Cuh yad liq
Awg meh he lehq phehq peg che awg lawn
Cuh yad liq che ve awr lehr, Jawd mawd Yer suq suh lehq kawq teq tuag peg khaz nuhr sehz chi khuhq ve awg yad khuhn Yawd haq kha yonr che Khreq yad teq pa ir kae mad kae che awg lawn buhq lar che yaog. Liq che te koz awr lehr, ha lehg che bon khuhd liq uhg koz he lehq Khreq yad teq pa haq cuh yad ir teq pa buhq fea vid lar che liq teq pa awg kanr huh cax vid lar che liq te koz phehq che yaog. Kheh te lehq “Daq che kehg che Awg ha phu ve kanx te lar che liq,” lehz liz koz gha che yaog. Awg lawg ghod ver, Daq che kehg che Awg ha phu yawd yaq lehq kanx te che awg lawn mar ax lar che yaog.
Buhq var he lehq buhq che awg yand
Liq che haq buhq var yawd awg meh mad buhq ax lar liz, liq che ve awg thang phawd, awg khuhn phawd awg lawn teq pa haq koz cax daq lar che haq ngawx che te yand, Lud kar buhq lar che liq yaog lehd koz gha che yaog. Kheh te lehq cuh yad liq che awr lehr, A.D. 63 khuhq kheh thad huh buhq tuhz lar che yaog.
A yed ir che awg lawn he lehq awg lawn kha peg
Liq che te koz khuhn ve a yed ir lehq cuhx kig nax jad che awg lawn 1:8 awg khuhn cawg che yaog. Awg kawd thad ve Khreq yad awg mor teq pa tanr kawr tanr te lehq ir tuag che awg lawn, pen daq kig ted mag peg ted mag haq a yed te lehq buhq mar ax lar che yaog. Liq che ve te koz awr lehr, awg lawn che ve teq pa ve awg khad haq te buhq lar che yaog: (1) Khreq yad awg mor awg khuhn ve a yed ir lehq yeg chehd vid che chaw teq pa: Per troq he lehq Pawd loq. (2) A yed ir che awg lawn he lehq phehq tuhaz che awg ceng te pa: Daq che kehg che Awg ha phu kanx te che, mig gig pez awg suhx awg suhx lo kae lehq ha lehg che bon khuhd tanr mar vid che Miz sen teq pa, vend bax duhd phuhz che chaw teq pa, Khreq yad awg mor ir lag muh lag che he lehq yonr che chaw teq pa awg khuhn ve a saq teq khad te pa. (3) Phehq har che awg ceng nux maq teq pa: Yud daq chaw he lehq Bid saz a naz chaw teq pa ma cawd maq hawr daq che, Yud daq chaw awg mor khuhn ve te pehg Khreq yad awg mor haq du deh vid che, Yud daq chaw he lehq Rod maq chaw mehz khuhd suhr suhx jehg suhx taz che haq gha khanr che, Bid saz a naz chaw haq tawnr daq che he lehq Ghig sa kanx te che awg khuhn tuq khanr har ghuhd che awg ceng haq gha khanr che. (4) Yer ruq sar lehnr med lo te lehq Rod maq med lo kae che ha lehg che bon khuhd yaq kaw.
Awg lawn nux
1. Per troq he lehq Pa ler tid naq muhd mig khuhn Khreq yad awg mor tanr te che (1:1-12:25)
a. Yud daq muhd mig, Gar liq lehd muhd mig he lehq Sar mar riq muhd mig kha peg awg khuhn (1:1-9:31, 9:31 khuhn ngawx ser)
b. Phid niq, Kud par ruz he lehq Anr tiz awr muhd mig kha gag (9:32-12:25, 11:19 khuhn ngawx ser)
2. Pawd loq he lehq Anr tiz awr te lehq Rod maq med lo kha gag Khreq yad awg mor ir kae mad kae che (13:1-28:31)
a. Phur giz muhd mig he lehq Gar lar tiq muhd mig kha gag (13:1-15:35; 16:6 ngawx)
b. Mar ker dawd niq muhd mig kha gag (15:36-21:16; 16:6 ngawx)
c. Rod maq med khuhn gehe che (21:17-28:31; 28:14 ngawx)
1
Daq kehg che Awg ha phu pea tug
1-2 Thawd phid luq-og, Yer suq awg kawd maq thad loar tanr mar tanr te che awg ceng gha lia he lehq yawd muhd nuh maq lo taz kawq veh thad kha gag huh ve awg lawn ngag liq awg kawd maq ve te koz khuhn nawg haq buhq ax peg che yaog. Yawd ma taz koeq ser thad huh, Daq che kehg che Awg ha phu haq cud lehq, lez yug lar che cuh yad teq pa haq tawd pid lar haz che yaog. Yawd khanr suh peg khaz nuhr, uhd chi ni khuhn cuh yad teq pa haq yawd awg ton mawg vid lehq, Ghig sa ve muhd mig awg lawn koz mar vid che yaog. Yawd awg ton teq chehd che yaog lehz su gha sir vid tug awg pun, yawd awg ton laex pawz su haq mawg vid lehq, sax khiz liz laex ceng te mar vid che yaog. Yawd cuh yad teq pa geh chehd lehq awr cad chehd-ag huh, yawd i hehd haq koz vid che, “Yer ruq sar lehnr med khuhn ta tuhz kae ser. Ngag nig hehd haq koz vid lar che heh te lehq, ngar pa ve kar tiq tawd khuhd haq gha thad kha gag law lar ser. Yod hanr awr lehr, a kaz khuhn baz tiz sar pehar che yaog. Kheh ma khuhd, nig hehd awr lehr, maq muh tand ver, Daq kehg che Awg ha phu khuhn baz tiz sar gha khanr yug tug yaog,” lehz Yer suq i hehd haq koz vid che yaog.
Yer suq muhd nuh maq lo taz kawq veh che
Kheh te lehq, i hehd phawng daq chehd-ag huh yawd haq na lehq koz che, “Jawd mawd-og, a meha nawg Id sar rer laq chaw ceng haq muhd mig kawq khuhq pid tuawg la,” lehd koz vid che yaog.
Yer suq i hehd haq kawq yaw khuhq vid lehq koz che, “Awr pa yawd khad yawad duhd ngawx lehq te lar che awg yand teq pa haq nig hehd sir tug maq lor hawg. Kheh ma khuhd, Daq che kehg che Awg ha phu nig hehd geh yaq ver, nig hehd kand pax gha tug yaog. Kheh te lehq, Yer ruq sar lehnr med haq tanr lehq Yud daq muhd mig, Sar mar riq muhd mig he lehq muhd leh mig leh nig hehd ngag ved awg lawn khae par te lehq sax khiz gha khanr tug yaog,” lehz koz vid che yaog. Yawd u kheh koz peg lehq cuh yad teq pa yawd haq ngawx chehd-ag huh, Ghig sa awr lehr, yawd haq chid taz ve lehq, i hehd ve mehz sir mawg leh thad kha gag, mog dig yawd haq beh lar che yaog.
10 Yer suq taz veh tod che haq cuh yad teq pa kuhr ghaq chid ngawx chehd-ag huh, veq kad phuhx-u ghad te che haq veq deh che haw khaz var ni ghad, i hehd pad huh lag hox chehd lawz che yaog. 11 Chaw u ve ni ghad koz che, “Gar liq lehd chaw teq paog, a thoq te nig hehd teq pa muhd nuh maq lo kuhr chid ngawx chehd cheawg le. Nig hehd haq phaz daq lar haz lehq muhd nuh maq lo chid taz veh tod che Yer suq che te ghad awr lehr, nig hehd mehz khuhd suhr muhd nuh maq lo taz kawq veh che heh te lehq, te pawz kawq yaq tug yaog,” lehd koz vid che yaog.
Yud daq Id sar kar rir oq awg tan kawq lez che
12 Kheh te lehq cuh yad teq pa awr lehr, sar lonr kehaq lo tu lehq, Yer ruq sar lehnr med lo kawaq che yaog. Keh u ve awr lehr, Yer ruq sar lehnr med haq ma vid daq, Sa ba to awg ni teq ni khuhn tod gha che* 1:12 Sa ba to awg ni teq ni khuhn tod gha che Uhd phar lon kheh tawa lehax cawg che yaog. Tuhz 16:29, Heh 35:5 yaq kaw kheh fia lehax cawg che yaog. 13 I hehd teq pa med khuhn kawq gag lehq, i hehd chehd jaw che yehg awg thang ted taeg lo taez che yaog. I hehd teq pa awr lehr, Per troq, Yod hanr, Yar koq, Anr drehr, Phid liq, Thod maq, Bar thawd lar mehd, Mar thehr, Ar lar phehd ve awg yad par Yar koq, muhd mig haq haq che awg mor khuhn ve Sid monr he lehq Yar koq ve awg yad par Yud daq che teq pa yaog. 14 I hehd teq pa he lehq yad mid teq pa liz ted pehg pawnd lehq, Yer suq ve awr ye Mar riq he lehq yawd ved awg nax var teq pa geh awg gha lia ni ma teq siar lehax te lehq, bon hax ceh lawg chehd che yaog.
