La-ukei ta
PITA
ramen ja iy atorou hamon
Sahou Tanan
Kati budon ta la-ukei dah, ta tiye iri lau ta Kindrei ta iri sanuhun sahou tiri lau ta leheya rayah adek laleyah ta tobolowe budon ma kandriyen mwasin tiri. Iri badeh, katawiy kihis sahou tiri aposel mene adeu ili tiri, ma ta kandriyen doh, iri kameh atanan mwasin ta Kindrei ma ta Laban Jises Krais. Iri aposel mene anyolom Jises na mada iri amwenen, ma iri mene anuhun Jises leheya iri.
Lau rayah mene asehek buku Jises kameh winiyan bame hamon ja bwe. La-ukei ta Pita dah asehek anya, iy kameh eme hamon ja. Handru, iy winiyan bame suwi bwe, arile katin i buku doh, Kindrei badeh, baso-ok ari ndramak kameh amai bwe. Iy aso-ok lau marakon badeh, katubuni ndrine iri, eme ma idoh bwidiy amunum tiri mwan ma badih ma iy atondrok kahis le (3:9).
Iri Sahou Tinan
Sahou sekesek ma hawe salom (1:1-2)
Iri lau ta hamon ta Laban kamanyah buku sah (1:3-15)
Lomada Krais (1:16-21)
Iri propet ta wendreya ma hawe iri lau ta leheya (2:1-22)
Len ta Laban ta eme hamon idoh handru (3:1-18)
Taha badeh, kamekes iri kandriyen mwasin kabadok ta manyah tataha, ma taha badeh, sanuhun sahou tiri lau ndra-in
1
(Kalan 1–3)
1 La-ukei dah, jo Saimon Pita amwenen atorou ewek tado. Jo badeh, lohowan ma aposel, batun ari, Kindrei suni jo ta atiye sahou ta Jises Krais ili tiri lau tan.
Jo atorou la-ukei dah, ewek tado lau mari ta budon handru i ta Jises Krais ado badeh. Tasah, Jises Krais badeh, iy ale Kindrei tataha ma hawe iy ndramak ta aseben taha. Iy abudon ta amekes taha badeh, kakohok budon mwasin handru i randra le, eme ma iy amekes ado asahan lau ta budon handru i le buku aso.
2 Eme udu bolo salom tek, ili ta Kindrei badeh, jo aseken iy katikisi aha, ma iy katehei tanan mwasin kewek taha, ta atanan kandriyen mwasin ta ado le, kidih kudu ndrine aha, i san ta tanan ta Kindrei uru Laban tataha, Jises.
Kindrei sebenei to, ma to ale ka buku le iy
3 Jises Krais badeh, Kindrei tataha. Eme iy aloh taha, ta taha ka-en hamon ta kandriyen tan, ma taha kadih na lomadan. Eme ma, taha atanan iy, ta iy badeh, mwasin labai. Handru, na boto-on tan le, iy edeu iri lakou mari ndrame tataha, ta taha winiyan manyah ado mwasin, ma taha winiyan amekes iri kandriyen iy aso-ok.
4 Eme lakou bwena mene iy tandrakan ta aseben taha badeh, iy ndramesekei ndrano na boto-on ma na mwasin tan. Iy amekes iri lakou doh eme tataha, ta taha kakohok kohan mwasin, ma kandriyen tataha badeh, kudu mwasin ta madan, ya taha samekes kandriyen ndra-in ta bada taha ja ai, sala buku none oro lau ala batehei budon toro handru ba-en ta Krais bwe kede-eh. Oro badeh, ndrabola ta kandriyen ndra-in, tasah budon toro ndra-in badeh, ndrasolo-ei oro labai ta amekes kandriyen ndra-in le.
5 Eme ta katin le doh, ado kanone boto-on ta amekes kandriyen tado ki mwasin i bwele-e budon handru tado, ma hawe i bwele-e kandriyen mwasin tado badeh, ado kanone boto-on tado ta takaleh ma akohok tanan mwasin ta Kindrei. 6 Ma hawe i bwele-e ado takaleh ma akohok tanan mwasin ta Kindrei badeh, ado kanone boto-on ta atondrok budon tado kudu mwasin; ma hawe i bwele-e ado atondrok budon tado kudu mwasin badeh, ado kanone boto-on tado ta saruwani mine ado, arile ado kales kado le ta bolo maha-an. Ya, i bwele-e kandriyen ta ado le tado badeh, kanone boto-on tado ta amekes bolo manyah tado i buku lau handru ta Kindrei. 7 Ma hawe i bwele-e kandriyen ta bolo manyah tado i buku lau handru ta Kindrei badeh, ado kanone boto-on tado ta amekes kandriyen ta tikisiy kudu ndrine ado, ki tiri lau ari ari, ma hawe i bwele-e kandriyen ta tikisiy kudu ndrine ado ki tiri lau ari ari badeh, ado kanone boto-on ta amekes kandriyen ta aseken iri lau mari. 8 Eme, i buku none ado amekes iri lakou doh ili ili, idah kameh ado atana ado handru amwenen ta Jises Krais badeh, iy Laban tataha. Eme, lahou tan ado amekes kameh winiyan bamak laleyah bwe, arile kandriyen ta bolo manyah tado kameh asahan lakou ari mwasin. 9 Ya, i buku none are lau oro kandriyen doh bare toro bwe, oro badeh, i buku none ari ndramak madan bwe, ma oro ndramani Kindrei mene ndrasikinei karei ma lomondra ndra-in toro ndra-au.
10 Eme ya ado nadu tine badu hawek ta budon handru, ado badeh, sala buku oro doh. Arile, ado tanan Jises tiye ado badeh, badu hawen. Eme ma, ado katawi tanan doh kihis, ma kaleheya udu bolo ado keme lewan. Ya eme, i buku none ado amekes iri lakou doh, idah kameh ado winiyan bataku bwe. 11 Ma hawe ado kameh, Laban Jises Krais, ndramak ta aseben taha kameh sekesek tado laba tinan labai udu baha tondrok tan, udu le buku doh.
12 Eme jo kameh asehek i tado udu le buku doh ta nyala lakou doh, buku ado ndratana ado ta aliy, ma ado badeh, kandro ado ndrahas ta budon handru. 13 Jo abudon, mwasin ta jo udu ndra loke kahis le kada-ah, ta amekes budon tado badeh, samani sahou handru. 14 Tasah, Laban tataha Jises Krais ndratiye ndraleu ndrame tek buku luwen bwe, kameh jo ruwani ado. 15 Eme ya jo anya kanone boto-on ta katiye tado badeh, bale ado samani oro lakou doh, ya eme ado katehei kudu budon tado i buku none jo kimek.
Aso anyolom lomada Kindrei amwenen udu ta Krais
16 Eme aso aposel mene ndrasehek taha, ma aha ndratanan boto-on ta Laban tataha Jises Krais. Ma aso asehek taha ale, ta iy kameh eme hamon eme kon munyak ja. Arile, aso badeh basehek kundruh laleyah ba-en hamon ta lau abudon, ma aso asehek taha ta nyala boto-on ta Jises Krais, bwe. Na mada aso amwenen, aso anyolom iy andrei lomada Kindrei,* Pita oro anyolom bada Jises asahan randrah labai ja na len Jises andrei lomada taman Kindrei. Ou anyolom ili ta Metiu kalan 17:1-13; Mak kalan 9:2-13; ma hawe Luk kalan 9:28-36. ma iy asahan tinan. Eme ma aso asehek nyala aha ta iri lakou mara-ei nane doh. 17 Na bolo iri len mara-ei doh ale, tama taha Kindrei badeh, atudun ma suri Laban tataha Jises Krais iu ili loken mara-ei, ma iy atehei lomadan mwasin labai doh i tan, ma iy asahan i randrah labai. Aso badeh, areu aliy anyolom iy. Ma Kindrei badeh, udu bolo kandrah ma lomadan, asehek i buku doh: “Iy ndramak badeh, naduk. Jo aso-ok iy labai. Jo badeh, sekesek tinan labai tan.” 18 Aso anuhun doh na ndranye aso amwenen, udu kandrah aloh eme, kabatana aso ado hawen ado mandrei turuwen.
19 Eme sahou doh, to mene ndranuhun badeh, amekes sahou tiri propet abadok, ma ndrasahan handru ai. Idoh badeh mwasin, ya taha katehei taha ka ta aliy, i buku none ado kandrei sun kanya ta lomada kati ado udu kon lulik, winiya le an barame loke. Eme taha kabudon kudu ta sahou tiri propet doh, winiya le Jises Krais barame andri. Ano kameh, budon tataha baraleu ta lakou mari, i buku none ndramak andrei sun anya ta lomada katin winiya le ndrau ta boho len† Ndrau ta boho len doh badeh, Jises Krais. Ou anyolom Rebelesen kalan 22:16. barame loke. 20 Ano udu bwele-en ta lakou mari doh, ado katanan kudu mwasin ta sahou iri propet atorou, badeh, na budon toro laleyah, bwe. Eme ma, taha ale sa-en hamon ta budon tataha amwenen, buku none taha katiye kati sahou ta ari propet udu bolo buk ndrabun. 21 Tasah, oro propet batorou ari sahou buku ari ndramak awas asehek bwe. Arile, oro atorou sahou doh na tanan ta Malawin Ndrabun aseben oro.