1 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤥᤗᤠᤶ ᤁᤧᤗ᤺ᤶᤒᤠ ᤕᤶᤒᤠ ᤀᤡᤰᤗᤠ᤺ᤸᤗᤧ ᤂᤧᤴ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡᤖ ᤕᤠᤃᤧᤒᤠ ᤂᤧᤵᤛᤢᤱ. “ᤐᤣᤃᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧᤴ ᤏᤢᤛᤡ ᤂᤥᤷᤕᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤢᤰᤂᤧᤶᤔᤧ᤹ᤀᤥ॥”

2 ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤴ ᤐᤣᤀᤠᤱ ᤁᤢᤄᤥᤷᤕᤠ᤺ᤴ ᤂᤠᤶᤒᤣ᤺ᤰᤔᤥ ᤜᤢᤰᤂᤢ. ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴ ᤁᤧᤗᤰᤐᤠ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤛᤣ ᤔᤠᤱᤃᤧᤄ᤺ᤒᤠᤜᤠ᤹ ᤕᤠᤶᤃᤧᤛᤡᤱᤒᤠ ᤏᤢ ᤛᤠ᤹ᤖᤡᤰ ᤁᤧᤍᤢᤰᤐᤠ ᤕᤠᤱᤄᤣ᤺ᤰᤁᤡᤸᤗᤧ ᤂᤢᤏᤡ᤹ ᤌᤰᤁᤡᤴ ᤛᤡᤍᤧᤵ ᤋᤧᤵᤋᤢᤖ ᤗ᤺ᤴᤍᤧᤖᤥ॥

3 ᤜᤧᤰᤁᤩᤠᤱ ᤏᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤘᤠᤜᤱᤅᤥ ᤜᤢᤰᤂᤢ. ᤜᤧᤰᤁᤩᤠᤱ ᤂᤧᤴ ᤘᤠᤜᤱᤅᤡᤱᤃ ᤁᤧᤛᤡ᤺ᤒᤠ ᤔᤏᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤡᤴ ᤜᤧᤰᤁᤣ ᤗᤧᤱᤛᤡᤱ ᤐᤣᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥ ᤁᤧᤕᤠᤰᤐᤠ ᤁᤠᤰ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤔᤧᤛᤩᤧᤖᤥ॥

4 ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤕᤱᤄᤱ ᤏᤢ ᤘᤠᤒᤢᤴᤜᤠ᤹ᤀᤥ ᤜᤢᤰᤂᤢᤀᤠᤱ ᤂᤧᤱᤜᤠ᤹ ᤔᤠᤰᤂᤡ᤹ ᤐᤥ᤺ᤰᤂᤧ ᤐᤣᤖᤥ॥ 5 ᤜᤧᤰᤁᤩᤠᤱ ᤆᤫᤠ᤺ᤳ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤳᤋᤢᤒᤠ ᤀᤡᤱᤃᤠ᤹ ᤂᤧᤵᤛᤢᤱ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤛᤣᤛᤣ ᤁᤧᤘᤕᤧ ᤜᤧᤰᤁᤩᤠᤱ ᤀᤠᤸᤗᤥᤀᤠᤱ ᤛᤣᤛᤣ ᤁᤧᤘᤠ᤹ᤖᤥ॥ ᤁᤴ ᤔᤡᤴᤍᤣ᤹ᤜᤠ᤹ ᤁᤧᤒᤠᤱᤄᤢᤀᤠᤱ ᤂᤠᤛᤧᤴ ᤁᤧᤈᤥᤃᤢᤛᤡᤸᤗᤧ ᤁᤧᤄᤠᤛᤧᤴᤏᤡᤴ ᤁᤢᤍᤥ᤺ᤵᤔᤠ ᤆᤥ᤺ᤰᤗᤥ॥ 6 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤴ ᤔᤧᤛᤧ᤺ᤛᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤠᤰᤂᤡ᤹ᤀᤡᤴ ᤌᤢᤱᤔᤠ ᤁᤧᤒᤠᤱᤄᤢᤛᤡᤖᤥ॥ ᤂᤧᤱᤃ ᤂᤧᤱᤜᤠ᤹ ᤗᤠ᤹ᤖᤢᤛᤡᤒᤠ ᤂᤢᤶᤍᤡᤱᤅᤡᤴ ᤘᤕᤧᤖᤥ॥” 7 ᤜᤧᤰᤁᤩᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤈᤥᤃᤢᤒᤠ ᤂᤠᤛᤧᤴᤏᤡᤴ ᤛᤧᤰᤂᤠᤒᤠ ᤏᤢ ᤛᤠᤶᤕᤥᤏᤡᤒᤠ ᤆᤥ᤺ᤰᤗᤥ॥”