15 Awg yand u ve khuhn, yonr che chaw awg gha lia teq ha nig chi ghad kheh ma phoz phawng daq chehd che kar lo, Per troq tu lehq koz che, 16 “A vix a nax teq paog, Yud daq su haq sir veha lehq Yer suq haq pheh yug tug a mig thad lo Daq kehg che Awg ha phu Dar viq ve mawg kaw haq cud lehq, Liq phu khuhn koz lar che heh awg cehg mag gha phehaq vehr che yaog. 17 Kheh liz, Yud daq awr lehr, a nig ved awg mor khuhn chehd lehq kanx che ve haq ga te tug lez yug lar che chaw te ghad phehq che yaog.”
18 Chaw u ve awr lehr, ma thed ma cawd che kanx haq te lehq gha lar che phu u ve mig gig te pez vig lar che yaog. Yawd mig gig u ve khuhn a kor thuhd par kha awr kuhd jawq lehq, ux peg khod cheaq te lehq awg ghug awg tehz saw tuhaz vehr che yaog. 19 Awg lawn u ve haq Yer ruq sar lehnr med yad awg gha lia saw sir chehd che yaog. Kheh te lehq, mig gig u ve te pez haq i hehd ve tawd khuhd Ar ker dar maq lehd koz meh vid lar che yaog. Cuhx kig awr lehr, awg suhr mig gig lehd koz che yaog.
20 Per troq koz che, “Awg lawn che ve chid muh che liq khuhn buhq lar peg che yaog.
1:20a Chid 69:25‘Yawd ved chehd kig huh awg gawg cux awg gawg chuhq he lehq chaw te ghad-eg liz
taq gha chehd vid-oq.’ 1:20b Chid 109:8‘Yawd ved a yad liz su haq kawq pid-oq,’
lehd koz buhq lar che yaog.
21-22 Kheh te cheaq te lehq, Yud daq awg tan a nig chaw te ghad gha kawq lez ke tug yaog. Yer suq kawq teq tuag che awg lawn haq a nig geh sax khiz ga khanr ax vid tug, chaw te ghad lor che yaog. Chaw u ve te ghad awr lehr, Jawd mawd Yer suq Yod hanr geh a kaz khuhn baz tiz sanr khanr tur che teq ni haq tanr lehq, a nig geh yig yig lag lag te tod che awg yand awg gha lia he lehq yawd a nig haq phaz daq lar haz lehq, muhd nuh maq lo taz kawq veh che teq ni kha gag, a nig geh chehd lar che chaw te ghad gha phehq che yaog,” lehz Per troq koz che yaog.
23 Kheh te lehq, i hehd teq pa chaw ni ghad ve awg meh haq koz tuhz che yaog. Te ghad awr lehr, Yod sehq la Bar sar baq lehd koz che Yud duq yaog. Ni ghad te ghad awr lehr, Mar thiq yaog. 24 Kheh te lehq, cuh yad teq pa i hehd bon lawg lehq koz che, “Chaw yad awg gha lia ve ni ma haq sir che Jawd mawd Yer suq-og, chaw che ni ghad awg khuhn nawg khar ve te ghad haq lez yug che ngag hehd haq a cehax bez mar laoq. 25 Yud daq awr lehr, cuh yad ve a yad haq chid bag lar haz lehq yawd haq kenr che chehd kig lo 1:25 yawd haq kenr che chehd kig lo Suh muhd mig lo haq koz che yaog. kawq veh che yaog. Yawd ved kanx haq kawq te lehq cuh yad ve a yad haq kawq gha tug, chaw che ni ghad awg khuhn nawg a sug te ghad haq lez yug tug a cehax bez mar ax laoq,” lehd koz bon lawg che yaog. 26 Ix mag ved awg meh buhq ke lar lehq kehx yug gha mehx, Mar thiq haq gha cawd che yaog. Kheh te lehq, cuh yad teq chi te ghad geh yawd geh che yaog.

*1:12 1:12 Sa ba to awg ni teq ni khuhn tod gha che Uhd phar lon kheh tawa lehax cawg che yaog. Tuhz 16:29, Heh 35:5

1:20 1:20a Chid 69:25

1:20 1:20b Chid 109:8

1:25 1:25 yawd haq kenr che chehd kig lo Suh muhd mig lo haq koz che yaog.