5
ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤶᤔᤠ
ᤀᤠᤳᤋᤡᤸᤗᤧ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤑᤠ᤹ᤀᤠᤱ ᤏᤛᤠ᤺ᤴ ᤆᤥᤃᤢ᤹. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤖᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤔᤡ᤺ᤶᤈᤡ ᤁᤧᤔᤧᤵᤐᤧᤸᤗᤧ ᤁᤢᤛ᤻ᤛᤠ᤺ᤴᤏᤠᤱ ᤔᤡ᤺ᤶᤈᤡ ᤔᤧᤳᤋᤢ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤀᤠᤔᤧᤳᤋᤢᤶᤔᤠᤱ ᤁᤢᤀᤡᤱᤈᤠ᤺ᤱᤜᤠ᤹ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤜᤠ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤛᤡᤶ ᤁᤧᤗ᤹ᤒᤠᤴᤏᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤑᤠ᤹ᤀᤡᤱᤃ ᤁᤢᤀᤡᤱᤈᤠ᤺ᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤜᤠ᤹ ᤀᤠᤏᤡ᤹ ᤗᤠᤃᤡ ᤔᤧᤛᤠᤰᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤴᤍᤢ᤹ᤖᤥ॥ ᤀᤠᤏᤡ᤹ ᤏᤛᤠ᤺ᤴᤏᤡᤸᤗᤧᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤴᤍᤢ᤹ᤖᤥ॥ ᤜᤠ᤺ᤳᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤶᤔᤠ ᤛᤢᤰᤋᤢ᤹ᤒᤣ᥅ ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤛᤠ᤺ᤖᤥ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠᤸᤗᤧᤖᤰ ᤛᤢᤰᤋᤢ᤹ᤖᤥ॥
ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤍᤥ᤺ᤴᤍᤡᤜᤠ᤹
ᤕᤧᤛᤢ ᤂᤪᤡᤛ᤻ᤋᤧᤴ ᤕᤧᤀᤠᤱ ᤆᤫᤠ᤺ᤳᤋᤥ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤁᤢᤔᤠᤰᤂᤡ᤹ᤀᤡᤴ ᤘᤠᤍᤣ᤺ᤴᤍᤢ॥* ᤃᤪᤡᤁ ᤐᤠ᤺ᤴᤍᤠᤱᤅᤥ “ᤕᤧᤛᤢ ᤂᤪᤡᤛ᤻ᤋᤧᤴ ᤆᤫᤠ᤺ᤳ ᤏᤢ ᤔᤠᤰᤂᤡ᤹ᤗᤠᤶ ᤕᤧᤖᤥ॥” ᤂᤢᤏᤧ᤹ᤃ ᤆᤫᤠ᤺ᤳᤗᤠᤶᤖᤰ ᤔᤧᤕᤧᤏᤧᤴ ᤁᤖ ᤆᤫᤠ᤺ᤳ ᤏᤢ ᤔᤠᤰᤂᤡ᤹ ᤏᤧᤵᤔᤠᤱᤗᤠᤶ ᤕᤧᤖᤥ॥ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤀᤠᤒᤠᤅᤣ ᤋᤥ᤺ᤴᤍᤡ ᤐᤡᤖᤢ᤹. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤴᤏᤣ ᤛᤧᤰᤂᤠ ᤆᤥ᤺ᤰᤗᤥ॥ ᤜᤧᤰᤁᤣ᤺ᤸᤗᤧ ᤛᤢᤶᤛᤡ ᤋᤥ᤺ᤴᤍᤡᤜᤠ᤹ ᤔᤧᤘᤠ᤹ᤖᤥ– ᤂᤧᤱᤜᤠ᤹ ᤛᤣᤛᤣᤔᤠᤱ. ᤆᤫᤠ᤺ᤳ ᤜᤧᤰᤁᤩᤠᤱ ᤔᤠᤰᤂᤡ᤹ᤖᤥ॥ ᤜᤧᤰᤁᤩᤠᤱ ᤁᤴ ᤛᤢᤶᤒᤪᤠᤱᤗᤧ ᤗᤳᤇᤠ ᤐᤠ᤺ᤴᤏᤥ ᤋᤥ᤺ᤴᤍᤡ ᤔᤧᤒᤡᤖᤢ᤹ᤖᤥ॥ ᤀᤠᤏᤡ᤹ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤥ᤺ᤴᤍᤡᤀᤥ ᤏᤛᤠ᤺ᤴ ᤀᤠᤈᤥᤃᤢᤶᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤥ᤺ᤴᤍᤡᤱᤃ ᤂᤧᤴᤏᤢ᤺ᤸᤗᤧᤀᤠᤱ ᤁᤢᤈᤧᤰ ᤆᤥ᤺ᤰ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤒᤠᤖᤥ॥ 10 ᤜᤧᤰᤁᤣᤗ᤹ᤖᤡᤰ ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤆᤥᤃᤢ᤹. ᤂᤧᤸᤗᤧ ᤁᤢᤛᤡᤰᤗᤢᤱᤔᤠᤀᤥ ᤁᤴ ᤋᤥ᤺ᤴᤍᤡᤴ ᤕᤢᤱᤗᤥ॥ ᤁᤖ ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢᤴ. ᤂᤧᤸᤗᤧ ᤂᤢᤏᤧ᤹ ᤀᤡᤱᤗᤧᤰᤐᤠ ᤆᤥᤃᤢ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤡᤖᤢᤒᤠ ᤋᤥ᤺ᤴᤍᤡᤀᤥ ᤂᤧᤸᤗᤧ ᤏᤛᤠ᤺ᤴ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥ 11 ᤋᤥ᤺ᤴᤍᤡ᤺ᤱᤃ ᤀᤠᤶᤓᤠ ᤁᤴᤗᤥ–ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤠᤒᤡᤖᤧᤀᤠᤱ ᤀᤠᤘᤠ᤹. ᤜᤧᤰᤁᤩᤠᤱ ᤁᤴ ᤜᤡᤱᤔᤴᤏᤡᤱᤃ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤗᤠᤶ ᤋᤠ᤺ᤖᤥ॥ 12 ᤜᤠ᤺ᤳᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤏᤛᤠ᤺ᤴ ᤆᤥᤃᤢᤀᤠᤱ ᤘᤠ᤹. ᤂᤧᤸᤗᤧ ᤁᤴ ᤜᤡᤱᤔᤴᤏᤡᤴ ᤁᤳᤋᤢ᤹॥ ᤁᤖ ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤔᤧᤴᤈᤥ᤺ᤰᤁᤣ ᤘᤠ᤹. ᤂᤧᤸᤗᤧ ᤁᤴ ᤜᤡᤱᤔᤴᤏᤡᤴᤏᤠᤱ ᤔᤧᤃᤳᤋᤢᤴᤗᤥ॥
ᤁᤢᤏᤢᤵᤔᤠ ᤀᤡᤱᤈᤠ᤺ᤱ
13 ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤁᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥ 14 ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤋᤢᤘᤠᤀᤥ ᤀᤠᤏᤠ᤺ᤰᤋᤢᤶᤔᤡᤸᤗᤧ ᤂᤢᤏᤧ᤹ ᤀᤠᤏᤡ᤹ ᤐᤠ᤺ᤴᤏᤡᤴ ᤂᤧᤵᤛᤢ᤹ ᤑᤠ᤹ᤀᤠᤱ ᤏᤡ᤺ᤴᤎᤥ ᤀᤠᤒᤥ᤺ᤱᤗᤥ॥ 15 ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤠᤸᤗᤧᤛᤠᤱ ᤀᤠᤏᤠ᤺ᤰᤋᤢᤶᤒᤠ ᤐᤠ᤺ᤴᤜᤠ᤹ ᤂᤧᤵᤛᤢ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤏᤧ ᤑᤠ᤹ᤃᤪ ᤂᤢᤏᤧ᤹ ᤀᤠᤏᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤀᤠᤒᤡ᤹ᤀᤣᤖᤥ ᤑᤠ᤹ᤀᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
16 ᤜᤠ᤺ᤳᤗᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤌᤡᤰᤗᤧ ᤛᤡ᤺ᤔᤧᤴ ᤌᤠᤖᤡᤰ ᤔᤧᤴᤍᤣ᤹ᤔᤏᤠ ᤗᤠᤕᤥ ᤆᤥᤃᤢᤒᤠ ᤏᤡ᤺ᤛᤢ᤹. ᤂᤧᤴ ᤗᤠᤕᤥᤗᤠᤶ ᤏᤢ᤺ᤱᤏᤡ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ ᤐᤡᤖᤢᤖᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢ᤹ᤖᤥ॥ ᤁᤱᤃ ᤛᤡ᤺ᤔᤧᤴ ᤌᤠᤖᤡᤰ ᤔᤧᤴᤍᤣ᤹ᤔᤏᤠ ᤗᤠᤕᤥ ᤁᤧᤈᤥ᤺ᤰᤐᤠᤸᤗᤧ ᤁᤢᤕᤠ᤺ᤶᤒᤣᤀᤥᤖᤰ ᤐᤠ᤺ᤳᤋᤢᤱᤒᤠᤖᤥ॥ ᤁᤖ ᤛᤡ᤺ᤔᤧᤴ ᤌᤠᤖᤡᤰ ᤁᤧᤍᤣ᤹ᤒᤠ ᤗᤠᤕᤥᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥ 17 ᤁᤠᤰ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤃ ᤗᤠᤕᤥᤖᤥ॥ ᤜᤧᤰᤁᤣᤛᤠᤱ ᤛᤡ᤺ᤔᤧᤴ ᤌᤠᤖᤡᤰ ᤔᤧᤴᤍᤣ᤹ᤔᤏᤠᤒᤠ ᤗᤠᤕᤥᤀᤠᤱ ᤘᤠ᤹ᤖᤥ॥
18 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤳᤋᤢᤒᤠ ᤛᤠ᤺ᤸᤗᤧ ᤗᤠᤕᤥ ᤆᤥᤃᤢᤖ ᤔᤧᤘᤠ᤹ᤏᤧᤴ ᤑᤠ᤹ᤀᤠᤱ ᤀᤠᤏᤡ᤹ ᤏᤢ᤺ᤖᤡᤰᤁᤠᤱ ᤀᤠᤏᤡ᤺ᤛᤢᤶᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ᤸᤗᤧ ᤂᤧᤴ ᤋᤠᤱᤛᤧ᤺ᤵᤋᤢ᤹ᤀᤠᤱ ᤁᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤧᤴ ᤛᤢ᤺ᤔᤠᤀᤠᤱ ᤔᤧᤛᤢᤰᤋᤢᤴᤗᤥ॥ 19 ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤛᤡᤖᤥ. ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤜᤢᤰᤁᤥ ᤌᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤺ᤛᤢᤶᤗᤥ॥ 20 ᤏᤡᤱᤘᤠ᤹ᤑᤢᤛᤠ᤺ᤴ ᤕᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤸᤗᤥ ᤀᤠᤏᤡ᤹ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤕᤧᤛᤢ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤀᤠᤘᤠ᤹ᤖᤥ॥ ᤂᤢᤏᤧ᤹ᤀᤣ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥ 21 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤏᤠᤘᤠᤀᤡᤳᤗᤠᤜᤠ᤹ᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥

*5:6 ᤃᤪᤡᤁ ᤐᤠ᤺ᤴᤍᤠᤱᤅᤥ “ᤕᤧᤛᤢ ᤂᤪᤡᤛ᤻ᤋᤧᤴ ᤆᤫᤠ᤺ᤳ ᤏᤢ ᤔᤠᤰᤂᤡ᤹ᤗᤠᤶ ᤕᤧᤖᤥ॥”