1 Nig hehd awr lehr, te yaq kig he lehq vend bax teq pa awg khuhn suh chehd che te yand, yawd nig hehd haq kawq teq tuag vid che yaog. 2 Pong lag thad nig hehd mig gig ve awg lid awg khad teq pa awg khad haq kae che awg khuhn, vend bax teq pa haq te che yaog. Awg yand u ve haq, muhd-aq lo ve kand pax haq uq penr che phad*2:2 uq penr sehr phad Ned haeg haq koz che yaog. Yh 14:30. awg khad haq liz nig hehd kae che yaog. Yawd awr lehr, maq na yug che chaw teq pa ve ni ma awg khuhn kanx te che awg ha phehq che yaog. 3 Awg yand u ve haq, a nig awg gha lia liz maq na yug che chaw teq pa geh teq geha chehd lehq, awg suhr awg sar ni khaz suh tug te cheaq te lehq, awg suhr awg sar te gad che heh te che lehd ma koz, duhd lar che heh te che lehd ma koz, a nig te che yaog. Kheh te lehq, awg kag awr ve chaw teq pa heh te lehq, a nig awr lehr nez nag che haq gha khanr che chaw teq pa phehq cehg mag che yaog.

4 Kheh ma khuhd, har kax vix jad che Ghig sa awr lehr, yawd ved haq pehnd ir jad che awg khuhn a nig haq haq cheaq te lehq, 5 vend bax teq pa awg khuhn a nig suh chehd che†2:5 a nig suh chehd che Awg ton suh che haq koz che ma hez. Co ha suh che haq koz che yaog. liz, Khreq geh teq geha yawd a nig haq kawq teq tuag vid peor. (Ghig sa ve awg bon haq te lehq nig hehd thaer khuhq che haq gha vehor.) 6 Ghig sa awr lehr, Yer suq Khreq geh teq geha a nig haq kawq teq tuag vid lehq, yawd haq te lehq muhd nuh maq ve chehd kig awg khuhn a nig haq yawd geh mi cuha che yaog. 7 Yawd che kheh te che awr lehr, Yer suq Khreq haq te lehq yawd a nig haq har kax ax che awg khuhn, awg khaz nuhr lag tug te yand khuhn, yawd ved awg bon khawd-ehg ma ir jad mad jad che haq pheq mar ax tug awg pun te che yaog. 8 Awg lawn ghod ver, nig hehd yonr che awg khuhn Ghig sa ve awg bon haq te lehq nig hehd thaer khuhq che haq gha che yaog. Nig hehd khad nig hehd te che haq te lehq gha che ma hez. Ghig sa pehar che laq sawnr phehq che yaog. 9 Chaw te ghad-eg liz ni ma maq gha ir tug, kanx te cheaq te lehq‡2:9 kanx te cheaq te lehq Daq che kanx awr lehr, chaw yad ve vend bax haq chuhd kha maq gha. gha che ma hez. 10 Awg lawn ghod ver, a nig haq yawd tea lar che yaog. A nig daq che kanx teq pa haq te tug, Yer suq Khreq awg khuhn yawd a nig haq phanr lar che yaog. Daq che kanx u ve teq pa haq a nig te kae tug awg pun awg kawd maq thad loar Ghig sa ghu lar peor.

11-12 Kheh te lehq, awg suhr awg sar phawd awr bid saz a naz§2:11 bid saz a naz Yud daq chaw ma hez che awg gha lia haq bid saz a naz chaw lehd sawnr lar che yaog. chaw phehq che nig hehd teq pa awr lehr, pong lag thad Khreq haq a cehax liz ma caz daq che haq duhd nuhd-og. Awg yand u ve haq, awg gig med soer che chaw teq pa awr lehr, nig hehd haq awg gig med maq soer che chaw teq pa phehq che lehd koz che yaog. Awg gig med soer che*2:11 Awg gig med soer che Gal 2:3, 5:2 haq ngawx. u ve awr lehr, awg suhr awg sar phawd awr laq kuhr te che ted ceng phehq che yaog. Awg yand u ve awg khuhn nig hehd awr lehr, Id sar rer laq awg mor haq maq gha pawnd daq. Ghig sa koz lar che kar tiq sax caz tawd khuhd haq liz nig hehd ma caz daq. Nig hehd awr lehr, mig gig koar lo duhd law kig liz mad cawg lehq Ghig sa liz mad cawg che haq duhd nuhd-og. 13 Pong lag thad†2:13 Pong lag thad Thaer khuhq che maq gha ser huh ve awg yand haq koz che yaog. nig hehd vid kig lo chehd che liz, a meha‡2:13 a meha Thaer khuhq gha peg khaz nuhr ve awg yand haq koz che yaog. Yer suq Khreq awg khuhn lo nig hehd awr lehr, Khreq ve awg suhr haq te lehq awg pad huh gag vehor. 14 Awg lawn ghod ver, yawd haq te lehq a nig cawd daq hawr daq che yaog. Yawd awr lehr, a nig chaw nid ceng§2:14 chaw nid ceng Yud daq chaw he lehq bid saz a naz chaw haq koz che yaog. phehq chehd che haq ted ceng lehax phehaq vid lehq, a nig awg kanr huh ko lar che ghoq pa heh te lehq cand daq che te ceng haq yawd phaz kha vehor. 15 Yawd ved awg ton awg khuhn awg lid tawd khuhd ve awg lid awg khad he lehq tawd pid lar che teq pa haq te lug vehor. Yawd che kheh te che awr lehr, chaw nid ceng phehq chehd che haq yawd awg khuhn chaw awg suhx te ghad phehaq lehq, cawd daq hawr daq tug te che yaog. 16 Laq kan haq te lehq, a nig chaw nid ceng haq awg ton teq ton lehax phehq che awg khuhn Ghig sa haq cawd daq hawr daq tug awg pun liz yawd te che yaog. Yawd che kheh te cheaq te lehq, cand daq che ted ceng haq yawd dawz vehr che yaog. 17 Khreq lag lehq, nig hehd vid kig lo chehd che chaw*2:17 vid kig lo chehd che chaw Bid saz a naz chaw teq pa haq koz chehd che yaog. teq pa haq lehd ma koz, ned kig huh chehd che chaw†2:17 ned kig huh chehd che chaw Yud daq chaw haq koz chehd che yaog. teq pa haq lehd ma koz, cawd daq hawr daq vid tug awg lawn ha lehg che bon khuhd mar vid che yaog. 18 Awg lawn ghod ver, yawd haq te lehq a nig chaw nid ceng awr lehr, Awg ha phu te ghad lehax awg khuhn lo Awr pa chehd lo kae tug, yaq kaw cawg lar peor.

19 Kheh te lehq, nig hehd awr lehr, su muhd mig ve chaw mad kawq phehq. Khehx chaw liz mad kawq phehq. A meha nig hehd awr lehr, Khreq yad teq pa geh te muhd mig awg khuhn lo lehax chehd lehq, Ghig sa ve yehg awg khuhn lo yehg yad ka yad teq pa phehq vehr che yaog. 20 Nig hehd teq pa awr lehr, Ghig sa te lar che yehg phehq che yaog. Cuh yad teq pa he lehq Ghig sa ve cuh kar var teq pa awr lehr, awg chi he lehq awg cuhz penr phehq lehq, Yer suq Khreq awg ton vawr, awg cir lo cawg che awg cuhz penr huhx meh dig phehq vehr che yaog. 21 Yawd awg khuhn lo ted yehg ka maq ve saw caz daq lar lehq, Jawd mawd Yer suq Khreq awg khuhn daq kehg che bon yehg nux phehaq tug ir veh chehd che yaog. 22 Ghig sa ve Awg ha phu awg pun chehd kig phehq tug yawd awr lehr, nig hehd haq yug lehq yehg u ve haq te chehd che yaog.