1 Yer suq awr lehr, chaw kheh ma ve haq tawd khuhd u ve awg gha lia saw mar vid lar haz lehq, Kar per nar unr med lo kae che yaog. 2 Awg yand u ve khuhn Rod maq ve maq por te ghad, yawd haq che awg ceg te ghad nag lehq suh vehr tez che yaog. 3 Maq por u ve Yer suq awg lawn gha kad lehq, yawd ved awg ceg haq ghu na vid tug, Yud daq chaw teq pa ve awg hox chaw mawd teq pa kae pe lehq, Yer suq haq ca lawg khawx pe che yaog. 4 I hehd Yer suq chehd lo gaeg lehq, Yer suq haq kha nehax lawg khawx lehq koz che, “Nawg yawd haq che kheh te vid kenr che chaw te ghad yaog. 5 Awg lawn ghod ver, yawd a nig ved chaw ceng haq haq lehq a nig awg pun bon lawg kig tea lar peg che yaog,” lehd koz vid che yaog. 6 Kheh te lehq, Yer suq i hehd geh kae che yaog. Maq por ve yehg pad huh gaeg che te yand, maq por yawd ved awg chawd teq pa haq lag pea lehq koz che, “Jawd mawd-og, nawg awg pun har tug taq teo. Awg lawn ghod ver, ngag nawg haq haq yug lehq ngag ved yehg khuhn lag vid tug ngag maq kenr. 7 Kheh te lehq ngag liz nawg chehd lo lag maq kenr hawg lehd duhd che yaog. Kheh te lar nawg tawd teq pear lehax yaw liz, ngag ved awg ceg na vehr tug yaog. 8 Awg lawn ghod ver, ngag awr lehr su ved kand pax awg huhx uh chehd lehq ngag huhx uh liz maq yad teq pa cawg che yaog. Ngag chaw che te ghad haq ‘Kae’ lehd koz vid ver yawd veh che yaog. Chaw u ve phad haq ‘Laor’ lehd koz vid ver, yawd lag che yaog. Ngag ved awg ceg var haq liz ‘Che ve te’ lehd koz vid ver, yawd te vehr che yaog,” lehd ca koz vid pe che yaog. 9 Tawd khuhd u ve haq Yer suq gha kad che te yand, yawd and lehq yawd kuhr tehx nuhr ghaq tod che teq pa haq kuhr phuhz ngawx lar lehq koz che, “Id sar rer laq chaw awg khuhn liz che kheh taw maq yonr che chaw ngag mad mawg jaw ser,” lehd koz che yaog. 10 Yawd ved awg chawd teq pa yehg lo kawq gag gha mehx, awg ceg var na vehr chehd lawz che haq i hehd gha mawg che yaog.

11 U kheh te lar haz maq muh tand, Yer suq he lehq yawd ved awg laq ghuhd teq pa Nar id naq meh che khaz lo kae lehq, chaw awg mor nux i hehd geh teq geha kae che yaog. 12 I hehd teq pa lag lehq med u ve ghaz mir huh gaeg che te yand, chaw suh te ghad haq su ga taz si tod lawz che haq gha mawg daq che yaog. Chaw suh u ve awr lehr, meh chuhd ma ve yad par te ghad lehax te che suh vehr che haq su ga taz ve veh tod che geh awr ye meh chuhd ma he lehq med yad teq pa liz, awg mor nux te lehq veh tod che yaog. 13 Jawd mawd Yer suq Khreq awr lehr, yad mid u ve haq gha mawg lehq yawd haq har kax jad lehq koz vid che, “Tad huhg” lehd koz vid che yaog. 14 Yer suq awr lehr, awg pad huh kae lehq taz tod che kawnd kor haq yig vad-eg lehq, taz par teq pa jehd vehr che yaog. Yer suq koz che, “Chaw hax var-og, ngag nawg haq koz ax laq, tu laoq,” lehd koz vid che yaog. 15 Suh chehd che chaw u ve tu mi lehq, tawd yaw vehr che yaog. Yer suq awr lehr, chaw hax var u ve awr ye ve laq khuhn yawd haq aq vid che yaog. 16 Chaw awg gha lia kuhz jad lehq, Ghig sa haq chi ir chid muh lehq koz che, “Ghig sa ve cuh kar var nux a nig chehd huh tuhaz vehr che law. Ghig sa awr lehr, yawd ved chaw teq pa haq ca ngawx-ag vehor,” lehz i hehd koz che yaog. 17 Yer suq ve awg lawn che Yud daq muhd mig khuhn he lehq awg kiz awg naz awg kag gha lia lo buhg veh che yaog.

