2 Yod hanr liq
Awg meh he lehq phehq peg che awg lawn
Yer suq Khreq muhd nuh maq khod-aq lo kawq taz kawq veh peg khaz nuhr, awg kawd maq niq ha khuhq ve awg yand awg khuhn ha lehg che bon khuhd mar par he lehq sar lar teq pa, ha lehg che bon khuhd puhd ve lehq ted kag peg ted kag hax ceh nux maz ca kaod maer che yaog. Kheh te lehq, Khreq yad phehq lehq yonr vehr che chaw teq pa awr lehr, sar lar he lehq ha lehg che bon khuhd mar par teq pa haq a sug yawd ved yehg awg khuhn lo haq yug vid che awg lid cawg che yaog. Kheh te lehq, i hehd kawq cax tuhz kae che te yand, i hehd lor che yehd tug awg ceng teq pa liz pid che yaog. Nawz sa tiq ve ma hez che sar lar teq pa liz u kheh te che awg lid haq ghad va cheaq te lehq, 2 Yod hanr liq che ve buhq che awr lehr, Yonr che chaw teq pa haq kha sehax ngawx lehq ma hez hez che sar lar che teq pa haq fir daq pehg daq gha vid tug awg pun, liq che ve haq buhq lehq fe vid lar che yaog.
Buhq var he lehq buhq che awg yand
Liq che te koz haq cuh yad Yod hanr buhq lar che yaog. Yawd A.D. 90 khuhq kheh thad huh, 1 Yod hanr liq buhq thad huh te yand lehax buhq lar che haq sur che yaog. Awg lawn ghod ver, liq che ve ni koz haq ngawx ver, laex kag sur daq che yaog. Sur daq che awg tawn teq pa awr lehr che teq pa yaog: 2 Yod hanr 5 mag he lehq 1 Yod hanr 2:7; 2 Yod hanr 6 mag he lehq 1 Yod hanr 5:3; 2 Yod hanr 7 mag he lehq 1 Yod hanr 4:2-3; 2 Yod hanr 12 mag he lehq 1 Yod hanr 1:4 che ve teq pa yaog.
A yed ir che awg lawn he lehq awg lawn kha peg
Khreq yad teq pa te ghad he lehq te ghad haq haq daq che awr lehr, a yed ir jad che yaog lehd Yod hanr liq che te koz khuhn buhq lar che yaog. Haq daq che lehd koz che cuhx kig vawr, Ghig sa ve awg lid tawd khuhd na yug che haq koz che yaog. Kheh te lehq Ghig sa ve awg lid tawd khuhd u ve liz a nig haq khawd-ehg kheh te lehq haq che ted ceng awg khuhn, a saq teq chehd gha tug mar lar che yaog. Lex lehq, Yod hanr te pawz kha sehax a yed yug lehq kawq koz lar ser che awr lehr, Jawd mawd Yer suq Khreq Ghig sa ve Yad phu phehq cehg mag che yonr khad nux ted mag haq koz lar che yaog. Koz gad che vawr, Yer suq awr lehr, Ghig sa liz phehq lehq chaw yad liz phehq che yaog. Kheh te cheaq te lehq, Khreq yad teq pa awr lehr, Yer suq Ghig sa ve Yad phu ma hez hawg lehd koz mar che chaw teq pa haq a cehax liz ma caz daq cawd che yaog.
Awg lawn nux
1. Awg kawd ve tawd (1-3)
2. Chid muh che khuhd (4)
3. Awg ghad pid lehq sa tiq pid che (5-11)
4. Awg leh med ve tawd (12-13)
1
Awg chawd haq duhd nuhd che tawd khuhd
1 Ngag awr lehr awg hox chaw mawd te ghad phehq lehq Ghig sa lez yug lar che yad mid te ghad he lehq yawd ved yad teq pa haq liq che buhq ax lar che yaog. Awg cehg mag cawd che awg khuhn ngag nig hehd haq haq che yaog. Ngag lehax haq che ma hez hawg. Awg cehg mag cawd che bon khuhd haq kha sir che chaw awg gha lia liz nig hehd haq haq che yaog. 2 A nig khuhn cawg lar che awg cehg mag cawd che ted ceng haq te lehq, nig hehd haq haq che yaog. Awg cehg mag cawd che ted ceng awr lehr co co taer taer a nig geh cawg chehd tug yaog. 3 Awg cehg mag cawd che heh te lehq haq pehnd che ted ceng awg khuhn, Awr pa Ghig sa he lehq yawd ved Yad phu Yer suq Khreq geh lag che awg bon ted ceng, har kax che ted ceng he lehq duhd sa gad sa che ted ceng a nig geh cawg tug yaog.
Khreq mar lar che khuhn chehd laor
4 Awr pa a nig haq tawd pehar che heh nawg yad nawg dug teq pa ted pehg awg cehg mag cawd che awg khad haq kae chehd che haq ngag gha mawg lehq ha lehg jad che yaog. 5 A meha tawd pehar lar che awr lehr awg suhx te khuhd ngag nig hehd haq buhq ax chehd che ma hez hawg. Awg kawd maq thad loar, a nig gha lar peg che tawd khuhd ngag nig hehd haq buhq ax chehd che yaog. Yad mid-og, a nig te ghad he lehq te ghad haq daq tug nawg haq lawg khawx che yaog. 6 Yawd tawd pehar lar che heh a nig te che awr lehr haq pehnd che ted ceng phehq che yaog. Haq pehnd che awg khad haq kae-og lehz tawd pehar lar che awr lehr awg kawd maq thad loar nig hehd gha kad lar peor. 7 Awg lawn ghod ver Yer suq Khreq awr lehr chaw yad ve awg suhr awg sar puhd lehq lag che ma hez hawg lehz koz che her ka che chaw laex ghad mig gig awg thang huh saw veh vehr che yaog. Kheh te che chaw awr lehr her ka che chaw phehq lehq Yer suq ve cand par nux phehq che yaog. 8 Nig hehd te peg lar haz che kanx teq pa ve laq sawnr maq gha mehx vehr lehq nig hehd awg pun kha peh vad-ag phehaq tug, a sug mid khad ve awg ton haq sa tiq tar-oq. 9 Khreq mar lar che khuhn ma chehd lehq mar pong mar lex lehq gaz ix che chaw khar ve te ghad lehd ma koz, Ghig sa haq ma caz daq. Khreq mar lar che awg khuhn chehd che chaw te ghad awr lehr Awr pa he lehq Yad phu haq liz caz daq che yaog. 10 Chaw te ghad ghad nig hehd geh lag lehq mar lar che tawd khuhd che ve haq ma puhd veha lag ver, yawd haq yehg khuhn tad haq yug. Phud daq che te yand, tawd liz taq yaw vid. 11 Awg lawn ghod ver phud daq che te yand yawd haq tawd yaw vid che chaw te ghad awr lehr, yawd te che kanx teq pa haq yawd geh teq geha ga te che yaog.
Ca gid-ag gad che awg lawn
12 Ngag nig hehd haq liq buhq ax tug kha peh vad cawg liz, liq koz he lehq nag meq tag haq yehd lehq mad buhq gad. Kheh ma khuhd a nig ha lehg che kha peh vad-ag cawag tug, ngag nig hehd geh lag lehq mehz khuhd tawr daq lar lehq tawd gha yaw daq tug haq ngag duhd law chehd che yaog. 13 Ghig sa lez yug lar che nawg vix ma yawd ved awg yad awg dug teq pa liz nig hehd haq haq pehnd che sanr fea lar che yaog.