8 ᤜᤧᤰᤁᤩᤠᤱ ᤗᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤏᤠᤶᤔᤥ ᤜᤢᤰᤂᤢᤀᤠᤱ ᤏᤠᤶᤔᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤡ᤺ᤸᤗᤧ ᤀᤥ᤹ᤔᤠᤛᤡ ᤕᤢᤰ ᤂᤥ᤺ᤛᤢᤖᤥ॥ 9 ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤠᤶᤔᤡᤸᤗᤧ ᤛᤠ᤹ᤖᤡᤰ ᤀᤥ᤹ᤖᤢᤛᤡᤸᤗᤧ ᤂᤧᤴ ᤔᤡᤴᤍᤣ᤹ᤜᤠ᤹ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤥᤏᤢ ᤔᤧᤴᤜᤡᤴᤍᤧᤴ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤔᤡᤍᤡᤱᤅᤠᤱ ᤔᤧᤶᤒᤡᤖᤢᤴᤗᤥ॥

10 ᤜᤧᤰᤁᤩᤠᤱ ᤅᤠᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤜᤠᤱᤕᤢᤰᤏᤠ ᤛᤶᤍᤠᤱ ᤜᤢᤰᤂᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤜᤠᤱᤈᤢᤶᤔᤡᤴ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧ ᤛᤡᤍᤧᤵ ᤋᤧᤵᤋᤢᤖᤥ॥ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤜᤠᤒᤧ ᤔᤧᤓᤡ᤺ᤰᤋᤧᤖᤥ॥ 11 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠᤱᤄᤣ᤺ᤰᤜᤠ᤹ ᤛᤠ᤹ᤖᤡᤰ ᤋᤢᤃᤧᤒᤠᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ॥ ᤀᤠᤸᤗᤛᤠᤱ ᤂᤧᤱᤜᤠ᤹ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤥᤏᤢ ᤔᤧᤴᤜᤡᤴᤍᤧᤴᤗᤥ॥ 12 ᤜᤧᤰᤁᤩᤠᤱ ᤋᤢᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤐᤕᤶ ᤕᤶᤒᤠ ᤕᤢᤑᤪᤣᤋᤡᤛ ᤘᤠᤜᤱᤅᤥ ᤜᤢᤰᤂᤢᤀᤠᤱ ᤂᤧᤵᤔᤥᤒᤠ ᤆᤫᤠ᤺ᤳᤋᤡᤴ ᤆᤒᤧᤒᤣᤖᤥ. ᤜᤧᤰᤁᤩᤠᤱ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤌᤱ ᤆᤥ᤺ᤰᤛᤧ ᤁᤧᤓᤧᤶᤒᤠ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤔᤠᤖᤠᤶᤔᤡᤴ ᤕᤠᤖᤡᤵ ᤐᤥ᤺ᤰᤂᤧᤖᤥ॥ 13 ᤜᤧᤰᤁᤩᤠᤱ ᤂᤧᤵᤔᤥ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ. ᤌᤰᤛᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤜᤧᤰᤁᤩᤠᤱ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤁᤢᤔᤢᤖᤠᤀᤥᤗᤠᤶ ᤛᤢᤶᤛᤡ ᤐᤍ᤺ᤰ ᤜᤧᤰᤋᤱᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤑᤧᤴᤛᤠᤶᤜᤠ᤹ ᤔᤧᤗ᤺ᤴᤍᤧᤒᤠ ᤏᤡ᤺ᤛᤢᤱᤛᤡᤱᤗᤥ॥ 14 ᤂᤧᤱᤜᤠ᤹ᤃ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤑᤧᤴᤛᤠᤶᤛᤡᤖᤥ॥ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤁᤢᤕᤧᤴᤏᤥ ᤌᤱ ᤆᤥ᤺ᤰᤛᤧ ᤂᤧᤱᤜᤠ᤹ ᤔᤧᤛᤢᤵᤛᤢ ᤔᤧᤍᤠᤖᤢᤛᤡ᤹॥

