1 Su haq nig hehd vend bax taq tar. U kheh te ver, Ghig sa liz nig hehd haq vend bax maq tar hawg. 2 Awg lawn ghod ver, nig hehd su haq vend bax tar che heh te lehq Ghig sa liz nig hehd haq vend bax kawq tar tug yaog. Nig hehd su haq khawd-ehg kheh te vid lar liz, Ghig sa nig hehd haq u kheh kawq te khuhq ax tug yaog. 3 Nig hehd a sug yawd ved mehz sir khuhn ve suhz tehd nux tor laq kheh hi te che haq maq ngawx mawg he lar lehq, a thoq awr te lehq nawg vix nawg nax teq pa ve mehz sir khuhn lo cawg che mehz pux nehax haq ca ngawx mawg cheawg le. 4 Nig hehd a sug yawd ved mehz sir khuhn suhz tehd nux tor laq kheh hi cawg chehd liz a thoq awr te lehq nawg vix nawg nax haq nawg ved mehz sir khuhn lo cawg chehd che mehz pux nehax haq ngag bez kha ax laq lehd ca koz tod cheawg le. 5 Chaw her ka var teq paog, nig hehd ve mehz sir khuhn suhz tehd nux tor laq kheh hi te che haq awg kawd yug kha ser. U kheh te peg ver, nawg vix nawg nax ve mehz sir khuhn cawg chehd che mehz pux nehax haq khawd-ehg kheh te yug tuhz gha tug nawg kha sehax mawg cehnr tug yaog.

6 Daq kehg jad che awg ceng yug lehq phid haq ta pid. Pix koer sehnx haq yug lehq vaq mehz khuhd suhr taq ca bag teh vid. U kheh te ver, u ve teq pa haq vaq u ve teq pa naz kix lar lehq phid u ve teq pa nig hehd haq kawq phuhz cheq tug yaog.

7 Lawg lor. Lawg ver, gha tug yaog. Ca lor. Ca ver, mawg tug yaog. Ghaz mir haq thuhz lor. Thuhz ver, phawa tug yaog. 8 Awg lawn ghod ver, lawg che chaw awg gha lia gha tug yaog. Ca che chaw liz mawg tug yaog. Yehg ghaz mir haq thuhz che chaw haq liz i hehd haq yehg ghaz mir phaw vid tug yaog. 9 Nig hehd teq pa awg khuhn a sug te ghad cawg hawg le. Yad khaor mod lawg ver, huhx meh dig yug pid che. 10 Ngad lawg ver, vig yug pid tuawg la. 11 Nig hehd awr lehr, haeg che chaw phehq liz a sug yawd ved yad haq med nged daq maq pid khuhd nuhd chehd ver, cheaq keh lex lehq muhd nuh maq lo chehd che nig hehd ve Awr pa geh kha lawg che chaw teq pa haq daq che awg ceng yawd pid tug ma hez hawg la.

12 Kheh te cheaq te lehq, su nawg haq tea vid gad che heh te lehq nig hehd liz su haq u kheh te vid-oq. Awg lawn ghod ver, tawd che ve te khuhd awr lehr, awg lid tawd khuhd liq awg khuhn he lehq Ghig sa ve cuh kar var teq pa koz lar che tawd khuhd yaog.

13 Mad kuhg che ghaz mir khuh haq gehe. Awg lawn ghod ver lug vid kig lo kae che yaq kaw awr lehr kae sa jad lehq ghaz mir khuh liz kuhg jad che yaog. Kheh te lehq chaw u huh gehe che liz cawg mad jad che yaog. 14 Kheh ma khuhd, a saq teq vid kig lo kae che ghaz mir khuh awr lehr, mad kuhg lehq yaq kaw liz har jad che yaog. Ca mawg lehq gehe che chaw liz a cehax lehax cawg che yaog.

15 Awg cehg mag ma hez che Ghig sa ve cuh ka var teq pa haq sa tiq tar-oq. Awg khuhn phawd awr ver haeg jad che heh phid heh te chehd liz, yawg ve awg gig kox haq veq deh lehq nig hehd chehd lo lag che yaog. 16 I hehd te che kanx haq ngawx ver, i hehd khawd-ehg kheh te che chaw haq nig hehd gha sir che yaog. A chud bid haq a pehx med sir gha sax jawa la. A chud cehg hag a kud sir gha sax jawa la. 17 U ve haq sur daq che yaog. Daq che awg cehg haq ver, daq che awg sir nuhq che yaog. Mad daq che awg cehg haq ver, mad daq che awg sir nuhq che yaog. 18 Daq che awg cehg awr lehr, mad daq che awg sir nuhq tug awg khad mad cawg hawg. Kheh te lehq mad daq che awg cehg haq liz, daq che awg sir nuhq tug awg khad mad cawg hawg. 19 Daq che awg sir mad nuhq che awg cehg teq pa awr lehr, thawq kuhd lehq a mir khuhn tox ke tug yaog. 20 Kheh te cheaq te lehq, chaw u ve teq pa te che kanx haq ngawx ver, i hehd ve ni ma he lehq i hehd khawd kheh te tod che haq sir gha che yaog.

21 Ngag haq, ‘Jawd mawd-og, Jawd mawd-og,’ lehd kha koz che chaw awg gha lia muhd nuh maq muhd mig khuhn gha gehe che ma hez. Muhd nuh maq lo chehd che ngag ved Awr pa ve a lor haq te che chaw teq pa lehax gha gehe che yaog. 22 Ghig sa suhx jehg suhx taz che awg ni u ve haq gaeg ver, ‘Jawd mawd-og, Jawd mawd-og, ngag hehd nawg ved awg meh awg khuhn bon mar che ma hez hawg la. Nawg awg meh awg khuhn ned haeg teq pa haq ghaq kog lehq and tug kha peh te peg che ma hez hawg la,’ lehz chaw kha peh vad-ag ngag haq koz ax tug yaog. 23 Kheh liz, ngag i hehd haq che kheh koz vid tug yaog. ‘Ngag nig hehd haq maq sir daq. Haeg che chaw teq paog, yor log,’ lehd koz vid tug yaog.

24 Kheh te cheaq te lehq, ngag mar vid che tawd khuhd haq gha kad lehq na yug lehq te che chaw teq pa awr lehr, huhx meh thag huh yehg te che cud yiq cawg che chaw teq pa haq sur daq che yaog. 25 Muhd yeg lag lehq a kaz ir taz lehq muhd huh nux lag lehq yehg u ve haq thinr liz yehg u ve huhx meh thag huh te lar cheaq te lehq ma kuhd che yaog. 26 Ngag mar vid che tawd khuhd haq gha kad lehq maq na yug lehq maq te che chaw te pa awr lehr, sehnd de khuhn yehg te che cud yiq mad cawg che chaw teq pa haq sur daq che yaog. 27 Muhd yeg lag lehq a kaz ir taz lehq muhd huh nux mez lag che te yand, yehg u ve haq thinr ver, yehg u ve saw kuhd bag vehr che yaog,” lehz Yer suq koz che yaog.

28 Yer suq tawd u ve teq pa haq yaw mar peg che te yand, yawd mar che tawd khuhd u ve haq chaw kheh ma ve and jad che yaog. 29 Awg lawn ghod ver, yawd mar che tawd khuhd u ve teq pa liq buhq var teq pa mar che haq maq sur. Kheh ma khuhd, yawd vawr Ghig sa lo lag che kand pax cawg che phad heh te mar che yaog.