1 A vix a nax teq paog, awg leh med ve tawd te khuhd awr lehr che kheh yaog. Jawd mawd Yer suq ve tawd khuhd awr lehr, nig hehd awg khuhn har naq buhg veh lehq tar ir yawz yan vid che*3:1 tar ir yawz yan vid che Bon khuhd kad lehq chaw kha peh Khreq yad phehq vehr che haq koz che yaog. heh, ted kag peg ted kag lo u ve heh te lehq phehq vehr tug, ngag hehd awg pun bon lawr-oq. 2 Chaq chiz che chaw he lehq haeg che chaw teq pa ve laq khuhn ngag hehd gha pong tug liz bon lawr-oq. Awg lawn ghod ver, chaw awg gha lia yonr che ma hez.

3 Kheh ma khuhd, Jawd mawd Yer suq awr lehr, kar tiq yeg che yaog. Yawd awr lehr, nig hehd haq yeg vid lehq haeg che ted ceng nig hehd haq maq gha te lug tug, yawd haq sax-ax tug yaog. 4 Ngag hehd nig hehd haq tawd pehar lar che teq pa haq nig hehd te chehd che awg khod-aq, awg ghud suhr phawd awr liz nig hehd te tug yaog lehz Jawd mawd Yer suq awg khuhn ngag hehd kha nehax yonr che yaog.

5 Nig hehd ve ni ma awr lehr, Ghig sa ve haq pehnd che ted ceng he lehq Khreq ve ni ma yeg che ted ceng haq sir vid tug, Jawd mawd Yer suq nig hehd haq seh kae vid-oq.

6 A vix a nax teq paog, a nig ved Jawd mawd Yer suq Khreq ve awg meh awg huhx lo ngag hehd nig hehd haq che kheh tawd yawa che yaog. Ngag hehd geh nig hehd gha hend lar peg che awg lid awg khad teq pa awg khad haq maq kae lehq teq chaweh kanx maq te che a vix a nax awg gha lia haq awg chawd taq te. 7 Awg lawn ghod ver, ngag hehd te che haq nig hehd hend yug lehq te cawd che yaog lehz nig hehd sir chehd che yaog. Ngag hehd nig hehd geh chehd che te yand, ngag hehd kanx maq te lehq kheha chehd chehd che ma hez.†3:7 kheha chehd chehd che ma hez 1Th 2:9, Cy 18:3, 1K 9:1-18 8 A sug te ghad ve cad tug haq lehd ma koz, awg phuhd ma pid lehq ngag hehd cad che ma hez. Nig hehd te ghad-e liz maq gha nar tug, ngag hehd awr lehr, muhd kaw muhd khax kanx hax ceh nux te che yaog. 9 Su canr che cad tug haq ngag hehd gha cad tug a khawag mad cawg‡3:9 a khawag mad cawg 1K 9:4-14 che haq te lehq ngag hehd che kheh te che ma hez. Nig hehd ngag hehd haq hend yug tug, nig hehd awg pun ngag hehd awg khad che kheh te lar che yaog. 10 Ngag hehd nig hehd geh chehd che te yand, ngag hehd nig hehd haq che kheh tawd yawa lar peor. Chaw te ghad ghad kanx maq te gad ver, awr taq car vid lehd koz lar che yaog.

11 Nig hehd awg khuhn chaw ted pehg pehar awr lehr, bawg jad lehq su ved kanx haq ca soq saq vid lehq, a sug yawd awg ton kanx teq chaweh maq te che haq ngag hehd gha kad che yaog. 12 Che kheh te che chaw teq pa haq Jawd mawd Yer suq Khreq awg khuhn ngag hehd che kheh te tawd pehar lehq awg ghad pehar che yaog. Gawr lehd chehd che awg khuhn a sug yawd ved kanx haq te lehq a sug yawd ved cad tug haq ca-oq. 13 A vix a nax teq paog, daq che haq te che awg khuhn awg ghad ta nud vid.

14 Liq che awg khuhn ngag hehd buhq lar che tawd khuhd haq chaw te ghad ghad maq na yug ver, yawd haq tawnd laoq. Yawd gha yaq taw vid tug, yawd haq awg chawd taq te. 15 Kheh ma khuhd, cand par heh te lehq yawd haq taq sawnr lar. A vix a nax heh te lehq sawnr lar lehq yawd haq sa tiq pid-oq.

16 Duhd sa vid sehr phad Jawd mawd Yer suq awr lehr, nig hehd haq awg ceng gha lia awg khuhn khar thad liz duhd sa gad sa tug cawg vid-oq. Jawd mawd Yer suq nig hehd awg gha lia geh chehd vid-oq.

17 Ngag Pawd loq awr lehr, duhd nuhd che awg khuhn tawd che te khuhd ngag awg ton nig hehd haq buhq fea che yaog. Ngag buhq che liq awg koz gha lia awg khuhn nig hehd sir vid tug, che kheh cawg che yaog. Ngag buhq che laq med§3:17 Ngag buhq che laq med Liq te koz haq buhq peg che te yand, awg leh med phawd lo liq buhq var ve awg meh buhq che haq koz che yaog. awr lehr che kheh cawg che yaog lehz sir-oq. 18 A nig ved Jawd mawd Yer suq Khreq ve awg bon awg sinx nig hehd awg gha lia geh cawg vid-oq.