Kaw law sehd liq
Awg meh he lehq phehq peg che awg lawn
Pawd loq Ed fed suq med khuhn seh khuhq kha gag chehd lehq Ghig sa ve kanx haq te chehd che te yand, Ed par phar raq vend bax duhd phuhz lehq Yer suq Khreq haq yonr lehq, ha lehg che bon khuhd yug ve lehq Kaw law sehd med lo ca mar vid-eg lehq, u huh Khreq yad awg mor phehq vehr che yaog. Khreq yad awg mor te suhx suhax phehq che haq te lehq, Kaw law sehd Khreq yad awg mor haq su ma hez hez che awg lid hax ceh mar ke vid che yaog. (Ma hez hez che mar khad che awr lehr, Kaw law sehd chaw teq pa ve ma hez hez che mar khad yaog). Awg lawn che ve teq pa haq te lehq, Ed par phar raq yawd Rod maq med lo Pawd loq chehd lo kae lehq liq che ve te koz cawag che yaog.
Buhq var he lehq buhq che awg yand
Su tawd ghawg daq lehq koz che, Kaw law sehd liq che ve haq Pawd loq Ed fed suq med la, ma hez ver Kehd sar riq med khuhn chehd-ag huh buhq lar che yaog lehd koz che yaog. Kheh maq khuhd, mad awr ve sax khiz cawg lar che teq pa haq ngawx ver, Pawd loq A.D. 60 khuhq thad huh Rod maq med khuhn thawnr khuhn awg kawd maq te pawz geh chehd-ag huh buhq lar che yaog lehd koz che yaog.
A yed ir che awg lawn he lehq awg lawn kha peg
Liq che te koz buhq lar che awr lehr, maq yonr che Kaw law sehd chaw ve ma hez hez che mar khad haq yaw khuhq vid lar che yaog. Awg lawn che haq ghad tug, Pawd loq Yer suq Khreq haq chid muh lehq Khreq awr peh lawq jad, lehd koz che yaog. Liq che ve te koz ve awg lawn nux vawr, Yer suq Khreq ve peh lawq che haq yug lehq, chaw yad ve sir vix che cud yiq teq chaweh mad cawg che haq tehz mar lar che yaog. Khreq awg khuhn lo a nig peh lawq vehr che yaog (2:10).
Awg lawn nux
1. Awg kawd ve tawd, Ghig sa ve bon haq chid muh lehq bon lawg che (1:1-14)
2. Ir jad muh jad che Jawd mawd Yer suq Khreq (1:15-23)
3. Khreq yad awg mor awg pun Pawd loq kanx te che (1:24-2:7)
4. Khreq khuhn a saq teq che haq te lehq chaw yad teh lar che awg lid awg khad haq gha pong che (2:8-23)
5. Daq kehg che a saq teq khad ve awg lid awg khad teq pa (3:1-4:6)
6. Awg leh med ve tawd he lehq yug cuq lar che awg lawn (4:7-18)
1
Awg chawd teq pa haq duhd nuhd che tawd
1-2 Ghig sa ve a lor cawd cheaq te lehq, Yer suq Khreq ve cuh yad phehq che ngag Pawd loq he lehq a vix a nax Tiq mod ser ngag nid-ag awr lehr, Kaw law sehd med khuhn chehd che Khreq haq yonr che khuhn kar tiq yeg che a vix a nax he lehq daq che kehg che Ghig sa ve chaw teq pa haq liq che teq koz buhq ax che yaog. Ngag hehd ve Awr pa Ghig sa ve awg bon awg sinx he lehq duhd sa gad sa tug nig hehd geh cawg vid-oq.
I hehd co ha phawd awr cud yiq cawg tug Pawd loq bon lawg che
3 Nig hehd awg pun ngag hehd bon lawg thad ver a nig ved Jawd mawd Yer suq Khreq ve Awr pa Ghig sa haq khar thad liz chid muhd chehd che yaog. 4 Awg lawn ghod ver, nig hehd Yer suq Khreq haq yonr che he lehq Khreq yad awg gha lia haq nig hehd haq che haq gha kad cheaq te lehq, Ghig sa haq chid muhd che yaog. 5 Nig hehd ve haq che he lehq yonr che u ve awr lehr, nig hehd awg pun muhd nuh maq lo kha nehax haq sax ax lar che duhd law kig awg khuhn tuhaz vehr che yaog. Duhd lawg kig che awg lawn haq nig hehd awg kawd thad liz awg cehg mag ve ha lehg che bon khuhd awg khuhn gha kad peg vehr che yaog. 6 Ha lehg che bon khuhd u ve awr lehr, mig gig khod-aq lo awg sir nuhaq lehq ir veh chehd che heh, nig hehd gha kad lehq awg cehg mag te che Ghig sa ve awg bon haq gha sir-ag che teq ni haq tanr lehq nig hehd liz awg sir nuhaq lehq ir veh chehd che yaog. 7 Ha lehg che bon khuhd u ve Ed par phar raz geh nig hehd gha hend peg che yaog. Ed par phar raz awr lehr, ngag hehd haq che ngag hehd teq geha kanx te che chaw phehq che yaog. Yawd awr lehr, ngag hehd awg pun kar tiq yeg che Khreq ve kanx te sehr phad phehq che yaog. 8 Awg ha phu tea cheaq te lehq nig hehd haq daq vix che awg lawn yawd ngag hehd haq koz ax che yaog.
9 Kheh te cheaq te lehq, nig hehd awg lawn che ve haq ga kad che teq ni haq tanr lehq nig hehd awg pun ngag hehd bon lawg don chehd che yaog. Co haq phawd awr ve cud yiq ma yiq he lehq duhd sir gad sir vix che kha peh cawg tug Ghig sa ve a lor haq nig hehd kha nehax sir tug ngag hehd bon lawg chehd che yaog. 10 Nig hehd u ve haq sir cheaq te lehq, Jawd mawd Yer suq haq kenr daq che heh nig hehd a saq teq kae lehq awg ceng gha lia khuhn yawd ni ma cawd che yaog. Kheh te lehq, daq che kanx awg ceng gha lia khuhn nig hehd awg sir nuhq mad-ag lehq Ghig sa awg lawn haq sir che liz mad-ag tug yaog. 11 Ghig sa ve kand pax he lehq awg mig awg phond ir cheaq te lehq, nig hehd ha lehg ha ka che khuhn ni ma yeg lehq yeg khanr vix tug nig hehd kand pax kha peh vad-ag cawg tug awg pun ngag hehd bon lawg che yaog. 12 Kheh te lehq awg ghiz awg khuhn chehd che Khreq yad teq pa geh teq geha nig hehd awg sinx cad kenr che tea sehr phad Awr pa haq nig hehd chid muh tug yaog. 13 Awr pa Ghig sa awr lehr naz tud che kand pax awg khuhn a nig teq pa haq pong ax lehq yawd haq che yawd ved Yad phu ve muhd mig awg khuhn geh chehd cuha che yaog. 14 Yad phu u ve awg khuhn a nig teq pa thaer khuhq che haq gha che yaog. Thaer khuhq che u ve awr lehr, vend bax phehd kha ax che yaog.
Khreq suh cheaq te lehq a nig Ghig sa haq cawd daq che
15 Yer suq Khreq awr lehr, chaw yad mad mawg jaw che Ghig sa ve awg hoq awg han phehq lehq Ghig sa kha te phanr lar che awg ceng gha lia haq keh a yad ir jad che yaog. 16 Muhd nuh maq lo cawg che he lehq mig gig thang huh cawg che awg ceng teq pa lehd ma koz, mehz sir mawg che awg ceng he lehq mad mawg che awg ceng teq pa lehd ma koz, uq penr sehr phad teq pa he lehq kand pax ir sehr phad teq pa lehd ma koz, awg ceng gha lia Ghig sa te phanr lar che yaog. Awg ceng gha lia liz, Yer suq haq cud lehq phanr lehq Yer suq awg pun te che yaog. 17 Teq chaweh liz mad cawg ser thad loar, Yer suq Khreq cawg chehd vehr che yaog. Yer suq Khreq haq cud lehq awg ceng gha lia yeg chehd che yaog. 18 Yer suq awr lehr, Khreq yad awg mor ve a kor phehq lehq, Khreq yad awg mor awr lehr, Yer suq ve awg ton phehq che yaog. Yer suq awr lehr, awg cuhz penr phehq lehq awg gha lia awg khuhn yawd awg kawd ped maq ve te ghad phehq tug suh kig lo awg kawd maq kawq teq tuag che te ghad phehq che yaog. 19 Awg lawn ghod ver, Awr pa Ghig sa awr lehr yawd ved awg ton gha lia Yer suq awg khuhn saw peh lawq vid tug yawd ni ma cawd lehq 20 laq kan thag huh sez che awg suhr haq te lehq mig gig koar lo ve awg ceng teq pa lehd ma koz, muhd nuh kawag lo ve awg ceng te pa lehd ma koz, awg ceng gha lia haq Ghig sa yawd awg ton haq kawq cawd daq tug te che yaog.
