2
Asehek nyala Krais udu bada kei tondreh
1 Aha nadu tine, jo eme hawe aha mene asehek sahou handru ta Kindrei ewek taha badeh, jo basehek sahou lawe-en bala buku iri lau ta tanan asehek
bwe. 2 Jo udu hawe aha mene, jo amekes budon tek ta mani iri lakou solo-an. Budon tek mara-ei badeh, ta asehek nyala Jises Krais le, hawe imek tan udu bada kei tondreh. 3 Jo mene ewek hawe aha ma mwena badeh, jo se nyamuk bwe-en. Jo totoreh ma jo inoh tinan labai. 4 Ma sahou jo mene asehek, ma sahou mwasin mene jo ndratiye, jo bamekes bala buku ta sahou tiri lau ta tanan badu kon munyak bwe, ta ariu budon taha eme ta tanan tek le, bwe. Jo badeh, leheya boto-on ta Malawin Ndrabun ewek taha, ma aha atehei budon taha mari in le ta sahou doh. 5 Jo amekes i buku doh, tasah jo bwalek tanan tiri lau badu munyak kabwidi budon taha, jo aso-ok boto-on ta Kindrei le kamekes iri budon doh.
Malawin Ndrabun ta Kindrei edeu iri budon ma tanan mwasin eme tataha
6 Handru, ahi aposel atiye sahou ta tanan handru ili tiri lau, ale iri ndra tinan ndra-en. Arile, tanan dah ta kon munyak bwe. Ma tanan dah ale, iri lau boto-on ta atondrok kon munyak badeh, bakohok bwe. Iri boto-on nane doh nyamu iri iu laleyah. 7 Iri tanan jo asehek badeh, iri tanan ndrabun ta Kindrei mene aton ta lau. Kindrei bamekes kon munyak bwe le, iy badeh, ndratandrakan tanan doh bwena labai, ta aseben ma ta akohok taha ala bolo lomadan udu kandrah. 8 Iri kabin marakon badu kon munyak tana iri se tanan dah bwe. Buku iri katanan badeh, iri winiyan batahi Laban badu kandrah bala bada kei tondreh bwe. 9 Arile idah amwenen ta buk ndrabun ta Kindrei asehek,
“Lakou mada taha banyolom bwe, ma ndranye taha banuhun bwe, ma basahan ta budon ta lau bwe le, iri lakou mwasin le badeh, Kindrei ndralokowaniy, tiri lau le aso-ok iy handru.” Aisaya 64:4
10 Handru, tanan doh mene aton, arile Malawin Ndrabun ta Kindrei le amwenen eme leheyaniy eme tataha. Tasah, Malawin Ndrabun tanan labai ta anyolom lakou mari, ma iy tanan labai ta anyolom iri budon ma kandriyen mari ta Kindrei mene aton ta mada iri lau. 11 Ndramak ari ja winiyan bala tanan ta budon ta iy ari ja bwe. Malawin mwasin ta ndramak doh udu bolo odan le amwenen, iy le ari tanan. I buku le, ari ndramak bala tanan ta budon ta Kindrei bwe le. Malawin Ndrabun ta Kindrei le amwenen badeh, tanan. 12 Taha bakohok malawi munyak dah bwe, arile Kindrei ndratehei ndrame tataha Malawin Ndrabun tan amwenen. Idoh le bwidi taha babudon bala
buku le budon ta lau marakon badu kon munyak abudon bwe. Tasah idoh ale bwidi taha winiya seleyani iri nyosowan ale Kindrei ndratehei ndrame tataha. 13 Iri sahou marakon ahi asehek badeh, ta Malawin Ndrabun ta Kindrei leheya eme tahi. Ari ndramak baleheya ahi ta tanan dah bwe. Malawin Ndrabun le nane doh aseben ahi ta leheya iri lakou mwasin ili tiri lau nane, Malawin Ndrabun udu hawe iri. 14 Are lau, Malawin Ndrabun bado hawen bwe, iy kameh winiyan bakohok iri lakou ta Malawin Ndrabun bwe. Tasah, iy abudon anya, ndramas kede-eh lakou laleyah. Eme ma, iy bala tanan lakou doh bamwenen bwe, tasah Malawin Ndrabun bado hawen ta aseben iy bwe. 15 Oro mwan ma badih nane, Malawin Ndrabun udu hawe oro, badeh, oro winiyan seleyani iri lakou marakon ta Kindrei. Arile, iri lau nane, Malawin Ndrabun bare hawe iri bwe, iri winiyan baseleyani lakou ere ndrine oro mwan ma badih nane, bwe. Ma iri ale winiyan bala tanan lakou ta Kindrei mwasin bwe.
16 Buk ndrabun ndremenya i buku doh,
“Are lau handru, iy ndratanan iri budon marakon ta Laban?
Ma, are lau winiyan batanau iy ta sasah?” Aisaya 40:13
Arile, taha ndratanan saba lakou Krais abudon.