Tarou ta
MAK
Sahou Tanan
Sahou ta buk Mak laba tinan i buku doh, “Idah sahou mwasin ma mwena asahan ta nyala Jises Krais, Nadu Kindrei.” Ma bolo tarou ta buk dah taha anyolom Jises, iy ndramak ari boto-on, ma nyaran udu loken labai ta amekes iri gok randrah, randrah. Taha anyolom boto-on tan, ma anuhun nyaran na len mene iy leheya iri lau mwan ma badih, ma tikahei malawi balik ndra-in udu la-u iri iu, ma sikine kandriyen ndra-in tiri mwan ma badih marakon iu. Jises aloh iy amwenen i buku doh, “Nadu Ndramak Awas,” ma iy asehek i buku doh ale, iy eme ta edeu kohan amwenen ta akunoh mwan ma badih solo-an labai ame hamon. (10:45).
Mak asehek kundruh solo-an ta gok ta Jises, arile iy basehek kundruh solo-an ta iri sahou Jises mene amekes ta leheya iri lau mwan ma badih bwe. Ma mwena handru, Mak asehek kundruh ta Jon ta alomwa, iy mene alomwa Jises ma Satan eme none iy. Udu hamon ja taha anyolom Jises tikisiy tinan labai, ta iri lau bwese maha-an solo-an, ma iy eme leheya iri. Ma bwena handru, iri lau tan bala tanan bala mwasin ta kati iri sahou Jises amekes bwe, arile iri amekes amunum le ili, eme ma iri akohok tanan tan.
Taha anyolom ale ta iri lau ame amekes ndra-in i ta Jises, ma iri adeu maha-an solo-an labai i tan. Ma sendrehendreh ta sahou iy atorou, Mak asehek kundruh ta Jises imek ma iy amak ja.
Iri Sahou Tinan
Sahou eme boho Jon ta alomwa (1:1-8)
Jon inyu Jises ano ma Satan none iy (1:9-13)
Jises amekes gok tan ma bwena udu kon Galili (1:14–9:50)
Jises ere Galili edek ili Jerusalem (10:1-52)
Jises ili Jerusalem buku kabin ano iy imek (11:1–15:47)
Jises bamak bwe, iy ndramak ja. (16:1-8)
Jises asahan mada oro lau tan amwenen (16:9-20)
Jises eme ta asehek tiri mwan ma badih ta nyala tondrok ta Kindrei
1
(Kalan 1:1–3:6)
Sahou mwasin ta nyala Jises hawe Jon atehe san ta Jises
(Metiu 3:1-12; Luk 3:1-9; Luk 3:15-17; Jon 1:19-28)
Idah sahou mwasin ma mwena asahan ta nyala Jises Krais, Nadu Kindrei. I buku none propet Aisaya ndratorowenei,
“Jo kameh suni ndramak ari ewek bwena tam.
Iy kameh ta atehe san tam.” Malakai 3:1
“Ndramak ari aloh udu bolo kon lomale an i buku doh, ‘Kalowosa san ta Laban, ma kadik san kales lewan.’ ” Aisaya 40:3
Ya eme Jon ta alomwa asahan bolo kon lomale an ta atiye sahou mwasin ma inyu iri lau, ma tiye tiri katubuni ndrine iri, ma Kindrei kameh sikine kandriyen ndra-in tiri mara-ei iu. Eme iri lau mari badu loboho Judiya ma badu kon tinan Jerusalem ame anuhun iy. Eme ma iri asehek budon ma lomondra ndra-in ta karei tiri i ta Kindrei, ma iy alomwa iri ta sikine kandriyen ndra-in tiri iu udu gwa Jodan.
Jon isin awin iri amekes na lami kamel, ma iy aseu balaban, iri amekes na ku-i bulumakau udu ndrukulun i buku malou ta aseu awin tan. Ya iy badeh, kaniyan sabaye ma hawe bwirik badu lokei. Eme iy tiye i buku doh, “Ndramak ari in hamon tek eme kameh boto-on tan sakalawi boto-on tek ja. Jo badeh, mwasin handru bwe, ta aluh i andri ta talou malou ta molowa ku-i katin bwe. Jo badeh, alomwa ado na gwa, arile iy kameh inyu ado na boto-on ta Malawin Ndrabun.”
Jon inyu Jises
(Metiu 3:13-17; Luk 3:21-22)
Eme nawin bwe na len doh, Jises ere Nasaret udu bolo Galili eme, ma Jon inyu iy in gwa Jodan. 10 Ano, Jises edek udu gwa eme loken le badeh, nawin bwe iy atou kandrah asak, ma Malawin Mwasin atah i buku ban eme andri eme bwele-en. 11 Ya, eme aloh ari udu kandrah tiye i buku doh, “Ou badeh, naduk handru, ma ou adek handru. Ou le mesekei jo sekesek labai.”
Satan none Jises
(Metiu 4:1-11; Luk 4:1-13)
12 Ano suwi labai Malawin Ndrabun tiyani Jises iu ili kon lomale an. 13 Eme Jises udu gwek winiya len ma hanoh (40) hawe iri katin haka, eme Satan none iy kataku, arile iri angelo ta Kindrei badu loken ame bwese-ei Jises ma aseben iy.
Jises atiye sahou mwasin udu bolo Galili
(Metiu 4:12-17; Luk 4:14-15)
14 Ano hamon ta iri ndratehei Jon ta alomwa ndrala bolo kou, Jises eme asahan Galili ta atiye sahou mwasin ta Kindrei. 15 Eme iy tiye i buku doh, “Len ndrasahan ai, ma tondrok ta Kindrei ndrame bakep! Ya ado katubuni ndrine ado ta karei ma lomondra ndra-in tado, ya ado katehei budon tado handru ki ta sahou mwasin.”
