La-ukei ta
PITA
ramen iy atorou ma mwena
Sahou Tanan
Pita atorou la-ukei dah ta atadau budon tiri lau ta Kindrei ale bwese maha-an laba tinan labai. Iy anya, iri lau ta Kindrei badeh, kabudon kili hamon ja ta sahou mwasin ta Jises Krais. Jises mene imek ma iy amak eme awas ja, ma iy mene tandrakan buku iy kameh eme hamon ja. Iri badeh, kabudon tandrakan doh ma katondrok iy eme.
Handru, iri lau ta Kindrei bwese maha-an, arile lakou doh asahan badeh, ta none budon tiri. Eme ma budon tiri badeh, kabadok kili, kili winiya le Krais eme hamon ja, ma na bolo len doh iri kameh akohok ndramas mwasin handru.
Iri Sahou Tinan
Sahou sekesek ma hawe salom (1:1-2)
Tiye kati tanan ta atondrok (1:3-12)
Manyah buku lau ta kindrei ndrabun (1:13–2:17)
Taha ka-en le hamon ta mweleke kati Krais (2:18-25)
Are asahan lau ta Kindrei handru iy kameh bwese maha-an (3:1–4:19)
Sahou batanau tiri lau a-en mwena ta lahou ta Kindrei (5:1-11)
Sahou sekesek ta sahou ano (5:12-14)
Taha asahan lau mwan ma badih handru ta Kindrei, ma taha badeh, kamekes iri kandriyen mwasin ma atondrok iri lakou mwasin taha anya kakohok
1
(Kalan 1:1–2:10)
Jo Pita, jo aposel ta Jises Krais, jo atorou la-ukei dah ewek taha lau mwan hawe badih handru ta Kindrei. Aha ndraseker i buku iri lau ta ateheh areu bolo kon munyak tinan tiri Pontus, Galesiya, Kapadosiya, Esiya, ma hawe Bitiniya. Ma mwena handru badeh, Kindrei tama taha, iy ndratanan aha, ma iy ndramesekei aha ndrasahan iri lau tan handru. Malawin Ndrabun ndrasebenei aha ta adeu koha aha mari i ta Kindrei, ma bwidi aha ndrasahan randrah labai ja. Ya aha winiyan an hamon ta sahou handru ta Jises Krais. Ya iy kameh winiyan sikine kandriyen ndra-in taha na ndraye Jises mene amou udu bada kei tondreh.
Jo aso-ok Kindrei badeh, kabwidi ndrine aha kamwenen ma kudu le kudu mara-ei.
Kohan mwasin handru badeh, atondrok taha ereu kandrah
Taha badeh, katudun nyara Kindrei, iy badeh, tama tinan tataha Jises Krais. Iy badeh, tikisi taha tinan labai, ma iy sebenei taha i buku doh: Iy badeh, mene mete-ei Jises Krais amak eme awas ja. Eme ma, na san le doh, taha are awas kahis ta atondrok Kindrei ta akohok taha ta ala ado hawen. Eme ma taha atondrok Kindrei ta akohok taha ta ala kandrah hawen, ma akohok manyah mwasin handru. Manyah nane doh badeh, bala buku lakou badu kon munyak kameh abola o andra-i iu laleyah, bwe. Iy kameh udu kandrah, ta udu le buku don ai. Na boto-on tan le, Kindrei badeh, atondrok aha ta maha-an hawe none anya kasahan. Tasah, aha badeh, atehei budon taha mara-ei in tan, ma iy atondrok aha na bolo len mara-ei. Tasah, iy anya kakohok aha mara-ei kala kado hawen, ma iy kameh amekes iri lakou mari doh, ewek taha, ta Jises kameh eme hamon ja.
Ya, aha badeh, abudon ta lakou doh kameh asahan, ma aha winiyan sekesek labai ta aliy. Handru, na idah badeh, len lawe-en bwe, Kindrei atehei iri maha-an mara-ei doh ewek taha. Arile, aha satehei budon taha sala ta aliy. Kora-on aha karuwani sekesek mwasin nane doh. Iri maha-an doh badeh, ta none iri budon taha le. Idoh i buku none le bek nyikilikin iri aloh gol; gol doh badeh, lakou ari mwasin labai. Arile, iri asun na jih ta none gol handru deh, bwe. Ma iri budon tataha badeh, sakalawi gol nane ja. Tasah, gol kameh andra-i. Handru, budon tataha badeh, buku none gol nane, arile Kindrei badeh, baso-ok gol nane bwe. Tasah, gol badeh, lakou badu kon munyak, ma gol kameh andra-i. Arile, Kindrei aso-ok budon taha boto-on ki-in tan. Eme ma, iy ndraruwani minen sese ta la-u taha, ma iri maha-an solo-an ndrasahan taha. Idoh, ta none aha le, buku aha an hamon ta Krais deh bwe. Na len Jises eme hamon, iri lau mari badu kon munyak kameh anyolom iy. Ma, i buku none aha ndratehei budon taha boto-on in tan, iy kameh kuhi aha ala bolo nyosowan mwasin. Ma iy kameh sekesek taha handru, ma bwese-ei nyara aha ili loken handru. Handru, aha mara-ei badeh, batou Jises bwe le, arile aha aso-ok iy labai, eme ma na idah, aha batou iy bwe le, arile aha atehei ndrine aha ma budon taha mara-ei, ma sekesek taha laba tinan labai in tan. Sekesek doh badeh, sakalawi iri sekesek mari badu kon munyak mara-ei, ya taha winiyan basehek na boho taha bwe-en! Tasah handru aha sekesek? Aha badeh, atehei budon taha boto-on labai i ta Kindrei, eme ma, kati budon taha doh anya kasahan keme lewan. I buku doh: Kindrei andrei aha ndrame hamon, buku none le iy mene ndratandrakan bwena.
10 Iri propet mene ndrasehek nyala iri kandriyen ta tikisiy nane ndrasahan taha. Iri badeh, takaleh ta atanan kati sahou ta Kindrei i buku doh: Tasah, iy anya kakohok taha kame hamon ja. 11 Malawin Mwasin ta Krais badeh, udu bolo iri propet, ma Malawin Mwasin asehek sahou i boho iri, ta iri sisi-in solo-an labai kameh Krais bwese, ma ta iy kameh akohok nyaran tinan ale. Iri propet badeh, abo gok boto-on ma ndremenya i buku doh, “Saba len handru iy ndramak ta akohok taha, kameh eme hamon?” Ma, “Saba lakou handru kameh asahan na bolo len doh?” 12 Arile, Kindrei leheyani iri propet, ta sahou oro asehek na boho oro, idoh winiyan basahan na len iri ado kon munyak dah, ma lakou nane doh kameh aseben iri bwe. Iy tiye toro ta saba lakou kameh asahan na bolo len hamon tiri mwan ma badih basahan kon munyak bwe le. Iri propet badeh, asehek sahou ta nyala iri lakou kameh asahan nadah, aha ndranuhun sahou mwasin badu boho iri lau mene ndrame ndrasehek taha ta aliy. Malawin Ndrabun ta Kindrei badeh, udu kandrah eme andri kon munyak, ma i la-u iri lau tan, ma iri ame atiye sahou mwasin doh kewek taha. Iri angelo badu kandrah ale, aso-ok labai ta akohok tanan ta kati sahou mwasin ta Krais.
