Lad hur Si Liq Phu Awg Suhx Her brehd liq 8

Kar tiq sax caz awg suhx awg pun awg kanr te sehr phad

1 Ngag koz gad che awg lawn ir che awr lehr che kheh yaog. Che kheh te che paw khod nux* te ghad a nig cawg che yaog. Yawd awr lehr, muhd nuh maq lo chehd che Kand pax ir sehr phad ve kaw jaw laq yaq awr phawd huh mi lar lehq, 2 awg cehg mag ve hax po† bon yehg awg khuhn, daq kehg che chehd kig huh, kanx te sehr phad phehq che yaog. Awg cehg mag ve hax po bon yehg u ve awr lehr, chaw yad te lar che ma hez, Jawd mawd Ghig sa te lar che yaog.

3 Awg lawn ghod ver, paw khod nux awg gha lia awr lehr, laq sawnr he lehq tand tug teq pa tand vid tug awg pun, i hehd haq lez teh lar che yaog. Kheh te lehq, paw khod nux che te ghad liz, tand tug ted ceng cear yawd gha cawg lar che yaog. 4 Yawd awr lehr mig gig khod-aq lo chehd chehd che heh ver, yawd paw khod phehq tug ma hez.‡ Awg lawn ghod ver, awg lid tawd khuhd awg khad heh te lehq, laq sawnr teq pa tand vid sehr phad teq pa cawg chehd che yaog. 5 I hehd awr lehr, muhd nuh maq lo bon yehg ve awg hoq awg han he lehq awg ghig han lehax phehq che bon yehg ted mag awg khuhn kanx te chehd che yaog. Awg lawn ghod ver, Mod ser awr lehr hax po bon yehg haq teag lehd te che te yand, Ghig sa yawd haq che kheh koz mar vid che, †“Keh dig thag lo nawg haq mawa peg che awg khad heh te lehq awg gha lia haq nawg te tug sa tiq teo,” lehz yawd haq koz vid che yaog. 6 A meha Yer suq awr lehr, daq jad che kar tiq sax caz awg pun awg kanr te sehr phad phehq che heh, yawd gha lar che kanx liz daq jad che yaog. A thoq haq te lehq kar tiq sax caz u ve daq jad cheawg le lehd koz ver, daq jad che kar tiq teq pa awg khod-aq teh lar che haq te lehq yaog.

7 Awg lawn ghod ver, awg kawd ped maq ve kar tiq sax caz ted mag peh lawq che heh ver, kar tiq sax caz ni pawz te pawz kawq pid tug maq lor.

8 Kheh ma khuhd, Jawd mawd Ghig sa yawd ved chaw ceng haq vend bax tar lehq koz che,

†“Ngawx lor, Id sar rer laq chaw teq pa he lehq Yud daq chaw teq pa haq

kar tiq sax caz awg suhx ngag teh lar vid tug awg ni cawag tug yaog.

9 Kar tiq sax caz awg suhx u ve awr lehr,

i hehd ve a pux a pi teq pa haq ngag laq kuhr ghawg lehq

Ed jid tuq muhd mig awg khuhn sir veha tuhaz che teq ni huh,

ngag i hehd haq te vid lar che kar tiq sax caz heh ma hez.

Awg lawn ghod ver, ngag ved kar tiq sax caz

awg khad haq i hehd mad kawq te.

Kheh te lehq, ngag liz i hehd haq chid bag lar haz che yaog lehz,

Jawd mawd Ghig sa koz che yaog.

10 Awg yand u ve peg khaz nuhr, Id sar rer laq ted yehg haq

ngag te vid tug kar tiq sax caz awr lehr che kheh yaog.

Ngag ved awg lid tawd khuhd teq pa

i hehd ve ni ma duhd khad awg khuhn ke vid lehq,

i hehd ve ni ma awg thag huh buhq vid tug yaog.

Ngag i hehd ve Ghig sa phehq lehq,

i hehd liz ngag ved chaw phehq tug yaog, lehz Jawd mawd Ghig sa koz che yaog.

11 I hehd awr lehr, ‘Jawd mawd Ghig sa haq sir-oq,’ lehz

muhd mig yad chawd chawad lehd ma koz, a vix a nax lehd ma koz,

te ghad haq te ghad mar vid daq tug maq lor.

Awg lawn ghod ver, i hehd awg khuhn i jad che te ghad te lehq

ir jad che te ghad kha gag, i hehd awg gha lia ngag haq sir tug yaog.

12 Ngag i hehd ve yaq kig jiz kig

teq pa haq hax kar vid tug yaog.

I hehd ve vend bax teq pa haq

ngag kawq duhd nuhd tug ma hez,”

lehz Jawd mawd Ghig sa koz che yaog. 13 Kar tiq sax caz awg suhx lehz yawd koz che te yand, awg kawd maq pid lar che§ kar tiq sax caz haq awg pir phehq vid vehr che yaog. Muh jad lehq pir vehr che awg ceng awr lehr, mehx vehr tez che yaog.

*8:1 8:1 Che kheh te che paw khod nux Yer suq haq koz che yaog. 7:19-28

†8:2 8:2 awg cehg mag ve hax po Muhd nuh maq lo cawg che bon yehg haq koz che yaog. 7:25

‡8:4 8:4 paw khod phehq tug ma hez 7:13 haq ngawx

†8:5 8:5 Tuhz 25:40

†8:8 8:8-12 Yrm 31:31-34

§8:13 8:13 awg kawd maq pid lar che Mod ser haq cud lehq pid lar che awg lid tawd khuhd haq koz che yaog.