Balʉwa wa mambwa ka nɨnɔ
Yuani
akpika ndɨ
Lɨkpʉmʉka la mambwa
Balʉwa wa mambwa nɨnɔ Yuani akpika ndɨ nɨmʉ. Yuani okpikatʉ ndɨ mbɛyɨ kɨtaɓʉ yagɔgɔ, kʉ anzɨna ndɨ mino ko bulya ɔɓɨlɨ ka Yeso ka lɨtɔmbʉ. Kɨtaɓʉ yi nɨ: «Mongoni Manza ɓɛyɔ Yuani okpika ndɨ mino.» Kumbusa wa nɨyɔ, ukpika ndɨ gɔnɨ ɓabalʉwa ɓagɔgɔ ɓaɓa.
Ka ɓongbingo ɓemoti-ɓemoti, ɓatʉ ɓagɔgɔ ɓʉɓɔgɔ ndɨ ɓambanzʉ ɓɛ Yeso-Kilisito nɨnɔ odoku ndɨ kʉnʉ ka lɨtɔmbʉ kaiko mikya ɓambanzʉ kɛgʉ Miko-Kunzi. Ɓaɓɨkyagatʉ ndɨ gɔnɨ ɓɛ mʉtʉ yɨkaka-yɨkaka akwanana kagya ɓɛyɔ aka yɔ opo mino, Kunzi kɨnɨgʉ abɛ kagya ɓʉnyɛ.
Kinili, Yuani ukpikilya ndɨ Ɓakilisito kaʉtʉmbʉlyaga ɓɛ Yeso nɨ wanɨ. Ʉɓɨkya gɔnɨ ɓɛ a lɨngʉnʉ ɓɛ ɔɓɨlɨ wa ɓɛnzɛ na ɓɛnzɛ atʉ, uwonisa ndɨ gɔnɨ pisi tino yɔ mʉmbanzʉ akwanana mino kainiso na ɔɓɨlɨ yi nɨnɔ. Pisi yi nɨ mʉtʉ wasɨ nɨnɔ aɓɨnɨkyana Yeso, inisanatʉ na ɔɓɨlɨ yi nɨnɔ. Omotiloku kaʉɓɨkya ɓambanzʉ ɓɛ okwononi kamatɨkana no Kunzi pa imoti no Mikakɨ ɓɛyɔ ka Yeso. Okwononi gɔnɨ kapa Kunzi na kaʉpa ɓakilisito ɓagɔgɔ ɓasɨ. Ɓakagya ɓɛyɔ, ɓiko lɨmbɛngɨ ɓɨdɛɛ ɓɛ ɓinisanatʉ na ɔɓɨlɨ wa ɓɛnzɛ na ɓɛnzɛ.
Yɨgbananaga ya kɨtaɓʉ yi nɨyɨ:
Lɨkpʉmʉka ko Kunzi apága ɔɓɨlɨ 1:1-4
Tokpokyonini ka ɓʉngbanganya 1:5–2:6
Mʉtʉʉ mambɨya 2:7-17
Ɓomuyoniso ka Kilisito, na ɓomiko Kunzi 2:18–3:10
Sɨpananɨsɔ luga kunu 3:11–4:21
Kopupo tutungyo ka makpʉmʉka ma lɨtɔmbʉ 5:1-21
1
Mʉnzɨna ko Kunzi apága ɔɓɨlɨ
1 Takamukpikilyo balʉwa yi nɨmʉ ko bulya Mʉnzɨna nɨmɔ apága ɔɓɨlɨ, nɨmɔ a ndɨ katʉkya ka mʉpʉnganagɨ. Tʉkanatʉ ndɨ Mʉnzɨna mi nɨmɔ, tɨna, tanda ɓizumuuu, tavɨlaga na maɓɔkʉ. 2 Ngbingo nɨnɔ ɔɓɨlɨ yi nɨnɔ ipupisa ndɨ mino, tamɨnatʉ ndɨ. Kinili, takaamalya ɓʉdɛmʉ ɓi, kamʉɓɨkyaga mongoni mi nɨmɔ ma ɔɓɨlɨ wa ɓɛnzɛ na ɓɛnzɛ. Ɔɓɨlɨ yi nɨnɔ a ndɨ pa imoti na Baba, nɨnɔ ipupisa ndɨ kusu. 3 Nɨlɔ tɨna ndɨ, tʉkana, ilu kʉwa lɔ takamʉɓɨkyaga iba wikoni gɔnɨ na yʉkanana na iɓusu. Wɨna sɛ, yʉkanana kusu a nɨyɔ ta mino pa imoti na Ɓababa no Mikakɨ ɓɛyɔ ka Yeso-Kilisito. 4 Iɓusu, takamukpikilyo lɨkpʉmʉka li nɨlɨ kyɛ magyagya kusu ogwononi ɓɨgbɨya-gbɨya.
Kunzi nɨ ɓʉngbanganya
5 Mongoni mi nɨmɔ tʉkana ndɨ na Yeso-Kilisito nɨma, imu mɔ tamʉɓɨkyaga ɓɛ Kunzi nɨ ɓʉngbanganya, kʉsɔ kakɨ, kɛgʉ gʉtʉgʉ no mikyo biti aka. 6 Takoɗongyo ambɛ ta na yʉkanana na ɨɓʉ, luki limoti kanɨ takakpakyana ko biti, takaɓɨkya ɓɔngɔ na yɨgya kusu kɛgʉ ya lɨngʉnʉ. 7 Luki limoti, takiko kakpakyana ka ɓʉngbanganya, mʉɗɔngɔnɨ ɓɛyɔ Kunzi mombukwana-dakɨ yi o mino ka ɓʉngbanganya, tiko na yʉkanana luga kusu, ɓangʉ ko Mikakɨ Yeso asʉkʉsa ɓʉnyɛ kusu ɓasɨ.
8 Takaɓɨkya ambɛ takagyagɨgʉ ɓʉnyɛ, iba takaɨɓɔ nɨ iɓusu aka, lɨngʉnʉ kɛgʉ kʉsɔ kusu. 9 Luki limoti, takatwɨlyaga Kunzi ɓʉnyɛ kusu ɓɨngbanganya, atɨpɨlyatʉ, atɨsʉkʉsa ɓʉnyɛ kusu ɓasɨ, kyɛ a wongbingbili na walɨngʉnʉ. 10 Takaɓɨkya ambɛ takagyagɨgʉ ɓʉnyɛ, iba takaitiso Kunzi mʉtʉ waɓɔngɔ, nɨyɔ akowonisilo ɓɛ lɨkpʉmʉka kakɨ kɛgʉ kʉsɔ kusu.