23
1 ᤐᤠᤘᤗᤖᤧ ᤕᤧᤈᤢᤶᤓᤥ᤺ᤴ ᤏᤢ᤺ᤖᤡᤰᤁᤠᤱ ᤀᤥᤔᤧᤳᤋᤢᤀᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤀᤡᤴ ᤌᤠᤖᤡᤰ ᤀᤠᤜᤡᤱᤔᤴᤏᤥ ᤛᤣᤛᤣ ᤂᤠᤛᤡᤱᤅᤥ ᤔᤠᤱᤛᤣᤘᤠ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥” 2 ᤁᤴ ᤂᤧᤵᤛᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤜᤏᤏᤡᤕᤠᤖᤧ ᤐᤠᤘᤗᤖᤧ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤌᤰᤋᤢᤶᤒᤠᤴ ᤐᤠᤘᤗᤖᤧ ᤁᤢᤔᤢᤖᤠᤀᤥ ᤜᤡᤵᤋᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤖᤥ॥ 3 ᤐᤠᤘᤗᤖᤧᤀᤠᤱ ᤜᤏᤏᤡᤕᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤀᤣ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤀᤠᤱ ᤁᤧᤜᤡᤵᤗᤥ॥ ᤂᤧᤏᤧ᤹ᤃ ᤂᤧᤵᤔᤥ ᤔᤥᤛᤠᤖᤧ ᤐᤡᤖᤢᤒᤠ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤀᤠᤄᤠᤛᤧᤴ ᤗᤥ᤺ᤶᤔᤠ ᤑᤠ᤹ᤀᤠᤱ ᤁᤧᤕᤢᤱ. ᤁᤖ ᤂᤧᤏᤧ᤹ᤃ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤠᤛᤧᤴ ᤗᤥ᤺ᤶᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤡᤱᤃᤠ᤹ ᤕᤠᤵᤔᤡ ᤜᤡᤵᤔᤠ ᤁᤧᤒᤠᤱᤄᤢᤛᤡᤒᤡ᥅”
4 ᤜᤧᤰᤁᤩᤠᤱ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤐᤠᤘᤗᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤏᤠᤎᤠ᤺ᤔᤠ ᤀᤠᤰᤂᤣᤀᤠᤱ ᤁᤧᤀᤠ᤺ᤴᤇᤡᤱᤒᤣ᥅”
5 ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤂᤢᤏᤧ᤹ᤃ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤔᤧᤴᤏᤡ᤺ᤒᤧᤴᤗᤥ॥ ᤛᤠᤶᤕᤥᤛᤠᤵᤗᤠᤀᤥᤃ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. ‘ᤂᤡᤏᤡ᤹ ᤗᤠᤶᤗᤥ᤺ᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ॥’ ”
6 ᤜᤧᤰᤁᤩᤠᤱ ᤐᤠᤘᤗᤖᤧ ᤂᤧᤵᤔᤥ ᤑᤖᤡᤛᤡ ᤏᤢ ᤛᤍᤢᤁᤡᤜᤠ᤹ ᤔᤧᤘᤠ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤡ᤺ᤔᤧᤴ ᤀᤣᤃᤠᤱ ᤌᤣ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤥ ᤂᤢᤏᤡ᤹ ᤏᤛᤠ᤺ᤴ ᤔᤧᤍᤅᤧᤴᤒᤠ ᤏᤡ᤺ᤛᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤕᤧᤈᤢᤶᤓᤥᤀᤥ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤀᤡᤱᤃᤠ᤹ᤃ ᤑᤖᤡᤛᤡ᤺ᤸᤗᤧ ᤁᤢᤛ᤻ᤛᤠ᤺ ᤑᤖᤡᤛᤡᤀᤠᤖᤥ॥ ᤀᤡᤱᤃᤠ᤹ᤃ ᤁᤧᤛᤡ᤺ᤒᤠᤜᤠ᤹ ᤔᤧᤜᤡᤱ ᤗ᤹ᤖᤡᤰ ᤏᤡᤱᤛᤠᤱ ᤆᤥᤃᤢᤱᤒᤠᤸᤗᤧ ᤀᤠᤀᤡᤴ ᤁᤴ ᤋᤢ᤺ᤴᤍᤣ᤹ᤀᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ॥” 7 ᤂᤢᤏᤧ᤹ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤏᤢᤔᤧ᤺ᤴᤏᤣ ᤑᤖᤡᤛᤡ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤧᤔᤠ᤹ ᤐᤥᤃᤧᤀᤠᤱ ᤂᤧᤱᤜᤠ᤹ ᤔᤧᤛᤧ᤺ᤖᤧ ᤔᤧᤒᤣᤖᤥ॥ 8 (ᤌᤣᤀᤠᤱᤓᤧᤸᤗᤧ ᤛᤍᤢᤁᤡᤜᤠ᤹ᤖᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤀᤥ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹ ᤏᤢ ᤛᤠᤶᤜᤠ᤹ ᤔᤧᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥ ᤁᤖ ᤑᤖᤡᤛᤡᤜᤠ᤹ᤖᤧ ᤁᤴ ᤛᤢᤶᤛᤡ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥)
9 ᤜᤧᤰᤁᤩᤠᤱ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤀ᤺ᤰᤋᤧ॥ ᤂᤧᤵᤔᤥ ᤑᤖᤡᤛᤡ ᤗᤰᤁᤥᤒᤠ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤔᤧᤒᤥᤃᤧᤀᤠᤱ ᤘᤣ᤹ᤜᤠ᤹ ᤛᤠ᤹ᤖᤡᤰ ᤔᤧᤀᤳᤋᤢᤛᤡᤖ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤕᤠ᤺ᤶᤒᤰ ᤑᤣ᤺ᤴᤍᤢᤒᤠ ᤌᤣᤀᤠᤱ ᤔᤧᤏᤡ᤺ᤛᤢᤶᤒᤧᤴᤗᤥ॥ ᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤃᤪ ᤛᤠᤶᤜᤠ᤹ᤀᤠᤱᤛᤠ ᤛᤧᤰᤂᤠᤀᤣ ᤁᤴᤏᤢ ᤐᤠ᤺ᤵᤔᤠ ᤔᤧᤛᤢᤰᤛᤧᤒᤠ᥄” 10 ᤜᤧᤰᤁᤩᤠᤱ ᤐᤠ᤺ᤴᤎᤱᤅᤡᤴ ᤐᤥ᤺ᤖᤧᤖ ᤐᤣᤒᤠᤸᤗᤧ ᤌᤰᤋᤢᤶᤒᤠᤸᤗᤧ ᤐᤠᤘᤗᤧᤴᤏᤠᤱ ᤔᤧᤎᤧ᤺ᤰᤂᤢ ᤔᤧᤛᤧᤖᤢ ᤑᤠ᤹ᤀᤠᤱ ᤁᤡ᤺ᤛᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ ᤕᤥ ᤐᤠᤱᤄᤢᤛᤡᤀᤠᤱ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤌᤠᤰᤋᤧᤶᤔᤧ᤹ ᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤐᤠᤘᤗᤧᤴ ᤛᤠᤰᤁᤧᤸᤗᤧᤰᤁᤠᤱ ᤌᤰᤛᤢᤒᤠ ᤕᤰᤁᤥ ᤔᤧᤎᤠᤰᤋᤢᤖᤥ॥
11 ᤒᤠ ᤂᤧᤴ ᤛᤧᤴᤍᤡᤰ ᤐᤠᤘᤗᤖᤧ ᤁᤢᤒᤣᤛᤠᤱ ᤍᤠᤱᤒᤧᤴ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ ᤀᤰᤂᤣ ᤔᤧᤳᤋᤢ. “ᤐᤠᤘᤗᤀᤣ. ᤂᤧᤏᤧ᤹ ᤜᤠᤱᤜᤠᤱ ᤔᤧᤳᤇᤡᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤰᤂᤣᤗ᤹ᤖᤡᤰ ᤁᤴ ᤕᤖᤢᤛᤗᤧᤶᤔᤥ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤢᤒᤠ ᤁᤢᤀᤡᤛᤡ᤺ᤰ ᤖᤥᤔ ᤗᤠᤈᤣ᤹ᤀᤥᤀᤠᤱ ᤋᤥ᤺ᤴᤍᤡ ᤁᤧᤒᤡᤖᤢᤖ ᤐᤥ᤺ᤱᤗᤥ॥”
ᤐᤠᤘᤗᤧᤴ ᤛᤧᤵᤔᤠ ᤆᤧᤶᤑᤴ
12 ᤁᤢᤍᤠ᤺ᤴᤍᤡᤰᤔᤠ ᤕᤜᤢᤍᤡᤜᤠ᤹ ᤔᤧᤓᤢᤱᤛᤡᤱᤅᤠᤱ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤖ ᤀᤡᤱᤔᤧᤍᤱᤄᤢᤖᤥ॥ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤴᤇᤧᤳᤋᤣ ᤌᤠᤖᤡᤰ ᤌᤧᤔᤠᤀᤠᤱ ᤔᤧᤈᤠᤶᤒᤧᤴ ᤔᤧᤎᤢᤱᤃᤢᤶᤒᤧᤴ ᤗ᤹ᤖᤡᤰ ᤔᤠᤱᤔᤧᤜᤧᤰᤛᤡᤱᤗᤥ॥ 13 ᤁᤴ ᤆᤧᤶᤑᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤗᤡᤒᤥ᤺ᤱᤅᤠᤱ (᥊᥆) ᤌᤥ ᤔᤧᤘᤕᤧᤖᤥ॥ 14 ᤂᤧᤴ ᤆᤧᤶᤑᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤥ ᤔᤧᤒᤣᤀᤠᤱ ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤧᤃ ᤐᤠᤘᤗᤧᤴ ᤔᤧᤴᤇᤧᤳᤋᤣ ᤌᤠᤖᤡᤰ ᤌᤣᤀᤠᤱ ᤔᤧᤈᤠᤶᤒᤧᤴ ᤔᤧᤎᤢᤅᤢᤶᤒᤧᤴ ᤗ᤹ᤖᤡᤰ ᤔᤠᤱᤜᤧᤰᤛᤡᤱᤔᤏᤠᤀᤠᤱ ᤘᤕᤡᤃᤧᤖᤥ॥ 15 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤏᤢ ᤕᤧᤈᤢᤶᤓᤥ᤺ᤴ ᤋᤱᤅᤠᤛᤡᤶᤔᤧ᤹ᤀᤠᤱ ᤖᤥᤔᤡ ᤌᤰᤋᤢᤶᤒᤧᤸᤗᤥ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ‘ᤂᤧᤴ ᤐᤠᤘᤗᤧᤴ ᤆᤢᤶᤗᤢᤱᤅᤥ ᤕᤢᤖᤧ᤹’ ᤔᤧᤳᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤆᤢᤶᤗᤢᤱᤅᤡᤸᤗᤧ ᤕᤖᤡᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤘᤠ᤹ᤖᤥ ᤗ᤹ᤖᤡᤰ ᤐᤠ᤺ᤴ ᤆᤥᤃᤧᤶᤔᤧ᤹ᤀᤥ॥ ᤁᤖ ᤂᤢᤏᤧ᤹ ᤁᤵᤔᤥ ᤔᤧᤕᤢᤖᤢᤖ ᤔᤧᤒᤳᤋᤡᤸᤗᤧ ᤗᤠᤶᤔᤥᤛᤠ ᤀᤠᤏᤡᤃᤧ ᤛᤧᤖᤢᤶᤒᤧ᤹ᤖᤥ॥”
16 ᤁᤖ ᤐᤠᤘᤗᤖᤧ ᤁᤢᤸᤗᤠᤶᤛᤠ᤹ᤀᤡᤸᤗᤧ ᤁᤴ ᤆᤧᤶᤑᤴ ᤔᤧᤈᤥᤃᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤌᤰᤛᤢᤒᤠ ᤕᤰᤁᤥ ᤐᤣᤀᤠᤱ ᤁᤴ ᤐᤠ᤺ᤴᤜᤠ᤹ ᤁᤠᤰ ᤐᤠᤘᤗᤧᤴ ᤆᤧᤰᤋᤢᤖᤥ॥
17 ᤜᤧᤰᤁᤩᤠᤱ ᤐᤠᤘᤗᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤌᤡᤰ ᤌᤰᤋᤢᤶᤒᤧᤴ ᤀᤢ᤺ᤳᤋᤢᤀᤠᤱ ᤀᤰᤂᤣ ᤔᤧᤳᤋᤢᤖᤥ. “ᤀᤠᤍᤠᤱᤒᤣ. ᤁᤴ ᤌᤠᤱᤒᤧᤴᤏᤡᤸᤗᤧ ᤁᤢᤓᤠ ᤋᤠ᤹ᤈᤧᤱ ᤐᤠ᤺ᤴᤜᤠ᤹ ᤌᤰᤋᤢᤶᤒᤧᤴ ᤔᤧᤵᤔᤠ ᤁᤳᤋᤢᤖᤥ॥” 18 ᤜᤧᤰᤁᤣ᤺ᤸᤗᤧ ᤂᤧᤴ ᤛᤢᤜᤠᤱᤕᤢᤰᤐᤧᤸᤗᤧ ᤐᤠᤘᤗᤖᤧ ᤁᤢᤸᤗᤠᤶᤛᤠ᤹ᤀᤡᤴ ᤌᤰᤋᤢᤶᤒᤠᤸᤗᤥ ᤋᤣ᤹ᤖᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤐᤢᤱᤗᤠᤎᤠᤒᤠ ᤐᤠᤘᤗᤖᤧ ᤀᤡᤱᤃᤠ᤹ ᤀᤢ᤺ᤳᤋᤠᤱᤅᤠᤱ ᤁᤴ ᤔᤏᤠ᤺ᤸᤗᤧ ᤀᤠᤍᤠᤱᤒᤠᤏᤢ ᤋᤠ᤹ᤈᤧᤱᤔᤠ ᤁᤢᤓᤠ ᤐᤠ᤺ᤴᤜᤠ᤹ ᤁᤳᤋᤢᤖᤥ ᤗ᤹ᤖᤡᤰ ᤔᤧᤳᤋᤠᤱᤅᤠᤱ ᤁᤴ ᤁᤵᤔᤥ ᤋᤠᤖᤢᤱᤒᤠᤖᤥ॥”
19 ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤁᤢᤸᤗᤠᤶᤛᤠ᤹ᤀᤡᤸᤗᤧ ᤁᤢᤜᤢᤰᤁᤡᤴ ᤋᤧᤶᤛᤢᤀᤠᤱ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤌᤰᤋᤢᤶᤒᤠᤸᤗᤧ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ᤏᤢ ᤋᤠ᤹ᤈᤧᤱ ᤐᤠ᤺ᤴᤜᤠ᤹ ᤌᤧᤔᤠ ᤁᤧᤃᤳᤋᤢ᤹. ᤗᤢ ᤐᤠ᤺ᤳᤋᤧ᤹᥄”
20 ᤂᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤢᤓᤠ ᤕᤜᤢᤍᤡ ᤕᤢᤰᤛᤠᤒᤠᤜᤠ᤹ᤖᤧ ᤋᤠ᤺ᤴᤍᤡᤰ ᤐᤠᤘᤗᤧᤴ ᤕᤥ ᤕᤧᤈᤢᤶᤓᤥᤀᤥ ᤕᤢᤖᤧ᤹ ᤑᤠ᤹ᤀᤠᤱ ᤂᤧᤏᤧ᤹ᤏᤢ ᤐᤣᤗᤡ ᤑᤠᤰᤔᤠ ᤀᤡᤱᤔᤧᤍᤱᤄᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤁᤴ ᤆᤢᤶᤗᤢᤱᤅᤡᤸᤗᤧᤃ ᤐᤠᤘᤗᤖᤧ ᤁᤢᤕᤠ᤺ᤶᤒᤣᤀᤥ ᤕᤖᤡᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤘᤠ᤹ ᤑᤠ᤹ᤀᤠᤱ ᤐᤠ᤺ᤴ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥ 21 ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤗᤡᤒᤥ᤺ᤱᤅᤠᤱᤎᤥ ᤔᤏᤠᤜᤠ᤹ᤖᤧ ᤐᤠᤘᤗᤧᤴ ᤛᤧᤵᤔᤠ ᤑᤠ᤹ᤀᤠᤱ ᤔᤧᤛᤢᤃᤢᤀᤠᤱ ᤔᤧᤕᤢᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤢᤏᤧ᤹ ᤔᤧᤴᤇᤧᤳᤋᤣ ᤌᤠᤖᤡᤰ ᤌᤣᤀᤠᤱ ᤔᤧᤈᤠᤶᤒᤧᤴ ᤔᤧᤎᤢᤅᤢᤶᤒᤧᤴ ᤗ᤹ᤖᤡᤰ ᤔᤠᤱᤔᤧᤜᤧᤰᤛᤡᤱᤅᤠᤱ ᤕᤠᤖᤡᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤏᤡᤱᤘᤠ᤹ ᤐᤠ᤺ᤴᤏᤡᤸᤗᤧ ᤀᤡᤱᤈᤠ᤺ᤱ ᤂᤥ᤺ᤔᤠᤖᤰ ᤔᤧᤜᤠᤱᤄᤢᤀᤠᤱ ᤔᤧᤕᤢᤱᤗᤥ॥”
22 ᤜᤧᤰᤁᤣ᤺ᤸᤗᤧ ᤌᤰᤋᤢᤶᤒᤧᤸᤗᤧ ᤂᤧᤴ ᤔᤏᤠ᤺ᤴ ᤀᤰᤂᤣ ᤔᤧᤳᤋᤢᤀᤠᤱ ᤛᤠᤶᤍᤡᤱ ᤐᤡᤖᤢᤖ ᤐᤠᤱᤄᤢᤍᤣ᤺ᤛᤢ. “ᤁᤴ ᤀᤡᤱᤃᤠ᤹ ᤁᤧᤈᤧᤰᤋᤠᤱᤒᤠ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤴᤏᤧ᤹ᤀᤥ॥”
ᤐᤠᤘᤗᤧᤴ ᤛᤡᤈᤖᤡᤕᤠᤀᤥ ᤔᤧᤒᤠᤱᤄᤢ᤹
23 ᤜᤧᤰᤁᤩᤠᤱ ᤂᤧᤴ ᤌᤰᤋᤢᤶᤒᤠᤸᤗᤧ ᤏᤧᤵᤑᤢ ᤛᤢᤜᤠᤱᤕᤢᤰᤐᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤰᤂᤥ ᤛᤧᤴᤍᤡᤰ ᤁᤢᤔᤢᤰ ᤑᤠᤱᤛᤡ (᥏) ᤔᤢᤰᤁᤡᤸᤗᤧ ᤁᤡᤵ ᤏᤧᤳᤇᤡ (᥈᥆᥆) ᤌᤰᤛᤢᤒᤠᤜᤠ᤹. ᤏᤢᤒᤥ᤺ᤱ (᥍᥆) ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤁᤡᤵ ᤏᤧᤳᤇᤡ ᤗᤠ᤺ᤰ ᤁᤧᤕᤠᤱᤒᤠ ᤌᤰᤛᤢᤒᤠᤜᤠ᤹ ᤛᤡᤈᤖᤡᤕᤠᤀᤥ ᤐᤣ᤺ᤰᤔᤠ ᤕᤠᤖᤡᤵ ᤆᤥᤃᤧᤳᤇᤧ᤹. 24 ᤜᤧᤰᤁᤩᤠᤱ ᤐᤠᤘᤗ ᤏᤢ ᤁᤢᤴᤍᤣ᤺ᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤔᤠ ᤀᤴᤜᤠ᤹ᤖᤧᤴᤏᤠᤱ ᤋᤱᤃᤠᤶ ᤆᤥᤃᤧᤳᤇᤧ᤹ᤀᤥ॥ ᤂᤢᤏᤧ᤹ ᤏᤢ᤺ᤖᤡᤰᤁᤠᤱ ᤌᤣᤀᤠᤱ ᤔᤧᤶᤒᤥ᤺ᤱᤅᤣ ᤛᤢᤜᤠᤱᤃᤧᤶᤒᤠ ᤑᤧᤗᤡᤰᤛᤖᤥ ᤁᤧᤳᤋᤧᤇᤧ᤹ᤀᤥ॥” 25 ᤌᤰᤋᤢᤶᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤛᤢᤜᤠᤱᤃᤧᤶᤒᤠ ᤑᤧᤗᤡᤰᤛᤧᤴ ᤛᤰᤀᤡᤱᤄᤱ ᤜᤠᤰᤋᤢᤖᤥ–
26 “ᤋᤢᤳᤋᤢ ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠ ᤑᤧᤗᤡᤰᤛᤣ.
