1 ᤕᤧᤛᤢᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. 2 “ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤠ᤺ᤔᤠ ᤏᤡᤕᤧᤴᤗᤰ ᤘᤠ᤹ᤒᤠᤃ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤣᤖᤥ. ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤇᤧ ᤜᤢᤰᤔᤧᤛᤢᤵᤋᤢ᤹ᤖᤥ॥” 3 ᤂᤧᤴ ᤕᤧᤶᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤈᤢᤵᤛᤧ॥ ᤂᤧᤸᤗᤧ ᤁᤢᤔᤡᤱᤃ ᤁᤤᤕᤠᤑᤠᤛ ᤘᤕᤧ॥ 4 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤀᤠᤰᤂᤣᤗ᤹ᤖᤡᤰ ᤛᤫᤠ᤺ᤳᤋᤠᤱ ᤋᤧᤶᤔᤠᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤆᤧᤶᤓᤴ ᤔᤧᤈᤥᤃᤢᤖᤥ॥ 5 ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤋᤱᤏᤠᤶᤔᤥᤃ ᤀᤠᤏᤡ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤁᤴ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ᤖᤥ॥”

6 ᤂᤧᤴ ᤕᤧᤶᤔᤥ ᤕᤧᤛᤢ᤺ᤴ ᤒᤧᤌᤠᤏᤡ ᤐᤠᤱᤓᤣ᤹ᤀᤥ ᤗᤥᤃᤣ᤹ ᤋᤢᤰᤔᤠᤗᤠᤶ ᤁᤧᤘᤣ᤺ᤵᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤕᤧᤖᤥ॥ 7 ᤜᤧᤰᤁᤩᤠᤱ ᤆᤠᤈᤠᤏᤢ ᤕᤢᤅᤧᤸᤗᤧ ᤔᤧᤴᤇᤢᤔᤠ᤹ᤎᤡᤰ ᤀᤡᤔᤧᤸᤗᤢᤱᤒᤠ ᤑᤢᤱᤏᤠᤶ ᤁᤧᤕᤠᤰᤐᤠ ᤗᤧᤶᤓᤠᤗᤢᤱ ᤐᤷᤕᤠᤔᤠᤏᤢ ᤋᤩᤧᤀᤠᤱ ᤕᤧᤛᤢᤖᤧ ᤁᤢᤎᤧᤃᤣ᤺ᤰᤐᤥ ᤜᤢᤰᤂᤢᤖᤥ॥ 8 ᤂᤧᤴ ᤔᤧᤏᤡ᤺ᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤌᤣᤀᤠᤱ ᤁᤴ ᤑᤢᤱᤏᤠᤶᤔᤡᤴ ᤆᤠᤛᤥ᤺ᤰᤂᤢᤒᤠᤒᤣ᥅ 9 ᤁᤱᤃ ᤕᤖᤡᤰ ᤕᤠᤱᤅᤥ ᤛᤱᤔᤠᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡ᤺ᤔᤏᤠᤛᤡᤸᤗᤧ ᤐᤥ᤺ᤰᤂᤧᤒᤠᤖᤥ॥” 10 ᤕᤧᤛᤢᤖᤧ ᤁᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤌᤣᤀᤠᤱ ᤁᤴ ᤔᤧᤴᤇᤢᤔᤠ᤹ᤀᤡᤴ ᤋᤢᤰᤂᤣ ᤁᤧᤈᤠ᤺ᤳᤋᤢᤶᤒᤠᤒᤣ᥅ ᤂᤧᤸᤗᤧᤃ ᤀᤠᤗᤠᤃᤡ ᤏᤢ᤺ᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥ 11 ᤕᤠᤱᤃᤧᤛᤠ᤹ᤒᤠᤜᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤖᤥ॥ ᤁᤖ ᤀᤡᤱᤃᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤀᤠᤴᤗᤥ॥ 12 ᤂᤧᤸᤗᤧ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤑᤢᤱᤏᤠᤶᤔᤡᤴ ᤜᤢᤰᤂᤢᤀᤠᤱ ᤀᤠᤗᤢᤵᤔᤠᤸᤗᤧᤴ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹ᤖᤥ॥ 13 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤸᤗᤧ. ᤂᤧᤵᤔᤥ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤈᤧᤰᤂᤢᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥”

