1 ᤜᤧᤰᤁᤩᤠᤱ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤐᤥ᤺ᤰᤂᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤛᤢᤏᤠᤀᤡᤱᤅᤡᤸᤗᤧ ᤐᤠ᤺ᤴᤏᤡᤴ ᤂᤡᤏᤡ᤹ ᤜᤡᤱᤔᤴᤏᤥ ᤜᤏᤧ ᤐᤥ᤺ᤱᤔᤠ ᤔᤧᤒᤠᤱᤄᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ 2 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤗᤠᤶ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹.

3 ᤀᤠᤏᤡᤃᤧ ᤔᤠᤱᤛᤣᤘᤠᤀᤥ ᤀᤠᤵᤋᤡᤰ ᤔᤧᤍᤠᤏᤧᤴᤗ ᤑᤠ᤹ᤀᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤗᤠᤶᤔᤡᤴᤏᤠᤱ ᤔᤧᤜᤶᤛᤢᤶᤒᤧᤴᤗᤥ॥ 4 ᤁᤖ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤀᤣᤒᤠ ᤁᤢᤛᤣᤘᤠᤖᤥᤒᤠᤛᤡᤃᤧ ᤑᤠ᤹ᤀᤠᤱ ᤁᤠᤰ ᤐᤖᤡᤰᤗᤧ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤰᤁᤠᤛᤡᤃᤧᤖᤥ॥ ᤀᤠᤏᤡᤃᤧ ᤁᤠᤰ ᤋᤢᤰᤂᤣ ᤆᤩᤧ᤹ᤀᤡᤃᤧᤸᤗᤧ. ᤁᤧᤛᤠᤰᤐᤠ ᤐᤠ᤺ᤴ ᤋᤢᤔᤢᤶᤒᤧᤸᤗᤧ ᤜᤧᤰᤁᤩᤠᤱ ᤏᤡᤱᤘᤠ᤹ ᤐᤱᤛᤡᤱᤅᤡᤸᤗᤧ ᤛᤠ᤹ᤖᤡᤰ ᤏᤠᤛᤡ ᤌ᤺ᤳᤋᤢᤶᤒᤧᤖᤥ॥ 5 ᤀᤠᤏᤡᤃᤧ ᤋᤧ᤺ᤶᤓᤢᤰ ᤆᤩᤧ᤹ᤀᤡᤃᤧ. ᤐᤢᤱᤗᤠᤜᤡᤶᤔᤥ ᤌᤩᤧ᤹ᤀᤡᤃᤧᤀᤠᤱ ᤘᤕᤡᤃᤧ. ᤀᤠᤏᤡᤃᤧ ᤋᤰᤗᤧᤱᤘᤠᤀᤥ ᤕᤖᤡᤰ ᤔᤧᤒᤥᤃᤧᤀᤠᤱ ᤔᤧᤘᤠ᤹ᤖᤥ॥ ᤛᤠ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤶᤒᤧ ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤡᤶᤔᤠ ᤏᤢ ᤆᤠᤔᤠᤀᤠᤱ ᤔᤧᤱᤄᤥᤀᤣ ᤘᤕᤡᤃᤧᤖᤥ॥ 6-7 ᤀᤠᤏᤡᤃᤧ ᤛᤣᤛᤣ ᤜᤡᤱᤔᤴᤗᤠᤶ. ᤂᤠᤛᤡᤱ ᤏᤡ᤺ᤵᤔᤠᤗᤠᤶ. ᤏᤠᤛᤡ ᤌ᤺ᤵᤔᤠᤗᤠᤶ. ᤏᤢ᤺ᤖᤡᤰᤁᤠᤱ ᤗᤢᤱᤔᤠ᤹ ᤋᤢᤰᤔᤠᤗᤠᤶ. ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ. ᤁᤢᤍᤥ᤺ᤵᤔᤠ ᤔᤡ᤺ᤶᤈᤡᤗᤠᤶ. ᤛᤧᤰᤂᤠᤒᤠ ᤛᤢᤏᤠᤀᤡᤱᤄᤱᤗᤠᤶ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤛᤡᤃᤧ ᤑᤠ᤹ᤀᤠᤱ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤰᤁᤠᤛᤡᤃᤧᤖᤥ॥ ᤀᤠᤰᤋᤱᤒᤠ ᤕᤧᤶᤔᤥᤛᤠᤱ ᤀᤠᤏᤡᤃᤧ ᤑᤧᤈᤢᤶ ᤑᤧᤕᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤀᤠᤏᤡᤃᤧ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤣᤖᤥ॥ 8 ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤡᤃᤧᤛᤠᤱ ᤔᤧᤶᤒᤡᤖᤡᤃᤧᤴᤇᤠᤱ. ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤔᤧᤔᤧᤳᤋᤡᤃᤧᤛᤠᤱ. ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠ ᤆᤥᤃᤢᤶᤒᤧ᤹ᤖᤥ॥ ᤀᤠᤏᤡᤃᤧ ᤁᤢᤍᤥ᤺ᤵᤔᤠ ᤆᤥᤃᤡᤃᤧ᤹ ᤁᤖ ᤀᤡᤱᤗᤧᤰᤁᤣ ᤔᤧᤔᤧᤳᤋᤡᤃᤧᤖᤥ॥ 9 ᤀᤠᤏᤡᤃᤧ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤡᤃᤧᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠ ᤔᤧᤗᤧᤱᤛᤡᤱᤗᤥ॥ ᤛᤡ᤺ᤔᤠᤗᤡᤱᤎᤥ ᤁᤧᤖᤡᤃᤧᤛᤠᤱ ᤁᤢᤜᤡᤱᤘᤧᤳ ᤘᤕᤡᤃᤧᤖᤥ॥ ᤋᤧ᤺ᤶᤓᤢᤰ ᤔᤧᤕᤠ᤺ᤰᤋᤡᤃᤧᤛᤠᤱ ᤔᤧᤴᤇᤡ᤺ᤀᤣ ᤘᤕᤡᤃᤧᤖᤥ॥ 10 ᤔᤣᤖᤡᤱᤅᤥ ᤌᤩᤧ᤹ᤀᤡᤃᤧᤛᤠᤱ ᤛᤍᤠᤍᤡᤱ ᤛ᤺ᤳᤋᤡᤃᤧᤖᤥ॥ ᤕᤠᤱᤃᤧᤛᤠ᤹ᤒᤠ ᤆᤥᤃᤡᤃᤧᤛᤠᤱ ᤕᤖᤡᤰ ᤔᤏᤠᤜᤠ᤹ ᤏᤛᤠ᤺ᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥᤃᤢᤶᤛᤡᤶᤒᤧᤖᤥ॥ ᤌᤣᤀᤠᤱ ᤔᤧᤃᤳᤋᤢᤶᤒᤧᤴᤇᤠᤱ ᤁᤠᤰ ᤐᤠ᤺ᤴ ᤁᤧᤃᤵᤐᤠ ᤁᤢᤀᤡᤛᤡ᤺ᤰ ᤆᤥᤃᤡᤃᤧᤖᤥ॥

