Pheq mar liq
Awg meh he lehq phehq peg che awg lawn
Awg yand u ve awg khuhn, Rod maq muhd mig kanx te par teq pa awr lehr, muhd mig yad teq pa haq tanr bax nex lehq, Jawd mawd nux Kehd sar haq a kor pi che awg lid haq haq yug cuh che yaog. Khreq yad teq pa vawr, “Jawd mawd Yer suq awr lehr, Ghig sa yaog. Jawd mawd Kehd sar ma hez hawg,” lehd koz che haq te lehq i hehd du deh che haq gha khanr jad che yaog. Kheh te cheaq te lehq, Khreq yad awg mor khuhn chehd che Khreq yad ted pehg pehar tu lehq, su haq ca kaod jehg vid lehq Rod maq Jawd mawd nux lor che heh te vid lehq cawd daq vid tug te gad che yaog. Duhd khad che ve ted mag Khreq yad ve yonr khad awg khuhn maq gha soq saq mad ser huh, har naq gha gu cawd che yaog. Ma hez ver, awg ghud suhr phawd awr kawz tug ir jad che du deh che awg ni awg haz teq pa awg khuhn, Khreq yad teq pa hox yeg gha tug Ghig sa khuhn yonr yeg che ni ma haq te lug gha che yaog.
Buhq var he lehq buhq che awg yand
Liq che ve haq buhq var yawd ved awg meh Yod hanr yaog ghod lehq 4 pawz kha gag koz lar che yaog. Yer suq muhd nuh maq khod-aq lo kawq veh peg khaz nuhr niq ha khuhq kheh thad huh haq tanr lehq, liq che ve haq cuh yad Yod hanr buhq lar che yaog lehd su u kheh te yonr lag che yaog. Cud yiq cawg lehq liq hend muh che chaw teq pa liq che ve te koz haq A.D. 95 khuhq kheh thad huh buhq lar che lehd koz lar che yaog.
A yed ir che awg lawn he lehq awg lawn kha peg
Yod hanr liq che ve te koz haq buhq lehq, daq kehg thed cawd che Khreq yad teq pa jawd mawd nux Kehd sar ve awg han sax ho haq a kor maq gha pi tug, i hehd haq awg ghad kha sehax pid che yaog. Yawd i hehd haq Ghig sa he lehq ned haeg Sar tanr awg leh med te pawz maq bawz daq che awr lehr awg cehg mag lag gag tug yaog lehd yawd i hehd haq koz vid che yaog. Ned haeg Sar tanr vawr, yonr che chaw teq pa haq hax ceh nux maz kha muhd kha na te vid lehq du deh vid tug yaog. Kheh liz, i hehd yonr che chaw teq pa vawr, suh thad kha gag gha yeg chehd che yaog. Yonr che chaw teq pa awr lehr, co ha phawd awr lug che sez che kuhz tug haq maq gha phud tug, Ghig sa i hehd haq haq sax lar che yaog. Kheh te lehq Khreq ni pawz te pawz kawq yaq che te yand, i hehd thed che cawd che chaw phehq che yaog lehz maw vid tug yaog. Chaw haeg teq pa haq co co taer taer te lug vid lehq Ghig sa ve chaw teq pa awr lehr co co taer taer awg mig awg phond he lehq Ghig sa ve awg bon awg sinx khuhn gha gehe tug yaog. Liq che ve te koz awg khuhn, cuhx kig nax jad lehq na gha tug har jad che Ghig sa pheq mar lar che awg hez teq pa kha peh vad-ag cawg che yaog.
Awg lawn nux
1. Yer suq Khreq, Khreq yad awg mor 7 mor awg khuhn chehd che (1:1-20)
2. Khreq yad awg mor 7 mor haq liq buhq vid che (2:1-3:22)
3. Kaw jaw, Loq lar che liq daw he lehq Yawg nehax (4:1-5:14)
4. Cunr dawz lar che 7 mag (6:1-8:1)
5. Behd mez tug 7 mag (8:2-11:19)
6. A yed ir che chaw he lehq phehaq che awg ceng teq pa (12:1-14:20)
7. Mawq khu 7 mag (15:1-16:21)
8. Bar bud lunx med: Haeg jad che meh mar lanx nux (17:1-19:5)
9. Yawg nehax ve khehx cad che pawehd (19:6-10)
10. Jawd mawd Yer suq Khreq kawq yaq che (19:11-21)
11. Teq hinx khuhq ve awg yand (20:1-6)
12. Sar tanr gha lug gha sez che (20:7-10)
13. Phux-u ghad te che kaw jaw nux mehz khuhd suhr huh suhx jehg che (20:11-15)
14. Muhd nuh maq awg suhx, mig gig awg suhx, Yer ruq sar lehnr med awg suhx (21:1-22:5)
15. Awg leh med ve tawd (22:6-21)
