Phid lid monr liq
Awg meh he lehq phehq peg che awg lawn
Phid lid monr vawr, Kaw law sehd med khuhn awg kag awr ve Khreq yad teq pa heh te lehq, awg ceg te che teq pa ve awg sehr phad phehq che yaog. Yawd ved awg ceg phehq che Awr ner sir muz, yawd ved mend nged khuhd ve phaw veh che yaog. Kheh te cheaq te lehq, Rod maq chaw ve awg lid awg khad khuhn ver, u kheh te chaw haq gha suh che lehax cawg che yaog. Kheh ma khuhd, Awr ner sir muz vawr, Pawd loq haq gha mawg daq lehq Pawd loq ha lehg che bon khuhd mar vid che haq te lehq yawd Khreq yad phehq vehr che yaog. U kheh te peg khaz nuhr yawd duhd chez lehq, yawd ved awg sehr phad chehd lo kawq koeq gad che yaog.
Buhq var he lehq buhq che awg yand
Pawd loq ngeh jad che liq che ve te koz haq A.D. 60 khuhq thad huh buhq lehq Awr ner sir muz he lehq Tud khiq haq pid lehq Kaw law sehd med lo fe vid che yaog.
A yed ir che awg lawn he lehq awg lawn kha peg
Pawd loq yawd awg ton liq che ve te koz buhq lehq, Phid lid monr haq lawg khawx lehq Awr ner sir muz haq awg ceg var te ghad heh te maq gha haq yug vid lehq, Yer suq Khreq awg khuhn a vix a nax heh te kawq haq yug vid tug awg pun lawg khawx che yaog. Awg lawn ghod ver, a meha Awr ner sir muz awr lehr, Khreq yad kawq phehq vehr lehq awg cehg mag awg bon cawg mad jad che yaog (Awr ner sir muz ghod che cuhx kig vawr, awg bon cawg che lehd koz che yaog. Ka nad nehax 10 he lehq 11 awg khuhn cuhx kig yug tuhz lar che haq ngawx).
Awg lawn nux
1. Awg kawd ve tawd (1-3)
2. Ghig sa ve awg bon haq chid muh lehq bon lawg che khuhd (4-9)
3. Awr ner sir muz awg pun Pawd loq lawg khawx che (8-21)
4. Awg leh med ve tawd (22-25)
1
Awg chawd haq duhd nuhd che tawd khuhd
1 Yer suq Khreq awg pun thawnr khuhn gha chehd che ngag Pawd loq he lehq a nig ve a vix a nax Tiq mod ser awr lehr, a nig geh kanx te chehd che haq che awg chawd Phid lid monr haq lehd ma koz, 2 a nig ved a nax ma A piz lehd ma koz, a nig geh teq geha bon phawd awr maq yad te chehd che Ar khid puq haq lehd ma koz, nawg ved yehg awg khuhn phawng daq chehd che Khreq yad awg mor haq liq buhq fea lar che yaog.
3 A nig ved Awr pa Ghig sa he lehq Jawd mawd Yer suq Khreq awr lehr, nig hehd teq pa haq duhd sa gad sa che he lehq awg bon awg sinx cawg vid-oq.
Phid lid monr yonr lehq haq che awg lawn
4-5 Nawg awr lehr, Jawd mawd Yer suq haq yonr lehq, Khreq yad awg gha lia haq haq che yaog lehz ngag gha kad cheaq te lehq, nawg awg pun ngag bon lawg che te yand, ngag ved Ghig sa awg bon haq khar thad liz ngag chid muh che yaog. 6 Ngag bon lawg che awr lehr, a nig geh teq geha Khreq haq nawg yonr cheaq te lehq a nig cawg lar che daq che awg ceng gha lia haq nawg kha sehax sir mad-ag tug awg pun ngag lawg che yaog. 7 A nax var-og, nawg ved haq pehnd cheaq te lehq, ngag ha lehg duhd sa jad che yaog. Awg lawn ghod ver, nawg haq te lehq Khreq yad teq pa ve ni ma awg ghad cawag che yaog.
