1 ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤃᤠᤗᤡᤗ ᤌᤢᤶᤔᤥᤗᤠᤶ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡᤒᤠ ᤕᤜᤢᤍᤡᤕᤠ ᤌᤢᤶᤔᤥ ᤐᤣᤖᤥ॥ 2 ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤘᤣ᤺ᤴᤍᤢᤛᤡᤖᤥ॥ 3 ᤁᤢᤓᤠ ᤑᤖᤡᤛᤡᤜᤠ᤹ ᤔᤧᤍᤩᤧᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤑᤠ᤹ᤀᤠᤱ ᤐᤠ᤺ᤴ ᤔᤧᤃᤧᤛᤢ. “ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤔᤏᤠ᤺ᤸᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤐᤡᤖᤢᤒᤡ ᤔᤧ᤺ᤶᤒᤡ᥅”

4 ᤕᤧᤛᤢᤖᤧ ᤔᤧᤳᤋᤢᤛᤡ. “ᤔᤧ᤺ᤶᤒᤧ᥄ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤆᤀᤡ᤺ᤳᤍᤠᤱᤒᤠᤸᤗᤧ ᤁᤢᤜᤣ᤺ᤰᤛᤡᤱᤔᤥᤀᤣ ‘ᤂᤧᤱᤜᤠ᤹ ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ ᤆᤥᤃᤢᤛᤡᤖᤥ॥’*ᤋᤥᤗᤡᤱᤛᤥᤔᤢ ᥇.᥈᥍. ᥋.᥈ 5 ᤜᤧᤰᤁᤩᤠᤱ ‘ᤂᤧᤸᤗᤧ ᤆᤥᤃᤢᤸᤗᤧ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤶᤒᤠ ᤏᤢ ᤁᤢᤶᤔᤠᤛᤡ ᤗᤧᤖᤢᤛᤡᤀᤠᤱ ᤁᤢᤔᤣ᤺ᤳᤋᤡᤴᤏᤢ ᤋᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥ᤺ᤱᤛᤡᤖᤥ॥’*ᤋᤥᤗᤡᤱᤛᤥᤔᤢ ᥈.᥈᥊. ᤃᤪᤡᤁ ᤐᤠ᤺ᤴᤍᤠᤱᤅᤥ “ᤌᤡᤰ ᤌᤰ ᤐᤥ᤺ᤱᤛᤡᤖᤥ॥” 6 ᤀᤠᤸᤗ ᤂᤧᤱᤜᤠ᤹ᤃ ᤏᤧᤵᤑᤢᤛᤡ ᤔᤧ᤺ᤴ. ᤁᤖ ᤗᤳᤇᤠ ᤌᤰᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤌᤰ ᤆᤥᤃᤢᤛᤡᤒᤠᤜᤠ᤹ ᤔᤧᤴᤇᤠᤶ ᤕᤠᤵᤔᤡᤖᤧ ᤛᤧᤶᤔᤠᤛᤡ ᤔᤧᤏᤢ᤹ᤏᤧᤴᤗᤥ॥”

7 ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤣᤀᤠᤱ ᤔᤥᤛᤠ᤺ᤸᤗᤧ ‘ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤀᤡᤱᤃᤠ᤹ ᤏᤠ᤹ᤏᤧᤒᤠᤖᤥ ᤑᤠ᤹ᤀᤠᤱ ᤛᤠᤵᤗᤠ ᤛᤠᤵᤋᤢᤀᤠᤱ ᤐᤠᤱᤔᤠᤍᤣ᤺ᤔᤠ ᤛᤢᤰᤋᤢ᤹’ ᤗ᤹ᤖᤡᤰ ᤛᤠᤵᤋᤢᤒᤠᤒᤣ᥅”