18 Yod hanr ve awg laq ghuhd teq pa awr lehr, awg lawn u ve awg gha lia Yod hanr haq saw khae mar vid che yaog. 19 Yod hanr awr lehr, yawd ved awg laq ghuhd ni ghad haq kug yug lehq, Yer suq chehd lo ca na ngawx pe lehq koz che, “Te ghad lag lawg ghod che nawg yaog la. Ma hez ver, te ghad haq gha kawq law ser lawg la.” 20 Chaw u ve ni ghad Yer suq chehd lo gaeg lehq na che, “Te ghad lag lawg ghod che u ve nawg yaog la. Ma hez ver, awg kag awg nuz awr ve chaw te ghad haq gha duhd law ser lawg la. Baz tiz sar pehar var Yod hanr ngag nid-ag haq nawg chehd lo ca na pea lar che yaog,” lehd koz vid che yaog. 21 Awg yand u ve khuhn, Yer suq chaw nag teq pa a nar laex ceng te nag che laex ghad haq ghu na vid lehq, haeg che ned geh che haq liz ghaq kog vid lehq mehz cox che chaw teq pa haq liz mehz kawq mawag vid che yaog. 22 Yer suq ix mag haq kawq koz vid che, “Nig mag kha gha kad kha gha mawg che teq pa Yod hanr haq ca kawq koz vid-eq. Mehz cox che chaw teq pa mehz kawq mawag lehq, khi lug che chaw teq pa yaq kaw tod gag che, khir tuq kex che chaw teq pa daq kehag che, nar puh bag che chaw nar puh kad-ag che, suh vehr che chaw teq pa kawq teq tuag lehq, har che ghuhd che chaw teq pa liz, ha lehg che bon khuhd haq gha kad che yaog. 23 Ngag haq ni ma mad lug lehq yonr che chaw teq pa awr lehr, awg bon ir che yaog,” lehd koz vid che yaog.

24 Yod hanr cuh pea che chaw u ve ni ghad kawq veh lehq, Yer suq awr lehr chaw mor nux haq Yod hanr awg lawn khae mar vid che, “Nig hehd heh pir khuhn awg god khehz teag lo kae che a thoq haq ca ngawx-eg tug kae cheawg le. Pund cehg haq muhd huh mez lehq, aw taz aw yaq te chehd che haq ca ngawx-eg cheawg la. 25 Ma hez ver, a thoq haq ca ngawx-eg tug kae cheawg le. Beg ke pehz daq mehz awg nud nehq te che veq lar che chaw haq la. Veq kad daq lehq cad tug dawg tug daq che chaw teq pa awr lehr, jawd mawd ve hawx yehg khuhn chehd che yaog. 26 Ma hez ver, a thoq haq ca ngawx-eg cheawg le. Ghig sa ve cuh kar var haq la. Yaog, Ghig sa ve cuh kar var haq ca ngawx-eg che yaog. Ngag nig hehd haq koz ax laq. Yawd awr lehr, Ghig sa ve cuh kar var haq keh ir che chaw te ghad yaog. 27 Liq phu khuhn koz lar che Yod hanr che phad yaog.

29 Yer suq koz che haq awg khawnr saw var he lehq chaw awg gha lia gha kad che te yand, Ghig sa te che awr lehr, thed jad cawd jad law lehd koz che yaog. I hehd Yod hanr ve baz tiz sar haq khanr yug lar haz peg che yaog. 30 Kheh ma khuhd, Phar rir sehd teq pa he lehq awg lid tawd khuhd sir var teq pa awr lehr, Ghig sa i hehd awg pun te lar che awg ceng haq mad haq yug, awg lawn ghod ver, Yod hanr baz tiz sar pid che haq i hehd mad haq yug che yaog. 31 Kheh te lehq Yer suq koz che, “Chaw a meha ve teq co ve haq a thoq gha yug tehz mar tuawg le. I hehd a thoq haq sur daq cheawg le. 32 Chaw che teq co haq ve awr lehr, chaw yad nehax teq pa kax khuhn mi lar kug daq lehq koz che, ngag hehd nuhr mez liz nig hehd ka ma khez, ngag hehd kug huhg paz huhg liz nig hehd ma duhd har, lehd koz chehd che haq sur che yaog. 33 Awg lawn ghod ver, baz tiz sar pehar var Yod hanr lag lehq khaor mod ma cad lehq a pehx med ghig mad dawg cheaq te lehq, nig hehd yawd haq ned geh che chaw lehd koz che yaog. 34 Chaw yad ve Yad phu lag lehq, cad che dawg cheaq te lehq, chaw cheawg lehr cad pong cad lex che chaw, a pehx med ghig dawg pong dawg lex che chaw, awg khawnr saw var he lehq vend bax yad teq pa haq awg chawd te che chaw yaog, lehz nig hehd koz che yaog. 35 Kheh ma khuhd, Ghig sa ve cud yiq ma yiq haq haq yug che chaw teq pa awr lehr, cud yiq ma yiq u ve thed cawd lehq daq che haq gha mawg tug yaog.”