11 ᤁᤥᤖᤴᤌᤡᤒᤠ ᤆᤢᤶᤛᤣ. ᤂᤡᤏᤡ᤹ ᤀᤠᤏᤡᤃᤧ ᤏᤡᤱᤘᤠ᤹ᤒᤠ ᤐᤠ᤺ᤴᤏᤡᤴ ᤔᤧᤳᤋᤠᤛᤡᤃᤧᤀᤠᤱ ᤘᤕᤡᤃᤧ. ᤂᤡᤏᤡ᤹ᤏᤢᤃ ᤀᤠᤏᤡᤃᤧ ᤏᤡᤱᤘᤠ᤹ᤀᤡᤴ ᤜᤖᤧᤀᤠᤱ ᤘᤠ᤹॥ 12 ᤀᤠᤏᤡᤃᤧ ᤗᤢᤱᤔᤠ᤹ ᤔᤧᤍᤢᤰᤁᤠᤛᤡᤃᤧᤶᤒᤠ ᤔᤧ᤺ᤴᤗᤥ. ᤁᤖ ᤂᤡᤏᤡ᤹ᤏᤧ ᤕᤠᤵᤔᤡ ᤗᤢᤱᤔᤠ᤹ ᤋᤢᤰᤔᤠ ᤁᤧᤗᤖᤢᤶᤗ ᤁᤧᤒᤣᤃᤡᤀᤠᤱ ᤁᤧᤘᤕᤡ᤹ᤖᤥ॥ 13 ᤀᤡᤱᤃᤠ᤹ᤃ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤵᤔᤏᤠᤒᤠ ᤜᤧᤰᤁᤣ ᤂᤡᤏᤡ᤹ ᤔᤧᤳᤏᤡᤱᤗᤥ–ᤀᤠᤏᤡᤃᤧ ᤏᤡᤱᤘᤠ᤹ᤀᤡᤴ ᤂᤡᤏᤡ᤹ᤏᤢ ᤕᤶᤒᤠ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤀᤡᤴᤏᤠᤱ ᤆᤢᤰᤐᤠ ᤔᤧ᤺ᤴ. ᤕᤶᤒᤠ ᤆᤥᤃᤧᤶᤔᤧ᤹ᤀᤥ॥

14 ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤄᤧ᤺ᤵᤐᤠᤛᤡᤶᤔᤡᤴᤏᤧ᤹ᤀᤥ.*ᤂᤧᤴ ᤑᤠ᤹ᤀᤡᤴ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤍᤱᤅᤠᤛᤡᤶᤔᤡᤴᤏᤧ᤹ ᤐᤥ᤺ᤱᤗᤥ॥ ᤁᤢᤒᤡᤀᤥ. ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤏᤡᤒᤠ ᤏᤢ ᤗᤠᤕᤥᤒᤠ ᤐᤠ᤺ᤴᤜᤠ᤹ ᤔᤧᤍᤱᤏᤧᤴᤗᤥ᥄ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤏᤢ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤴ ᤔᤧᤍᤱᤏᤧᤴᤗᤥ॥ 15 ᤂᤪᤡᤛ᤻ᤋᤧᤴ ᤏᤢ ᤔᤠᤑᤧᤴᤛᤠᤶᤔᤡᤴ*ᤔᤠᤑᤧᤴᤛᤠᤶᤔᤡᤴ–ᤃᤪᤡᤁ ᤐᤠ᤺ᤴᤍᤠᤱᤅᤥ ᤒᤣᤗᤡᤀᤠᤗ ᤐᤥ᤺ᤱ॥ ᤂᤧᤱᤃ ᤔᤠᤑᤧᤴᤛᤠᤶᤔᤡᤸᤗᤧ ᤗᤳᤇᤠ ᤁᤢᤔᤡᤱᤗᤥ॥ ᤀᤠᤰᤂᤣᤗ᤹ᤖᤡᤰ ᤋᤱᤔᤠ ᤛᤢᤰᤛᤡ᤹ᤒᤣ᥅ ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴᤏᤠᤱ ᤀᤠᤰᤂᤣᤗ᤹ᤖᤡᤰ ᤋᤱᤒᤣ᥅ 16 ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤏᤢ ᤏᤠᤘᤠᤀᤡᤳᤗᤠ᤺ᤴ ᤀᤠᤰᤂᤣᤗ᤹ᤖᤡᤰ ᤋᤱᤔᤠ ᤛᤢᤰᤐᤣ᥅ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤡᤶᤛᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ.