11
Kindrei tikisi iri Isra-el
1 Ya eme jo lelen anya, sebwe Kindrei baseken iri lau tan bwe nadeh? Bwe, handru en! Jo dah badeh, ndraye Isra-el amwenen, lundriye Abraham badu boho kamen ta Benjamin. 2 Kindrei badeh, winiyan bakahei iri Isra-el bwe, tasah ndra mwena mwena ndra-au iy tanan ta iri badeh, lau tan amwenen. Aha bala tana aha bwe? Tarou mene torowenei udu bolo buk ndrabun asehek nyala Alaija mene ibolosen ma iy asalom i ta Kindrei ma iy asehek kandriyen tiri Isra-el i buku doh,
3 “Laban, iri mene ndradai iri propet tam, ma ndratokosei mada koto-ok tam ta salom ndra-au; eme ma jo le ari erah, ya iri anya kadai jo ale.” 1 Kabin 19:10, 14
4 Ya eme Kindrei tiye sasah i tan?
“Bwe, jo ndrasolo-ei iri lau ma ndru tuluwi (7,000) iri mene batehei bwili ndru-u iri bala andri ta Ba-al bwe, ndrame tek.” 1 Kabin 19:18
5 Ya eme na len dah i le buku aliy, na tikisiy ta Kindrei le, iy solo-ei oro rayah le tawi oro areu. 6 Iy atehei tikisiy badeh, i kati budon tan, ya buku iy anya kasolo-ei ndramak badeh, iy ba-en hamon ta lahou ndramak amekes doh bwe. Tasah, ki buku none Kindrei kasolo-ei ndramak ki-in hamon le ta lahou iy amekes, idah kameh tikisiy tan ari moson bwe.
7 Ya, asah i buku doh: Iri Isra-el anya katakaleh san ta Kindrei kaloh iri mwasin mara-ei ta madan, arile iri batakalahei bwe. Arile, iri lau rayah le Kindrei solo-ei iri badeh, iri ndruniy. Ya iri mara-ei badu hawe oro nane doh, Kindrei mesekei ndrine iri abadok ta iri winiyan banuhun sahou tan bwe. 8 I buku none ndratorowenei mene ndra-au anya,
“Kindrei badeh, wahei budon tiri Isra-el,
ma mesekei mada iri agwah ta anyolom lakou,
hawe ndranye iri ulun ta anuhun kon,
eme, eme, taku na len dah.” Dutoronomi 29:4; Aisaya 29:10
9 Ma Debit ale tiye anya,
“Ya abo, jo aseken nyamon tiri ki buku lakou ta wahei iri; ki buku nyamon udu ta samek hawe udu ta lolohon kawahei iri kala kasukik,
ma ki buku bek iri kato-ak ma kataku bwele-en,
ya iri lakou doh kasahan tiri ta amekes oda iri kakohok sisi-in ta kandriyen ndra-in tiri.
10 Ya abo, jo aseken lakou kawahei mada iri kagwah, ma iri sanyolom kon eh,
ma hawe ndruwi kona iri kihun kudu le buku don eh.” Wari 69:22-23
Kindrei akohok iri lau badu leheleh ame hamon
11 Ya eme jo ndremenya ja anya, na len iri Isra-el ato-ak ma taku mene, iri ndrandra-i mara-ei, deh bwe? Bwe! Arile iri atehei kona iri i ta Kindrei, ma iri amekes karei ma lomondra ndra-in. Eme, ta katin doh, Kindrei eme aseben iri lau badu leheleh. Budon tan badeh, iy aseken iri Isra-el kanyolom kandriyen tan ta tikisiy i tiri lau badu leheleh, ma eme iri Isra-el ame, ya mada iri alikis ta aliy. 12 Na len iri lau badu Isra-el atehei kona iri i ta Kindrei, Kindrei le aseben iri lau badu kon munyak. Handru, na len iri Isra-el atelei ma bakohok nyosowan ta Kindrei bwe, iy mesekei iri lau badu leheleh akohok nyosowan solo-an labai ja. Ya, ta seleya ta aliy badeh, i buku doh: I buku none iri Isra-el katubuni kandriyen tiri ma kame hamon hawe Kindrei ja, idah kameh, nyosowan solo-an labai mwasin ja winiyan eme la-u lau mari badu leheleh ma badu Isra-el ale.
13 Ya sasah, sasah kasahan, aha ndratanan ta jo badeh, aposel ta atiye sahou ta ewek taha lau badu leheleh. Kindrei suni jo dah ta amekes lahou tan, ma jo sekesek ma aseken iri lau kanyolom gok jo amekes dah. 14 Tasah, jo abudon i san doh, kameh winiyan mesekei iri lau badu hawek, iri Isra-el kameh, mada iri alikis ta aliy. Ma idah kameh, winiyan sebenei iri rayah ado mwasin. 15 Ya kabatana len doh mene Kindrei baseken iri bwe badeh, mesekei iri lau badu kon munyak asahan kawas ta Kindrei. Eme ma, i buku none len ta aliy kasahan, ya Kindrei kaseken iri Isra-el kame hamon ja, idah kameh, ki buku sah bah? Idah kameh, iri sekesek tinan labai, i buku none iri amak ta imek ame loken.
16 Ya, sahou sokek i buku doh: I buku none ou amekes jabi ramen, ano ou andrei ari ma mwena, ou adeu i ta Kindrei i nyara ndramas badeh, jabi ramen mari ndra tan kabwe. Ma, i buku none kandro kei katehei ki ndramas ki ta Kindrei badeh, ma andran mari kili hawen ale. Idoh leheya buku, bwena mene, Abraham hawe tubu iri Isra-el rayah ndratehei iri ndra ta Kindrei. Eme ya, udu hamon ja, iri lundriye Isra-el kameh ame hawen ale.
17 Iri lau badu Isra-el badeh, i buku kei olip ateh udu bolo bilin. Kindrei eme tubwani andran rayah ma akahei iu. Ya, aha lau badu leheleh badeh, i buku andra kei olip ateh laleyah udu bolo lokei. Eme aha andra olip saniy badu bolo lokei doh badeh, Kindrei andrei aha ala ya tabahani aha ahas ala bada ndro-o andra olip rayah nane udu bolo bilin. Ma eme gwa edek bolo kandron eme ma nyohonei bakatabadah dah akuk ma andra iri basara bwe, uru asahan ari buruwen. 18 Eme ya aha andra olip ta bakatabadah, mada aha sandra-i sala toro andra olip udu bilin ibok mene, ndri-iy. Tasah, aha badeh, andran laleyah; aha akohok nyosowan ma boto-on badeh, edek udu ta kandron le. Kandron badeh, balelei aha bwe. 19 Ya, i buku none ou asehek anya, “Iy ndrasani oro andran kede-eh ndrame andri, tasah iy anya katabahani jo kili bada ndro-on oh.” 20 Handru, arile ou anuhun! Oro mene abok a andri tasah oro batehei budon handru toro bwe. Arile ou ales boto-on ta lakou ari le, ta budon handru tam. Ma ou sabudon anya ou ndra ari ai, ndri-iy; ou abudon ou, ma ou anoh. 21 Ou abudon! Kindrei mene sani iri Isra-el rayah ame andri, i buku ndramak sani andra kei olip amwenen. Ya eme ou ale kameh, buku ou ruwani budon tam handru, iy winiyan sani ou ame andri ale. 22 Ya eme ou none seleya se, Kindrei amekes kandriyen mwasin labai i tiri lau, arile iy ale edeu maha-an i la-u iri ma tiye sahou nyarahan ale. Iy edeu maha-an i la-u iri mene taku, arile iy amekes kandriyen mwasin ewek tam, i buku ou adek amwenen ala le bolo kandriyen mwasin tan. Bwe kameh iy kasani ou ame andri ale. 23 Ya, i buku none iri Isra-el nane katehei budon tiri handru kihis, iri kameh winiyan alih hamon ja ala bada ndro-o iri. Tasah, Kindrei le kameh winiyan tabadah iri ala hamon ala bada ndro-o iri. 24 Ya, ou tanam, ou a buku andra kei olip mene ateh laleyah bolo lokei. Ya, Kindrei eme amekes lahou boto-on labai, iy eme sani ou badu lokei, eme ya iy tabadahani ou ndra bada ndro-o olip udu bolo bilin ndrahas kabwe. Ma idoh kameh, mwasin labai ja ta Kindrei kameh winiyan atehei iri lau badu Isra-el kameh ala hawen ala ndrahune iri amwenen.
Iri Isra-el mari kameh ado mwasin
25 Aha nadu tine, jo aseken budon taha kaleu ta sali sahou handru bwena mene aton mara-ei. Ma aha sasore nyara aha anya, Kindrei aseken le aha, ya iri Isra-el bwe, ndri-iy. Sali sahou handru bwena mene aton asah idoh: Iri lau rayah badu Isra-el badeh, bwale iri atehei budon tiri handru in ta Jises Krais. Ya iri kameh tunuhun sahou mwasin tan ili winiya le kane iri lau mari badu leheleh ala Kindrei aloh iri badeh, anuhun sahou mwasin ta nyala Jises Krais ma ame bolo tondrok tan. 26 Ma i san doh kameh, buku kane iri lau badu leheleh winiyan eh, Kindrei kameh akohok iri Isra-el mari ame hamon, ma iri kameh ado mwasin i buku none ndratorowenei mene ndra-au,
“Ndramak ta seben kameh asahan udu Sayon eme.* Sayon badeh, nyaran ari ja ta kon tinan Jerusalem.
Iy kameh tikahei kandriyen ta tunuhun sahou tan au a len ta lundriye Jekob oro.
27 Ma idah, sahou randra le tek jo amekes hawe iri,
Ma jo kameh sikine kandriyen ndra-in tiri mara-ei iu.” Aisaya 59:20-21; 27:9; Jeremaya 31:33-34
28 Arile, iy anyolom iri Isra-el badeh, ndratubuni kona iri ndra ta sahou mwasin, ya eme mesekei iri are len labai ta Kindrei; ma eme sihi madasan ta Kindrei amekes mwasin i taha lau badu leheleh. Arile, in hamon ta tandrakan tan bwena mene iy amekes hawe tubu iri Isra-el badeh, iy aseken iri kahis le. 29 Tasah, Kindrei winiyan bapwai tandrakan tan mene iy amekes i tiri lau tan iy aloh iri ma atehei nyosowan i la-u iri, bwe. 30 I le buku none aha lau badu leheleh
mene tebelese boho Kindrei; na dah Kindrei tikisi aha. Tasah, na tebelese tiri Isra-el le mesekei aha asahan i buku badeh. 31 Ya i le buku aliy, i san ta Kindrei tikisi aha le badeh, tubuni iri lau badu Isra-el mene tebelese boho Kindrei, na dah kameh akohok tikisiy tan ale. 32 Ma eme ta sendrehendreh ta sahou, jo asehek i buku doh: Kindrei mene alelei lau mari tebelese badeh, ta katin doh: Ta iy kaleheya tikisiy tan keme lewen la-u lau mari.
Masiye ki ta Kindrei
33 Handru labai, Kindrei amekes mwasin solo-an labai eme tataha mari.
Lomondra tan ta aleben ndra amwenen le,
Ma tanan tan badeh, ili labai.
Taha winiyan batakalahei kati budon tan ta aleben bwe,
Ma taha winiyan bala tanan tekedek tan bwe.
34 “Are lau handru, iy ndratanan iri budon marakon ta Laban?
Ma, are lau winiyan batanau iy ta sasah?” Aisaya 40:13
35 “Are lau ndradeu lakou ndra ta Kindrei,
ya eme iy kedeu bundruwen ki hamon?” Jop 41:11
36 Taha mara-ei winiyan bwe!
Tasah, lakou mari asahan badeh, iy le amekes;
Iy asehek na le bohon badeh, lakou asahan i le buku aliy;
Ma iy amekes iri lakou mara-ei badeh, tan le ari.
Ya ta katin le doh badeh, taha lau mari katudun iy kudu le buku doh.
Handru!
Pol asehek ta kandriyen iri mwan ma badih atehei budon tiri handru in ta Krais badeh, iri kamekes
(Kalan 12:1–15:13)