1 Thed sa lawd niq liq
Awg meh he lehq phehq peg che awg lawn
Ni pawz te pawz ha lehg che bon khuhd ca mar tod che awg yand khuhn, Pawd loq yawd Thed sa lawd niq med khuhn Khreq yad awg mor teh che yaog. Yud daq chaw yawd ha lehg che bon khuhd mar che kanx haq tawr chuhd vid che haq te lehq, yawd u huh seh sinx kheh tawa lehax gha mar lar haz che yaog. Yud daq chaw teq pa tawr jad cheaq te lehq, yawd med u ve khuhn har naq gha phaw tuhz veh che yaog. Kheh te cheaq te lehq, ni ma pa lehq Yer suq Khreq haq haq yug lehq, yonr suhx suhax te chehd ser che chaw teq pa haq kheha gha chid bag vid lar haz che yaog. Su du deh chehd che awg yand u ve awg khuhn, awg bag phawd awr ve chaw teq pa ga vid che haq liz, i hehd a cehax lehax gha haq yug che yaog. Che haq te lehq Pawd loq yawd Liq che te koz buhq lehq i hehd yonr che chaw teq pa haq awg ghad pid che yaog.
Buhq var he lehq buhq che awg yand
Awg bag phawd awr lo ve he lehq awg khuhn phawd awr lo ve sax khiz teq pa awr lehr, 1 Thed sa lawd niq liq che ve haq Pawd loq buhq lar che yaog lehd koz lar che yaog. Liq che ve te koz haq A.D. 51 khuhq thad huh buhq lar che yaog lehd koz che yaog. Gar lar tiq liq u ve te koz awg kawd buhq lar che awg yand awg nuz awr ma hez ver (A.D. 48-49 khuhq kheh thad huh buhq lar che gha hawg), 1 Thed sa lawd niq liq che ve te koz vawr, Pawd loq buhq lar che liq awg kawd maq ve te koz phehq che yaog.
A yed ir che awg lawn he lehq awg lawn kha peg
Liq che te koz khuhn laex ceng laex lawn haq buhq lar liz, Thed sa lawd niq Khreq yad awg mor haq buhq vid lar che liq ni koz koz awg khuhn su haq keh buhg jad che vawr, awg leh med ve teq coaq ve awg lawn yaog. 1 Thed sa lawd niq liq ve ka nad nux maz awg gha lia khuhn, awg leh med phawd gaeg ver Jawd mawd Yer suq ni pawz te pawz kawq yaq tug awg lawn haq koz buhq lar che yaog. Lex lehq, ka nad nux maz 4 lehd awg khuhn liz awg lawn che ve haq a yed tar lehq buhq lar che yaog. Kheh te cheaq te lehq, Jawd mawd Yer suq Khreq ni pawz te pawz kawq yaq tug awg lawn liq che ve te koz awg khuhn khar lo liz, cawg chehd che yaog. Kheh te lehq liq che ve te koz haq kha sehax kawq ngawx ver, Yer suq Khreq ni pawz te pawz kawq yaq tug awg lawn awr lehr liq che khuhn a yed ir jad che awg lawn nux maz phehq che yaog.
Awg lawn nux
1. Awg kawd ve tawd yaw lehq Ghig sa ve awg bon haq chid muh che (1:1-10)
2. Pawd loq yawd gha te lar che kanx he lehq yawd gha tuhz kae che awg lawn sir ax che (2:1-3:13)
3. Awg ghad pid che (4:1-5:22)
a. Daq che a saq teq khad awg lawn (4:1-12)
b. Khreq ni pawz te pawz kawq yaq che awg lawn (4:13-5:11)
c. Khreq yad awg mor ve a saq teq khad (5:12-22)
4. Bon lawg lehq yug cuq daq lar che, awg leh med ve tawd he lehq awg bon naq che tawd (5:23-28)
1
Awg chawd teq pa haq duhd nuhd che tawd
1 Pawd loq,* 1:1 Pawd loq Kaw 1:1 haq ngawx. Sir lar nuz† 1:1 Sir lar nuz Cy 15:22 haq ngawx. he lehq Tiq mod ser‡ 1:1 Tiq mod ser 1 Tiq mod ser liq haq ngawx. ngag hehd teq pa awr lehr, Awr pa Ghig sa he lehq Jawd mawd Yer suq Khreq awg khuhn chehd che Thed sar lawd niq Khreq yad awg mor haq liq che te koz buhq ax che yaog. Awg bon awg sinx he lehq duhd sa gad sa tug nig hehd geh cawg vid-oq.
I hehd su awg pun hend kig jawg kig phehq che
2 Nig hehd awg gha lia haq te lehq ngag hehd khar thad liz Ghig sa ve awg bon haq chid muh lehq, ngag hehd bon lawg che te yand, nig hehd awg pun khar thad liz lawg chehd che yaog. 3 Nig hehd yonr che haq te lehq kanx te che lehd ma koz, haq pehnd che haq te lehq kanx nar che haq te che lehd ma koz, a nig ved Jawd mawd Yer suq Khreq haq duhd law che haq te lehq ni ma yeg che lehd ma koz, a nig ved Awr pa Ghig sa mehz khuhd suhr, awg ceng che teq pa haq ngag hehd khar thad liz duhd nuhd chehd che yaog. 4 Ghig sa haq che a vix a nax teq paog, Ghig sa nig hehd haq lez yug lar che yaog lehz ngag hehd sir che yaog. 5 Awg lawn ghod ver, ngag hehd mar che ha lehg che bon khuhd awr lehr, tawd khuhd lehax te lehq nig hehd geh lag gag che ma hez. Kand pax cawg che awg khuhn lehd ma koz, Daq che kehg che Awg ha phu chehd che awg khuhn lehd ma koz, bon khuhd u ve haq yonr yeg jad che ni ma cawg che lehd ma koz, nig hehd geh ngag hehd lag gag che yaog. Ngag hehd nig hehd geh chehd che te yand, nig hehd awg pun awg bon cawg tug ngag hehd khawd-ehg kheh te che chaw phehq che haq nig hehd sir che yaog. 6 Nig hehd awr lehr, ngag hehd haq liz Jawd mawd Yer suq haq liz, hend yug lehq te chehd che yaog. Awg lawn ghod ver, bon khuhd haq te lehq nig hehd gha tuq gha khanr jad liz, Daq che kehg che Awg ha phu pehar che ha lehg che awg khuhn lo bon khuhd haq nig hehd haq yug che yaog. 7 Che haq te lehq nig hehd awr lehr, Mar ker dawd niq muhd mig he lehq A kha ya muhd mig awg khuhn chehd che yonr che chaw awg gha lia awg pun hend kig jawg kig phehq vehr che yaog. 8 Awg lawn ghod ver, nig hehd haq te lehq Jawd mawd Yer suq ve tawd khuhd awr lehr, Mar ker dawd niq muhd mig he lehq A kha ya muhd mig awg khuhn lo buhg veh che lehax ma hez. Nig hehd Ghig sa haq yonr che awg lawn u ve awg kag gha lia lo liz buhg veh che haq te lehq, u ve awg lawn ngag hehd teq chaweh koz tug maq lor. 9 Awg lawn ghod ver, ngag hehd nig hehd geh bon khuhd tanr mar che te yand, nig hehd ngag hehd haq ha lehg ha ka haq yug ax che awg lawn haq awg ti u ve teq pa khuhn chehd che chaw teq pa koz daq che yaog. Kheh te lehq, sax ho teq pa haq nig hehd chid bag lar haz lehq teq chehd lehq awg cehg maq phehq che Ghig sa awg pun kanx te tug, Ghig sa geh nig hehd kawq phuhz kawaq che awg lawn haq liz, su koz daq chehd che yaog. 10 Suh kig lo Ghig sa kawq teq tuag vid che yawd ved Yad phu muhd nuh maq lo yaq tug haq nig hehd law chehd che awg lawn liz, su koz daq chehd che yaog. Yad phu u ve awr lehr, a nig haq Ghig sa cir yanr tug haq Pong ax sehr phad Yer suq phehq che yaog.