14 ᤜᤧᤰᤁᤩᤠᤱ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤧᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤐᤣᤀᤠᤱ 15 ᤔᤧᤳᤋᤛᤡ. “ᤕᤧᤛᤢ᤺ᤴ ᤁᤧᤍᤧᤶᤛᤢᤶᤗ ᤑᤠ᤹ᤀᤠᤱ ᤂᤡᤏᤡ᤹ ᤜᤢᤰᤁᤥ ᤌᤠ᤺ᤛᤢᤱ ᤐᤡᤏᤡᤱᤅᤡᤸᤗᤧ ᤀᤡᤱᤃᤠ᤹ ᤌᤣ ᤕᤠᤵᤔᤡ ᤀᤠᤃᤧᤒᤡᤖᤡᤒᤣ᥅”

ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤢᤶᤒᤥ᤺ᤱ (᥉᥆) ᤕᤢᤵᤐᤠᤕᤠᤱ ᤂᤧᤴ ᤔᤧᤒᤡᤖᤢᤖᤥ॥ 16 ᤂᤧᤴ ᤕᤧᤶᤔᤠᤱᤎᤥ ᤕᤜᤢᤍᤠ᤺ᤸᤗᤧ ᤕᤧᤛᤢ᤺ᤴ ᤀᤡᤱᤗᤧᤰᤔᤠ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥

17 ᤀᤠᤸᤗ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣ᤺ᤰᤐᤠ ᤕᤧᤴᤏᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ*ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤴ ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤘᤣ᤹ ᤘᤣ᤹ ᤋᤱᤏᤠᤶᤛᤡᤖᤥ. ᤁᤖ ᤛᤥᤛᤥᤖᤡᤰ ᤁᤧᤍᤠ᤺ᤒᤠ ᤋᤱᤏᤠᤶ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤂᤧᤴ ᤋᤱᤏᤠᤶᤜᤠ᤹ ᤗᤳᤇᤠ ᤔᤡᤱᤅᤡᤸᤗᤧᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢ॥ ᤆᤠᤔᤠ ᤌᤢᤱᤔᤠ ᤀᤠᤳᤋᤥ ᤕᤠᤖᤡᤵ ᤆᤥ᤺ᤰᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤀᤠᤱ ᤘᤠ᤹ᤒᤣ᥅”

18 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤕᤧᤰᤕᤰᤁᤥ ᤐᤣᤃᤧᤶᤔᤧ᤹. ᤂᤧᤵᤔᤥ ᤗᤳᤇᤠ ᤔᤏᤠᤎᤡᤰ ᤁᤧᤍᤢᤔᤢᤶ॥ ᤂᤧᤴ ᤀᤰᤂᤣ ᤔᤧᤳᤋᤧᤶᤔᤧ᤹. ‘ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ᤀᤡᤱᤃᤠ᤹ ᤀᤠᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤛᤛᤠᤱᤛᤪᤥ᤺ᤳ ᤆᤥᤃᤢᤶᤒᤧ᤹ᤖᤥ॥’ ”

19 ᤜᤧᤰᤁᤣ᤺ᤸᤗᤧ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤢ॥

20 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤕᤧᤛᤢ᤺ᤴ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤛᤥᤖᤡᤰ ᤆᤠᤔᤠ ᤋᤧᤴᤏᤥ ᤕᤢᤱᤛᤡᤱ॥ 21 ᤜᤧᤰᤁᤩᤠᤱ ᤔᤧᤈᤖ ᤔᤧᤕᤢᤅᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥”

22 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤛᤠᤶᤔᤥ ᤔᤧᤎᤩᤧᤀᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤛᤣ᤺ᤴᤍᤥ᤺ᤔᤠ ᤔᤧᤜᤣ᤺ᤰᤋᤢ. “ᤍᤠᤱᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠ᤺ᤴ ᤀᤡᤱᤃᤠ᤹ᤒᤡ᥅”

