3
Kandriyen ta a-en hamon ta batanau ma kandriyen ta budon handru
1 Aha mwan ma badih badu Galesiya, bale aha ndra-au! Are lau ndrawahei budon taha, ma aha ndra bale aha bwe? Jo mene udu hawe aha amwenen badeh, jo leheya aha aleu handru ta iri adai Jises Krais imek, udu bada kei tondreh. 2 Eme jo anya ndremenya aha ta aliy, ma aso-ok aha badeh, kasehek kamwenen keme tek: Aha badeh, akohok Malawin Ndrabun ta Kindrei i san ta aha a-en hamon ta batanau malen deh? Bwe! Aha akohok Malawin Ndrabun i san ta aha anuhun, ma hawe i san ta budon taha handru ki ta sahou mwasin. 3 I buku sah aha a bale aha bwe badeh? Aha bwena mene amekes na Malawin Ndrabun ta Kindrei; ya idah ja kameh, aha anya kamekes na boto-on ta ndramak ai? 4 Sebwe iri maha-an aha ndruniy udu bolo tekedek taha bwena mene, moson bwe nadeh? Bwe! Iri lakou doh moson udu aliy. 5 Aha abudon i buku sah? Kindrei badeh, edeu Malawin Ndrabun ma amekes kalem udu ndrokowa aha. Sebwe iy edeu tasah aha an hamon ta batanau malen? Bwe! Idoh badeh, i san ta anuhun sahou ma hawe ta budon taha handru badeh, i ta sahou mwasin labai.
6 Aha badeh, kalomondra tekedek ta Abraham se: I buku buk ndrabun ndratiye,
“Abraham atehei budon tan handru in ta Kindrei, eme ma Kindrei aloh iy ndramak mwasin mara-ei ta madan.” Jenesis 15:6
7 Eme ma, aha badeh, ndranyolom ma ndratanan ndramwenen ta lakou doh: Iri mwan ma badih nane atehei budon tiri handru in ta sahou ta Kindrei, iri doh badeh lundriye Abraham amwenen. 8 Sahou ta Kindrei badeh, ndrasehek ndra bwena, ta iy kameh aloh iri lau badu leheleh mwasin mara-ei ta madan i san ta budon handru le. Eme ma iy ndrasehek ndra ta Abraham ta sahou mwasin ta Krais i buku doh,
“Na lundriyem oro le kameh, jo kameh edeu nyosowan i la-u iri lau mari badu munyak.” Jenesis 12:3; 18:18; 22:18
9 Abraham atehei budon tan handru i ta Kindrei, ma Kindrei nyosowani iy; eme ma are lau oro atehei budon handru i le buku Abraham badeh, kameh i le buku aliy.
10 Are lau oro abudon anya oro winiyan an hamon le ta batanau malen mari, eme ma Kindrei kameh sekesek ta budon toro doh, badeh kameh oro akohok andra-i na len iri ales an ta mada sahou ta Kindrei. Tasah, ari ndramak winiyan ba-en hamon ta lakou mari batanau malen tiye iy kamekes, bwe. Idoh i buku le sahou ta Kindrei ndratiye,
“Are lau ba-en hamon ta lakou mari torowenei udu bolo buk ta batanau malen dah bwe, Kindrei le kameh edeu maha-an i tiri!” Dutoronomi 27:26
11 Handru, aha winiyan anyolom sahou ta Kindrei tiye ale i buku doh,
“Are lau le atehei budon tan handru in ta Kindrei, Kindrei kameh aloh iy mwasin mara-ei ta madan, ma iy ndramak doh le winiyan akohok kohan ha-un ta udu le buku doh.” Habakuk 2:4
Eme ma taha ndratanan lakou dah: Ari mwan o badih sabudon anya iy winiyan in hamon ta batanau malen, ma na lahou tan doh iy winiyan akohok kohan ha-un ta udu le buku doh, ndri-iy. 12 Arile, kati budon ta ndramak anya ki-in le hamon ta batanau malen badeh, bala buku none kati budon ta ndramak i san ta budon handru, bwe. Sahou ta Kindrei tiye i buku doh,
“Are lau le, iy in hamon ta lakou mari, batanau malen asehek, iy kameh akohok kohan ha-un ta udu le buku doh.” Lebitikus 18:5
13 Arile, batanau malen le badeh, leheya taha buku taha winiyan ba-en hamon ta lakou mara-ei batanau malen tiye, bwe, ya taha kakohok maha-an ta aliy. Arile, Krais badeh aseben taha, iy ndrakonohei taha mene ado bolo maha-an ta batanau malen ndrame len. Iy le ari badeh, ari kandriyen ndra-in bwe, arile iy akohok kon tataha bwese maha-an tataha; tasah sahou ta Kindrei tiye i buku doh,
“I buku, are lau atahi iy sukik udu bada kei ta kandriyen ndra-in tan badeh, iy udu bahandra maha-an ta Kindrei.” Dutoronomi 21:23
14 Handru, Krais Jises badeh, ndrakonohei taha ma ndrakohok taha ndrame hamon. Iy ndramesekei lakou doh, tasah iy anya katehei nyosowan keme tataha lau mari. Idoh nyosowan Kindrei mene tandrakan i ta Abraham ki tiri lau badu leheleh. Ya taha akohok nyosowan doh i san ta Krais le ari. Eme ma, taha i san ta budon handru badeh, winiyan akohok boto-on ta Malawin Ndrabun mene Kindrei tandrakan.
