Mar thehr liq
Awg meh he lehq phehq peg che awg lawn
Yer suq ve a saq awg lawn liq Mar thehr che ve awr lehr, awg kag awg nuz awr ve Yer suq ve a saq awg lawn liq haq pehg tuhz gha tug Mar thehr yawd ved awg meh haq yehd lehz koz kug lar che yaog. Yer suq ve a saq awg lawn liq awr lehr, teq lawn lehax phehq liz, 4 koz pehg lehq buhq lar che yaog. Kheh te cheaq te lehq, a nig Ghig sa geh lo lag che ha lehg che bon khuhd Mar thehr ve liq cawg-ag che yaog. Mar thehr awg meh cuhx kig vawr “Ghig sa ve laq sawnr” yaog.
Buhq var he lehq buhq che awg yand
Yer suq ve a saq awg lawn liq 4 koz haq buhq sehr phad ve awg meh teq pa awr lehr mad buhq lar che yaog. Kheh maq khuhd, awg kawd maq thad huh ve bon hox bon nax teq pa tawd te khuhd lehax te lehq koz che, Mar thehr liq haq cuh yad Mar thehr yawd awg ton buhq lar che lehd koz che yaog. Yawd awr lehr awg khawnr saw var Ler viq meh lar che yaog. A.D. 70 khuhq thad Yer ruq sar lehr med haq maq te lug ser thad huh buhq lar che yaog.
A yed ir che awg lawn he lehq awg lawn kha peg
Mar thehr yawd a yed yug lehq duhd law jad che awr lehr,Yer suq awr lehr i hehd Yud daq chaw ve Mir six yaq phehq che yaog lehd koz che haq ghawn sehr phad Yud daq chaw teq pa gha sir tug awg pun yaog. Mar thehr yawd liq phu awg pir khuhn cawg che tawd khuhd teq pa haq lehd ma koz, “Muhd nuh maq ve muhd mig” lehd koz che tawd khuhd haq lehd ma koz, te pawz peg te pawz yug lehq yehd che yaog. Mar thehr liq awg khuhn ir che awg lawn teq pa pehg tuhz ver, che kheh te pehg tuhz gha che yaog: (1) Ka nad nux maz 5-7; (2) Ka nad nux maz 10; (3) Ka nad nux maz 13; (4) Ka nad nux maz 18; (5) Ka nad nux maz 24-25.
Awg lawn nux
1. Yer suq paw che he lehq awg khaz nuhr maq muh muh-a huh ve awg lawn (1:1-2:23)
2. Yer suq ha lehg che bon khuhd kanx tanr te che (3:1-4:11)
3. Gar liq lehd muhd mig khuhn Yer suq ha lehg che bon khuhd kanx te che (4:12-14:12)
4. Gar liq lehd muhd mig khuhn Yer suq tuhz veh che (14:13-17:20)
5. Gar liq lehd muhd mig khuhn Yer suq awg leh med te pawz ha lehg che bon khuhd kanx te che (17:22-18:35)
6. Yud daq muhd mig he lehq Per riq muhd mig khuhn Yer suq ha lehg che bon khuhd kanx te che (19:1-20:34)
7. Yer suq suh che (21:1-27:66)
8. Yer suq suh ki lo kawq teq tuag che (28:1-20)
1
Yer suq ve awg ceng awg khad teq pa
Liq che ve awr lehr, Ar brar hanr ve awg yad he lehq Dar viq ve awg yad phehq che Yer suq Khreq ve awg ceng awg khad teq cax peg teq cax te yaq lag lar che awg lawn buhq lar che yaog.
Ar brar hanr ve awg yad awr lehr, Id caq yaog. Id caq ve awg yad awr lehr, Yar koq yaog. Yar koq ve awg yad awr lehr, Yud daq he lehq yawd ved awg vix awg nax teq pa yaog. Yud daq ve awg yad awr lehr, awg mid ma Tar mar lor paw lar che Phar rehq he lehq Ser raq yaog. Phar rehq ve awg yad awr lehr, Her sar ronr yaog. Her sar ronr ve awg yad awr lehr, Ar ranr yaog. Ar ranr ve awg yad awr lehr, Ar miq nar daq yaog. Ar miq nar daq ve awg yad awr lehr, Nar sonr yaog. Nar sonr ve awg yad awr lehr, Sar lar monr yaog. Sar lar monr ve awg yad awr lehr, awg mid ma Rar haq geh paw lar che Bawd saq yaog. Bawd saq ve awg yad awr lehr, awg mid ma Rud thaq geh paw lar che Awd behq yaog. Awd behq ve awg yad awr lehr, Ye sehd yaog. Ye sehd ve awg yad awr lehr, Jawd mawd Dar viq yaog.
Dar viq ve awg yad awr lehr, Ud rid yaq ve awg mid ma te jaw che yad mid te ghad geh pawag che Sawd laq monr yaog. Sawd laq monr ve awg yad awr lehr, Rawd baor yaog. Rawd baor ve awg yad awr lehr, Ar bid yaq yaog. Ar bid yaq ve awg yad awr lehr, Ar saq yaog. Ar saq ve awg yad awr lehr, Yawd sar phaq yaog. Yawd sar phaq ve awg yad awr lehr, Yar hawd ranr yaog. Yar hawd ranr ve awg yad awr lehr, Awd siq yaog. Awd siq ve awg yad awr lehr, Yod tanr yaog. Yod tanr ve awg yad awr lehr, Ar khad yaog. Ar khad ve awg yad awr lehr, Her sar kiz yaog. 10 Her sar kiz ve awg yad awr lehr, Maq nad ser yaog. Maq nad ser ve awg yad awr lehr, Ar monr yaog. Ar monr ve awq yad awr lehr, Yod siq yaog. 11 Yod siq ve awg yad awr lehr, Bar bud lunx muhd mig lo su yug kae che teq coaq thad, Yer khawd niq he lehq yawd ved awg vix awg nax teq pa yaog.
12 Bar bud lunx muhd mig lo su i hehd haq yug ve vehr khaz nuhr, Yer khawd niq ve awg yad awr lehr, Sar lar ter laq yaog. Sar lar ter laq ve awg yad awr lehr, Ser rud ber laq yaog. 13 Ser rud ber laq ve awg yad awr lehr, Ar bid oq yaog. Ar bid oq ve awg yad awr lehr, Ed lar kenr yaog. Ed lar kenr ve awg yad awr lehr, Ar cawr yaog. 14 Ar cawr ve awg yad awr lehr, Sar doq yaog. Sar doq ve awg yad awr lehr, Ar kher yaog. Ar kher ve awg yad awr lehr, Ed lid oq yaog. 15 Ed lid oq ve awg yad awr lehr, Ed lar sar yaog. Ed lar sar ve yad awr lehr, Mar thanr yaog. Mar thanr ve awg yad awr lehr, Yar koq yaog. 16 Yar koq ve awg yad awr lehr, Mar riq ve awg phad mawd Yod sehq yaog. Mar riq awr lehr, Khreq lehd koz che Yer suq haq pawag vid che yaog.
17 Kheh te lehq, Ar brar hanr haq tanr te lehq Dar viq ve awg coaq lo kha gag che teq chi uhd co cawg che yaog. Dar viq haq tanr te lehq Bar bud lunx muhd mig lo su yug ve che awq coaq kha gag teq chi uhd co cawg che yaog. Bar bud lunx muhd mig lo su yug ve che haq tanr te lehq Khreq ve awg coaq kha gag teq chi uhd co cawg che yaog.
Yer suq Khreq pawag che
18 Yer suq Khreq paw che awr lehr, che kheh te che yaog. Yawd ved awr ye Mar riq he lehq Yod sehq he daq tug kar tiq te daq peg khaz nuhr, ix mag maq he daq ser huh, Daq che kehg che Awg ha phu ve kand pax haq cud lehq Mar riq yad hu vehr che yaog. 19 Yawd he tug kar tiq te daq lar che Yod sehq awr lehr, thed che cawd che chaw phehq lehq Mar riq ve mehz khuhd mad lug vid gad lehq, yawd haq taq chuhax teh lar haz tug duhd che yaog. 20 Yawd u kheh te duhd ngawx chehd che te yand huh, yuhq maz mawg che awg khuhn, Jawd mawd Ghig sa ve muhd nuh maq cuh yad te ghad tuhaz lehq koz che, “Dar viq ve yad Yod sehq-og, nawg kar tiq te lar che yad mid Mar riq haq he tug ta duhd har. Awg lawn ghod ver, yawd yad hu che awr lehr, Daq che kehg che Awg ha phu ve kand pax khuhn hu che yaog. 21 Yawd yad par te ghad pawag tug yaog. Nawg yawd haq Yer suq lehd koz gha meh vid tug yaog. Awg lawn ghod ver, yawd ved chaw ceng haq i hehd ve vend bax teq pa awg khuhn yawd thaer khuhq vid tug yaog,” lehz muhd nuh maq cuh yad koz vid che yaog.
22 Awg ceng che ve teq pa phehaq che awr lehr, Jawd mawd Ghig sa yawd ved cuh kar var te ghad haq cud lehq koz lar che tawd khuhd peh lawq tug awg pun phehaq che yaog. 23 Yawd koz che,
1:23 Isy 7:10“Ngawx lar, yad mid hax te ghad yad hu lehq yad par te ghad pawag tug yaog.
Yad par u ve haq 1:23 Isy 8:8,10Ed mar noer laq lehd koz gha meh vid tug yaog,”
lehz koz lar che yaog. (Ed mar noer laq lehd koz che cuhx kig awr lehr, Ghig sa a nig geh chehd che lehd koz che yaog.)
24 Yod sehq yuhq nuhd-ag che te yand, Jawd mawd Ghig sa ve muhd nuh maq cuh yad yawd haq koz vid lar che heh te lehq yawd kar tiq te lar che yad mid haq he che yaog. 25 Kheh ma khuhd, yad par u ve maq paw ser che kheh ceh yawd awg mid ma geh mad yuhq. Yad par u ve pawag lehq yawd haq Yer suq lehd koz meh vid che yaog.

1:23 1:23 Isy 7:10

1:23 1:23 Isy 8:8,10