ᤰᤗᤠᤀᤢᤍᤡᤕᤛ ᤗᤢᤛᤡᤕᤛᤗᤠᤶ. ᤀᤠᤛᤣᤘᤠᤖᤥ॥ 27 ᤁᤴ ᤔᤏᤠ᤺ᤴ ᤕᤜᤢᤍᤡᤜᤠ᤹ᤖᤧ ᤔᤧᤍᤧᤶᤛᤢᤀᤠᤱ ᤛᤧᤵᤔᤠ ᤔᤧᤃᤥ᤺ᤳᤋᤢᤀᤠᤱ ᤔᤧᤘᤕᤧ. ᤁᤖ ᤀᤡᤱᤃᤠ᤹ ᤁᤴ ᤔᤏᤠ᤺ᤱᤃ ᤖᤥᤔᤡ ᤕᤰᤕᤢᤱᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤛᤢᤱᤅᤠᤱ ᤌᤰᤛᤢᤒᤠᤜᤠ᤹ᤏᤢ ᤐᤣᤃᤠᤱᤅᤠᤱ ᤕᤜᤢᤍᤡᤜᤠ᤹ᤗᤠᤶ ᤛᤧ᤺ᤵᤋᤢᤱᤗᤥ॥ 28 ᤁᤴ ᤔᤏᤠ᤺ᤴ ᤌᤣ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤒᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤂᤢᤏᤡ᤹ ᤕᤧᤈᤢᤶᤓᤥᤀᤥ ᤋᤣ᤹ᤖᤢᤱ. 29 ᤁᤖ ᤂᤢᤏᤡ᤹ ᤀᤠᤒᤠᤅᤣ ᤕᤜᤢᤍᤡ ᤛᤠᤶᤕᤥᤌᤡᤶᤔᤥᤒᤠ ᤏᤡᤱᤘᤠ᤹ ᤔᤧᤴᤍᤠ᤺ᤔᤏᤠ ᤐᤠ᤺ᤴᤏᤥᤖᤰ ᤁᤴ ᤔᤏᤠ᤺ᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤁᤴ ᤔᤏᤠ᤺ᤸᤗᤧ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠ ᤏᤢ ᤐᤢᤱᤗᤠᤎᤠᤒᤠ ᤐᤥ᤺ᤱᤔᤠ ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤘᤠ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥ 30 ᤜᤧᤰᤁᤩᤠᤱ ᤁᤴ ᤔᤏᤠ᤺ᤴ ᤛᤧᤵᤔᤠ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ᤖᤧ ᤆᤧᤶᤑᤴ ᤔᤧᤈᤥᤃᤢᤖ ᤔᤧᤕᤠᤰ ᤁᤧᤗ᤹ᤒᤠ ᤀᤡᤱᤃᤠ᤹ ᤀᤡᤱᤄᤱ ᤂᤥ᤺ᤛᤢᤱ॥ ᤜᤧᤰᤁᤣ᤺ᤸᤗᤧ ᤁᤴ ᤔᤏᤠ᤺ᤴ ᤂᤧᤏᤧ᤹ᤀᤥᤀᤣ ᤐᤠᤱᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ᤀᤠᤱ ᤜᤠᤖᤠ᤹ ᤂᤧᤏᤧ᤹ᤀᤥᤀᤣ ᤔᤧᤕᤢᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤅᤥ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤜᤠ᤹ᤀᤠᤱ ᤂᤧᤏᤧ᤹ᤀᤣ ᤁᤧᤶᤔᤧᤳᤗ. ᤑᤠ᤹ᤀᤠᤱ ᤔᤧᤳᤋᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥”