1
Yer suq Khreq pheq mar lar che awg lawn teq pa
Yer suq Khreq pheq mar lar che awg lawn teq pa liq che awg khuhn lo buhq lar che yaog. Maq muh tand ver phehaq tug awg lawn teq pa Yer suq Khreq awr lehr, yawd ved awg ceg teq pa haq maw vid tug, pheq mar lar che awg lawn che teq pa Ghig sa Yer suq haq pid lar che yaog. Ghig sa awr lehr yawd ved muhd nuh maq cuh yad te ghad haq peha lehq, yawd ved awg ceg Yod hanr haq awg lawn che teq pa sir vid mawg vid che yaog. Ghig sa ve tawd khuhd he lehq Yer suq Khreq sax khiz khanr lar che awg lawn haq Yod hanr yawd kha gha mawg che heh sax khiz khanr che yaog. Ghig sa ve cuh kar var ve tawd khuhd che haq ghawn mar che chaw lehd ma koz, buhq lar che teq pa haq gha kad lehq yonr che chaw teq pa lehd ma koz, awg bon ir che yaog. Awg lawn ghod ver, awg yand gag vehr tez che yaog.
Khreq yad awg mor suhr mor haq liq buhq vid che
Ngag Yod hanr awr lehr, Ar siq muhd mig awg khuhn cawg che Khreq yad awg mor suhr mor haq liq buhq ax che yaog. A meha liz, pong lag thad liz, lag tug awg yand awg khuhn lo liz, teq chehd che te ghad geh lo lag che awg bon awg sinx he lehq duhd sa gad sa tug lehd ma koz, yawd ved kaw jaw mehz khuhd suhr lo chehd chehd che awg ha suhr mag geh lo lag che awg bon awg sinx he lehq duhd sa gad sa tug lehd ma koz, kar tiq yeg che sax khiz khanr sehr phad Yer suq Khreq geh lo lag che awg bon awg sinx he lehq duhd sa gad sa tug lehd ma koz nig hehd geh cawg vid-oq. Yer suq Khreq awr lehr, suh vehr che chaw teq pa awg khuhn awg kawd maq kawq teq tuag che te ghad phehq lehq, mig gig khod-aq lo ve khux hawx khand teq pa haq uq penr sehr phad phehq che yaog.
Yawd a nig haq haq lehq, yawd ved awg suhr haq cud lehq a nig ved vend bax haq phehd kha ax peor. A nig haq yawd ved muhd mig yad te vid tug lehd ma koz, yawd ved Awr pa he lehq yawd ved Ghig sa ve paw khod teq pa phehq vid tug lehd ma koz, yawd te ax vehr che yaog. Co co taer taer yawd haq awg mig awg phond he lehq kand pax cawg vid-oq. A meng.
Ngawx lor, yawd awr lehr mog geh teq geha yaq tug yaog. Mehz sir awg gha lia he lehq yawd haq gehd pawnr jaw che chaw teq pa liz yawd haq gha mawg tug yaog. Mig gig khod-aq lo chehd che chaw ceng awg gha lia yawd haq te lehq gha paz huhg tug yaog. Che kheh phehaq tug yaog. A meng.
“Ngag awr lehr Ar lar phaz he lehq Aw me gaz phehq che yaog,”* 1:8 Ar lar phaz he lehq Aw me gaz phehq che yaog Co co taer taer teq chehd lehq awg ceng gha lia ve awg khiz penr he lehq awg leh med phehq che lehd koz che yaog. lehz Jawd mawd Ghig sa koz che yaog. Yawd awr lehr, a meha liz, pong lag thad liz, lag tug awg yand awg khuhn lo liz teq chehd che Kand pax ir sehr phad phehq che yaog.
Chaw yad ve Yad phu haq Yod hanr gha mawg che
Ngag awr lehr, nig hehd ve a vix a nax Yod hanr yaog. Yer suq Khreq awg khuhn tuq che khanr che ted ceng haq lehd ma koz, Ghig sa uq penr che ted ceng haq lehd ma koz, yeg khanr che ted ceng haq lehd ma koz, ngag nig hehd geh teq geha awg chawd phehq chehd che yaog. Ngag awr lehr Ghig sa ve tawd khuhd mar lehq, Yer suq awg lawn sax khiz khanr che haq te lehq, a kaz khuhn cawg che Par moq muhd mig 1:9 a kaz khuhn cawg che Par moq muhd mig Ed fed suq med awg hawx phawd awr 100 kid lod heh vid kig huh cawg che yaog. huh ngag gha chehd lar che yaog. 10 Jawd mawd Yer suq ve awg ni 1:10 Jawd mawd Yer suq ve awg ni Yer suq kawq teq tuag che awg ni haq koz che yaog. Cy 20:7, 1K 16:2 teq ni thad Awg ha phu awg khuhn ngag chehd lehq, behd mez che awg khuhd buhg che heh te lehq, ngag kuhr tehx nuhr phawd awr lo hehnd jad che tawd khuhd haq ngag gha kad che yaog. 11 Tawd khuhd u ve awr lehr, Nawg gha mawg che teq pa haq liq khuhn buhq lar lehq, Khreq yad awg mor che suhr mor haq fe vid-oq. Ed fed suq, Sa mud ra naz, Per rar gar, Sar tir rehd, Sar diq, Phiq lar der phiq he lehq Lawr dir kiq, awg mor che teq pa haq fe vid-oq lehd koz ax che yaog.
