1 ᤂᤧᤴ ᤕᤧᤴᤏᤥ ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤓᤠ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤰᤂᤣᤗ᤹ᤖᤡᤰ ᤃᤠᤗᤡᤗᤡᤜᤠ᤹ ᤛᤡᤍᤢᤱᤈᤓᤠ ᤆᤥ᤺ᤰᤁᤡ ᤔᤧᤕᤠᤃᤧᤸᤗᤧ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤂᤧᤴ ᤛᤡᤍᤢᤱᤈᤓᤠ ᤁᤧᤈᤥ᤺ᤰᤐᤠᤜᤠ᤹ ᤛᤧᤵᤔᤠ ᤐᤠᤱᤄᤢᤛᤡᤖᤥ॥” 2 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ ᤐᤥ᤺ᤰᤂᤧ ᤑᤠ᤹ᤗᤧ ᤂᤧᤴ ᤃᤠᤗᤡᤗᤡᤜᤠ᤹ ᤛᤠ᤹ᤖᤡᤰ ᤗᤠᤕᤥᤒᤠ ᤔᤧᤈᤥᤃᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅ 3 ᤔᤧ᤺ᤴᤗᤥ᥄ ᤂᤡᤏᤡ᤹ᤀᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤏᤧ ᤑᤠ᤹ᤃᤪ ᤒᤠ ᤜᤧᤰᤁᤣᤀᤣ ᤁᤧᤒᤥ᤺ᤰᤂᤡ᤹ᤀᤠᤱ ᤁᤧᤔᤧᤃᤡ᤹ᤖᤥ॥ 4 ᤜᤧᤰᤁᤩᤠᤱ ᤛᤡᤗᤥᤀᤠᤔ ᤈᤱᤜᤡᤶᤔᤡᤸᤗᤧ ᤁᤧ᤺ᤵᤋᤢ ᤛᤧᤖᤢᤛᤡᤒᤠ ᤌᤡᤰ-ᤕᤧᤳ (᥇᥎) ᤔᤏᤠᤜᤠ᤹ ᤕᤖᤢᤛᤗᤧᤶᤔᤥ ᤁᤠᤰᤏᤢ᤺ᤸᤗᤧ ᤛᤠ᤹ᤖᤡᤰ ᤗᤠᤕᤥᤒᤠ ᤔᤧᤈᤥᤃᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅ 5 ᤔᤧ᤺ᤴᤗᤥ᥄ ᤂᤡᤏᤡ᤹ᤀᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤏᤧ ᤑᤠ᤹ᤃᤪ ᤒᤠ ᤜᤧᤰᤁᤣᤀᤣ ᤁᤧᤒᤥ᤺ᤰᤂᤡ᤹ᤀᤠᤱ ᤁᤧᤔᤧᤃᤡ᤹ᤖᤥ॥”