31 ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂᤧᤴ ᤀᤡᤱᤈᤠ᤺ᤱᤅᤡᤴ ᤋᤧᤴᤍᤡᤱ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤍᤣ᤹ᤖᤢᤀᤠᤱ ᤛᤧᤴᤍᤡᤰᤛᤠ ᤀᤣᤴᤋᤡᤐᤋᤪᤡᤛ* ᤀᤣᤴᤋᤡᤐᤠᤋᤪᤡᤛ–ᤀᤣᤴᤋᤡᤐᤠᤋᤪᤡᤛ ᤐᤠᤱᤈᤢᤶᤔᤡᤴ ᤖᤥᤔᤡ ᤌᤰᤛᤢᤓᤠ ᤋᤢᤖᤠᤖᤧᤴ ᤔᤠᤕᤰ ᤘᤕᤧᤖᤥ॥ ᤕᤧᤰᤕᤰᤁᤥ ᤔᤧᤃᤧᤳᤋᤢᤖᤥ॥ 32 ᤜᤧᤰᤁᤩᤠᤱ ᤁᤢᤏᤠᤶᤍᤠ᤺ᤵᤔᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ᤏᤢ ᤐᤣ᤺ᤰᤏᤡ ᤑᤠ᤹ᤀᤠᤱ ᤐᤰᤔᤧᤎᤛᤡᤀᤠᤱ ᤕᤰᤁᤥ ᤔᤧᤏᤢ᤺ᤰᤂᤧ ᤔᤧᤍᤩᤧᤖᤥ॥ 33 ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ᤖᤧᤀᤠᤱ ᤛᤡᤈᤖᤡᤕᤠ ᤔᤧᤃᤧᤖᤧᤀᤠᤱ ᤛᤰᤀᤡᤱᤄᤱᤅᤡᤴ ᤏᤢ ᤐᤠᤘᤗᤧᤴᤏᤠᤱ ᤛᤢᤜᤠᤱᤃᤧᤶᤒᤠᤸᤗᤥ ᤔᤧᤍᤥ᤺ᤴᤍᤢ ᤔᤧᤒᤡᤖᤢᤖᤥ॥ 34 ᤛᤢᤜᤠᤱᤃᤧᤶᤒᤠᤸᤗᤧ ᤂᤧᤴ ᤛᤰᤀᤡᤱᤄᤱᤅᤡᤴ ᤏᤡ᤺ᤖᤢᤀᤠᤱ ᤐᤠᤘᤗᤧᤴ ᤀᤠᤳᤋᤡᤴ ᤋᤧᤱᤃᤐᤛ᤻ᤔᤠ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤸᤗᤧ ᤂᤢᤏᤧ᤹ ᤛᤡᤗᤡᤛᤡᤕᤠᤛ᤻ᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤛᤢ॥ 35 ᤜᤧᤰᤁᤩᤠᤱ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤍᤠ᤺ᤀᤠᤱᤗᤰ ᤁᤧᤍᤢ᤺ᤴᤍᤣᤴ ᤀᤥᤔᤧᤳᤋᤢᤱᤗᤥ॥” ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤜᤠᤱᤜᤡᤶᤔᤥ ᤂᤡᤏᤡ᤹ ᤗᤰᤐᤧᤴᤏᤥ ᤁᤳᤋᤧᤶᤔᤧ᤹ ᤑᤠ᤹ᤀᤠᤱ ᤌᤰᤛᤢᤒᤠᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