7
1 Ano pris tinan ndremenya Stiben anya, “Ou amekes iri lakou doh, handru?”
2 Ya, eme Stiben asumon anya, “Wurah lomada ado nadu tine, ma hawe ado tama, ado kanuhun jo!
Kindrei badu bolo lomadan mene asahan hawe tubu taha Abraham na len iy mene manyah udu Mesopotemiya mwena, ano iy barala baramanyah barado Haran. 3 Eme Kindrei tiye i ta Abraham anya,
‘Ou ruwani kon tinan tam hawe ou ruwani iri lau tam, ya ou adek au ala kon kameh jo leheya i tam.’ Jenesis 12:1
4 “Eme ma iy ruwani kon munyak Kaldiya, iy eme badeh, manyah udu Haran. Iy udu gwek winiya taman imek, ano Kindrei suni iy ili manyah udu kon ado areu aliy dah. 5 Ma iy badeh, badeu se ranah munyak bala tan bwe. Arile, Kindrei badeh, tandrakan iy hawe lundriyen oro kameh, iy kameh edeu munyak i tan ma hawe lundriyen oro asahan hamon. Na len Kindrei tandrakan doh badeh, Abraham ari nadun bwe le. 6 Ya eme Kindrei asehek sahou i ta Abraham i buku doh:
‘Lundriyem oro kameh manyah are kon munyak toro amwenen bwe, ma idah kameh, oro asahan bonyo-ou, winiya jaha ma hanek (400). Ma iri lau ta atondrok oro kameh amekes ndra-in i toro. 7 Ano, jo kameh edeu maha i la-u iri kon munyak nane adeu oro a bonyo-ou, ma jo kameh kuhi oro ame hamon ame kon dah atudun jo ja.’ Jenesis 15:13-14
8 Ano, Kindrei amekes sahou randra le ta nyala asan ku-i lau i ta Abraham. Eme Abraham asahan tama Aisik, ma tinen atehei iy eme len ano. Len tan asahan ndru la-uh badeh, taman Abraham sani ku-in. Ano Aisik badeh, atehei Jekop, ya Jekop asahan tama tubu taha oro ma ronoh la-uh.
9 “Eme nadu tine Josep oro ma ronoh ari badeh, mada oro alikis iy, ma oro atehei iy i ta sisih i buku bonyo-ou ili Ijip. Arile, Kindrei udu hawen, 10 ma sebenei iy ta bolo maha-an mari. Eme iy atehei budon mwasin i ta Josep ma mesekei iy asahan mwasin, mesekei Parou, kabin badu Ijip sekesek. Eme ma iy mesekei Josep asahan tinan ta atondrok kon Ijip ma iri lakou badu bolo asiu ta kabin ale.
11 “Ano, kon mari badu bolo Ijip hawe Kenan badeh, nyamon bwe. Ma edeu maha-an tinan labai, ma tubu taha oro, ari madasan ta takaleh nyamon bwe. 12 Ya, eme Jekop anuhun Ijip badeh, nyamon udu aliy, eme iy suni tubu taha oro ala selesen bwena op. 13 Ano oro ala san lusan ja badeh, Josep baranyowonya, iy are lau handru barala ta nadu tinen oro ai. Ma Parou barala tanan nadu tine
Josep oro ai. 14 Ano hamon ta idoh badeh, Josep suni sahou i ta taman Jekop hawe lundriyen oro mari ma ndro tonoh limeh (75) kame. 15 Ano Jekop hawe lundriyen oro mari au ala Ijip. Ya eme iy hawe tubu taha iri amak ado loboho doh. 16 Ya a-eh iri mari badeh, a hamon ja ala Sekem ala lek mene Abraham sihine i ta nadu Hamor oro na luk rayah.
17 “Eme ya suniya len Kindrei anya kamekes tandrakan tan i ta Abraham kasahan handru badeh, kane iri lau tataha ado Ijip i sola le gwek. 18 Ya eme kabin ari asahan ja atondrok Ijip. Iy badeh, tanan Josep se bwe. 19 Iy eme wendreyani iri lau tataha, ma amekes kandriyen ndra-in handru i ta tubu taha iri. Iy indrek iri badeh, kakeh nadu iri ma borolak le kamak ka-au.
20 “Na len doh badeh, tine Moses atehei iy eme len. Iy badeh, konen mwasin labai ma Kindrei aseken iy handru. Udu bolo bun ma taloh badeh, atondrok iy udu le asiu ta taman. 21 Ano na len iri atehei iy eme manan badeh, nadu Parou badih bwese-ei iy eme loken ma nyowo-ei iy i nadun. 22 Eme Moses badeh, akohok tanan tinan labai badu Ijip ma iy badeh, asehek sahou nyarahan labai, ma iy amekes lahou tan badeh, irih labai.
23 “Ano jaha ta Moses asahan hanoh (40) badeh, iy ili selesen iri lau tan badu Isra-el. 24 Eme iy anyolom ndramak ari badu Ijip badeh, idi ndramak ari badu Isra-el andra-i labai. Eme Moses suri iy ili badeh, aseben lau tan badu Isra-el ma iy idi ndramak nane imek. 25 Eme Moses lomondra anya kameh, iri lau tan baraseleyani iy, Kindrei suni iy eme ta aseben iri, arile bwe. 26 Ano na len rasan ja badeh, Moses eme, iy anyolom uru lau la-uh badu Isra-el ada uru. Eme iy ili anya katalou uru ma tiye sahou i turu i buku doh, ‘Ah anya kada ah ta sasah? Ah badeh, nadu tine ah.’
27 “Arile, iy ari nane ta amekes bahun bwena atuwi Moses i hamon ma iy tiye sahou nyarahan i tan anya, ‘Are lau atehei ou atondrok ahi hawe suni ou asehek sahou nyarahan eme tahi? 28 Ou anya adai jo ja, i buku none ou na mene adai iy lau badu Ijip mene imek, neh?’ 29 Eme Moses anuhun sahou doh badeh, ma iy atobwak iu ili Midiyen, i buku lau badu leheleh manyah udu kon doh. Ya eme nadun mwan la-uh asahan.
30 “Iy udu gwek jaha ma hanoh (40) ano badeh, angelo ari asahan hawen udu bolo jih anya laleyah udu ta kei udu kon lomale an, udu mirihik ta mandrei Sainai. 31 Eme Moses anyolom jih doh badeh, manin atur, eme iy edek ili mirihik anya katou
kamwenen. Eme iy anuhun boho Laban aloh anya,
32 ‘Jo dah badeh, Kindrei ta tamam oro. Jo Kindrei ta Abraham, ta Aisik, ma ta Jekop.’ Eksodus 3:6
Eme Moses totoreh, ma inoh ma madan bala loken bwe.
33 “Ano Laban tiye i tan anya,
‘Ou tolowei ku-i katim ki-iu, kon ou ales areu aliy badeh, turuwen. 34 Jo badeh, ndranyolom sisi-in ndra-in labai tiri lau tek are Ijip. Jo badeh, ndranuhun ndrelen tiri, ya eme jo ndrame andri dah ta aseben iri kame len kado mwasin. Abo, ou suri ou ya jo kasuni ou ala hamon ala Ijip ja.’ Eksodus 3:5, 7, 8, 10
35 “Iy Moses dah le mene adeh iri badeh, asehek na boho iri anya ‘Are lau atehei ou atondrok ahi ma asehek sahou nyarahan eme tahi?’ Iy le badeh, Kindrei suni iy ili atondrok iri, ma ta akohok iri ame len na seben ta angelo mene asahan hawen udu bolo jih. 36 Iy badeh, kuhi iri ame len ta Ijip ma iy amekes kalem tinan tinan udu Ijip, udu gwa ndras aloh Retsi, ma iy sariye iri ado kon lomale an, jaha ma hanoh (40). 37 Iy Moses le doh mene adeh tiye i tiri lau badu Isra-el anya,
‘Kindrei kameh suni propet ari ewek taha i le buku jo badu bolo ado amwenen.’ Dutoronomi 18:15
38 Iy le badeh, mene udu ndrokowa iri lau badu Isra-el ado kon lomale an udu hawe tama taha iri. Ma iy udu hawe angelo mene asehek sahou i tan udu mandrei Sainai, ma iy akohok sahou awas ta asehek nyala taha.
39 “Arile, tubu taha iri badeh, baseken iy bwe, ma iri tikahei iy ma udu ndrine iri badeh, iri lomondra ili hamon ja ili Ijip. 40 Ya eme iri ame tiye Aron anya,
‘Ou amekes rayah kindrei ya iri ka-en bwena ta to ja. Iy lau Moses ta sariye to ame dah badeh, to bala tanan sasah ndrasahan tan udu mandrei Sainai kodo-oh bwe!’ Eksodus 32:1
41 Na len doh badeh, iri mesekei sukumada lakou ari asahan i buku nadu bulumakau. Eme iri atiye lakou i nyara salom eme ta asun i tan, ma iri amekes tine nyamon ta atudun lakou iri amekes na mine iri doh. 42 Arile, Kindrei atehei konan i tiri ma mesekei iri ala atudun iri lakou badu bada kandrah. Idoh amwenen le ta sahou mene torowenei udu bolo tarou tiri propet i buku doh:
‘Aha Isra-el, na len aha mene ado kon lomale an udu bolo jaha ma hanoh (40), aha atiye lakou i nyara salom eme tek deh bwe?