Jises aloh oro lau tan
(Metiu 4:18-22; Luk 5:1-11)
16 Ya eme Jises edek kabede gwa li Galili ili, ma iy atou Saimon hawe nadu tinen Enduru. Uru akeh kubwin turu ili bolo gwa li ta akohok ni, tasah uru lau ta bwisir ta ni. 17 Eme Jises tiye i turu i buku doh, “Ah kame ka-en hamon tek ma jo kaleheya ah, san ta akohok lau.” 18 Eme ya nawin bwe uru ruwani kubwin turu, ma uru au a-en hamon tan.
19 Ano Jises edek ili bwena sese ja, iy atou Jemis uru Jon an hawe tama uru Sebedi. Oro an ndron toro lowosa kubwin toro. 20 Eme iy atou uru le badeh, ma iy aloh i turu, eme uru ruwani tama uru Sebedi hawe lau ta kubwin nane an gwek ai. Eme ma uru an hamon ta Jises.
Jises leheya ma amekes iri lau amwenen ja
(Metiu 8:14-17; Luk 4:31-41)
21 Ano oro ame kon tinan Kapena-um na bolo len ta amunyau, eme ma Jises ili bolo asiu ta atukum tiri Juwis, ma leheya iri lau. 22 Eme iri lau mari mani iri atur ta leheya tan, tasah iy leheya iri, bala buku none iri lau ta leheya kandriyen tiri Juwis, bwe. Arile, iy leheya iri, i buku none ari ndramak leheya tan boto-on labai.
23 Eme nawin bwe, udu bolo asiu ta atukum tiri Juwis nane dah, ndramak ari malawin ndra-in udu bwele-en. 24 Eme iy aloh, “Jises badu Nasaret, ou anya amekes sasah keme taso? Ou ame dah ta adai aso kamak ai? Jo tanan ou are handru kede-eh, ou badeh, ndramak ndrabun ta Kindrei.”
25 Arile Jises tiye sahou boto-on i ta malawin ndra-in anya, “Ou andru-uk ma ou ame len ta ndramak badeh!”
26 Eme ma malawin ndra-in nane dah mesekei ndramak dah totoreh ma anyar bohon i loken, ano iy ruwani iy ma iy eme len. 27 Eme iri lau mari mani iri atur, ma iri ndremenya iri ari ari, “Saba lakou handru dah? Idah tanan ha-un ja nadeh? Sahou ta ndramak dah boto-on labai, iy tiye le badeh, malawin ndra-in anuhun bohon ma iri au.”
28 Eme ma sahou ta nyalan aseker ili bolo kon mari badu loboho Galili.
29 Ano nawin bwe oro ame len ta asiu ta atukum tiri Juwis ma oro adek ales ala asiu ta Saimon uru Enduru, ma Jemis uru Jon a hawe oro. 30 Eme salahu Saimon ibo sik, badan nyarahan in bada sau. Eme Jises asahan le badeh, oro tiye i tan. 31 Eme Jises ili hawen tawi minen ma suri iy eme loken, eme ma badan nyarahan nane iu, ma iy amekes noro nyamon.
32 Eme na beyeh an anya ki andri badeh, iri atiye iri lau mari sik ma hawe lau malawin ndra-in udu bwele-e iri ame hawen. 33 Eme iri lau mari badu kon tinan mara-ei atukum ala loboho le madasan ta asiu. 34 Eme Jises mesekei iri lau, saba sik udu tiri badeh, amwenen ja, ma tikahei iri malawin ndra-in solo-an au. Eme iy tiye iri malawin ndra-in kandru-uk le, tasah iri tanan iy.
Jises asolom ano iy atiye sahou mwasin ili Galili ja
(Luk 4:42-44)
35 Ano na mandraben ma wahun an bame loken bwe le, Jises suri iy ma edek eme len ta asiu ma edek iu ili kon ari doh, lau bare aliy bwe. Eme ma iy udu aliy asolom. 36 Arile Saimon hawe oro lau nane an hawen ala takaleh iy. 37 Eme oro ndruni iy ma asehek i tan, “Iri lau mari asilah ou.”
38 Eme Jises tiye i toro, “To ka-au ka kon rayah ja, ya jo kameh kasehek sahou ki aliy, tasah jo dah eme ta aliy amwenen ai.”
39 Eme ma iy edek ili loboho Galili mara-ei asehek sahou in bolo asiu ta atukum tiri Juwis ma atikah iri malawin ndra-in au.
Jises hawe ndramak badan lepra
(Metiu 8:1-4; Luk 5:12-16)
40 Eme ndramak ari sik lepra udu tan eme atehei bwili ndru-un i andri, ma iy ndremenya Jises i buku doh, “I buku none ou aseken, ou winiyan mesekei jo kamwenen ja udu mada Kindrei.” 41 Eme Jises tikisi iy labai, eme iy atehei minen i badan ma tiye i tan i buku doh, “Jo aseken. Ya ou amwenen.” 42 Eme ma nawin bwe, lepra udu badan amai iu laleyah ma iy ndramwenen ja. 43-44 Eme iy suni iy iu ma tiye sahou boto-on i tan i buku doh, “Ou sala sasehek ta ari lau ja ai, ndri-iy. Arile, ou ales ala hawe iri pris, leheya badam ki tiri kanyolom, ano ou adeu salom ta asun i le buku Moses mene ndrabatanau, ya eme iri kanyolom ma katanan ou badeh, ndramwenen ja.”
45 Arile bwai, ndramak nane dah ili asehek i tiri lau mari. Eme handru labai iy asehek san solo-an labai, eme Jises winiyan bala kon tinan bwe. Arile iy udu ndra kon nane lau aliy bwe doh, eme ma iri lau badu heh, badu heh ame le hawen.