Mar koq liq
Awg meh he lehq phehq peg che awg lawn
Awg kawd ped thad huh ve Khreq yad awg mor khuhn chehd che bon hox bon nax teq pa koz che, Mar koq liq che ve vawr, cuh yad Per troq ve bon mar lar che awg lawn haq yug cuq yug cax daq lar che yaog. Mar koq liq mehz khuhd awg gha lia khuhn Per troq ve awg hoq awg han haq gha mawg lehq Mar koq liq che ve te koz khuhn ve awg khad nux vawr, Yer suq kanx te lar che awg ceng teq pa haq kha nehax buhq lar che yaog.
Buhq var he lehq buhq che awg yand
Mar koq awr lehr, Mar riq ve yad par yaog (Cuh yad liq 12:12). Kheh te lehq, Bar nar baq ve awg vix awg nax liz yaog (Kaw law sehd liq 4:10). Mar koq awr lehr, Pawd loq he lehq Bar nar baq ix mag awg kawd te pawz ha lehg che bon khuhd tuhz maer che geh ghaq kae che yaog. Pawd loq yawd Mar koq kanx te che haq chid muh lehq Mar koq vawr Rod maq med awg khuhn daq che kanx te chawd phehq che yaog lehd koz che yaog. Chaw gha lia sir chehd che vawr, Ha lehg che bon khuhd Mar koq liq cheawg lehr, awg kawd ped maq buhq lar che liq te koz phehq lehq A.D. 55 khuhq kheh thad huh buhq lar che yaog.
A yed ir che awg lawn he lehq awg lawn kha peg
Mar koq liq che vawr, ir che awg lawn teq pa haq keh ver, awg cehg ma awg lawn he lehq te tuhaz che awg lawn haq a yed yug lehq buhq lar che yaog. Yer suq ve ha lehg che bon khuhd liq 4 lehd khuhn Mar koq liq awr lehr, suaq keh ngeh jad liz, sir ker sir cawd che awg lawn cawg mad jad che yaog. Yud daq chaw ve awg lid awg khad haq Rod maq chaw sir thad kha gag buhq lar che yaog. Mar koq yawd duhd law lar che ted ceng awr lehr, Yer suq Ghig sa yaog ghod che haq su sir tug Yer suq yawd and tug te che awg lawn teq pa haq buhq lar che yaog. Mar koq liq che khuhn 3 pun 1 pun Yer suq mig gig kor-ar chehd che awg leh med teq sinx khuhn phehq che awg lawn buhq lar che yaog. Awg leh med lo Yer suq laq kan thag huh khanr suh lehq kawq teq tuag che haq peg che yaog.
Awg lawn nux
1. Yer suq kanx tanr te che (1:1-13)
2. Gar liq lehd muhd mig khuhn Yer suq kanx tanr te che (1:14-6:29)
3. Gar liq lehd muhd mig khuhn Yer suq kanx jehd lehq tuhaz che (6:30-9:32)
4. Gar liq lehd muhd mig khuhn Yer suq awg leh med te pawz ha lehg che bon khuhd mar che (9:33-50)
5. Yud daq muhd mig he lehq Per riq muhd mig khuhn Yer suq kanx te che (10:1-52)
6. Yer suq suh che (11:1-15:47)
7. Yer suq suh kig lo kawq teq tuag che (16:1-20)
1
Yod hanr A kaz tur var bon mar che
1 Ghig sa ve Yad phu Yer suq Khreq ve ha lehg che bon khuhd awg kawd maq thad awr lehr che kheh yaog. 2 Ghig sa ve cuh kar var Id sar yaq ve liq awg khuhn buhq lar che heh,
†1:2 Ml 3:1“Ngawx lor, nawg ghud med awr nawg ved yaq kaw haq ghu lar ax tug,
ngag ved cuh yad*1:2 cuh yad Yod hanr A kaz tur var haq koz che yaog. haq ngag kae pe che yaog, lehz koz lar che yaog.
3 †1:3 Isy 40:3‘Jawd mawd Ghig sa ve yaq kaw haq ghu lar lor.
Yawd ved yaq kaw teq pa haq thed-e lehd teo,’ lehz
heh pir khuhn lo chaw te ghad kug chehd tug yaog,” lehd koz che yaog.
4 Yod hanr baz tiz sar pehar var heh pir khuhn tuhaz che yaog. Vend bax phehd kha gha tug, vend bax duhd phuhz che haq caz daq che baz tiz sar ted ceng haq yawd mar vid che yaog. 5 Yud daq muhd mig chaw awg gha lia he lehq Yer ruq sar lehnr med yad awg gha lia Yod hanr chehd lo kae che yaog. A sug yawd ved vend bax haq koz mar vid lehq, Yod hanr i hehd haq Yawd danr lawg kax†1:5 Yawd danr lawg kax Par ler tid naq muhd mig khuhn cawg lehq, Yer ruq sar lehnr med haq 20 kid lod vid daq kig huh cawg che yaog. Mt 3:5 haq ngawx. awg khuhn baz tiz sar pid che yaog.
6 Yod hanr awr lehr, kar lar oq awg muh‡1:6 kar lar oq awg muh A mig thad ve Ed lid yaq liz kheh te che beg ke veg deh che yaog. 2Jm 1:8 te lar che beg ke haq veq deh lehq, cuhq pehng huh sar gig sehx hang caz chuhq lar che yaog. Par ceq he lehq heh pir khuhn ve pehd ghig§1:6 Par ceq … pehd ghig Cad tug che teq pa awr lehr daq kehg che cad tug phehq che yaog. Ak 11:21-22 haq yawd cad che yaog. 7 Yawd bon mar lehq koz che, “Ngag khaz nuhr lag tug te ghad awr lehr, ngag haq keh kand pax ir che yaog. Ngag cuhq kuhq lehq yawd ved khi noz caz haq phi tug lehax liz maq kenr. 8 Ngag awr lehr nig hehd haq a kaz awg khuhn baz tiz sar pehar che yaog. Kheh ma khuhd yawd awr lehr, nig hehd haq Daq che kehg che Awg ha phu awg khuhn baz tiz sar pehar tug yaog,” lehz mar vid che yaog.
Yer suq baz tiz sar khanr yug che
9 Awg yand u ve awg khuhn, Gar liq lehd muhd mig Nar sar rehq*1:9 Nar sar rehq Yer suq chehd ir lag kig med phehq che yaog. Lk 2:39 med khuhn Yer suq tuhaz lehq, Yawd danr lawg kax awg khuhn Yod hanr yawd haq baz tiz sar pid che yaog. 10 Yer suq a kaz awg khuhn tanr tuhaz che te yand huh, muhd nuh maq phaw lehq Awg ha phu awr lehr a pia heh te lehq yawd awg thang huh yaq che haq Yer suq gha mawg che yaog. 11 “Nawg awr lehr ngag haq jad che ngag ved Yad phu yaog. Nawg haq ngag ni ma cawd jad che yaog,” lehz muhd nuh maq lo awg khuhd buhq tuhaz che yaog.
Yer suq ber che lawd che haq gha khanr che
12 Teq pear lehax Awg ha phu yawd haq heh pir khuhn ghaq pe che yaog. 13 Yawd heh pir khuhn lo uhd chi ni chehd lehq, Sar tanr yawd haq ber che lawd che yaog. Yawd haeg che to nud to saz teq pa geh chehd lehq, muhd nuh maq cuh yad teq pa yawd lor che haq ga vid che yaog.
Yer suq kanx tanr te che
14-15 Yod hanr haq su pheh yug†1:14-15 Yod hanr haq su pheh yug Mt 14:3 haq ngawx. peg khaz nuhr, Yer suq Gar liq lehd muhd mig lo lag che yaog. Ghig sa ve ha lehg che bon khuhd haq Yer suq mar vid lehq koz che, “Awg yand gag vehr che yaog. Ghig sa ve muhd mig‡1:14-15 Ghig sa ve muhd mig Ni ma khuhn Ghig sa uq penr che haq koz che yaog. Mt 3:2 lag gag vehr tez che yaog. Vend bax haq duhd phuhz lehq ha lehg che bon khuhd haq yonr lor,” lehd koz mar vid che yaog.