23 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤈᤠᤒᤠᤖ ᤁᤧᤕᤢᤱᤒᤠᤎᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥ 24 ᤔᤧᤴᤇᤠᤶᤛᤠ᤺ᤱᤃ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤛᤡ᤺ᤔᤠᤀᤣ ᤐᤥ᤺ᤱᤗᤥ॥ ᤁᤖ ᤔᤧᤴᤇᤠᤶᤛᤠ᤺ᤴ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧ ᤛᤩᤧᤖᤥ᥄ ᤂᤧᤱᤃ ᤛᤠᤔᤧᤘᤠ᤺ᤴᤇᤡᤱᤅᤡᤴᤏᤡᤸᤗᤧ ᤏᤢᤖᤧᤒᤠᤖᤥ॥” 25 ᤜᤧᤰᤁᤩᤠᤱ ᤛᤧᤰᤂᤠᤀᤥ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤸᤗᤧᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠ᤺ᤴ ᤀᤡᤱᤃᤠ᤹ᤀᤣᤒᤡ᥅”

ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤀᤠᤒᤠᤅᤣ ᤁᤧᤒᤠ᤺ᤳᤋᤢᤖᤥ॥”

26 ᤂᤧᤱᤜᤠ᤹ᤖᤧ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢᤖᤧ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤡᤖᤢᤛᤡ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤠᤱ ᤆᤧᤶᤔᤧ᤹ᤀᤥ. ᤁᤱᤃ ᤏᤠᤛᤡᤱᤃᤧᤴ ᤀᤠᤎᤰᤗᤥ॥” 27 ᤜᤧᤰᤁᤩᤠᤱ ᤆᤸᤗᤱᤏᤠ ᤂᤥᤷᤕᤠ᤺ᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤡᤖᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤁᤴ ᤌᤢᤅᤧᤶᤔᤧ᤹ᤀᤥ॥ 28 ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤆᤥ᤺ᤰᤔᤏᤠᤒᤠ ᤁᤢᤛᤱ ᤔᤠᤱᤜᤢᤵᤗᤧᤴ ᤀᤠᤔᤠᤰᤂᤡ᤹ᤖᤥ॥ ᤁᤴ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤥ᤺ᤱᤗ ᤑᤠ᤹ᤀᤠᤱ ᤘᤠᤍᤣ᤺ᤴᤗᤥ॥ 29 ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤀᤡᤴᤏᤠᤱᤎᤥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤠᤱᤈᤢᤶᤔᤥ ᤂᤡᤏᤡ᤹ᤏᤢ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤕᤠᤶᤔᤥ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤎᤢᤱᤅᤠᤴᤗᤥ॥”

30 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤛᤣᤘᤠ ᤛᤠᤶᤗᤥ ᤛᤠᤶᤔᤧᤗᤥᤖᤧᤀᤠᤱ ᤈᤤᤋᤢᤏ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥

31 ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤀᤡᤴ ᤛᤧᤴᤍᤡᤰᤛᤠ ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤗᤧᤖᤡ᤹ᤀᤠᤱ ᤁᤧᤒᤡᤃᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.

33 ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤁᤧᤖᤧᤰᤗᤧ ᤂᤧᤏᤧ᤹ ᤁᤧᤶᤗᤧᤳ ᤁᤧᤶᤎᤠ᤺ᤛᤠᤱ ᤀᤡᤱᤃᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤳᤏᤧᤴᤗᤥ॥”

34 ᤕᤧᤛᤢᤖᤧ ᤔᤧᤳᤋᤢ. “ᤐᤋᤪᤢᤛᤣ. ᤛᤧᤰᤂᤠᤀᤣ ᤔᤧᤳᤏᤧ᤹. ᤀᤠᤰᤂᤥ ᤛᤧᤴᤍᤡᤰ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡᤀᤣ. ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”

35 ᤁᤖ ᤐᤋᤪᤢᤛᤖᤧ ᤜᤠᤍᤡᤱ ᤌᤰᤋᤧᤖ ᤔᤧᤳᤋᤢ. “ᤔᤧ᤺ᤴᤗᤥ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤛᤡ᤺ᤔᤠ ᤐᤥ᤺ᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤏᤧᤴᤗᤥ॥” ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤒᤠ᤺ᤳᤋᤢᤖᤥ॥