6 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤌᤡᤰ ᤔᤏᤠ᤺ᤸᤗᤧ ᤐ᤺ᤳᤇᤣ᤹ᤒᤢᤱᤔᤠᤎᤡᤰ ᤗᤣ᤺ᤳᤋᤢ॥ ᤂᤢᤏᤧ᤹ ᤐ᤺ᤳᤇᤣ᤹ᤒᤢᤱᤔᤥ ᤁᤢᤈᤠ᤹ ᤁᤥ᤺ᤳᤇᤧ ᤋᤩᤧ. ᤁᤖ ᤔᤧᤄᤥ᤺ᤛᤢᤴ॥ 7 ᤂᤧᤸᤗᤧ ᤀᤡᤰᤁᤧᤃᤥ᤺ᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤀᤡᤱᤃᤠ᤹ ᤋᤱᤒᤣ ᤛᤢᤶᤛᤡᤀᤠᤱᤎᤥ ᤁᤴ ᤐ᤺ᤳᤇᤣ᤹ᤒᤢᤱᤔᤥ ᤁᤢᤈᤠ᤹ᤀᤡᤴ ᤀᤥᤔᤧᤳᤋᤢᤱᤗ ᤘᤠ᤹ᤀᤠ. ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤔᤧᤱᤄᤥ᤺ᤒᤠᤴᤗᤥ॥ ᤀᤠᤸᤗ ᤁᤴ ᤋᤠᤅᤧ᤹ᤀᤠᤱ ᤛᤧᤖᤧ᤹॥ ᤌᤣᤀᤠᤱ ᤂᤠᤶᤔᤡᤴ ᤀᤠᤶᤓᤠ ᤆᤠᤛᤥ᤺ᤰᤂᤢᤒᤠᤒᤣ॥’ 8 ᤂᤧᤴ ᤀᤡᤰᤁᤧᤃᤥ᤺ᤒᤠᤸᤗᤧ ᤔᤧᤳᤋᤢ. ‘ᤀᤠᤍᤠᤱᤒᤣ. ᤀᤠᤀᤡᤗᤠᤶᤒᤠ ᤐ᤺ᤳᤇᤣ᤹ᤒᤢᤱᤔᤠᤴ ᤗᤧᤖᤠᤱ ᤐᤡᤖᤠᤱᤅᤧ᤹ᤀᤠᤱ ᤀᤡᤱᤃᤠ᤹ ᤁᤢᤄᤡᤖᤡ ᤋ᤺ᤕᤢᤱᤅᤠᤱ ᤔᤗ ᤕᤠᤰᤋᤢᤱ॥ 9 ᤜᤧᤰᤁᤩᤠᤱ ᤀᤠᤴᤏᤧᤶᤔᤠ᤹ ᤁᤢᤈᤠ᤹ ᤌᤥ᤺ᤰᤋᤧᤏᤧ ᤑᤠ᤹ᤃᤪ ᤏᤢ᤺ᤒᤠ ᤐᤥ᤺ᤰᤂᤧ. ᤔᤧᤎᤥ᤺ᤰᤋᤧᤴᤏᤧ ᤑᤠ᤹ᤃᤪ ᤋᤠᤅᤧᤍᤣ᤺ᤛᤧ᤹ᤀᤥ॥’ ”

10 ᤜᤧᤰᤁᤩᤠᤱ ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤡᤛᤠᤶ ᤜᤢ᤹ᤖᤢᤛᤡᤖ ᤕᤠᤃᤧᤸᤗᤧ 11 ᤂᤧᤵᤔᤥ ᤋᤱᤒᤣ ᤌᤡᤰ-ᤕᤧᤳᤋᤠᤱᤎᤥ (᥇᥎) ᤀᤢᤎᤢᤰᤁᤣ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤁᤢᤀᤣ᤺ᤰ ᤀᤢ᤺ᤰᤂᤢ᤹ ᤁᤧᤗ᤹ᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥ ᤂᤧᤸᤗᤧ ᤁᤢᤀᤣ᤺ᤰ ᤛᤸᤗᤡᤰ ᤛᤶᤔᤠ ᤔᤧᤛᤢᤰᤋᤢᤴᤏᤠᤱ ᤘᤕᤧᤖᤥ॥ 12 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤡ᤺ᤛᤢᤀᤠᤱ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤀᤠᤸᤗᤥ ᤀᤢᤎᤢᤰᤁᤣ ᤑᤧᤴᤛᤠᤶᤔᤡᤸᤗᤧ ᤂᤧᤏᤧ᤹ ᤁᤧᤗᤧᤖᤧ ᤁᤧᤎᤩᤧᤖᤥ॥” 13 ᤜᤧᤰᤁᤩᤠᤱ ᤂᤧᤴ ᤀᤢ᤺ᤰᤂᤢ᤹ᤒᤠ ᤁᤢᤀᤣ᤺ᤰᤁᤥ ᤜᤢᤰᤁᤡᤴ ᤏᤧᤛ᤻ᤛᤢ ᤐᤡᤖᤢ॥ ᤂᤡᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤢᤖᤧᤀᤠᤱ ᤁᤢᤀᤣ᤺ᤰᤁᤡᤴ ᤛᤸᤗᤡᤰ ᤛᤴᤇᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖᤥ॥

14 ᤁᤖ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤢᤛᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤠᤴ ᤁᤢᤛᤠᤰᤁᤧᤴ ᤐᤥᤃᤧᤀᤠᤱ ᤂᤧᤵᤔᤥ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤕᤧᤳᤏᤠᤶᤎᤡᤰᤁᤥ ᤋᤢᤰᤛᤡ (᥌) ᤕᤧᤴ ᤌᤠᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤧᤳ॥ ᤜᤧᤰᤁᤣ᤺ᤸᤗᤧ ᤏᤠ᤺ᤶᤛᤡᤱ ᤕᤧᤴᤏᤥ ᤔᤧ᤺ᤴ. ᤁᤖ ᤘᤣ᤹ ᤕᤧᤴᤜᤠ᤹ᤀᤥ ᤏᤢᤛᤡᤱᤛᤧ ᤋᤩᤧᤶᤔᤧ᤹॥”

15 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤌᤠ᤺ᤱᤅᤥᤗᤠᤶ ᤐᤡᤳᤜᤠ᤹ ᤀᤡᤃᤪ ᤀᤍᤱᤜᤠ᤹ ᤁᤧᤗᤧᤖᤢᤶᤛᤡᤶᤔᤠᤱ ᤆᤫᤠ᤺ᤳ ᤌᤢᤱᤛᤧ ᤁᤧᤍᤣ᤹ᤖᤢᤶᤛᤡᤶᤒᤡ ᤔᤧ᤺ᤶᤒᤡ᥅ 16 ᤁᤴ ᤀᤒᤪᤠᤜᤠᤔᤖᤧ ᤁᤢᤜᤡᤶᤛᤕᤱᤒᤠ ᤔᤧᤴᤇᤢᤔᤠ᤹ᤀᤡᤴ ᤋᤱᤒᤣ ᤌᤡᤰ-ᤕᤧᤳᤋᤠᤱᤎᤥ (᥇᥎) ᤔᤠᤑᤧᤴᤛᤠᤶᤔᤡᤸᤗᤧ ᤌᤢ᤺ᤴᤍᤢᤀᤠᤱ ᤘᤕᤧ॥ ᤁᤴ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤴ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤄᤣ᤺ᤱᤅᤥᤗᤠᤶ ᤗᤧᤵᤔᤠ ᤏᤢ᤺ᤒᤠᤒᤡ ᤔᤧ᤺ᤶᤒᤡ᥅” 17 ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤔᤧᤏᤢ᤺ᤴᤍᤧᤖᤥ॥ ᤁᤖ ᤔᤏᤠᤜᤠ᤹ ᤕᤧᤛᤢᤖᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤔᤧᤛ᤺ᤳᤋᤧᤖᤥ॥

18 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤌᤧᤔᤠ᤺ᤴᤏᤢ ᤋᤱᤄᤢᤱᤒᤠᤒᤣ᥅ 19 ᤁᤱᤃ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠ ᤜᤧᤰᤁᤣ ᤆᤥ᤺ᤰᤗᤥ॥ ᤂᤧᤴ ᤀᤡᤰᤋᤠᤵᤐᤥ ᤗᤧᤵᤔᤠᤀᤠᤱ ᤗᤡᤱ ᤜᤧᤰᤁᤩᤠᤱ ᤛᤡᤱᤒᤢᤱ ᤜᤧᤰᤁᤣ ᤕᤶᤒᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤁᤢᤒᤥᤖᤠ᤺ᤰᤁᤥ ᤐᤢᤛᤠᤜᤠ᤹ᤖᤧ ᤜᤠᤵ ᤔᤧᤈᤥᤃᤢ᤹ᤖᤥ॥”