16 ᤜᤧᤰᤁᤩᤠᤱ ᤜᤡᤒᤪᤢ ᤐᤠ᤺ᤴᤍᤠᤱᤅᤥ “ᤀᤠᤖᤔᤠᤃᤧᤍ᤻ᤍᤥᤏ” ᤔᤧᤵᤔᤏᤠᤒᤠ ᤋᤧᤴᤏᤥ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤁᤠᤰ ᤜᤠᤱᤜᤠ᤹ ᤔᤧᤛᤢᤵᤛᤢᤛᤡ᤹॥

17 ᤜᤧᤰᤁᤩᤠᤱ ᤏᤢᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤛᤢᤖᤡᤳ ᤁᤣᤈᤱᤅᤥ ᤜᤢᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤜᤠᤱᤕᤢᤰᤏᤠᤗᤠᤶ ᤀᤠᤸᤗ ᤆᤢᤖᤧᤖᤥ ᤁᤧᤗ᤹ᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤋᤩᤧᤖᤥ॥ 18 ᤜᤧᤰᤁᤩᤠᤱ ᤂᤧᤵᤔᤥ ᤛᤠ᤺ᤶᤓᤣ ᤗᤧᤰᤋᤧ. ᤋᤠᤱᤛᤠᤰᤐᤧᤴ ᤂᤧᤖᤧᤱ ᤄᤢᤖᤢᤱ ᤗ᤹ᤖᤡᤰ ᤗᤥ᤺ᤰᤂᤢ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤰᤋᤱᤒᤠ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤒᤠᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤔᤧᤘᤕᤧᤖᤥ॥ 19 ᤜᤧᤰᤁᤩᤠᤱ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰ ᤒᤧᤒᤡᤗᤥᤏᤡᤴ ᤂᤧᤸᤗᤧᤰ ᤐ᤺ᤰᤂᤧᤖ ᤛᤢᤶᤛᤡ ᤗᤰᤁᤥ ᤜᤠ᤺ᤛᤡᤱᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤗᤠᤈᤣ᤹ᤒᤠ ᤕᤧᤰᤕᤰᤜᤠ᤹ ᤌᤩ᤺ᤱ ᤐᤥ᤺ᤰᤂᤧᤖᤥ॥ ᤒᤧᤒᤡᤗᤥᤏᤖᤧ ᤁᤠᤰ ᤁᤢᤗᤠᤕᤥᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡ᤺ᤳᤋᤢᤀᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤧᤴᤏᤡᤸᤗᤧ ᤁᤧᤍᤡᤶᤒᤠ ᤂᤥᤷᤕᤠᤗᤠᤶ ᤂᤧᤴ ᤌᤢᤱᤔᤠ ᤐᤠᤱᤄᤢᤖᤥ॥ 20 ᤗᤢᤵᤗᤡ ᤌᤠᤅᤧᤒᤠᤸᤗᤧ ᤆᤥᤃᤢᤸᤗᤧ ᤁᤠᤰ ᤘᤠᤃᤵᤗᤠᤈᤣ᤹ᤜᤠ᤹ ᤏᤢ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤔᤧᤔᤕᤧ ᤔᤧᤒᤣᤖᤥ॥ 21 ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤛᤶᤍᤠᤱ ᤋᤠᤱᤛᤠᤰᤐᤥᤗᤠᤶ ᤕᤶᤒ᤻ ᤕᤶᤒᤠ ᤑ᤺ᤴ ᤌᤩᤧᤖᤥ॥ ᤂᤧᤴ ᤑ᤺ᤴᤏᤡᤱᤃ ᤗᤡᤒᤥ᤺ᤱ (᥊᥆) ᤗᤡᤒᤥ᤺ᤱ ᤁᤡᤗᤥ ᤌᤠᤖᤡᤰ ᤁᤧᤗᤡ᤺ᤵᤐᤠ ᤆᤥᤃᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤃ ᤁᤴ ᤑ᤺ᤴᤏᤡᤸᤗᤧᤴ ᤔᤡᤴᤍᤣ᤹ᤀᤡᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤡᤴᤍᤣ᤹ᤀᤡᤱᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤆᤥᤃᤧᤖᤥ॥