4
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ
ᤀᤠᤸᤗ ᤁᤢᤏᤢᤵᤔᤥ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠᤖ ᤜᤡᤱᤔᤠ ᤐᤥ᤺ᤱ ᤗ᤹ᤖᤡᤰ ᤀᤠᤏᤡᤃᤧᤗᤠᤶ ᤁᤧᤜᤢ᤹ᤀᤠᤛᤡᤒᤠ ᤜᤧᤰᤁᤣᤀᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹॥ ᤁᤖ ᤀᤠᤸᤗᤛᤠᤱ ᤕᤖᤡᤰ ᤏᤢ᤺ᤖᤡᤰᤁᤠᤱ ᤁᤴ ᤐᤠ᤺ᤴᤜᤠ᤹ ᤁᤧᤈᤥᤃᤢᤶᤗᤀᤣ ᤐᤥ᤺ᤱ ᤑᤠ᤹ᤀᤠᤱ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ ᤌᤣᤀᤠᤱᤓᤧᤸᤗᤧ ᤁᤴ ᤂᤡᤏᤡ᤹ ᤐᤡᤀᤠᤛᤡᤃᤧᤒᤠ ᤀᤡᤱᤈᤠ᤺ᤱᤜᤠ᤹ᤃ ᤍᤠᤱᤒᤠ ᤕᤧᤛᤢᤖᤧ ᤁᤢᤕᤢᤰᤁᤥᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥ ᤂᤡᤏᤡ᤹ ᤛᤣᤛᤣ ᤁᤧᤘᤕᤡᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤁᤠᤰ ᤘᤣ᤹ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ ᤆᤠᤖᤠᤶᤔᤥᤗᤠᤶ ᤁᤧᤒᤥ᤺ᤱᤒᤠ ᤆᤡ᤺ᤴᤈᤡ᤺ᤶᤒᤠᤀᤥᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥ ᤘᤣ᤹ᤜᤠ᤹ᤖᤧ ᤀᤡᤱᤎᤠ᤺ᤱ ᤁᤧᤶᤒᤡᤖᤡᤏᤡ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤣᤛᤣ ᤁᤵᤔᤠ ᤐᤥ᤺ᤱ ᤁᤧᤗ᤹ᤒᤠᤱᤃ ᤂᤡᤏᤡ᤹ ᤗᤧᤔᤠ ᤐᤥ᤺ᤱᤗᤥ॥* ᤁᤴ ᤑᤠ᤹ᤀᤡᤱᤃ ᤀᤠᤒᤠᤅᤣ ᤔᤣ᤺ᤳᤋᤡᤴᤏᤢ ᤘᤠ᤹ᤔᤠᤸᤗᤧ ᤔᤡᤱᤛᤥ ᤀᤡᤱᤎᤠ᤺ᤱᤏᤢ ᤘᤠ᤹ᤔᤠ ᤐᤥ᤺ᤱ ᤁᤧᤗ᤹ᤒᤠᤴ ᤂᤡᤏᤡ᤹ ᤗᤧᤔᤠ ᤐᤥ᤺ᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠ ᤛᤢᤘᤠᤱᤜᤠ᤹ ᤜᤧᤰᤁᤣ ᤗᤠᤶᤔᤠ ᤑᤧᤴ ᤏᤡᤱᤘᤠ᤹ ᤁᤵᤔᤠ ᤔᤧᤏᤢ᤹ᤏᤧᤴᤗᤥ॥ ᤀᤰᤂᤣᤗ᤹ᤖᤡᤰ ᤁᤴ ᤐᤠ᤺ᤴᤏᤥ ᤀᤠᤳᤋᤡᤸᤗᤧᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤏᤢ ᤗᤠᤶᤛᤡᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤁᤠᤰ ᤜᤧᤰᤋᤱᤒᤠ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡ ᤑᤠ᤹ᤀᤠᤱ ᤋᤃᤡᤛᤠ ᤀᤠᤏᤡᤃᤧ ᤛᤠᤶᤍᤡᤱ ᤐᤡᤀᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤃ ᤆᤡ᤺ᤴᤈᤡ᤺ᤶᤒᤠ ᤜᤡᤱᤔᤴᤏᤥ ᤔᤧ᤺ᤴ. ᤁᤖ ᤛᤣᤛᤣ ᤛᤠᤱᤛᤠᤱᤅᤠᤱ ᤜᤡᤱᤔᤠ ᤗ᤹ᤖᤡᤰ ᤀᤠᤀᤢ᤺ᤳᤋᤧᤒᤠᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤸᤗᤧ ᤁᤴ ᤏᤡᤛᤠᤶᤔᤡᤴ ᤏᤠ᤹ᤖᤢ. ᤂᤧᤸᤗᤧᤃ ᤔᤧᤴᤇᤠᤶᤃᤧᤴ ᤕᤠᤵᤔᤡ᤺ᤴ ᤔᤧ᤺ᤴ. ᤁᤖ ᤂᤡᤏᤡ᤹ ᤛᤣᤛᤣᤔᤠᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤹ᤖᤢᤒᤠᤖᤥ॥
ᤀᤠᤸᤗ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤶᤔᤥ ᤀᤠᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱ ᤁᤧᤗ᤹ᤒᤠᤴ ᤛᤠᤵᤔᤠᤖ ᤏᤧᤔᤠ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱ ᤑᤠ᤹ᤀᤠᤱ ᤁᤧᤜᤢ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥ 10 ᤛᤧᤰᤂᤠ᤺ᤸᤗᤧ. ᤁᤠᤰ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤏᤛᤠᤏᤡᤒᤠᤜᤠ᤹ᤏᤢᤀᤠᤱ ᤒᤠ ᤜᤧᤰᤁᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗᤛᤠᤱ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥
11 ᤛᤏᤠᤖᤢᤱᤅᤥ ᤜᤡᤱᤔᤴ ᤂᤡᤏᤡ᤹ ᤜᤡᤱᤔᤴᤗᤧ ᤋᤠᤖᤠᤵ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧ ᤋᤃᤡᤛᤠ ᤔᤧᤳᤋᤠᤛᤡᤃᤧᤒᤠ ᤁᤢᤀᤡᤛᤡ᤺ᤰ ᤛᤫᤠ᤺ᤳ ᤘᤕᤧᤶᤔᤧ᤹ᤀᤠᤱ ᤀᤠᤒᤠᤅᤣ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤖ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥ 12 ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧ ᤀᤡᤱᤎᤠ᤺ᤱ ᤁᤧᤶᤒᤡᤖᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤆᤠᤕᤠ᤺ᤶᤒᤥᤀᤥ ᤁᤢᤓᤠᤖᤧ ᤗᤠᤃᤡ ᤘᤣ᤹ ᤔᤏᤠᤜᤠ᤹ᤀᤥ ᤋᤠ᤺ᤰᤐᤥ ᤆᤥ᤺ᤰᤔᤠ ᤔᤧᤒᤥ᤺ᤱᤏᤧᤸᤗᤥ॥
ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠᤴ
13 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤧᤛᤡ᤺ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤸᤗᤧ ᤔᤧᤴᤏᤡᤀᤣ ᤔᤧᤘᤕᤧᤶᤔᤡᤴᤏᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤧᤛᤢᤀᤥ ᤏᤡᤱᤛᤠᤱ ᤁᤧᤜᤥ᤺ᤵᤐᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤔᤣᤖᤡᤱ ᤔᤧᤎᤰᤋᤧᤶᤔᤡᤴᤏᤧ᤹ᤀᤥ॥ 14 ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤛᤩᤧᤀᤠᤱ ᤕᤠᤶᤔᤥ ᤜᤡᤅᤧᤒᤠ ᤐᤠ᤺ᤴᤏᤥ ᤀᤠᤏᤡ᤹ ᤏᤛᤠ᤺ᤴ ᤀᤠᤈᤥᤃᤢᤶ. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤛᤡᤀᤠᤱ ᤕᤧᤛᤢ᤺ᤴᤏᤢᤀᤣ ᤋᤠᤖᤢᤛᤡᤖᤥ॥ 15 ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤢᤒᤠ᤺ᤴᤈᤠᤴᤗᤠᤶᤒᤠ ᤀᤠᤏᤡᤃᤧ ᤀᤰᤂᤣ ᤐᤠ᤺ᤳᤋᤢᤶᤒᤧᤖᤥ. ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠ ᤕᤧᤶ ᤌᤠᤖᤡᤰ ᤀᤠᤏᤡ᤹ ᤔᤧᤴᤇᤡ᤺ᤀᤣ ᤁᤧᤘᤠ᤹ᤒᤠᤜᤠ᤹ᤖᤧ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠᤜᤠ᤹ ᤀᤠᤰᤂᤣᤀᤠᤱᤛᤠᤱ ᤗᤠᤶᤀᤠᤶᤒᤠᤰᤋᤢᤶᤛᤡᤶᤔᤡᤴᤗᤥ॥ 16 ᤌᤣᤀᤠᤱᤓᤧᤸᤗᤧ ᤋᤢᤶᤔᤠᤱᤗᤠᤀᤡᤱᤒᤠᤸᤗᤧ ᤁᤢᤀᤡᤰᤗᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤢᤳᤋᤢᤖᤡ᤺ᤵᤐᤠᤸᤗᤧ ᤁᤢᤀᤡᤰᤗᤠᤏᤢ ᤍᤠᤱᤒᤠᤴᤏᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗ ᤕᤢ᤺ᤖᤥ॥ ᤜᤧᤰᤁᤩᤠᤱ ᤁᤠᤰ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤜᤡᤱᤔᤴᤏᤥ ᤁᤠᤰᤏᤢ ᤋᤃᤡ ᤔᤧᤜᤡᤱᤅᤠᤱ ᤔᤧᤒᤥ᤺ᤰᤗᤥ॥ 17 ᤜᤧᤰᤁᤩᤠᤱ ᤀᤠᤏᤡ᤹ ᤀᤡᤰᤛᤠᤀᤥ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠᤜᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤍᤢᤶᤛᤧ ᤋᤠᤱᤛᤠᤰᤐᤠᤀᤥ ᤌᤠ᤺ᤱ ᤀᤠᤒᤱ ᤀᤠᤍᤣ᤹ᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤀᤠᤓᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤛᤍᤠᤍᤡᤱ ᤍᤠᤱᤒᤠᤴᤏᤢ ᤀᤠᤘᤠ᤹ᤖᤥ॥ 18 ᤁᤴ ᤐᤠ᤺ᤴᤜᤠ᤹ᤗᤠᤶᤒᤠ ᤜᤠᤱᤜᤠᤱ ᤔᤧᤳᤋᤠᤛᤡᤶᤔᤧ᤹ᤀᤥ॥

*4:4 ᤁᤴ ᤑᤠ᤹ᤀᤡᤱᤃ ᤀᤠᤒᤠᤅᤣ ᤔᤣ᤺ᤳᤋᤡᤴᤏᤢ ᤘᤠ᤹ᤔᤠᤸᤗᤧ ᤔᤡᤱᤛᤥ ᤀᤡᤱᤎᤠ᤺ᤱᤏᤢ ᤘᤠ᤹ᤔᤠ ᤐᤥ᤺ᤱ ᤁᤧᤗ᤹ᤒᤠᤴ ᤂᤡᤏᤡ᤹ ᤗᤧᤔᤠ ᤐᤥ᤺ᤱᤗᤥ॥