36 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤃᤧᤋᤛᤔᤏᤡ ᤔᤧᤵᤔᤏᤠᤒᤠ ᤈᤤᤋᤢᤏ ᤛᤡᤱᤗᤠᤀᤥ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤧᤵᤔᤥ ᤋᤢᤘᤠ ᤆᤥᤃᤢᤱᤅᤡᤸᤗᤧ ᤂᤡᤏᤡ᤹ ᤁᤵᤔᤥ ᤕᤢᤅᤧᤶᤔᤧ᤹ᤀᤥ॥” 37 ᤕᤧᤛᤢᤖᤧ ᤐᤋᤪᤢᤛᤧᤴ ᤏᤢ ᤈᤒ᤻ᤍᤡᤕᤠᤖᤧ ᤏᤧᤵᤑᤢ ᤁᤢᤛ᤻ᤛᤠ᤺ᤜᤠ᤹ ᤂᤢᤏᤧ᤹ᤏᤢ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤔᤡᤱᤘᤠᤖᤧ ᤁᤢᤎᤡᤶᤏᤢ ᤏᤡᤱᤛᤠᤶᤔᤥ ᤌᤩᤧᤖᤥ॥ 38 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤔᤡᤱᤘᤠᤖᤧ ᤕᤥ᤺ᤴᤍᤠᤱᤅᤠᤱ ᤛᤡ᤺ᤔᤠᤗᤡᤱᤎᤥ ᤌᤠᤖᤡᤰ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤁᤵᤔᤥ ᤆᤠᤱᤈᤠᤱᤅᤠᤱ ᤕᤢᤅᤧᤶᤔᤧ᤹ᤖ ᤕᤠᤵᤔᤡ ᤆᤢᤶ ᤀᤠᤔᤧᤳᤋᤧᤶᤔᤧ᤹ᤀᤥ॥”

39 ᤂᤢᤏᤧ᤹ ᤕᤠᤶᤔᤥ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤂᤠᤶᤔᤥ ᤛᤠᤶᤒᤥ᤺ᤴ ᤑᤴᤇᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧᤖᤥ. “ᤐᤠᤏᤢᤍᤡᤱ ᤀᤠᤶᤒᤣ. ᤐᤥ᤺ᤱᤔᤠ ᤛᤢᤰᤏᤧ ᤑᤠ᤹ᤃᤪ. ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠ᤺ᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣ᤺ᤛᤧ᤹ᤀᤥ॥ ᤜᤧᤰᤁᤣᤛᤠᤱ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤧ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥ᤺ᤱᤗᤖᤥ॥” 40 ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ॥ ᤕᤧᤛᤢᤖᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤡᤏᤡ᤹ ᤁᤢᤔᤢᤰᤌᤡᤰᤁᤠᤱ ᤀᤡᤱᤃᤠ᤹ᤏᤢ ᤆᤠᤱᤈᤠᤱᤅᤠᤱ ᤕᤢᤱᤔᤠ ᤁᤧᤴᤇᤢᤰᤋᤡᤴᤒᤡ᥅ 41 ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤠᤱᤈᤠᤱᤅᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤡᤸᤗᤧ ᤏᤢ᤺ᤖᤡᤰᤁᤠᤱ ᤆᤥ᤺ᤰᤔᤠ ᤁᤧᤃᤥ᤺ᤳᤋᤢᤶ. ᤁᤖ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤔᤧᤎᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ ᤁᤧᤴᤇᤢᤰᤋᤢᤶᤔᤡᤸᤗᤥ॥” 42 ᤂᤢᤏᤧ᤹ ᤕᤠᤶᤔᤥ ᤐᤣᤀᤠᤱ ᤋᤢᤘᤠ ᤆᤥᤃᤢ. “ᤐᤠᤏᤢᤍᤡᤱ ᤀᤠᤶᤒᤦ. ᤀᤡᤱᤃᤠ᤹ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠ᤺ᤴ ᤔᤧᤴᤎᤢᤱᤅᤣ ᤔᤧᤒᤥ᤺ᤱᤅᤡᤴᤏᤧ ᤑᤠ᤹ᤃᤪ ᤂᤧᤏᤧ᤹ ᤁᤧᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤗᤖᤥ॥” 43 ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤡᤰᤕᤢ᤺ᤔᤠᤸᤗᤧ ᤛᤠ᤹ᤖᤡᤰ ᤋᤖᤢᤛᤡᤀᤠᤱ ᤔᤧᤘᤕᤧ॥

