1 Kheh te lehq, nig hehd awr lehr Ghig sa haq che awg yad awg dug phehq che heh, yawd te che heh teo. 2 Khreq a nig haq haq che heh, haq pehnd che awg khad haq kae-o. Yawd a nig haq haq cheaq te lehq, awg sax huhx che tand tug a nig awg pun Ghig sa haq tand vid tug, yawd ved awg ton Ghig sa haq chid aq vid che*5:2 Ghig sa haq chid aq vid che Laq kan awg thag lo khanr suh che haq koz che yaog. 1:7-8 yaog.

3 Hax chawd hax paz te che, chaq chiz che awg gha lia he lehq su ved med nged jeg kor haq sex lae che awr lehr, nig hehd awg khuhn tad cawg cuh vid-oq. Khreq yad teq pa awr lehr, awg lawn che teq pa haq maq te cawd che yaog. 4 Chaq chiz che tawd khuhd, cuhx kig mad cawg che tawd khuhd he lehq her ka mig daq gid che tawd khuhd, tawd khuhd che teq pa haq ta koz. Tawd khuhd u kheh te che teq pa awr lehr, koz maq kenr. Chid muh che tawd khuhd haq lehax yaw-og. 5 Awg lawn ghod ver, hax chawd hax paz te che chaw, chaq chiz che chaw he lehq su ved med nged jeg kor haq sex lae che chaw khar ve te ghad lehd ma koz, Khreq he lehq Ghig sa ve muhd mig awg khuhn awg sinx maq gha†5:5 awg sinx maq gha Ghig sa muhd mig awg khuhn maq gha gehe che haq koz che yaog. Pheq 21:8 che haq nig hehd sir chehd che yaog. (Su ved med nged haq sex lae che chaw awr lehr, sax ho haq a kor pi che chaw haq sur daq che yaog.)

6 Chaw te ghad-e liz awg bon mad cawg che tawd khuhd haq yaw lehq nig hehd haq maq gha her ka yug tug sa tiq teo. Awg lawn ghod ver, awg ceng che teq pa haq te lehq Ghig sa nez nag che ted ceng awr lehr, maq na yug che chaw teq pa geh lag che yaog. 7 Kheh te lehq, i hehd haq awg chawd taq te daq. 8 Awg lawn ghod ver, nig hehd awg kawd thad ver awg naz tud phehq‡5:8 awg naz tud phehq Vend bax awg khuhn chehd lar che lehd koz gad che yaog. Rm 1:21 liz, a meha Jawd mawd Yer suq awg khuhn awg ghiz phehq vehr che yaog. Awg ghiz yad§5:8 Awg ghiz yad Thaer khuhq gha peg che chaw haq koz gad che yaog. Rm 6:2 heh te kae-oq. 9 (Awg lawn ghod ver, awg ghiz ve awg sir awr lehr, daq che awg gha lia thed che cawd che awg gha lia he lehq awg cehg mag ve awg ceng gha lia awg khuhn cawg chehd che yaog.) 10 Jawd mawd Yer suq ni ma cawd che awg ceng haq nig hehd sir lar tug teo. 11 Awg bon mad cawg che, naz hoq che kanx teq pa haq a cehax liz taq te. Kheh liz, kanx u ve teq pa ve yaq kig haq pheq tuhaz vid-oq. 12 Awg lawn ghod ver, awg bag lo i hehd te che kanx teq pa awg lawn a nig tawd yaw che lehax liz yaq taw tug cawg che yaog. 13 Yaq kig haq pheq tuhaz vid che awg gha lia awr lehr, awg ghiz haq te lehq kha sehax saw mawg che yaog. Kha sehax saw tuhaz che awg ceng awg gha lia liz, awg ghiz phehq che yaog. 14 Kheh te cheaq te lehq, che kheh koz lar che,

15 Kheh te lehq, nig hehd a thoq duhd a thoq te liz sa tiq kha nehax tar-oq. Cud yiq mad cawg che chaw teq pa heh taq te. Cud yiq cawg che chaw teq pa heh te chehd-oq. 16 A meha ve awg ni awg hax teq pa haeg cheaq te lehq, awg yand haq vig khuhq lehq kha nehax yehd-oq. 17 Kheh te cheaq te lehq, cud yiq mad cawg che chaw tad phehq vid. Kheh ma khuhd, Jawd mawd Yer suq ve a lor khawd-ehg kheh cawg che haq sir che chaw phehq vid-oq. 18 A pehx med ghig dawg buhz che taq te. U kheh te che awr lehr, chaw lug var phehq vehr che yaog. Nawg awg khuhn Awg ha phu kha peh cawg vid-oq. 19 Chid muh che tawd khuhd, ka mig khuhd he lehq co ha phawd awr haq caz daq che ka mig khuhd teq pa haq cud lehq, te ghad he lehq te ghad koz daoq. Nig hehd ve ni ma awg tawg kha gag Jawd mawd Yer suq haq ka mig chid muh-o. 20 Nig hehd awr lehr, a nig ved Jawd mawd Yer suq Khreq ve awg meh haq cud lehq, awg ceng gha lia ve awg pun Awr pa Ghig sa haq khar thad liz chid muh chehd-oq.

21 Khreq haq yawz yan che awg khuhn, te ghad awg huhx lo te ghad kha nehax chehd-oq. 22 Awg mid ma teq paog, Jawd mawd Yer suq awg huhx lo nig hehd chehd che heh, a sug yawd ved awg phad mawd awg huhx lo chehd-oq. 23 Awg lawn ghod ver, Khreq awr lehr yawd ved awg mor ve a kor phehq che heh, awg phad mawd liz awg mid ma ve a kor phehq che yaog. Khreq awr lehr, yawd ved awg ton phehq che Khreq yad awg mor haq Thaer khuhq vid che phad phehq che yaog. 24 Khreq yad awg mor awr lehr, Khreq awg huhx lo chehd che heh, awg mid ma teq pa liz awg ceng gha lia awg khuhn a sug yawd ved awg phad mawd awg huhx lo chehd-oq.

25-26 Awg phad mawd teq paog, Khreq awr lehr, yawd ved awg mor haq haq che heh nig hehd a sug yawd ved awg mid ma haq haoq. Khreq yad awg mor daq vid kehg vid tug, Khreq awr lehr a kaz he lehq bon khuhd haq yehd lehq Khreq yad awg mor haq chuhd kehg vid che yaog. Che kheh te tug awg pun, yawd ved awg ton chid aq vid che yaog. 27 Yawd a thoq te Khreq yad awg mor haq chuhd kehg vid le lehd koz ver, daq kehg che, yaq kig mad cawg che he lehq awg kix awg hawehd heh te che ted cenr liz mad cawg che awg mor te lehq, awg mig awg phond kha peh cawg che awg khuhn, awg mor u ve yawd awg ton haq yawd chid aq vid gha tug†5:27 yawd chid aq vid gha tug Yawd ved awg mid ma phehaq vid tug lehd koz gad che yaog. Pheq 21:9 awg pun chuhd kehg vid che yaog. 28 U ve heh te lehq, awg phad mawd teq pa awr lehr, a sug yawd ved awg ton haq haq che heh, a sug yawd ved awg mid ma haq haq cawd che yaog. A sug yawd ved awg mid ma haq haq che chaw awr lehr, a sug yawd awg ton haq haq che yaog. 29 Awg lawn ghod ver, a sug yawd ved awg ton haq cand che chaw te ghad-eg liz mad cawg. A sug yawd awg ton haq car vid taw vid lehq, kha nehax haq sax che yaog. Khreq awr lehr, yawd ved awg mor haq u ve heh te che yaog. 30 Awg lawn ghod ver, a nig awr lehr yawd awg ton ve awg khen teq pa phehq che yaog.

32 Awg lawn che awr lehr, nax jad che ted ceng phehq che yaog. Ngag che kheh koz che awr lehr, Khreq he lehq yawd ved Khreq yad awg mor awg lawn haq koz gad che yaog. 33 Nig hehd awg gha lia liz, a sug yawd awg ton haq haq che heh, a sug yawd awg mid ma haq haoq. Awg mid ma liz, a sug yawd ved awg phad mawd haq yawz yan-o.