8 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤐᤠ᤺ᤴ ᤔᤧᤱᤄᤧᤶᤔᤏᤠᤒᤠ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤔᤥᤛᤠᤖᤧ ᤂᤡᤏᤡ᤹ ᤔᤣ᤺ᤳᤜᤠ᤹ ᤏᤠ᤹ᤔᤠ ᤁᤧᤛᤢᤰᤋᤢᤶᤛᤡᤶ ᤑᤠ᤹ᤀᤠᤱ ᤛᤠᤵᤋᤢᤒᤠᤖᤥ॥ ᤁᤖ ᤁᤢᤜᤣ᤺ᤰᤛᤡᤱᤔᤥᤃ ᤀᤰᤋᤱᤒᤠ ᤜᤥ᤺ᤵᤋᤧᤖᤥ॥ 9 ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤳᤋᤡᤴ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤘᤣ᤹ᤜᤠ᤹ᤏᤢ ᤔᤧᤴᤗᤠᤶᤔᤣ ᤏᤠ᤹ᤖᤢᤀᤠᤱ ᤘᤣ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ. ᤂᤧᤸᤗᤧᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰᤁᤣ ᤆᤥᤃᤢ᤹ᤖᤥ॥” ((ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤂᤧᤴ ᤏᤠ᤹ᤖᤢᤔᤠ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹ ᤂᤧᤸᤗᤧᤀᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤣ ᤆᤥᤃᤢ᤹ᤖᤥ॥))

10 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤔᤣ᤺ᤳ ᤕᤧᤶᤒᤠ᤹ ᤗᤢᤶᤔᤥ ᤒᤠ ᤜᤧᤰᤁᤣᤖᤰ ᤐᤥ᤺ᤱᤏᤧ ᤑᤠ᤹ᤃᤪ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤔᤠᤀᤣ ᤏᤢ᤺ᤒᤠᤖᤥ॥”

11 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤁᤧᤖᤧᤰᤗᤧᤃ ᤁᤴ ᤐᤠ᤺ᤴᤜᤠ᤹ ᤋᤠ᤺ᤰᤔᤠ ᤔᤧᤴᤇᤢᤰᤋᤢᤴ. ᤁᤖ ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤥ᤺ᤛᤢ᤹. ᤂᤧᤸᤗᤧᤖᤰ ᤋᤠ᤺ᤰᤔᤠ ᤛᤢᤰᤋᤢ᤹॥ 12 ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤔᤏᤠ ᤕᤖᤡᤰ ᤐᤴᤕᤧᤶᤜᤠ᤹ ᤘᤠ᤹ᤖᤥ॥ ᤁᤢᤓᤠᤃ ᤛᤠᤘᤠ᤺ᤴᤇᤡᤱᤔᤠᤏᤢᤎᤥᤀᤣ ᤛᤡᤱᤃᤠᤖᤢ ᤔᤧᤘᤠ᤹ᤖᤥ. ᤘᤣ᤹ᤜᤠ᤹ ᤔᤏᤠᤜᤠ᤹ᤖᤧ ᤛᤡᤱᤃᤠᤖᤢ ᤔᤧᤈᤥᤃᤢᤛᤡ. ᤜᤧᤰᤁᤩᤠᤱ ᤁᤢᤓᤠᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ॥ ᤀᤠᤳᤋᤡᤸᤗᤧ ᤋᤠ᤺ᤰᤔᤠ ᤛᤢᤰᤋᤢ᤹ ᤜᤠᤖᤠ᤹ ᤂᤧᤸᤗᤧᤀᤣ ᤋᤠ᤺ᤰᤋᤢᤖ॥”

13 ᤌᤡᤰ ᤕᤧᤴ ᤕᤧᤛᤢᤖᤧ ᤜᤢᤰ ᤏᤧᤛ᤻ᤛᤢᤀᤠᤱ ᤋᤢᤘᤠ ᤆᤥᤃᤢ ᤐᤡᤖᤢᤛᤡᤖ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤍᤠᤖᤢᤛᤡ॥ ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤜᤡᤴᤈᤠ᤹ᤒᤡᤳᤇᤠ ᤁᤧᤍᤠ᤺ᤵᤐᤠᤜᤠ᤹ ᤔᤧᤓᤧ᤺ᤰᤋᤢᤛᤡ॥

