2
Yer suq awg ceg heh te lag che
1 Kheh te lehq, Khreq awg khuhn awg ghad gha che ted ceng lehd ma koz, haq pehnd che awg khad haq kae che ted ceng lehd ma koz, Awg ha phu awg khuhn awg chawd te che ted ceng lehd ma koz, su haq duhd ngawx lehq har kax vix che ted ceng lehd ma koz, che teq pa nig hehd awg khuhn cawg ver, 2 ngag ha lehg gha vid tug che kheh teog. Nig hehd ni ma teq sir lehax, haq daq pehnd daq che ted ceng lehax he lehq ni ma duhd khad tar khad te khad lehax cawg vid-oq. 3 A thoq ted ceng te che lehd ma koz, tanr daq ghawg daq lehq ni ma ir che awg khuhn taq te. Kheh ma khuhd, ni ma nud nehg che awg khuhn, te ghad he lehq te ghad a sug yawd awg ton haq keh su haq tar ir tar muh vid-oq. 4 A sug yawd awg ton haq caz daq che awg lawn teq pa haq lehax ta duhd ngawx. Kheh ma khuhd, su haq caz daq che awg lawn teq pa haq liz duhd ngawx-oq. 5 Yer suq Khreq ni ma tar che heh, nig hehd liz tar-oq.
6 Yawd awr lehr Ghig sa ve awg hoq awg han awg khuhn chehd liz,
Ghig sa haq sur daq che ted ceng haq
hax ceh nux yug cid lar cawd che yaog lehd yawd ma duhd.
7 Kheh ma khuhd, yawd ved awg mig awg phond haq kuhz teh lar haz lehq,
awg ceg ve awg hoq awg han haq veq deh lehq,
chaw yad haq sur daq vid lar che yaog.
8 Kheh te lehq, yawd chaw yad phehq cehg mag che haq su gha mawg che yaog.
Yawd awg ton haq yawd tar nehg lehq, suh thad kha gag na yug che yaog.
Suh che u ve awr lehr, laq kan thag huh khanr suh che ted ceng yaog.
9 Kheh te cheaq te lehq, Ghig sa awr lehr yawd haq
awg ceng gha lia awg thag lo yug ir yug muh vid lehq,
awg meh awg gha lia haq keh
ir jad daq jad che awg meh yawd haq pid lar che yaog.
10 Awg lawn ghod ver, muhd nuh maq lo chehd che lehd ma koz,
mig gig koar lo chehd che lehd ma koz,
mig gig awg huhx lo chehd che lehd ma koz, kha chehd che awg gha lia
Yer suq ve awg meh haq nar khehr gha teh mi lehq gha tar ir tug yaog.
11 Kheh te lehq, Awr pa Ghig sa awg mig awg phond gha tug
Yer suq Khreq awr lehr Jawd mawd phehq che yaog lehz,
mawq kaw awg mag gha lia sax khiz gha khanr tug yaog.
Mig gig koar awg ghiz paw chehd che
12 Kheh te lehq, ngag haq che chaw teq paog, nig hehd khar thad liz ngag ved tawd haq na yug che heh, ngag nig hehd geh chehd che te yand lehax ma hez, lex lehq a meha ngag nig hehd geh ma chehd che awg yand liz, nig hehd a sug yawd awg ton thaer khuhq che haq gha tug, kuhz che ched che awg khuhn hax ceh nux teog. 13 Awg lawn ghod ver, Ghig sa ni ma cawd che haq nig hehd te gad che ni ma cawg tug he lehq te gha tug, nig hehd awg khuhn yawd te chehd che yaog.
14 Nig hehd kha te che awg gha lia awg khuhn, khand che he lehq tawd kawq sang che ted ceng taq te. 15-16 U kheh te ver, nig hehd vend bax tar kig mad cawg lehq, su haq mad yaq vix che chaw phehq tug yaog. Ni ma kuhq che he lehq vend bax mad jad che chaw che teq co awg khuhn, nig hehd awr lehr yaq kig mad cawg che, Ghig sa ve awg yad awg dug phehq tug yaog. Co ha teq vid gha che tawd khuhd haq nig hehd yug cid lar lehq, awg ghiz paw che heh mig gig koar lo ve chaw che teq co haq nig hehd paw vid chehd che yaog. Kheh te lehq, Khreq ve awg ni teq ni gaeg ver, ngag ni ma ir kig che kheh te cawg tug yaog. Ngag cex che awr lehr, kheha phehq che ma hez. Ngag kanx te nar che liz, kheha phehq che ma hez.