44 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤗᤧᤖᤢᤎᤛᤡᤀᤠᤱ ᤕᤠᤶᤔᤥ ᤋᤢᤘᤠ ᤆᤥ᤺ᤰᤛᤧ ᤐᤣᤀᤠᤱ ᤋᤃᤡ ᤜᤧᤰᤁᤣ ᤋᤢᤘᤠ ᤆᤥᤃᤢ॥ 45 ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤸᤗᤛᤠᤱ ᤁᤧᤏᤠᤛᤡᤱᤅᤡᤀᤠᤱ ᤁᤧᤀᤡᤵᤛᤡᤀᤠᤱ ᤁᤧᤏᤧᤛ᤻ᤛᤡᤒᤡ᥅ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠ᤺ᤔᤠ ᤕᤧᤶᤔᤡᤴ ᤋᤩᤧᤖᤥ॥ 46 ᤐᤥᤃᤧᤶᤔᤧ᤹. ᤁᤵᤔᤥᤗᤠᤶ ᤐᤡᤃᤡ᥄ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤧᤴ ᤂᤠ ᤑᤧᤴᤗ ᤐᤳᤗᤥ᥄”

47 ᤕᤧᤛᤢ᤺ᤴ ᤜᤧᤰᤁᤣᤗ᤹ᤖᤡᤰ ᤐᤠᤖᤧᤖ ᤐᤳᤇᤧᤸᤗᤧ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤕᤜᤢᤍᤠ ᤔᤧᤵᤔᤏᤠᤒᤧᤴ ᤂᤧᤵᤔᤥ ᤁᤧᤖᤧ ᤋᤩᤧ॥ ᤂᤢᤏᤧ᤹ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤋᤠᤓᤣ ᤏᤢ ᤋᤰᤁᤠ᤺ᤳ ᤁᤧᤃᤵᤐᤠ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤘᤕᤧ॥ 48 ᤀᤠᤸᤗ ᤕᤧᤛᤢ᤺ᤴ ᤀᤡᤱᤃᤧᤗᤧᤰᤐᤧᤸᤗᤧ ᤀᤠᤳᤋᤡᤴ ᤔᤏᤠ᤺ᤴ ᤀᤡᤱᤃᤠ᤹ ᤆᤢᤵ ᤔᤧᤳᤋᤢᤱ. ᤂᤧᤴ ᤋᤧᤶᤛᤧᤶᤔᤧ᤹ ᤗ᤹ᤖᤡᤰ ᤔᤡᤰᤛᤣ᤺ᤴ ᤐᤡᤖᤢᤛᤡᤀᤠᤱ ᤘᤕᤧ॥*ᤕᤜᤢᤍᤡ ᤛᤠᤰᤌᤡᤶᤔᤥ ᤋᤣ᤺ᤱᤈᤢᤶ ᤔᤧᤍᤢᤶᤔᤡᤸᤗᤧ ᤆᤢᤵ ᤔᤧᤔᤧᤳᤇᤡᤱᤗᤥ॥ 49 ᤂᤡᤔᤥ ᤕᤜᤢᤍᤠ᤺ᤴ ᤕᤧᤛᤢᤖᤥ ᤐᤣᤀᤠᤱ “ᤀᤠᤛᤣᤘᤠᤖᤥ. ᤛᤡᤰᤛᤠᤶᤒᤣ” ᤔᤧᤳᤋᤢᤖ ᤆᤢᤵ ᤔᤧᤳᤋᤢ॥

50 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤆᤢᤶᤔᤣ. ᤂᤧᤏᤧ᤹ ᤌᤣ ᤆᤥ᤺ᤰᤛᤧ ᤁᤧᤍᤩᤧᤒᤠ ᤂᤧᤴ ᤜᤠᤖᤠ ᤆᤥᤃᤧ᤹ᤀᤥ॥” ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤜᤢᤰ ᤔᤧᤕᤠᤰᤋᤢᤀᤠᤱ ᤔᤧᤍᤧᤶᤛᤢᤖᤥ॥ 51 ᤕᤧᤛᤢ᤺ᤴᤏᤢ ᤁᤧᤘᤠ᤹ᤒᤠᤜᤠ᤹ᤀᤥ ᤌᤡᤰᤗᤧ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤒᤠᤴ ᤆᤧᤵᤋᤢᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥

52 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤁᤧᤍᤠᤓᤣ᤺ᤴ ᤑᤧᤛᤡ᤺ᤵᤐᤥ ᤕᤠᤰᤋᤧ᤹. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤋᤠᤓᤣ᤺ᤴ ᤀᤥᤃᤵ ᤆᤥᤃᤢ᤹. ᤂᤧᤴ ᤋᤠᤓᤣᤗᤠᤶᤔᤣ ᤛᤡ᤹᤺॥ 53 ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ᤺ᤴ ᤏᤠ᤺ᤰᤋᤢᤱᤅᤡᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧᤴ ᤌᤡᤰ-ᤏᤧᤳ ᤋᤢᤖᤠᤏᤢ᤺ᤸᤗᤧ ᤕᤖᤡᤰ*ᤃᤪᤡᤁ ᤐᤠ᤺ᤴᤍᤠᤱᤅᤥ “ᤗᤡᤈᤴ”॥ ᤂᤧᤴ ᤕᤧᤶᤔᤥ ᤌᤡᤰ ᤗᤡᤈᤴ ᤑᤠ᤹ᤀᤡᤴ ᥌᥆᥆᥆ ᤔᤏᤠᤜᤠ᤹ ᤔᤧᤘᤕᤧᤖᤥ॥ ᤀᤡᤱᤃᤠ᤹ ᤕᤠᤵᤔᤡ ᤋᤠᤱᤛᤧ᤺ᤵᤛᤧ ᤂᤡᤔᤥ ᤔᤧᤒᤠᤱᤄᤢᤴᤛᤡᤴᤒᤡ᥅ 54 ᤁᤖ ᤜᤧᤰᤁᤣᤗ᤹ᤖᤡᤰ ᤏᤠ᤺ᤰᤋᤢᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤥ᤺ᤱᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤛᤠᤵᤋᤧᤒᤠᤴ ᤀᤠᤰᤂᤣᤀᤠᤱ ᤁᤧᤵᤐᤠᤒᤣ᥅”

55 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤧᤶᤛᤧ ᤁᤧᤍᤠ᤺ᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣᤏᤢ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅ ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ॥ 56 ᤁᤖ ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤥ᤺ᤰᤂᤧᤒᤠᤖᤥ॥” ᤜᤧᤰᤁᤩᤠᤱ ᤁᤧᤖᤧᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤐᤰᤔᤧᤎ᤺ᤀᤠᤱ ᤔᤧᤄᤧᤳᤇᤡᤱ ᤔᤧᤒᤣᤖᤥ॥

57 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤧᤍᤧᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤖᤥ॥ 58 ᤁᤖ ᤐᤋᤪᤢᤛᤖᤧᤃ ᤕᤧᤛᤢ᤺ᤴ ᤏᤢ ᤂᤧᤴ ᤔᤏᤠᤜᤠ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤔᤠ᤺ᤱᤄᤠᤗᤠᤶ ᤋᤡᤶᤍᤢᤛᤡᤖᤥ॥ ᤜᤧᤰᤁᤩᤠᤱ ᤀᤠᤸᤗ ᤕᤧᤛᤢ᤺ᤴ ᤌᤣ ᤔᤧᤔᤧᤳᤋᤢᤀᤡᤗᤠ ᤗ᤹ᤖᤡᤰ ᤀᤥᤔᤧᤳᤇᤧ ᤛᤡᤃᤠᤱ ᤗᤠ᤺ᤛᤧᤀᤠᤱ ᤛᤣᤘᤠᤖᤥᤒᤠᤜᤠ᤹ᤏᤢ ᤕᤢᤱᤛᤡᤱᤗᤥ॥