Ngad ca var uhg ghad haq Yer suq kug yug che
16 Gar liq lehd ghig po nux pad huh Yer suq kae tod-ag huh, Sid monr he lehq yawd ved awg nax var Anr drehr ghig po awg khuhn geq phehd chehd che haq gha mawg che yaog. Awg lawn ghod ver, ix mag awr lehr ngad ca var phehq che yaog. 17 Yer suq koz che, “Ngag khaz nuhr ghaq lar-oq. Ngag nig mag haq chaw ca sehr phad te cuha tug yaog,” lehz ix mag haq koz vid che yaog. 18 Ix mag teq pear lehax geq haq teh lar haz lehq yawd awg khaz nuhr ghaq veh che yaog.
19 Yer suq awg nuz awr a cehax kawq kae che te yand, Yer ber dehd ve awg yad par Yar koq he lehq yawd ved awg nax var Yod hanr, huh lawd kor khuhn geq ghu behz chehd che haq gha mawg che yaog. 20 Teq pear lehax Yer suq ix mag haq kug yug che yaog. Kanx canr te cad var teq pa geh awr pa Yer ber dehd haq huh lawd kor khuhn lo teh lar haz peg lehq, ix mag yawd awg khaz nuhr ghaq veh che yaog.
Ned chaq chiz geh che chaw awg lawn
21 I hehd Kar per nar unr§1:21 Kar per nar unr Mt 4:13 haq ngawx. med khuhn gehe che yaog. Sa ba to awg ni haq teq pear lehax Yer suq bon lawg kig lo taez lehq mar vid che yaog. 22 Yawd mar vid che haq i hehd and jad che yaog. Awg lawn ghod ver, liq buhq var teq pa mar vid che heh te yawd mar che ma hez. Yawd kand pax cawg che awg khuhn mar vid che yaog.
23 Awg yand u ve haq i hehd ve bon lawg kig awg khuhn ned chaq chiz geh che chaw te ghad cawg che yaog. Yawd kug lehq 24 koz che, “Nar sar rehq chaw Yer suq-og, nawg ngag hehd haq khawd-ehg kheh caz daq che awg le. Ngag hehd haq te lug ax tug nawg lag cheawg la. Nawg haq ngag sir chehd che yaog. Nawg awr lehr, Ghig sa ve Daq kehg che chaw u ve te ghad phehq che yaog,” lehd koz che yaog.
25 Awg yand u ve haq Yer suq yawd haq ded lehq koz che, “Taq chuhax chehd-oq. Yawd awg khuhn lo tuhz kae-o,” lehz yawd haq koz vid che yaog. 26 Ned chaq chiz awr lehr, chaw u ve haq hax ceh nux phez dawz cuh vid lehq, awg khuhd hehnd chawa kug lehq yawd awg khuhn tuhz veh che yaog. 27 Chaw awg gha lia and lehq koz che, “Che ve awr lehr, khawd-ehg kheh awr le. Mar vid che che awr lehr, awg suhx ted ceng law lehg. Ned chaq chiz teq pa haq liz kand pax awg khuhn yawd tawd pid lehq i hehd na yug che yaog,” lehz i hehd te ghad he lehq te ghad koz daq che yaog.
28 Yawd ved awg lawn teq pear lehax Gar liq lehd muhd mig awg kag gha lia lo buhg veh che yaog.
Sid monr ve awg pi ma haq Yer suq ghu na vid che
29 Teq pear lehax i hehd bon lawg kig awg khuhn tuhz kae lehq, Yar koq he lehq Yod hanr geh Sid monr he lehq Anr drehr teq pa ve yehg khuhn gehe che yaog. 30 Sid monr ve awg pi ma kaz nag lehq yuhq chehd che yaog. Yawd ved awg lawn Yer suq haq i hehd har naq koz vid che yaog. 31 Yer suq lag lehq, yad mid u ve laq kuhr haq yug lehq tuag vid che yaog. Yawd ved kaz nag che na vehr lehq, yawd i hehd haq te car te taw vid che yaog.
Chaw nag laex ghad haq ghu na vid che
32 Muhd ni kehg vehr lehq muhd sux naz vehr tez huh, nag che guhg che chaw awg gha lia he lehq ned geh che chaw teq pa haq Yer suq chehd lo sir veha lar che yaog. 33 Med yad awg gha lia ghaz mir khuh awg pad huh phoz chehd chehd che yaog. 34 A nar laex ceng te nag chehd che chaw kha peh haq yawd ghu na vid lehq, ned teq pa haq liz ghaq kog vid che yaog. Ned teq pa yawd haq sir cheaq te lehq Yer suq i hehd haq tawd maq yaw cuh vid.
