1 Mɔmɔɔ, bɛwɔni mɛ lesatsyuǝ itsyi lǝ atabi nnya bela biǝ biako lǝ bifi bisu bɛwunsǝko Onanto eto betidi ba nkpǝ lǝ Yudea eto kasɔ ǝsuǝ. Nya ɛlɛkɛ bǝ biyifo nya eto okle míntɛyi Galatiafɔ eto bafokanɔfɔ miǝ beyifo. 2 Nya lǝ Kɔsida saa Kɔsida eto diyi ǝsuǝǝ, ele bǝ utsyuǝ saa muǝ ǝsuǝ utsyǝ ku lesa nǝ woofo boko itsyi lǝ lesa nǝ ofo bunyǝ ǝsuǝ bǝ yembusu iyifo bǝ bako oko ǝmǝ lekolɛwɛ lǝ lefe nǝ mínkǝ míndufǝ mi ɔflɔ mfó. 3 Nya lǝ mbǝ ndufǝǝ, mɔɔwɔni kukue nkpe lǝ betidi ba bilǝkǝ lǝ kɔni, ko boofi balɛ bayɛnko ku mi ǝtǝsa nnya befi bantɔnko lǝ Yerusalem. 4 Nya lǝ ɛlɛkɛ bǝ mintsya suu, nyalɛ bonko mǝ ebɔyɛ busu.

5 Mɔɔyɛ Makedonia fɛ mooyo mi ɔflɔ, itsyise ele bǝ nyɛ mfó fɛ lǝ mbǝ. 6 Iyifo mɛ fe muudi eyi asiani lǝ mi ɔflɔ mfó. Ditsyuǝ mɔɔkɛ lǝ mi ɔflɔ ku lɛyɔ lefe. Lǝ nnya kamaa, biɔwunsǝko mɛ lǝ mɔ kusuyɛyɛ ǝsuǝ kesu kaka ke elǝ bǝ nsu. 7 Manla miǝ maakpɔ mbǝ nyɛ mi ɔflɔ ete. Bomuu, moola miǝ maakɛ lǝ mi ɔflɔ itǝ lefe sɛkɛ ditsyuǝ lǝ Bonamute ǝtǝ mɛ kusu nko.

8 Mɔɔkɛ lǝ Efeso mfo isu ese lǝ Pentekoste eto diyi ǝsuǝ. 9 Kusu sɛɛ asini mɛ tinti lǝ mfó, bǝ nyifo keyifo ka nkpe kutǝkǝ tinti, ite bǝ betidi ba ńyǝ mɛ lǝ ǝsuǝ fui itsyi lǝ keyifo ka meeyifo ǝsuǝ eso.

10 Lǝ Timoteo ǝbǝ udufǝ mi ɔflɔɔ, bebe biǝ befo wǝ kukɔnɔ. Itsyise Bonamute eto keyifo tsya ete ɔnlɛ buyifo fe mɔ ke. 11 Yanle bǝ mi kuutsyuǝ saa ńyǝ wǝ lǝ ǝsuǝ ubu wǝ sikpefi. Bomu befo wǝ, lǝ bɛwunsǝko wǝ bǝ lǝ wǝ kusu bɔyɛ ǝsuǝ ku diyuǝ bǝ lǝ usi usinkli ubǝ mɔ ɔflɔ buɛɛ. Itsyise nlɛ wǝ kusu bobe miǝ wǝ usinkli ubǝ ku bo bayimisani lefo banɔ.

12 Mɔmɔɔ itsyi lǝ bɔyimi Apolo eto etiki ǝsuǝǝ, mbɔlɛ wǝ kola kekleke miǝ ubǝ mi ɔflɔ ku wǝ bayimi bǝtsyuǝ. Fɛɛ woantɔnɔ tɔ nkǝ wǝǝbǝ lǝ lefe nǝmfo ǝsuǝ tɔ. Fɛɛ mfo nnɔ miǝ lǝ lefe ǝtǝ wǝ kusu koo, wuubǝ.

13 Bitǝkǝ ǝnǝ, lǝ bińyǝ kekleke lǝ mi bofokanɔ ǝsuǝ. Bekpe utu lǝ binyǝ kekleke. 14 Nya biyifo mi keyifo saa ku lelabi.

15 Biyi Stefana ku wǝ diyo eto betidi. Mǝ ni betidi tutɛ ba lɛtsyi bawuninsǝ báfo bánɔ lǝ Akaia eto kasɔ eto lekpake mfó. Nya béfi mǝ ǝsuǝ bǝtǝkawunsǝko mba eto ǝsuǝ bákpasǝ. Mɔ bayimi, nlɛ mi lekpakpa minkǝ 16 bitǝ kusu faa batɔnkotɔnko bamfo ku babamba ba laawunsǝko mǝ lǝ mǝ keyifo lǝ batɔnko mi.

17 Yiafo mɛ disuǝyuǝ bǝ Stefana ku Fortunato ku Akaiko ǝbǝ bedufǝ, nya eyifo mɛ fe mi ini minyǝ. 18 Bǝtǝ bǝ insi nyǝ ǝsuǝale fe kase bákpe mi ǝsuǝale. Nya betidi bamfo eto oklee, inyǝ bǝ bitǝ mǝ dibu sitinti nɛ.

19 Bafokanɔfɔ ba nkpe lǝ Asia eto kasɔ eto lekpake mfo kenke bǝ bǝǝsiǝsǝ mi! Akwila ku Priskila ku mǝ mbaa laatsya lǝ mǝ diyo bǝ bǝǝsiǝsǝ mi kukɔnɔ lǝ Bonamute eto diye ǝsuǝ. 20 Bo bayimi ba nkpe mfo kenke bǝ bǝǝsiǝsǝ mi o-o!

Bɛbuta bǝtsyuǝ lǝ bisiǝsǝ bǝtsyuǝ fe bayimi lala.

21 Mɔ, Paulo kosate, dífi mɔ kɔni minlɛ nyamfo bɔwɔni kǝsiǝsǝ mi. 22 Utsyuǝ saa wǝ laanla Bonamutee, yoole wǝ lǝ ǝsuǝ. O Bonamute, bǝ!

23 Bonamute Yesu eto lefonǝ lǝ disiǝko mi. 24 Mfi mɔ lelabi tinti nlɛ mimblɛ kenke butǝ lǝ Kristo Yesu eto diye ǝsuǝ. Ibǝ itǝ.