Moɓiso ɓɛyɔ ɓukpikilya ndɨ mino
Ɓebelenia
Lɨkpʉmʉka la mambwa
Balʉwa yi nɨmʉ ɓukpikilya ndɨ Ɓayuda ɓi nɨɓɔ ɓapʉnaga ndɨ kaɓɨɓya Kilisito. Ɓakamibigʉ mʉtʉ yi nɨnɔ akpika ndɨ. Luki limoti, lɨkpʉmʉka la ɨzangɨya a ɓɛ kyɛ akatʉkya ko Moɓiso yɔ ava mino likingyosi kauwonisilo lɨngʉnʉ. Ɓugyogyisa ndɨ ɓakilisito ɓi nɨɓɔ ɓa ndɨ ɓa mambwa kadwɛ kʉ kwa kʉ ɓakɨsa ndɨ mino kaɨsʉma. Kinili, ɓukpikilya ndɨ balʉwa yi nɨmʉ ɓɛ ɓigwinonogi yapʉ ka baya, na ɓakosonitɔgʉ pisi yi nɨyɔ.
Ka ɓʉndɛlɨ, Kunzi ʉkananatʉ ko ngbinga ɓemoti na Ɓayuda. Ʉɓɨkya ndɨ ɓɛ mʉmbanzʉ kagya ɓʉnyɛ, okwononi amwɨ nyama ko bulya apɛpɛ. Kunzi apɨlyatʉ mʉtʉ yi nɨnɔ. Balʉwa yi nɨmʉ akatʉmbʉlaga ɓɛ yʉkanana yambɨya yi nɨyɔ Kunzi obiso a ka ɓatʉ ɓi nɨɓɔ ɓaɓɨnɨkyana Mikakɨ okitogito nɨyɔ ya mambwa.
A ɓɛyɔ, nɨyɔ Yeso-Kilisito ʉgyɨlya ɓomikya-ɓambanzʉ okitogito nɨyɔ ɓamalaika, ikanɨ Musa, ikanɨ Aluni ikanɨ Yɔsʉa ɓagya ndɨ. Yeso nɔ a Mikya-kɔndɔlɔ ko Kunzi nɨnɔ okwa ndɨ ko bulya ɓʉnyɛ ka ɓatʉ ɓasɨ. Mʉtʉ yi nɨnɔ aɓɨnɨkyana Yeso, kɛgʉ ɓata na mʉsasa kapá nyama ka apɛpɛ ko bulya ɓʉnyɛ kakɨ. Luki limoti, Kunzi apɨlyatʉ ndɛkɛ ɓʉnyɛ kakɨ.
Yɨgbananaga ya kɨtaɓʉ yi nɨyɨ:
Miko Kunzi a mʉtʉ mudingi 1:1-3
Yeso a mʉtʉ mudingi kaʉkɨtaga ɓamalaika 1:4–2:18
Yeso a mʉtʉ mudingi kakɨtaga Musa ɨɓʉ na Yɔsʉa 3:1–4:13
Yeso a kumu-kumu 4:14–7:28
Yeso odoku ndɨ na yʉkanana ya kʉgʉ kakɨtaga nɨyɔ ya mambwa 8:1–9:22
Apɛpɛ ka Yeso a ɓemoti aka na a nɨnɔ wa muliɓo 9:23–10:31
Ɓatʉ ɓemoti-ɓemoti luga ka ɓatʉ ɓa baya yidingi ɓa ɓʉndɛlɨ 11:1-40
Toɓyini yɨgya ka Yeso 12:1–13:19
Malʉmba, na yuuso ya muliɓo 13:20-25
1
Kunzi ʉnzɨnɨlya ndɨ ɓambanzʉ pisi ko Mikakɨ
1 Ka ɓʉndɛlɨ, Kunzi ʉnzɨnɨlya ndɨ ɓotitosu nganga ɓɨkyɔ, na ka ɓopisi dididi pisi ka ɓogyalandʉ. 2 Luki limoti, mbɨya-mbɨya yi nɨmʉ, ka masyɛ ma muliɓo mi nɨmana to mino ma, akatɨnzɨnɨlya pisi ko Mikakɨ. Agya ndɨ ɔɓɨlɨ pisi ko Mikakɨ, abiso ɓɛ ɨyɨ nɔ ika ndɛkɛ mombukwana makpʉmʉka masɨ. 3 Miki yi nɨnɔ a ɓʉngbanganya ɓa ɨbɨba ko Kunzi, a likingyosi la lɨngʉnʉ ko Kunzi ɓɨkpɛ. Akpokyonisogo ɔɓɨlɨ ɓɛyɔ okwononi mino pisi ka mʉnzɨna kakɨ mo ngu. Nɨyɔ asʉkʉsaga ɓʉnyɛ ka ɓambanzʉ, ika kʉwa ka kʉmbanzɨkanɨkɔ ko Kunzi nɨnɔ wo Ngu.
Miko Kunzi ukitogito Ɓamalaika
4 Miki a mʉtʉ mudingi kaʉkɨtaga ɓamalaika, kinili, Kunzi apóni lino lidingi kʉgbɛ kakɨtaga nɨlɔ kaɓʉ. 5 A ɓɛyɔ, Kunzi kaɓɨkyagʉ ndɨ malaika gʉtʉgʉ ɓemoti aka ɓɛ:
«Ɨwɛ, wa mikamɨ,
na lɨsyɛ li nɨlɨ, ɨmɨ kʉwa nɨ abakʉ.»
Kanaɓikyigʉ ndɛkɛ malaika gʉtʉgʉ ɓemoti aka ɓɛ:
«Ɨmɨ, nika ndɛkɛ abakɨ,
ɨyɨ Mikamɨ.» 1:5 Wanda ka Mambʉ 2:7; 2 Samueli 7:14; 1.
6 Luki limoti, wa Kunzi a ndɨ mino katikoku Mikakɨ wa mambwa ka ɔɓɨlɨ, aɓɨkya ndɨ ɓɛ:
«Ɓamalaika ɓasɨ ko Kunzi ɓokwononi kabibiso.»
7 Aɓɨkya kʉwa ndɨ ko bulya ka ɓamalaika ɓɛ:
«Kunzi ʉgyaga ɓamalaika kakɨ kaiko abɛ muvivi* 1:7 muvivi ka Ligiliki a lɨmbɛngɨWanda ka Mambʉ104:4
ɓagya-ligubo kakɨ abɛ lɨɗaɗa lo ɓuku.»
8 Luki limoti, aɓɨkya ndɨ gɔnɨ ko bulya ko Mikakɨ ɓɛ:
«Kunziooo, ɓuliki kakʉ ɓa ɓʉngama,
a ɓa ɓɛnzɛ na ɓɛnzɛ.
Wokpokyonisa ɓʉngama kakʉ ka ɓungbingbili.
9 Wapa lɨkpʉmʉka longbingbili,
wakya nɨlɔ lanyɛ.
Kinili, Kunzi,
Kunzi kakʉ, umomosa ndɨ,
ugboɗya molingo,
ʉpʉnaga ɨwɛ aka luga ka ɓawai-dakʉ.» 1:8-9 Wanda ka Mambʉ 45:7-8.
10 Aɓɨkya ndɨ gɔnɨ ɓɛ:
«Katʉkya ka mʉpʉnganagɨ, ɨwɛ, Mombukwono-dosu nɔ wagya ndɨ ɔɓɨlɨ,
kʉgʉ wa lɨsyɛ a ligubo la maɓɔkʉ kakʉ.
11 Masɨ nɨmɔ olimikatʉ ndɛkɛ, luki limoti, ɨwɛ wika ka ɓɛnzɛ na ɓɛnzɛ.
Lɨtɔmbʉ na lɨsyɛ oɓuɓa ndɛkɛ ɓitu abɛ ɨnzanza ya kutuko.
12 Oɗukufaga ndɛkɛ abɛ ɓotu,
a ɓɛyɔ, ɓigomosyana ndɛkɛ abɛ ɓotu.
Luki limoti, ɨwɛ wika ndɛkɛ mʉɗɔngɔnɨ aka, ɔɓɨlɨ kakʉ kikigʉ ndɛkɛ na muliɓo.»
13 «Kunzi kaɓɨkyagʉ ndɨ malaika gʉtʉgʉ ɓemoti aka ɓɛ:
Wika ka kʉmbanzɨkanɨkɔ kamɨ,
kadwɛ kʉ kwa kʉ nubisa ndɛkɛ mino ɓomuyoniso kakʉ kusili wa ɓakagba kakʉ.» 1:13 Wanda ka Mambʉ 110:1.
14 Ambɛ, ɓamalaika ɓakɛgʉ mbɛyɨ asɨ mambɛngɨ nɨmɔ aka mɔ agugubyaga Kunzi? Ʉtɨkaga kausingya ɓatʉ nɨɓɔ ɓokwononi kainisono na muhukuso.