59 ᤀᤠᤸᤗ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤕᤧᤈᤢᤶᤓᤥᤖᤧᤴ ᤁᤧᤖᤧᤰ ᤐᤠᤛᤡᤱᤐᤠᤍᤠᤱᤗᤠᤜᤠ᤹ᤖᤧ ᤕᤧᤛᤢ᤺ᤴ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥᤒᤠ ᤀᤠᤵᤋᤡᤰᤜᤠ᤹ ᤔᤧᤃᤥ᤺ᤳᤋᤢ॥ 60 ᤂᤧᤵᤔᤥ ᤕᤖᤡᤰ ᤑᤥᤋᤩᤠᤒᤠ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤗ᤺ᤴᤍᤧ. ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤋᤛᤡ ᤔᤧᤱᤄᤥ᤺ᤛᤢᤴ॥ ᤁᤢᤏᤢᤵᤔᤥ ᤏᤧᤵᤑᤢ ᤔᤏᤠ ᤗ᤺ᤴᤍᤧᤳᤇᤡᤀᤠᤱ 61 ᤐᤠ᤺ᤳᤋᤧᤳᤇᤢ. “ᤁᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤕ᤺ᤔᤠ ᤛᤢᤰᤋᤢᤱ. ᤜᤧᤰᤁᤩᤠᤱ ᤛᤢᤶᤕᤧᤴᤏᤥ ᤕᤠᤶᤔᤥ ᤆᤥ᤺ᤰᤔᤠ ᤛᤢᤰᤋᤢᤱᤗᤥ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥” 62 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤐᤥᤃᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤁᤴ ᤔᤏᤠᤜᤠ᤹ᤖᤧ ᤁᤧᤍᤰᤗᤧᤱᤘᤠᤀᤥ ᤐᤡᤖᤧᤳᤇᤢᤒᤠ ᤋᤥ᤺ᤴᤍᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤂᤧᤏᤧ᤹ ᤏᤥᤃᤵ ᤁᤧᤶᤒᤡᤖᤢᤴᤇᤡᤴᤒᤠᤒᤣ᥅” 63 ᤁᤖ ᤕᤧᤛᤢ᤺ᤴ ᤔᤧᤶᤒᤠ᤺ᤳᤋᤣ ᤕᤧᤒᤧ॥ ᤜᤧᤰᤁᤣ᤺ᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤧᤳᤋᤢ. “ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤂᤧᤏᤧ᤹ ᤀᤡᤱᤈᤠ᤺ᤱ ᤐᤡᤏᤧ. ᤛᤧᤰᤂᤠᤀᤣ ᤀᤠᤔᤧᤳᤋᤧ᤹. ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤏᤡᤱᤘᤠ᤹ᤑᤢᤛᤠ᤺ᤏᤧᤒᤡ᥅”

64 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤂᤧᤏᤧ᤹ ᤀᤠᤒᤠᤅᤣ ᤜᤧᤰᤁᤣ ᤁᤧᤒᤠ᤺ᤳᤋᤢ᤹ᤖᤥ॥ ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤋᤠ᤺ᤴᤍᤡ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤅᤠ᤹ᤒᤠ ᤏᤢ ᤛᤠᤱᤃᤪᤠᤶᤐᤣᤍᤠᤱᤅᤥᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤀᤠᤒᤠ ᤁᤧᤏᤡ᤺ᤛᤢᤶᤗᤥ॥”*ᤍᤠᤏᤡᤀᤣᤗ ᥍.᥇᥉ ᤏᤡ᤺ᤖᤧ᤹॥

65 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤠᤰᤁᤧᤴ ᤀᤥᤛᤣ᤺ᤴᤎᤠᤰᤋᤢᤛᤡᤖ ᤀᤠᤒᤠᤅᤣ ᤁᤢᤍᤣ᤺ᤳᤋᤡᤴ ᤌᤧ᤺ᤰᤂᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠ᤺ᤳᤋᤢᤖᤥ᥄ ᤀᤠᤸᤗ ᤀᤠᤏᤡ᤹ ᤘᤣ᤹ ᤋᤥ᤺ᤴᤍᤡᤜᤠ᤹ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅ ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠ᤺ᤳᤋᤢᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗᤥ॥ 66 ᤁᤴ ᤐᤠ᤺ᤴᤏᤥ ᤂᤡᤏᤡ᤹ ᤌᤣ ᤁᤧᤒᤠ᤺ᤳᤋᤢᤶ᥅”

ᤂᤢᤏᤧ᤹ ᤛᤡ᤺ᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ॥*ᤗᤧᤒᤡ ᥈᥊.᥇᥌ ᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤛᤧᤵᤔᤠ ᤁᤧᤒᤥ᤺ᤱᤒᤠ ᤘᤕᤧ॥

67 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤏᤠᤖᤠᤀᤥ ᤌᤧᤳ ᤔᤧᤎᤥ᤺ᤰᤋᤢᤖ ᤜᤢᤰᤐᤢᤳᤋᤡᤸᤗᤧ ᤔᤧᤗᤰᤋᤢ॥ ᤜᤧᤰᤁᤩᤠᤱ ᤁᤢᤓᤠᤖᤧᤃ ᤁᤢᤏᤧᤍᤧᤱᤒᤠᤴ ᤔᤧᤗᤧᤰᤂᤢᤀᤠᤱ 68 ᤀᤰᤂᤣ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤣ. ᤗ ᤀᤠᤸᤗ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧ᤹᥄ ᤂᤧᤏᤧ᤹ ᤜᤠ᤺ᤳᤗᤧ ᤁᤧᤜᤡᤵᤋᤧ᥅”

69 ᤀᤠᤸᤗ ᤐᤋᤪᤢᤛᤧᤴ ᤗᤠ᤺ᤰᤁᤠᤳ ᤗᤰᤂᤢᤶᤔᤥ ᤕᤢᤅᤧᤸᤗᤧ ᤂᤧᤵᤔᤥ ᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰ ᤑᤧᤖᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤃᤠᤗᤡᤗᤛ᤻ᤔᤠ ᤕᤧᤛᤢ᤺ᤴᤏᤢᤀᤣ ᤁᤧᤘᤕᤧᤖᤥ॥”

70 ᤁᤖ ᤐᤋᤪᤢᤛᤖᤧ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤂᤧᤴ ᤐᤠ᤺ᤴᤏᤡᤴ ᤏᤠ᤹ᤖᤢᤖ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤵᤐᤧᤴᤗᤥ᥄”

71 ᤜᤧᤰᤁᤩᤠᤱ ᤂᤢᤏᤧ᤹ ᤗᤰᤂᤢᤶᤔᤥᤗᤠᤶ ᤋᤠ᤺ᤰᤜᤴ ᤗᤧᤵᤔᤠᤱ ᤐᤣ॥ ᤂᤧᤵᤔᤥ ᤘᤣ᤹ᤛ᤻ᤔᤠ ᤛᤣᤘᤠᤖᤥᤔᤠ ᤆᤢᤰᤔᤧᤸᤗᤧ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤘᤣ᤹ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤴᤏᤠᤱ ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤴᤏᤢᤀᤣ ᤘᤕᤧᤖᤥ॥”

72 ᤐᤋᤪᤢᤛᤖᤧ ᤔᤠᤱᤜᤧᤰᤛᤡᤱᤗ ᤕᤠᤶᤔᤥ ᤂᤧᤴ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤏᤠ᤹ᤖᤢ. “ᤛᤧᤰᤂᤠᤛᤠᤱ ᤀᤡᤱᤃᤠ᤹ᤃ ᤁᤴ ᤔᤏᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ᥄”

73 ᤛᤵᤑᤠᤀᤠᤱ ᤂᤧᤵᤔᤥ ᤁᤧᤕᤧᤵᤐᤠ ᤔᤏᤠᤜᤠ᤹ ᤐᤋᤪᤢᤛᤖᤥ ᤔᤧᤒᤣᤀᤠᤱ ᤔᤧᤔᤧᤳᤋᤢ. “ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤂᤧᤏᤧ᤹ᤀᤠᤱ ᤗᤳᤌᤡᤰᤏᤧᤖᤥ. ᤌᤣᤀᤠᤱᤓᤧᤸᤗᤧ ᤁᤧᤒᤠ᤺ᤴ ᤀᤡᤰᤗᤠ᤺ᤴ ᤃᤠᤗᤡᤗᤛ᤻ᤔᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥”

74 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤕᤠᤶᤔᤥ ᤔᤠᤱᤜᤧᤰᤛᤡᤱᤗ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠ᤺ᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤡ᤺ᤀᤠᤖ॥” ᤜᤧᤰᤁᤣ ᤐᤠ᤺ᤳᤋᤢᤏᤠᤔᤧ᤺ᤴᤏᤣ ᤀᤡᤱᤘᤠ᤺ᤴ ᤁᤠ᤺ᤛᤧᤖᤥ॥ 75 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤡᤔᤥ ᤕᤧᤛᤢᤖᤧ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤏᤡᤱᤘᤠ᤹ ᤛᤢᤶ ᤗ᤹ᤖᤧ॥ ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤰᤂᤢᤶᤔᤥᤏᤢ ᤗ᤺ᤴᤍᤧ ᤐᤣᤀᤠᤱ ᤀᤢ᤺ᤰᤁᤠᤱ-ᤀᤢ᤺ᤰ ᤜᤠᤒᤧᤖᤥ॥