Manyah taha kudu ndrabun, ma aha ka-en hamon ta kandriyen mwasin
13 Ya, budon taha kaleu kudu mwasin, ma aha kabudon tekedek taha kamwenen. Ya, aha katehei budon taha ki ta Kindrei ta abe-en iy, ta amekes iri lakou mwasin nane iy anya kedeu kewek taha. Idoh kameh asahan na len iri lau mari badu kon munyak anyolom Jises Krais eme hamon ja. 14 Aha kasahan ndramak ta anuhun sahou, tasah aha ndrasahan buku nadu Kindrei. Bwena mene aha budon mwasin bwe, ma aha an hamon ta budon ndra-in. Arile, na dah, aha sa-en hamon ta budon hawe kandriyen ndra-in taha bwena mene ja ai. 15 Arile, na idah, Kindrei ndraluhi aha, ma aha ndrasahan ndrala buku none nadun handru. Iy badeh, ndrabun, ma iy ari lomondra ndra-in bwe. Aha ndrasahan nadun, eme ma manyah taha kudu ndrabun, ma aha kamekes kandriyen mwasin buku le iy amwenen. 16 Sahou ta Kindrei tiye bwena i buku doh,
“Manyah taha kudu ndrabun, ma aha ka-en hamon ta kandriyen mwasin. Tasah, jo Kindrei, jo badeh, ndrabun labai.” Lebitikus 11:44-45; 19:2; 20:7
Kindrei konohei taha badeh, na luk tinan labai
17 Taha aloh Kindrei badeh, tama taha, buku taha asolom i tan. Iy badeh, ndramak ta ereu bwena ta anuhun sahou, ma iy kameh edeu sihine taha lau mari, amwenen le ta gok nane taha amekes. Ma iy badeh, babudon ou saba lau handru, ma iy kameh winiyan batobolowe budon tan bala bame, bwe. Iy badeh, anuhun sahou tataha mari na kati budon tan ari le. Budon tan badeh, mwasin labai. Eme ma, len mari taha areu kon munyak dah, taha kabeleben Kindrei kamwenen handru. 18 Ehe, aha katondrok aha kamwenen, ma ka-en hamon ta kandriyen mwasin. Tasah, bwena mene aha a-en hamon ta iri kandriyen ndra-in, aha mene akohok ta tubu aha iri, arile na dah, aha ndratana aha, Kindrei ndrakonohei ma ndrakuhi aha ndrame len ta kandriyen badu bwena. Iy bakonohei aha bame hamon na bek nyikilikin hawe silba bwe. Iri lakou doh, lau badu kon munyak abudon tinan labai. Arile, gol hawe silba badeh, lakou badu kon munyak le. Hamon kameh iri amai au laleyah. 19 Kindrei badeh, konohei taha na ndraye Jises Krais amwenen, ya ndrayen doh, luk winiyan bakonohei na aliy bwe. Krais badeh, buku none ari sipsip, iy ari lakou ndraka-an badan bwe-en. 20 Bwena mene Kindrei babwidi kon munyak dah bwe le badeh, iy ndranyowonyani Jises Krais ta amekes gok ta akunoh taha ame hamon. Ya, na len dah, Kindrei ndraleheyani iy ndrame lewan udu kala iy mene imek ereu bada kei tondreh ereu mada lau mari. Iy imek ta aseben taha lau mara-ei badu munyak. 21 Na Jises le badeh, aha atehei budon taha in ta Kindrei. Iy mene ndramete-ei Jises udu bolo lek ta imek ndrame awas ja, ma iy ndratehei nyosowan ndrabun ndrala la-un. Eme ma, aha atehei budon taha boto-on in ta Kindrei, ma aha abe-en iy ta eme akohok aha ala hawen. Ma aha kameh akohok kohan mwasin ma manyah mwasin hawe Krais.
22 Ya na idah, aha ndranuhun sahou handru nyala Krais, ma iy ndramani iri kandriyen ndra-in taha mari, ma aha ndrasahan lau ha-un. Ma iy ndramesekei aha ndraso-ok ndramak ari ja ta Kindrei. Aha badeh, kaso-ok ndramak ari ja na budon hawe ndrine aha handru na len mari. 23 Kindrei ndratehei kohan mwasin ndrawek la-u aha. Ma aha ndrasahan randrah ja, buku none le buwa kei ha-un ateh ereu bolo bilin. Arile, aha basahan na buwa kei badu kon munyak dah bwe. Buwa kei badu munyak dah kameh, imek ma amai iu. Aha asahan na buwa kei Kindrei le mesekei, ma iy kameh ereu le buku doh. Buwa kei doh badeh, sahou ta Kindrei. Sahou doh atehei kohan mwasin i la-u iri lau tan, ma iy winiyan bano bwe. 24 Sahou udu bolo buk ndrabun tiye i buku doh:
“Taha lau mari winiyan ba-en kon munyak dah luwen bwe. Taha kameh amak buku none le bwidiu. Ya nyara taha tinan kameh taku buku none le buwa bwidiu iroh le eme andri, 25 arile sahou ta Laban kameh ereu le buku doh.” Aisaya 40:6-8
Sahou doh badeh, iri ndrasehek ndrawek taha nane.