La-ukei ili tiri
HIBURU
Sahou Tanan
Iri atorou la-ukei dah ta aseben lau ta Kindrei rayah iri anya kamani budon tiri mwasin, tasah iri lau rayah adeu bwilima ma adeu maha-an ili tiri. La-ukei dah ili ta amekes budon tiri kabadok, eme ma iy asehek tiri ta iri gok laba tinan Kindrei mene amekes ta Krais Jises. Krais le ari kede-eh leheya taha ta kandriyen handru ta Kindrei.
La-ukei dah tiye ta lakou ma taloh laba tinan:
(1) Jises iy Nadu Kindrei handru. Jises mene udu kon munyak, iy akohok maha-an ma sisi-in solo-an labai, ma ta kandriyen doh Kindrei amekes Jises asahan ndramak tinan ari handru ta aseben iri mwan ma badih (2:10). Eme ma Jises udu bwele-en labai ja tiri lau ta tiye boho Kindrei bwena mene, ma iri angelo, ma iy udu bwele-en labai ale ta Moses.
(2) Kindrei le mene atehei Jises asahan pris ta udu le buku doh, ma iy udu bwele-en labai ja tiri pris badu Isra-el.
(3) Jises iy udu tinan tiri pris badu kandrah ma iy winiyan labai ta akohok iri mwan ma badih atehei budon tiri in tan, ame hamon. Iri kandriyen ta salom, batanau ta Moses mene tiye ta aliy, iri buku malawin le ta iri gok tinan nane doh Jises amekes.
Kati la-ukei dah ta anya kamekes iri budon tataha mwan ma badih kabadok. Eme ma iy tan iri sahou solo-an ta budon boto-on labai ta iri mwan ma badih badu Isra-el ma bwena mene (kalan 11). Iy anya, buku saba maha-an ndruni iri, iri katawiy kihis budon tiri kili winiya le iri amak. Iri kanyolom kili ta Jises ma ka-en hamon ta kandriyen tan, ma iri kamani iri maha-an ma sisi-in nane iri akohok.
Iri Sahou Tinan
Nadu Kindrei lomadan labai (1:1-4)
Jises udu bwele-en labai tiri angelo (1:5–2:18)
Jises udu bwele-en labai ja ta Moses uru Josuwa (3:1–4:13)
Jises iy pris tinan labai (4:14–7:28)
Jises atiye sahou randra le mwasin (8:1–9:22)
Jises i salom tataha i ta Kindrei rasan le (9:23–10:31)
Lau ta Kindrei rayah budon tiri boto-on labai (11:1-40)
Taha ka-en hamon ta mweleke kati Jises (12:1–13:19)
Sendrehendreh ta salom ma hawe sekesek (13:20-25)
Jises badeh, udu bwele-en labai ja tiri angelo
1
(Kalan 1–2)
Nadu Kindrei udu bwele-en labai tiri angelo
1 Bwena mene Kindrei asehek sahou ili ta tubu taha iri san solo-an, ma i san solo-an labai ili tiri propet. 2 Arile udu bolo len tataha hamon kada-ah, Kindrei asehek sahou eme tataha i san ta nadun ari le mwan. Kindrei leheyani nadun doh ta akohok iri lakou marakon. Na nadun le, iy bwidi lakou marakon asahan. 3 Nadun doh leheyani lomada sun tinan ta taman Kindrei, ma lomadan tinan labai eme tataha, ma konen mara-ei i buku le Kindrei amwenen. Sahou tan nyamun labai, ma tawi iri lakou marakon udu munyak ma kandrah. Iy ndrabwidi gok tan ndrano ta talou iri mwan ma badih ado ta kandriyen ndra-in, ame ta kandriyen mwasin. Ano iy ili manyah udu kandrah mine Kindrei salin, iy boto-on labai. 4 Iy udu bwele-en ja tiri angelo, i buku le Kindrei tondrohon nyaran udu bwele-en labai ja ta nyara iri.
5 Bwena mene Kindrei tiye i ta nadun i buku doh,
“Ou naduk handru,
Na dah jo ndrasahan tamam kabwe.” Wari 2:7
Kindrei basehek bala toro angelo tan bala buku doh bwe.
Arile iy asehek nadun:
“Jo kameh tamam, ma ou kameh naduk.” 2 Samuwel 7:14; 1 Kundruh 17:13
6 Na len Kindrei anya katiye nadun ari le keme andri kon munyak, iy eme asehek:
“Iri angelo ta Kindrei katehei bwili ndru-u iri ki andri kili tan.” Dutoronomi 32:43
7 Iri angelo tan badeh, iy batehei budon tan mara-ei bala tiri bwe, i buku le buk ndrabun ndrasehek:
“Kindrei bwidi iri angelo tan asahan i buku siyer laleyah, ma iri lau ta amekes lahou tan anya i buku jih nyarahan labai.” Wari 104:4
8 Arile iy asehek ta nadun:
“Tondrok tam, O Kindrei, ta udu le buku doh, winiyan bandra-i bwe!
Ou tondrokei iri lau tam kado le tiri kandriyen mwasin.
9 Ou aso-ok kandriyen mwasin tinan labai, ou bwalem iri kandriyen ndra-in.
Eme ma Kindrei tam amwenen ndranyahani ou ndrala loken labai, bwele-e oro lau tam mwasin.
Ma iy mene solowei ndrelekei ta sekesek ndrawek bwele-em.” Wari 45:6-7
10 Iy asehek ta nadun ale:
“O Laban, ndra bwena mene ou bwidi kon munyak, ma, na minem amwenen ou bwidi kandrah ja.
11 Uru ma la-uh kameh amai laleyah. Arile, ou le ari kameh are le buku doh. Uru ma la-uh kameh i buku ra-ei kolau ili malen, ano atarah.
12 Ou kameh lukumwi uru i buku ou alokom kolau malen, ano ou atehei kolau ha-un ili turu, ma uru asahan randrah ja. Arile ou kameh areu le buku doh, ma jaha tam kameh udu luluwen labai.” Wari 102:25-27
13 Kindrei winiyan basehek bala ta ari angelo tan bwe:
“Ou ame manyah ado loboho minek salin, winiya jo le baratehei iri lau ta amekes budon ndra-in i tam barado bahandra katim.” Wari 110:1
Kindrei asehek sahou doh ili ta nadun amwenen.
14 Iri angelo badeh, malawi iri le, iri ta amekes gok ta Kindrei. Kindrei tiye iri ala ta aseben lau, ta akohok iri kame hamon ja.