21 Pong lag thad ver nig hehd teq pa awr lehr, Ghig sa haq phaz daq lehq haeg che kanx teq pa haq te lehq duhd khad awg khuhn Ghig sa ve cand par phehq vehr che yaog. 22 Kheh ma khuhd a meha awr lehr, Yer suq ve awg ton awg suhr awg sar khanr suh cheaq te lehq, yawd nig hehd haq kawq cawd daq hawr daq vid peor. Yawd che kheh te che awr lehr, nig hehd daq kehg che chaw, vend bax tar kig mad cawg che chaw he lehq su koz kig yaw kig mad cawg che chaw phehq che awg khuhn, Ghig sa haq chid aq vid tug awg pun yawd te che yaog. 23 Kheh ma khuhd, nig hehd yonr cuhz gha cawg lehq yonr khad gha yeg che yaog. Nig hehd gha kad lar peg che ha lehg che bon khuhd u ve haq caz daq che duhd law che ted ceng haq nig hehd tad lug vehr vid-oq. Ha lehg che bon khuhd u ve haq awr lehr, mig gig thang huh su mar vid chehd che yaog. Ngag Pawd loq liz ha lehg che bon khuhd u ve haq mar var phehq lar che yaog.
Pawd loq Khreq yad awg mor awg pun kanx te che
24 A meha ngag nig hehd awg pun gha tuq gha khanr che awr lehr ngag ha lehg chehd che yaog. Khreq gha tuq gha khanr tug awg tan ngag ved awg ton yawd awg pun gha kawq cax khanr yug kae tug yaog. Khreq ve awg ton gha khanr tug ngag ved awg ton saw khanr tug ngag te chehd che yaog. Yawd ved awg ton lehd koz che awr lehr Khreq yad awg mor haq koz che yaog. 25 Ghig sa ve tawd khuhd kha sehax saw mar vid tug Ghig sa ngag haq lez yug lar che heh, Khreq yad awg mor awg pun ngag kanx te var phehq che yaog. Kanx che ve Ghig sa ngag haq te cuha che awr lehr, nig hehd awg pun yaog. 26 Ghig sa ve tawd khuhd awr lehr, a mig thad lo teq co peg teq co khuhd ceh lar lehq cuhx kig nax jad che tawd khuhd phehq che yaog. Kheh liz, a meha yawd ved Khreq yad teq pa haq yawd pheq mar vid lar peg che yaog. 27 Ghig sa u kheh te che awr lehr, awg mig awg phond ir jad lawq jad che cuhx kig nax jad che tawd khuhd haq bid saz a naz chaw teq pa i hehd sir vid gad che yaog. Cuhx kig nax jad che tawd khuhd u ve awr lehr, nig hehd geh chehd chehd che Khreq yaog. Khreq nig hehd geh chehd chehd cheaq te lehq, nig hehd awg mig awg phond gha tug duhd law che ted ceng phehq che yaog. 28 Khawd kheh te ver chaw awg gha lia Khreq awg khuhn ir vehr che chaw phehaq lehq i hehd haq Ghig sa mehz khuhd suhr lo chid aq vid gha tug, ngag hehd awr lehr, cud yiq kha cawg lar che haq saw yehd lehq chaw awg gha lia haq sa tiq pid lehq Khreq awg lawn mar vid che yaog. 29 Kheh te cheaq te lehq, u ve awg pun ngag kanx hax ceh nux te che yaog. Ghig sa ngag haq kand pax pehar lehq ngag awg khuhn kanx kha nehax te chehd che heh te lehq ngag liz kanx hax ceh nux maz te che yaog.