Batanau malen ta Kindrei badeh, winiyan basakalawi tandrakan tan bwe
15 Aha nadu tine mwan ma badih, jo kameh asehek i buku none lakou taha anyolom na len mari kede-eh: Buku none ndramak la-uh amekes tandrakan ta amekes sahou randra le ta ari lakou, badeh sahou randra le doh abadok. Ari ndramak winiyan batubuniy bwe, ma winiyan badeu ari budon bala ta aliy bwe. 16 Eme ma, udu bolo buk ndrabun, Kindrei amekes i buku le aliy. Iy amekes iri tandrakan i ta Abraham hawe lundriyen oro. Sahou ta Kindrei batiye anya “toro lundriyem solo-an,” bwe. Badeh tiye,
“i ta lundriyem ari” le. Jenesis 12:7; 13:15; 24:7
Ya iy doh badeh, Krais. 17 Moson jo tiye badeh, i buku doh: Ma mwena mene Kindrei amekes sahou randra le, ma iy tandrakan ta iy winiyan bamaniy bwe. Ano udu hamon ta jaha ma hanek tonoh (430) iu, ma batanau malen tiri Juwis barasahan. Eme ma, batanau malen doh, winiyan batokosei sahou randra le bwe, ma winiyan basokosowei tandrakan ta Kindrei amekes i ta Abraham bwena, bwe. 18 I buku none seben ma manyah mwasin ta Kindrei badeh, sukik udu ta kandriyen ta a-en hamon ta batanau malen, taha bakohok bala san ta tandrakan tan mene bwe. Arile bwai, seben ta Kindrei hawe manyah mwasin tan, iy ndratehei ndra ta Abraham i san ta tikisiy ma tandrakan tan le.
19 Ya, lahou ta batanau malen i buku sah bah? Kindrei mene aseken kati kandriyen ndra-in keme lewan. Eme ma, hamon ta iy edeu sahou tandrakan i ta Abraham, iy edeu batanau malen ale. Idoh ta leheya batanau malen doh boto-on ta aliy eme taku kabatana lundriye Abraham le barasahan. Ya ta lundriye Abraham le doh, Kindrei amekes sahou tandrakan i hawen. Ya lakou ari ja i buku doh, batanau malen mene Kindrei atehei i kani iri angelo, ano iri angelo atehei i kani iri lau badu Isra-el. 20 Arile, na len Kindrei amekes sahou tandrakan i ta Abraham iy ba-en hamon ta kandriyen doh bwe. Kindrei le ari asehek sahou amwenen i ta Abraham, ma amekes sahou tandrakan hawen. Eme ma, sahou tandrakan doh badeh, lakou laba tinan labai ja, ma sakalawi batanau malen mari ta Moses.
Lahou ta batanau malen tiyani taha ala hawe Krais
21 Idoh badeh, ma mesekei batanau malen badek se hawe tandrakan ta Kindrei bwai? Bwe labai! I buku none batanau malen mene ndratehei winiyan edeu kohan ha-un ma mesekei lau manyah mwasin, badeh Kindrei winiyan aloh iri lau mwasin mara-ei ta madan na san ta batanau malen le. 22 Arile bwai! Sahou ta Kindrei ndratiye anya lau mwan ma badih badu kon munyak mara-ei badeh, ado bolo kowah ta karei ma lomondra ndra-in. Kindrei le alelei lakou doh asahan tasah, iy anya katehei nyosowan mwasin tan mene iy tandrakan badeh, ki tiri lau heh atehei budon tiri handru in ta Jises Krais.
23 Ma mwena badeh, budon handru basahan bwe le, batanau malen turuki taha i buku none lau are bolo kou, winiya le, budon handru asahan eme lewan. 24 Handru labai. Krais bame bwe le badeh, taha are ndra bahandra tondrok ta batanau malen. Ya lahou ta batanau malen doh ta tiyani taha ala hawe Krais, ta taha katehei budon tataha handru ki tan, eme ma Kindrei winiyan aloh taha mwasin mara-ei ta madan. 25 Eme na len dah, budon handru ndrasahan ai, ya batanau malen winiyan batondrok taha ja bwe.
26 Aha mari atehei budon taha handru in ta Krais Jises. Ya, na kandriyen doh, aha asahan nadu Kindrei, ma aha ahas hawe Krais. 27 Aha ndralomwa, ma aha ndrala le se hawe Krais, eme ma aha ndrakohok kandriyen ta Krais. 28 Eme ma, iri lau badu hawe Krais badeh, iri Juwis, iri lau badu leheleh, iri bonyo-ou ma iri bonyo-ou bwe, ma hawe iri mwan ma iri badih badeh, ari bala randrah, ari bala randrah ja bwe. Iri mara-ei doh badeh, asahan ari buruwen hawe Krais le ari. 29 Ya, buku none aha badu hawe Krais handru, badeh, aha nadu Abraham ai. Ma idah kameh, aha akohok kohan ha-un ma manyah mwasin mene Kindrei tandrakan ta aliy.