1 A vix a nax teq paog, chaw te ghad ghad vend bax ted ceng cear te chehd che haq nig hehd gha mawg ver, yawd kawq daq vid tug, nig hehd co ha phawd awr awg ghad cawg che chaw teq pa awr lehr, ni ma nud nehg che awg khuhn yawd haq kawq ghu vid-oq. Nawg liz, ber che lawd che awg khad haq maq gha kae tug, khar thad liz nawg awg ton sa tiq teo. 2 Nig hehd te ghad lehq te ghad ve awg veg haq ga puhd daoq. Che kheh te ver, Khreq ve awg lid tawd khuhd haq nig hehd te peh lawq tug yaog. 3 Chaw te ghad ghad awr lehr, yawd teq chaweh cheng lehq a yed ir che chaw phehq che ma hez liz, ngag awr lehr su haq keh a yed ir lehq cheng che yaog lehd yawd duhd ver, yawd awr lehr yawd awg ton haq her ka che yaog. 4 A sug yawd te lar che kanx haq duhd ngawx tehz ngawx-oq.*6:4 duhd ngawx tehz ngawx-oq A sug yawd te chehd che kanx haq char ngawx lehd koz gad che yaog. 2K 13:5 U kheh te ver, su haq maq ca tehz daq lehq a sug yawd awg ton haq yawd ha lehg gha che yaog. 5 Awg lawn ghod ver, chaw awg gha lia awr lehr, a sug yawd ved awg veg haq gha puhd tug yaog.

6 Bon khuhd haq gha hend che chaw te ghad awr lehr, yawd haq mar vid sehr phad te ghad haq daq che awg ceng awg gha lia pehg vid cawd che yaog.

7 Ta duhd yaq. Ghig sa haq nig hehd her ka maq gha hawg. Awg lawn ghod ver, a sug yawd awg yuhd ser che heh yawd gha ghiq tug yaog. 8 Awg lawn ghod ver, a sug yawd awg suhr awg sar haq caz daq che ted ceng haq ser ver, awg suhr awg sar geh lag che lug che sez che haq gha ghiq tug yaog. Awg ha phu haq caz daq che ted ceng haq ser ver, Awg ha phu awg khuhn co tiq ha tiq haq gha ghiq tug yaog. 9 A nig daq che awg ceng haq te che awg ghad ta nud vid. Awg lawn ghod ver, a nig ni ma awg ghad ma nud lehq ma phehd kha lar haz ver, awg yand cawd che te yand awg khuhn a nig gha ghiq tug yaog.†6:9 gha ghiq tug yaog Te lar che heh awg bon gha che haq koz che yaog. Pheq mar 22:11-12 10 Kheh te cheaq te lehq, te gha che heh, chaw awg gha lia awg pun daq che haq teag veg. Yonr che yehg yad ka yad teq pa awg pun lex lehq daq che haq teag veg.

11 Ngag awg ton ngag ved laq kuhr nig hehd haq buhq fea che liq mehz che teq pa khawd-ehg ma ir che‡6:11 khawd-ehg ma ir che Pawd loq mehz sir mad daq che haq te lehq, liq buhq thad liq mehz ir chawa te buhq che haq koz che yaog. 4:13 haq ngawx-oq. 12 Awg suhr awg sar phawd awr awg lid tawd khuhd awg khuhn ngawx sa tug te gad che chaw teq pa awr lehr, nig hehd awg gig med gha soer tug nig hehd haq nix-i ghad te cuha che yaog. I hehd che kheh te che awr lehr, Khreq ve laq kan§6:12 Khreq ve laq kan Yer suq ve ha lehg che bon khuhd mar che kanx haq koz che yaog. haq te lehq du deh che haq i hehd maq gha khanr tug te che lehax yaog. 13 Awg lawn ghod ver, awg gig med soer vehr che chaw teq pa awr lehr, i hehd awg ton liz awg lid tawd khuhd haq kha lawq na yug che ma hez. Nig hehd ve awg suhr awg sar haq te lehq*6:13 awg suhr awg sar haq te lehq Awg gig med soer che haq koz che yaog. i hehd ni ma ir kig cawg tug, nig hehd haq awg gig med soer cuh gad che yaog. 14 Kheh ma khuhd ngag awr lehr, a nig ved Jawd mawd Yer suq Khreq ve laq kan haq lehax†6:14 laq kan haq lehax Yer suq ve ha lehg che bon khuhd mar che ted ceng haq lehax ni ma ir che haq koz che yaog. 1K 1:31, 2:2 chid ir chid muh tug yaog. Awg kag awr ve ted ceng haq chid ir chid muh tug ma hez. Laq kan u ve haq te lehq mig gig ve awg lid teq pa awr lehr ngag awg khuhn suh vehr lehq, ngag liz mig gig ve awg lid teq pa haq suh vehor. 15 Awg lawn ghod ver, awg gig med soer che lehd ma koz, maq soer che lehd ma koz, teq chaweh awg bon mad cawg. Chaw awg suhx phehq vehr che ted ceng lehax awg bon cawg che yaog. 16 Chaw awg suhx phehaq che awg lid ve awg khad haq‡6:16 awg lid ve awg khad haq Ha lehg che bon khuhd awg khad haq kae chehd che haq koz che yaog. kae chehd che chaw awg gha lia awg thag huh lehd ma koz, Ghig sa ve Id sar rer laq chaw teq pa§6:16 Ghig sa ve Id sar rer laq chaw teq pa Id sar rer laq chaw (Yud daq chaw) awr lehr Ghig sa ve chaw ceng phehq che yaog. Kheh ma khuhd, chuhr huh Pawd loq awr lehr Yer suq Khreq awg khuhn yonr che chaw teq pa haq koz lar che yaog. awg thag huh lehd ma koz, Ghig sa geh lag che duhd sa gad sa che ted ceng he lehq har kax che ted ceng cawg vid-oq.

17 Yaq ni khaz nuhr ver, chaw te ghad-ehg liz ngag haq tad kawq soq saq ax. Awg lawn ghod ver, ngag ved awg ton haq Yer suq ve awg maex*6:17 Yer suq ve awg maex Yer suq awg pun sax khiz khanr che haq te lehq, su du deh lehq gha lar che awg kix awg hawehd haq koz che yaog. 2K 11:23-25 teq pa cawg lar che yaog.

18 A vix a nax teq paog, a nig ved Jawd mawd Yer suq Khreq ve awg bon awg sinx nig hehd ve ni ma awg khuhn cawg vid-oq. A meng.