14 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤑᤠ᤺ᤰᤋᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤁᤴ ᤜᤡᤴᤈᤠ᤹ᤒᤡᤳᤇᤠ ᤜᤧᤰᤋᤱᤒᤠᤜᤠ᤹ᤖᤧᤴᤏᤣᤖᤥ॥” 15 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤖ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤀᤠᤱ ᤂᤧᤵᤔᤥᤗᤠᤶ ᤌᤠᤛᤡᤱᤗᤥ॥

16 ᤀᤠᤸᤗ ᤔᤏᤠᤎᤡᤰ ᤕᤧᤛᤢᤖᤥ ᤑᤧᤖᤧᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤀᤠᤰᤋᤱᤒᤠ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢᤱᤒᤣ᥅”

17 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤛᤣ᤺ᤴᤃᤧᤍᤥᤀᤠᤒᤠᤒᤣ᥅ ᤁᤧᤏᤢ᤹ᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤘᤠ᤹ᤖᤥ॥ ᤁᤖ ᤂᤧᤏᤧ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤜᤠ᤹ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤥ॥”

18 ᤂᤧᤴ ᤔᤏᤠ᤺ᤸᤗᤧ ᤛᤣ᤺ᤴᤍᤥᤛᤢ. “ᤀᤠᤳᤋᤡᤴ ᤛᤠᤶᤕᤥᤀᤡᤱᤈᤠ᤺ᤱᤅᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤒᤠᤒᤣ᥅”

ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤔᤏᤠ ᤛᤧᤵᤔᤠ ᤔᤧᤏᤢ᤹ᤏᤧᤴ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤂᤢ᤺ᤶᤔᤠ ᤔᤧᤏᤢ᤹ᤏᤧᤴ. ᤀᤡᤱᤗᤧᤰ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ. 19 ᤁᤧᤶᤒᤠ ᤁᤧᤶᤔᤠᤛᤡ ᤀᤡᤱᤎᤠ᤺ᤱ ᤐᤡᤖᤧᤛᤧ᤹॥ ᤜᤧᤰᤁᤩᤠᤱ ᤀᤠᤵᤑᤣ᤺ᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥”*ᤗᤠᤶᤍᤡ᤺ᤰ ᥈᥆.᥇᥈-᥇᥌. ᤗᤧᤒᤡᤜᤠ᤹ ᥇᥏.᥇᥎. ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱ ᥋.᥇᥌-᥈᥆

20 ᤂᤧᤴ ᤌᤠᤱᤒᤧᤴᤏᤡᤸᤗᤧ ᤔᤧᤳᤋᤢ. “ᤁᤴᤜᤠ᤹ ᤁᤧᤖᤧᤰ ᤀᤡ᤺ᤳᤋᤢᤱ-ᤏᤠ᤺ᤳᤋᤢᤱᤅᤠᤱᤅᤣ ᤘᤠ᤹ᤀᤠᤖᤥ॥ ᤀᤠᤸᤗᤛᤠᤱ ᤕᤠᤶᤔᤥ ᤌᤣ ᤆᤥ᤺ᤰᤔᤠᤀᤥ ᤛᤢ᤺ᤴᤍᤠᤱᤒᤣ᥅”

21 ᤕᤧᤛᤢᤖᤧ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤁᤢᤗᤡᤱᤎᤥ ᤁᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤐᤣᤃᤧ᤹ᤀᤠᤱ ᤁᤧᤃᤳᤋᤢᤒᤠᤴ ᤁᤧᤖᤧᤰ ᤛᤱᤄᤧᤍᤣ᤺ᤛᤧ᤹ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤁᤧᤄᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤑᤧᤖᤧ᤹ᤀᤠᤱ ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”

22 ᤂᤧᤴ ᤌᤠᤱᤒᤧᤴᤏᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤁᤢᤏᤡᤱᤘᤠ᤹ ᤋᤢᤃᤧᤖ ᤂᤧᤵᤔᤥᤗᤠᤶ ᤐᤣᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤳᤋᤢᤖᤥ॥

23 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤠ᤹ᤖᤡᤰ ᤛᤠᤰᤗᤥ॥ 24 ᤕᤠᤶᤔᤥᤀᤠᤱ ᤂᤡᤏᤡ᤹ ᤔᤧᤳᤏᤡᤱ. ᤕᤠᤱᤛᤠᤁᤢᤴᤎᤣᤛᤠᤒᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤏᤢ᤺ᤸᤗᤧ ᤀᤢᤔᤣ᤺ᤴ ᤛᤶᤔᤣ᤺ᤳᤋᤡᤸᤗᤧ ᤁᤢᤜᤱᤅᤥ ᤗᤠ᤺ᤵᤔᤠ ᤀᤢᤛᤢᤖᤢ ᤐᤥ᤺ᤱᤗᤥ॥”

25 ᤜᤧᤰᤁᤩᤠᤱ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣ᤺ᤸᤗᤧ ᤜᤠ᤺ᤳ ᤋᤠᤱᤛᤧ᤺ᤵᤔᤠ ᤛᤢᤰᤐᤠᤒᤣ᥅”

26 ᤕᤧᤛᤢᤖᤧ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡ ᤁᤴ ᤐᤥ᤺ᤱᤔᤠ ᤔᤧᤴᤇᤢᤰᤔᤏᤠᤒᤠ ᤆᤥ᤺ᤰᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ॥”

27 ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤍᤠᤱᤒᤣ. ᤀᤠᤏᤡᤃᤧᤃ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤶᤒᤧ. ᤜᤧᤰᤁᤩᤠᤱ ᤂᤧᤏᤧ᤹ ᤋᤡᤶᤔᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥ ᤀᤠᤏᤡᤃᤧᤃ ᤌᤣ ᤂᤥ᤺ᤛᤢᤶᤒᤧᤒᤠᤒᤣ᥅” 28 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤁᤧᤍᤠ᤺ᤒᤠ ᤁᤢᤛᤱ ᤜᤠᤱᤈᤢᤶᤔᤥ ᤔᤡᤔᤡᤍᤡᤱᤃᤧᤴ ᤜᤠᤱᤕᤢᤰᤏᤠᤀᤥ ᤕᤢᤱᤅᤠᤖᤥ॥ ᤂᤧᤴ ᤕᤧᤶᤔᤥ ᤂᤡᤏᤡ᤹ ᤀᤡᤱᤃᤠ᤹ ᤕᤠᤵᤔᤡ ᤁᤧᤍᤡᤶᤒᤠᤜᤠ᤹ᤀᤠᤱ ᤌᤡᤰ-ᤏᤧᤳ (᥇᥈) ᤜᤠᤱᤕᤢᤰᤏᤠᤀᤥ ᤁᤧᤕᤢᤅᤡᤀᤠᤱ ᤀᤡᤛᤪᤠᤀᤡᤗᤒᤠ ᤌᤡᤰ-ᤏᤧᤳ ᤛᤢᤘᤠᤱᤜᤠ᤹ ᤛᤶᤍᤠᤱ ᤜᤠᤱ ᤁᤧᤈᤥᤃᤡ᤹ᤖᤥ॥ 29 ᤀᤠᤳᤋᤡᤸᤗᤧ ᤀᤠᤗᤠᤃᤡ ᤜᤡᤶᤎᤠ᤺ᤱᤜᤠ᤹. ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹. ᤏᤧ᤹ᤏᤢᤛᤠ᤹ᤜᤠ᤹. ᤑᤢ᤹ᤏᤢᤛᤠ᤹ᤜᤠ᤹. ᤐᤠ᤺ ᤔᤠᤜᤠ᤹. ᤀᤡᤃᤪ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤗᤧᤖᤢᤛᤡᤀᤠᤱ ᤘᤠ᤹. ᤂᤧᤸᤗᤧᤃ ᤁᤡᤵᤌᤡᤰ (᥇᥆᥆) ᤗᤧᤱᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤥ᤺ᤛᤢ᤹. ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥ 30 ᤁᤖ ᤀᤠᤸᤗᤥ ᤋᤃᤡ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤀᤣᤃᤠᤱ ᤔᤧᤒᤥ᤺ᤱᤗᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤣᤃᤠᤱ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤋᤃᤠᤱ ᤔᤧᤒᤥ᤺ᤱᤗᤥ॥”