17 Nig hehd ve yonr che ted ceng awr lehr, tand tug heh phehq che yaog. Tand tug u ve awg thag lo ngag haq nger puhr liz ngag ha lehg jad lehq, nig hehd awg gha lia geh teq geha ha lehg che yaog. 18 U ve heh te lehq nig hehd liz ha lehg lehq, ngag geh teq geha ha lehg chehd-oq.
Tiq mod ser he lehq Eg par phawd diq awg lawn
19 Nig hehd awg lawn ngag gha sir ver ngag awg ghad cawg tug, maq muh tand Tiq mod ser haq nig hehd chehd lo lag peha tug yaog lehz, Jawd mawd Yer suq awg khuhn ngag duhd law lar che yaog. 20 Awg lawn ghod ver, yawd heh te lehq ni ma cawg che chaw te ghad-e liz ngag geh mad cawg. Yawd awr lehr, nig hehd awg pun daq che ted ceng haq awg cehg mag duhd ngawx vix che chaw te ghad phehq che yaog. 21 Awg kag awr ve chaw teq pa awr lehr, Yer suq Khreq awg pun daq che ted ceng haq maq ca lehq, a sug yawd awg ton awg pun daq che ted ceng haq lehax ca che yaog. 22 Kheh ma khuhd, Tiq mod ser awr lehr awg lid awg khad khawd-ehg taw maq daq che haq nig hehd sir che yaog. Yad par te ghad awr lehr, awr pa geh teq geha kanx te che heh, ha lehg che bon khuhd buhg veh tug yawd ngag geh teq geha kanx te che yaog. 23 Kheh te lehq, su ngag haq khawd-ehg kheh tea tug haq ngag gha sir che te yand, teq pear lehax yawd haq nig hehd chehd lo lag peha tug yaog, lehz ngag duhd law lar che yaog. 24 Maq muh tand ngag awg ton nig hehd chehd lo lag tug yaog lehz, Jawd mawd Yer suq awg khuhn ngag kha nehax yonr chehd che yaog.
25 Ngag ved a vix a nax Eg par phawd diq haq nig hehd chehd lo kawq lag peha cawd che yaog, lehd ngag duhd lar che yaog. Yawd awr lehr, ngag geh teq geha kanx te lehq ngag geh teq geha bon phawd awr ve maq yad phehq che yaog. Nig hehd ve awg tan liz te lehq, ngag lor che teq pa haq ga sehr phad liz phehq che yaog. 26 Yawd nig hehd awg gha lia haq ni ma har jad lehq, yawd nag che awg lawn haq liz nig hehd gha kad cheaq te lehq, yawd duhd har jad che yaog. Kheh te cheaq te lehq, ngag yawd haq nig hehd geh kawq lag peha che yaog. 27 Suh vehr lawq lawq yawd hax ceh nux maz nag che yaog. Kheh ma khuhd, Ghig sa yawd haq har kax che yaog. Yawd haq lehax har kax che ma hez. Ngag duhd har chehd che haq keh lex lehq maq gha duhd har tug, ngag haq liz Ghig sa har kax ax che yaog. 28 Kheh te lehq, nig hehd yawd haq gha mawg che te yand nig hehd gha ha lehg tug lehd ma koz, ngag duhd har che a cehax khehd-ag tug lehd ma koz, ngag yawd haq nig hehd chehd lo har naq kawq lag peha che yaog. 29 Jawd mawd Yer suq haq te lehq, ha lehg tug kha peh cawg che awg khuhn yawd haq haq yur-oq. Chaw che kheh te che teq pa haq yawz yawz yan yan teo. 30 Awg lawn ghod ver, nig hehd ngag haq ga lar che awg khuhn lor che cuz che teq pa haq te peh lawq tug awg pun, yawd ved a saq tand lehq, Khreq ve kanx haq te che haq te lehq, yawd a cehx mehz ver suh vehr che yaog.