Awr ner sir muz awg pun Pawd loq lawg khawx che
8 Kheh te lehq nawg te kenr te cawd che kanx haq te tug awg pun nawg haq te cuh vid tug Khreq awg khuhn ngag cuh yad phehq lehq tawd yaw tug ni ma tag che cawg cawd liz, ngag u kheh maq te hawg. 9 Chaw mawd phehq vehr lehq, a meha liz Yer suq Khreq awg pun thawnr khuhn gha chehd che ngag Pawd loq awr lehr, haq pehnd cheaq te lehq nawg haq lawg khawx che yaog. 10 Ngag thawnr khuhn chehd che awg yand awg khuhn co ha phawd awr ngag mar gha lar che ngag ved yad Awr ner sir muz awg pun ngag nawg haq lawg khawx che yaog. 11 (Yawd awr lehr, pon lag thad ver, nawg awg pun teq chaweh awg bon mad cawg liz, a meha nawg awg pun he lehq ngag awg pun awg bon cawg jad che yaog.)
12 Ngag haq jad che yawd haq ngag nawg chehd lo kawq peha lar che yaog. 13 Ha lehg che bon khuhd haq te lehq ngag thawnr khuhn gha chehd che awg yand khuhn, yawd nawg ved awg tan te lehq ngag haq ga tug, ngag yawd haq ngag geh chehd vid lar gad che yaog. 14 Kheh ma khuhd, awg bon cawg che awg ceng u ve haq ngag te cuh lehq te che maq gha phehq lehq nawg te gad lehq tea che heh phehq vid tug, nawg geh a khawag maq gha ser ver, ngag teq chaweh liz maq te gad.
15 Yawd nawg geh khar thad liz gha kawq chehd tug yawd nawg haq teq cuhx nehax gha phaz daq che lehq nar. 16 Kheh te lar che te pawz, yawd nawg geh kawaq che vawr, awg ceg heh lehax phehq che ma hez. Kheh ma khuhd, awg ceg haq keh lex lehq haq che a vix a nax heh phehq che yaog. Ngag awr lehr, yawd haq haq che yaog. A meha ngag yawd haq haq cheaq keh lex lehq nawg liz yawd haq haq cawd che yaog. Yawd awr lehr, nawg ved awg ceg phehq lehq Jawd mawd Yer suq awg khuhn nawg ved a vix a nax liz phehq che yaog.
17 Kheh te cheaq te lehq, ngag awr lehr nawg ved awg chawd cehg mag yaog, lehd koz lehq nig hehd sawnr lar ver, ngag haq haq yug che heh te lehq, yawd haq liz haq yug vid-oq. 18 Yawd nawg haq ted ceng cear te yaq che lehd ma koz, jeg ted ceng cear cawg che lehd ma koz, ngag ved jeg heh te sawnr laoq. 19 Ngag Pawd loq awr lehr, jeg u ve teq pa haq sehar tug yaog, lehz ngag awg ton buhq lar che yaog. Kheh ma khuhd, nawg awg ton ngag haq awg ceng gha lia sehar cawd che awg lawn vawr nawg ta lend mehr. Awg lawn ghod ver, ngag haq te lehq nawg Khreq yad phehq lar che yaog. 20 A nax var-og, Jawd mawd Yer suq awg pun ngag nawg geh awg bon ted ceng gha gad che yaog. Khreq awg khuhn a vix a nax phehq cheaq te lehq ngag ni ma sa tug a cehax ga tea laoq.
21 Nawg ngag ved tawd khuhd haq na yug tug yaog, lehz ngag yonr cheaq te lehq, ngag nawg haq liq buhq ax che yaog. Ngag lawg che haq keh liz nawg tea tug yaog, lehz ngag sir chehd che yaog. 22 Kheh te lehq ted ceng liz, ngag awg pun chehd kig awg bawehd a cehax ca ghua laoq. Awg lawn ghod ver nig hehd bon lawg cheaq te lehq, Ghig sa ngag haq nig hehd geh te pawz gha kawq lag cuha tug yaog, lehz ngag duhd law chehd che yaog.
Awg leh med ve tawd
23 Yer suq Khreq haq te lehq, ngag geh teq geha thawnr khuhn chehd lar che Ed par phar raz awr lehr, nawg haq duhd nuhd chehd che yaog, lehz tawd sanr fea lar che yaog. 24 Ngag geh teq geha kanx te chehd che chaw teq pa Mar koq, Ar rir tar khuz, Der maz he lehq Lud kar i hehd teq pa liz, nawg haq duhd nuhd chehd che yaog, lehd koz tawd sanr fea lar che yaog.
25 Jawd mawd Yer suq Khreq ve awg bon awg sinx nig hehd geh cawg vid-oq.