20 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤡᤱᤃᤠ᤹ ᤌᤧᤔᤠ᤺ᤴᤏᤢ ᤋᤱᤄᤢᤱᤒᤠᤒᤣ᥅ 21 ᤁᤱᤃ ᤑᤧ᤹ᤖᤢᤶᤔᤥ ᤕᤠᤰᤔᤏᤠᤒᤠ ᤛᤡᤍᤠ᤹ ᤜᤧᤰᤍᤱᤒᤠ ᤆᤥ᤺ᤰᤗᤥ॥ ᤌᤡᤰ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤖᤡᤰ ᤑᤧ᤹ᤖᤢᤶᤔᤥ ᤔᤡᤛᤠᤰ ᤛᤡᤍᤠ᤹ᤀᤡᤴ ᤕᤠᤰᤋᤢ ᤜᤧᤰᤁᤩᤠᤱ ᤛᤡᤍᤠ᤹ᤀᤡᤸᤗᤧ ᤔᤧᤴᤕᤢᤰᤁᤣ ᤌᤠᤖᤡᤰ ᤛ᤹ᤖᤢ ᤕᤢᤰᤂᤢᤖᤥ॥”

22 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤖᤢᤛᤗᤧᤔ ᤐᤣᤖ ᤐᤳᤇᤧᤸᤗᤧ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ᤀᤥ ᤏᤡᤛᤠᤶᤜᤠ᤹ ᤜᤢ᤹ᤖᤢᤛᤡᤖ ᤐᤣᤖᤥ॥ 23 ᤁᤢᤓᤠᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤛᤢ᤺ᤸᤗᤡᤰ ᤔᤏᤠᤜᤠ᤹ᤖᤧᤖᤰ ᤛᤧᤴᤗᤵ ᤔᤧᤄᤥ᤺ᤛᤢ᤹ᤒᤡ᥅”

ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. 24 “ᤆᤡᤓᤡ᤺ᤳᤑᤡ᤺ᤵᤐᤠ ᤗᤠᤶᤎᤣ᤺ᤵᤐᤥᤗᤠᤶ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤋᤶᤛᤡᤴ ᤆᤥᤃᤧᤶᤔᤧ᤹ᤀᤥ॥ ᤕᤖᤡᤰ ᤔᤏᤠᤜᤠ᤹ᤖᤧ ᤋᤶᤛᤡᤴ ᤔᤧᤈᤥᤃᤢ᤹. ᤁᤖ ᤗᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥ 25 ᤜᤧᤰᤁᤩᤠᤱ ᤜᤡᤶᤍᤠᤱᤒᤠᤸᤗᤧ ᤗᤠᤶᤎᤣ᤺ᤵᤐᤧᤴ ᤛᤢᤒᤢ᤹॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤠ᤺ᤰᤁᤠᤳᤗᤠᤶ ᤗᤠᤶᤎᤣ᤺ᤵᤐᤧᤴ ᤁᤧᤜᤡᤵᤋᤢᤶᤗ ᤁᤧᤔᤧᤳᤋᤢᤶ. ‘ᤀᤠᤏᤡᤃᤧ ᤗᤠᤃᤡᤀᤠᤱ ᤗᤠᤶᤎᤣ᤺ᤵᤐᤧᤴ ᤜᤴᤍᤧ ᤀᤠᤒᤡᤖᤧᤏᤠ᥄’ ᤁᤖ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤏᤥᤃᤵ ᤁᤧᤒᤡᤖᤡ᤹. ‘ᤂᤡᤏᤡ᤹ ᤀᤠᤳᤋᤥᤗᤠᤶ ᤁᤧᤍᤩᤧ᤹ᤀᤡᤒᤣ᥅ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤏᤡᤱᤅᤡᤴᤗᤥ॥’ ” 26 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤕᤠᤶᤔᤥ ᤁᤧᤒᤠ᤺ᤳᤋᤢᤶ. “ᤀᤠᤏᤡᤃᤧᤃ ᤂᤧᤏᤧ᤹ᤏᤢᤀᤣ ᤛᤥᤖᤡᤰ ᤕᤢᤱᤔᤏᤠᤀᤠᤱ ᤆᤠ᤺ᤔᤏᤠ ᤌᤢᤱᤔᤏᤠᤖᤥ. ᤂᤧᤏᤧ᤹ᤃ ᤀᤠᤏᤡᤃᤧ ᤗᤠᤶᤔᤥ ᤏᤡᤛᤠᤶ ᤁᤧᤜᤢ᤹ᤖᤢᤛᤡᤖᤥ॥ 27 ᤁᤖ ᤂᤢᤏᤧ᤹ ᤏᤥᤃᤵ ᤁᤧᤒᤡᤖᤡ᤹. ‘ᤛᤧᤰᤂᤠᤀᤣ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤏᤡᤱᤅᤡᤴᤗᤥ. ᤀᤠᤳᤋᤥᤗᤠᤶ ᤁᤧᤍᤩᤧ᤹ᤀᤡᤒᤠᤒᤣ᥅ ᤋᤠᤰᤁᤧᤓᤧ᤹ᤒᤠᤛᤣ. ᤁᤵᤔᤥᤗᤠᤶ ᤐᤣᤃᤧᤶᤔᤧ᤹ᤀᤥ᥄’

28 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤀᤒᤪᤠᤜᤠᤔ. ᤀᤡᤛᤜᤠᤁ. ᤕᤠᤁᤢᤒ. ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤧᤕᤢᤱᤒᤠ ᤁᤧᤏᤡ᤺ᤛᤢᤶᤛᤡᤶ. ᤁᤖ ᤀᤠᤒᤠᤅᤣᤃ ᤗᤠ᤺ᤰᤁᤠᤳ ᤗᤠᤵᤁᤧᤶᤓᤢᤛᤡᤀᤠᤱ ᤁᤧᤜᤠᤒᤡᤖ ᤁᤧᤓᤡ᤺ᤰᤋᤡᤖ ᤕᤧᤳᤋᤢᤰᤂᤣ᤺ᤸᤗᤧ ᤜᤠᤒᤥ᤹ᤒᤠᤴ ᤁᤧᤕᤧ᤺ᤰᤂᤢᤶᤗᤥ॥ 29 ᤁᤠᤰ ᤐᤡᤛᤠᤱᤗᤠᤶ ᤏᤢ ᤁᤠᤰ ᤗᤠᤈᤣ᤹ᤗᤠᤶ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤧᤍᤠᤀᤠᤱ ᤛᤠᤓᤠᤱᤈᤠ ᤆᤠᤛᤧ ᤔᤧᤕᤢᤱᤛᤡᤱᤗᤥ॥ 30 ᤂᤧᤵᤔᤥ ᤀᤠᤸᤗᤥ ᤕᤶᤗᤠᤒᤠ ᤔᤏᤠᤜᤠ᤹ ᤋᤠ᤺ᤴᤍᤡ ᤆᤢᤰᤛᤠ ᤔᤧᤒᤥ᤺ᤱ. ᤜᤧᤰᤁᤩᤠᤱ ᤆᤢᤰᤛᤠ ᤔᤏᤠᤜᤠ᤹ ᤕᤶᤗᤠᤒᤠ ᤔᤧᤒᤥ᤺ᤱᤗᤥ॥”

31 ᤒᤠ ᤂᤧᤴ ᤕᤧᤶᤔᤥ ᤂᤧ᤹ᤕᤥ ᤁᤢᤓᤠ ᤑᤖᤡᤛᤡᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤵᤔᤥᤗᤠᤶ ᤜᤠᤖᤠ ᤗ᤺ᤴᤍᤧ ᤐᤣᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤸᤗᤧ ᤂᤧᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤠ᤹ᤖᤥ॥”

32 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤂᤧᤴ ᤁᤡᤍᤡ᤺ᤵᤐᤠᤴ ᤀᤰᤂᤣ ᤔᤧᤳᤋᤧᤶᤔᤧ᤹ᤀᤥ–‘ᤀᤠᤀᤡᤴ ᤏᤢ ᤋᤠ᤺ᤴᤍᤡᤰ ᤀᤡᤱᤃᤠ᤹ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤅᤠᤱ ᤔᤏᤠᤜᤠ᤹ ᤏᤢᤛᤢᤱᤛᤡᤱ ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤕᤧᤴᤏᤥ ᤀᤡᤱᤃᤠ᤹ ᤀᤠᤕᤠ᤺ᤶᤒᤰᤁᤡᤴ ᤛᤢᤖᤢᤱᤗᤥ॥ 33 ᤁᤖ ᤀᤡᤱᤃᤠ᤹ ᤀᤠᤀᤡᤴ. ᤋᤠ᤺ᤴᤍᤡᤰ ᤏᤢ ᤀᤠᤳᤇᤧᤴᤍᤠ᤺ᤴ ᤂᤧᤳᤌᤥᤀᤣ ᤐᤣ᤺ᤰᤁᤠᤖ ᤐᤳᤋᤠ. ᤌᤣᤀᤠᤱᤓᤧᤸᤗᤧ ᤕᤖᤢᤛᤗᤧᤔ ᤗᤠ᤺ᤰᤁᤠᤳ ᤘᤣ᤹ ᤍᤧᤴᤏᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤛᤧᤵᤔᤠᤛᤡ ᤔᤧᤏᤢ᤹ᤏᤧᤴᤗᤥ॥’

34 ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤂᤡᤏᤡ᤹ᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤖᤢᤶᤛᤡᤶ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤥ ᤐᤠᤱᤄᤢᤛᤡᤒᤠ ᤀᤡᤱᤛᤠᤒᤠᤜᤠ᤹ ᤗᤢᤱᤅᤡᤸᤗᤧ ᤁᤧᤒ᤺ᤳᤋᤢᤶᤛᤡᤶᤗᤥ॥ ᤀᤠᤰᤂᤧᤴ ᤗᤧᤱ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤘᤠᤔᤠ᤺ᤵᤔᤠᤸᤗᤧ ᤘᤠᤈᤩᤠ᤺ᤰᤜᤠ᤹ ᤁᤢᤵᤋᤢᤛᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤛᤠ᤺ᤜᤠ᤹ ᤛᤢᤶᤔᤠᤛᤡ ᤏᤡᤱᤘᤠ᤹ ᤆᤥᤃᤢᤱ. ᤁᤖ ᤂᤡᤏᤡ᤹ ᤁᤧᤴᤍᤧᤴᤍᤡᤴᤗᤥ॥ 35 ᤀᤥᤔᤧᤳᤋᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤜᤡᤶᤔᤡᤴ ᤗᤠᤶᤎᤣ᤺ᤵ ᤆᤡᤀᤧᤳ ᤀᤧᤳᤋᤢ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ‘ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠᤴ ᤔᤢ᤹ᤀᤡᤛᤠᤒᤠᤖᤥ’*ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᥇᥇᥎.᥈᥌ ᤗ᤹ᤖᤡᤰ ᤁᤧᤶᤒᤠ᤺ᤳᤋᤢᤶᤔᤡᤴᤗ ᤌᤠᤖᤡᤰ ᤕᤠᤶᤔᤥ ᤕᤠᤵᤔᤡ ᤁᤧᤴᤏᤡ᤺ᤛᤡᤴᤗᤥ॥”