36 Phar rir sehd te ghad yawd geh awr cad tug Yer suq haq kug che yaog. Kheh te lehq, Phar rir sehd u ve yehg khuhn yawd gehe lehq mi cad che yaog. 37 Phar rir sehd ve yehg khuhn, Yer suq mi cad chehd che haq med u ve khuhn chehd che haeg che yad mid ma te ghad gha sir lehq, nag huhx ke lar che phux-u lehd te che huhx meh te lar che a kaw ted mag yug vea lag lehq, 38 Yer suq kuhr tehx nuhr phawd awr khi pad huh hox lar huhg chehd che yaog. Yawd ved mehz ghig Yer suq khi haq coz kaq lehq, yawd ved cuhz kheh muh yug siz che yaog. U kheh te peg lehq, yawd Yer suq ve khi haq bux vid peg lehq nag huhx puhr vid che yaog. 39 Yer suq haq kug lar che Phar rir sehd u ve phad yawd gha mawg lehq, yawd ni ma khuhn duhd che, “Chaw cheawg lehr, Ghig sa ve cuh kar var awr lehd koz ver, yawd haq duhq chehd che yad mid che ve khawd-ehg kheh ve yad mid awg le ghod che he lehq a suawg le ghod che haq yawd sir tug yaog. Awg lawn ghod ver, yad mid cheawg lehr, haeg che yad mid yaog,” lehz yawd duhd che yaog. 40 Yer suq kawq koz che, “Sid monr-og, ngag nawg haq ted ceng koz ax laq mehr.” Sid mor koz che, “Koz ax hehq sar lar-og,” lehd koz vid che yaog. 41 Yer suq koz che, “Phu chid vid var te ghad geh jeg cawg var ni ghad cawg che yaog. Te ghad vawr, jeg ngad ha thehq cawg lehq, te ghad vawr, jeg ngad chi thehq cawg che yaog. 42 Ix mag jeg khuhq sehr tug phu mad cawg te lehq, phu chid vid var ix mag ni ghad ghad haq jeg kheha pong vid vehr che yaog. Kheh te ver, ix mag awg khuhn khar ve te ghad vawr, yawd haq lex lehq kawq haq tuawg le,” lehd koz na ngawx che yaog. 43 Sid monr kawq koz che, “Ngag duhd che, jeg haq gha pong mad che phad awr lehr, lex lehq kawq haq mad tug yaog.” Yer suq yawd haq koz vid che, “Nawg duhd che cawd vehr che yaog.” 44 Yer suq yad mid u ve haq kuhr phuhz ngawx lar lehq Sid monr haq koz vid che, “Yad mid che ve haq nawg mawar la. Ngag nawg ved yehg khuhn ngag gehag huh, ngag khi chuhd tug a kaz nawg maq pehar. Kheh ma khuhd, yad mid che te ghad awr lehr, yawd ved mehz ghig ngag ved khi haq coz puhr lehq yawd ved cuhz kheh muh yug siz ax peor. 45 Ngag nawg yehg khuhn tanr gehag huh, nawg ngag haq maq buax. Kheh ma khuhd, yad mid cheawg lehr yawd tanr gehag loar, khar thad liz ngag ved khi haq bux don chehd che yaog. 46 Nawg ngag ved a kor haq nag huhx ma gehz ax. Kheh ma khuhd, yawd awr lehr ngag ved khi haq nag huhx puhr ax vehr che yaog. 47 Kheh te cheaq te lehq, ngag nawg haq koz ax laq, yawd awr lehr, vend bax mad jad che haq gha pong cheaq te lehq haq mad che yaog. Vend bax a cehax lehax cawg lehq gha pong che chaw awr lehr, a cehax lehax haq che yaog,” lehd koz vid che yaog. 48 Yad mid u ve haq liz yawd koz vid che, “Nawg ved vend bax teq pa haq ngag phehad vehor,” lehd koz vid che yaog. 49 Yawd geh mi cad chehd che chaw teq pa duhd lehq koz daq che, “Vend bax haq liz phehd kha gha che chaw che a suawg le,” lehd koz daq che yaog. 50 Yer suq yad mid u ve haq koz vid che, “Nawg yonr cheaq te lehq, nawg gha pong vehor. Ha lehg duhd sa che khuhn kae lor.”