43 Bwe handru! Asiu balei mene aha bwese, tek bwe, ta kindrei ta wasai Molek le, ma sukumada kei i buku ndrau ta kindrei taha ta wasai aloh Repan; oro sukumada kei doh ado asah, ta aha atudun iri. Ya eme idah kameh, jo kameh tikahei aha au a len ala kon munyak tinan Babilon.’ Amos 5:25-27
44 “Iri tubu taha iri badeh, mene kuhi asiu balei ta Kindrei ma sahou handru tan udu bolon mirihik tiri, udu kon lomale an. Amekes doh mene in hamon ta boho Kindrei tiye i ta Moses, amekes in hamon ta malawin Moses ndranyolom. 45 Ano udu hamon badeh, tubu taha iri bwese-ei udu mine tama iri, ma an hamon ta Josuwa, ma akohok iri kon munyak tinan mene Kindrei takahei iri au. Eme asiu balei doh udu gwek, eme taku len ta Debit asahan. 46 Eme iy aluwi budon ta Kindrei badeh, aseken iy ma ndremenyani Kindrei i buku none iy kaseken, badeh, iy katahi ra-em asiu ki asumwe Kindrei ta Jekop. 47 Arile bwe, idoh badeh Solomon labai tahi asiu i asumwe Kindrei.
48 “Arile bwe, Kindrei udu bwele-e kindrei mari badeh, bamanyah bado asiu ala lau amekes na mine iri bwe. I buku none propet ari asehek i buku doh,
49 ‘Kandrah badeh, ndrahu manyah tek labai,
ma munyak badeh, ndrahu katik.
Ma Laban anya, saba asiu handru ado anya kamekes keme asumwek?
Ya ndrahu amunyau tek kameh kudu heh bah?
50 Sebwe, jo bamekes lakou mari bwe, nadeh?’ Aisaya 66:1-2
51 “Aha badeh, ta tebelese handru en! Ma ndrine aha badeh, ndradah na kindrei ta wasai i buku iri lau tana iri Kindrei handru bwe, ma ndranye aha ndralun ma aha winiyan banuhun sahou handru ta Kindrei, bwe! Aha badeh, i le buku none tama aha oro mene. Aha banuhun sahou ta Malawin Ndrabun bwe! 52 Are propet asahan bwena mene, ya tama aha oro mene badai iy bwe? Oro mene adai iri propet mene asehek ta nyala ndramak mwasin handru kameh barasahan. Ya eme na dah, iy ndrame, arile aha badeh, atehei sa-oh ma adai iy imek. 53 Aha mene andrei batanau malen udu mine iri angelo, arile aha ba-en hamon ta aliy bwe.”
Iri orowei Stiben na bek
54 Eme na len iri anuhun sahou doh badeh, iri abolosen handru ma lihi iri asenyer i tan. 55 Arile Stiben badeh, idih handru na Malawin Ndrabun, ya eme iy suri madan ili bolo kandrah, ma iy anyolom lomadan ta Kindrei, ma anyolom Jises ales udu loboho lim salin ta Kindrei. 56 Eme iy anya, “Ado kanyolom! Jo anyolom bolo kandrah asak ma jo anyolom Nadu Ndramak Awas ales udu lim salin ta Kindrei.”
57 Eme iri arah ma sokei ndranye iri na lime iri, ma iri sakaliye ala hawen ma tawi iy, 58 ma aluwi iy eme len ta kon tinan, ma orou iy na bek.* Ta kandriyen malen tiri Isra-el, buku ndramak ari amekes kandriyen ndra-in handru, iri lau kameh tawi iy ma aluwi iy eme len ta kon tinan, ma iri orou iy na bek ili, ili winiyan le iy imek. Ou anyolom in bolo tarou ta Lebitikus kalan 24:13-16 ma Namba 15:35. Ya iri lau nane amekes sahou wendreya, ta adeu Stiben i ta sahou, badeh, talou awin tiri iu, ya iri akahei ili udu kati iy ndramak loweu ari, nyaran Sol.
59 Iri badeh, abo gok le ta orou Stiben na bek ai, ta adi iy kimek. Iy eme asolom bohon i tinan ili ta Laban i buku doh, “Laban Jises, ou andrei malawik ai.” 60 Ano badeh, iy atehei bwili ndru-un udu andri, ma iy aloh i tinan i ta Kindrei i buku doh, “Laban, balem kamani kandriyen ndra-in toro nane amekes eme tek doh.” Iy asehek sahou doh ano le badeh, ma iy imek.
*7:58: Ta kandriyen malen tiri Isra-el, buku ndramak ari amekes kandriyen ndra-in handru, iri lau kameh tawi iy ma aluwi iy eme len ta kon tinan, ma iri orou iy na bek ili, ili winiyan le iy imek. Ou anyolom in bolo tarou ta Lebitikus kalan 24:13-16 ma Namba 15:35.