12 Ngag haq tawd yawa che phad haq gha mawg tug ngag kuhr phuhz ngawx che te yand, si a mir khehd suhr mag haq ngag gha mawg che yaog. 13 A mir khehd u ve teq pa awg kaw jen huh chaw yad ve Yad phu§ 1:13 chaw yad ve Yad phu Mir six yaq (Yer suq) haq koz che yaog. Dyl 7:13, Mk 8:31 haq sur che chaw te ghad haq ngag gha mawg che yaog. Chaw u ve awr lehr, khi kud huh kha gag yehg che a poq veq deh lehq, yawd ved ni ma pi huh si sehx hang caz chuhq lar che yaog. 14 Yawd ved a kor he lehq yawd ved cuhz kheh muh awr lehr, phu che yawg muh heh te che lehd ma koz, a nge heh te che lehd ma koz, phu che yaog. Yawd ved mehz sir awr lehr, a mir ha kha sur suar phehq che yaog. 15 Yawd ved khi kud awr lehr, a mir awg khuhn lo lawr lar che tawnd sia haq sur daq che yaog. Yawd tawd yaw che awg khuhd awr lehr, a kaz ghig bad mad jad che awg khuhd hehnd che haq sur daq che yaog. 16 Yawd ved laq kuhr laq yaq awr pax awr huh muhd ki sir suhr mag yug cid chehd che yaog. Yawd ved mawq kaw awg khuhn awg vid ni phawd cawg che cuhz jad che a teh ted mag tuhaz che yaog. Yawd ved mehz khuhd awr lehr, muhd ni ghiz heh te lehq pawd daq jad che yaog.
17 Yawd haq ngag mawg che te yand, ngag awr lehr suh vehr che chaw te ghad heh te lehq yawd ved khi pad huh kuhd chehd che yaog. Kheh ma khuhd, yawd ved laq kuhr laq yaq awr pax awr ngag awg thag huh yawd tar lehq koz ax che, “Ta kuhz. Ngag awr lehr, awg kawd ped maq he lehq awg leh med phehq che yaog. 18 Teq chehd che te ghad liz ngag phehq che yaog. Ngag suh vehr liz, ngawx lor a meha co co taer taer ngag teq chehd che yaog. Suh che ted ceng ve sawnd he lehq suh muhd mig ve sawnd* 1:18 suh muhd mig ve sawnd Suh che ted ceng awg thang huh kand pax cawg che haq koz gad che yaog. Mt 16:19 haq ngag geh cawg lar che yaog. 19 Kheh te cheaq te lehq, nawg gha mawg peg che teq pa haq lehd ma koz, a meha phehq chehd che teq pa haq lehd ma koz, awg khaz nuhr phehq lag tug teq pa haq lehd ma koz, buhq lar-oq. 20 Ngag ved laq kuhr laq yaq awr pax awr huh nawg gha mawg peg che muhd ki sir suhr sir he lehq si a mir khehd suhr mag ve khuhd ceh lar che cuhx kig awr lehr che kheh yaog. Muhd ki sir suhr sir awr lehr, Khreq yad awg mor suhr mor ve muhd nuh maq cuh yad teq pa phehq lehq, a mir khehd suhr mag awr lehr, Khreq yad awg mor suhr mor phehq che yaog.
 

*1:8 1:8 Ar lar phaz he lehq Aw me gaz phehq che yaog Co co taer taer teq chehd lehq awg ceng gha lia ve awg khiz penr he lehq awg leh med phehq che lehd koz che yaog.

1:9 1:9 a kaz khuhn cawg che Par moq muhd mig Ed fed suq med awg hawx phawd awr 100 kid lod heh vid kig huh cawg che yaog.

1:10 1:10 Jawd mawd Yer suq ve awg ni Yer suq kawq teq tuag che awg ni haq koz che yaog. Cy 20:7, 1K 16:2

§1:13 1:13 chaw yad ve Yad phu Mir six yaq (Yer suq) haq koz che yaog. Dyl 7:13, Mk 8:31

*1:18 1:18 suh muhd mig ve sawnd Suh che ted ceng awg thang huh kand pax cawg che haq koz gad che yaog. Mt 16:19