Yer suq bon ca mar tod che
35 Muhd sawx ted naq, muhd ma thid ser huh, Yer suq tuag lehq heh pir khuhn kae lehq, u huh bon lawg chehd che yaog. 36 Sid monr he lehq yawd geh chehd che awg chawd teq pa Yer suq haq ghaq ca che yaog. 37 I hehd Yer suq haq mawg che te yand, “Chaw awg gha lia nawg haq ca chehd che yaog,” lehz yawd haq koz vid che yaog.
38 Yer suq i hehd haq koz vid che, “Awg pad awg ki huh cawg che med khaz teq pa haq liz ngag bon gha mar vid tug awg nuz awr kae veg. Awg lawn ghod ver, che kheh te tug ngag lag che yaog,” lehz yawd kawq koz vid che yaog.
39 Gar liq lehd muhd mig awg kag gha lia i hehd ve bon lawg kig teq pa awg khuhn yawd bon ca mar vid lehq, ned teq pa haq ghaq kog che yaog.
Khir tuq var haq Yer suq ghu na vid che
40 Khir tuq var te ghad yawd geh lag lehq nar kheh teh mi lar lehq koz che, “Nawg te gad ver, ngag haq daq vid kehg vid tug nawg te gha che yaog,” lehz Yer suq haq lawg khawx che yaog.
41 Yer suq yawd haq har kax lehq laq kuhr che lehq yawd haq vad lehq koz che, “Ngag te gad che yaog. Daq vid kehg vid-og,” lehz koz vid che yaog. 42 Teq pear lehax khir tuq a nar mehx vehr lehq yawd daq vehr kehg vehr che yaog. 43-44 Yer suq yawd haq tawd hehnd chawa koz vid che, “Awg lawn che ve chaw te ghad-eg haq liz ta ca koz vid. Nawg kae lehq paw khod haq nawg ved awg ton ca maw vid-eq.*1:43-44 ca maw vid-eq Ak 13:49 haq ngawx. Su mehz khuhd suhr huh sax khiz te tug, nawg daq vehr kehg vehr che awg pun Mod ser ve awg lid teh lar che heh, te tand tug ca tand vid-eq,” lehz Yer suq koz vid lehq teq pear lehax yawd haq koeq pe che yaog.
45 Kheh ma khuhd, yawd tuhz veh lehq awg lawn u ve haq hax ceh nux ca kaod koz vid lehq, awg kag gha lia awg khuhd buhg veh vid tug te che yaog. Kheh te cheaq te lehq Yer suq awr lehr med teq pa khuhn kha sehax phawd thi mehz thi ba ba te tod maq gha lehq, heh pir khuhn chehd chehd che yaog. Khar phawd chor phawd lo chehd che chaw teq pa yawd chehd lo lag che yaog.
†1:2 1:2 Ml 3:1
*1:2 1:2 cuh yad Yod hanr A kaz tur var haq koz che yaog.
†1:3 1:3 Isy 40:3
†1:5 1:5 Yawd danr lawg kax Par ler tid naq muhd mig khuhn cawg lehq, Yer ruq sar lehnr med haq 20 kid lod vid daq kig huh cawg che yaog. Mt 3:5 haq ngawx.
‡1:6 1:6 kar lar oq awg muh A mig thad ve Ed lid yaq liz kheh te che beg ke veg deh che yaog. 2Jm 1:8
§1:6 1:6 Par ceq … pehd ghig Cad tug che teq pa awr lehr daq kehg che cad tug phehq che yaog. Ak 11:21-22
*1:9 1:9 Nar sar rehq Yer suq chehd ir lag kig med phehq che yaog. Lk 2:39
†1:14-15 1:14-15 Yod hanr haq su pheh yug Mt 14:3 haq ngawx.
‡1:14-15 1:14-15 Ghig sa ve muhd mig Ni ma khuhn Ghig sa uq penr che haq koz che yaog. Mt 3:2
§1:21 1:21 Kar per nar unr Mt 4:13 haq ngawx.
*1:43-44 1:43-44 ca maw vid-eq Ak 13:49 haq ngawx.