1 Nya fǝ, mɔ ubi, kpe nkɛale ɛyɛ lǝ Onanto eto lefonǝ nǝ úfi útǝ bo bǝ bookpe lǝ lɔniyifoyifo ku Kristo Yesu ǝsuǝ. 2 Nya lǝ asa nnya fánɔ bǝ nte lǝ betidi kpǝ eto ǝnǝmii, nko kǝ ele bǝ fintsya fi akpe lǝ betidi ba léfobanɔ eto ani bǝ lǝ befi besu bate betidi bamba tsya. 3 Ńyǝ kekleke lǝ kanyi ǝsuǝ fe kase omamanyǝ sɛɛ lǝǝńyǝ, ǝtǝ Kristo Yesu. 4 Omamanyǝ wǝ ńyǝ sitinti itǝ wǝ keyifoo, woola nkǝ wǝ eyifosa lǝ ekpe wǝ uninǝ disuǝyuǝ. Nyaso woǝnsiǝmbufi ani okpe lǝ betidi ba lenni bamamanyǝ eto asa nnya beeyifo ǝsuǝ. 5 Nko ini nɛ bǝ fɛ nwǝ leetsyetsyi lǝ udi ututɛɛ, ele bǝ uyifo lǝ afi nnya baakpe ǝsuǝ kukɔnɔ. 6 Ɔkuɛmfo wǝ leeyifo keyifo ku otsyekle lǝ wǝ ɔkuɛɛ, wǝ ni futsyǝ laaka wǝ bidikǝ bia budi nɛ. 7 Bu disi lǝ etiki nnya minlɛ fǝ bɔtɛyi mfo kenke laabe, itsyise nyi minkǝ Bonamute ebutǝ anɔ nyamblɛ kenke kasɔ.

8 Kloma Yesu Kristo wǝ ni Oka David eto ufluflu wǝ Onanto létakasǝ úńyǝnsǝ utsyi ɔkɔmǝ úbǝ fe kase Ditiki Sɛɛ nǝ minlɛ bɔtɛyi mfo nlɛ bote. 9 Nnlɛ kanyi bunyǝ lǝ Ditiki Sɛɛ nǝ maatɛyi eso. Nya bakpe mɛ lǝ amana kulaa tsya fe utidi wǝ leeyifo asa bua. Fɛɛ Onanto eto etiki alɛɛ, bǝmbofo ni kusu buti! 10 Lǝ nyamfo eso maafo lesa saa akamini itǝ Onanto eto betidi ba ukǝlǝkǝ utsyǝ esoo, bǝ lǝ mǝ tsya lǝ bǝnyǝ bofo bo ɛyɛ lǝ Kristo Yesu mate ǝsuǝ lǝ bɔyɛ lǝ nnya ǝsuǝ bunyǝ nkpǝ manlo eto disuǝyuǝ.

11 Ɔnukualɛ uni baatɛyi bǝnkǝ,

14 Kaklomasǝ mǝ asa nyamfo nya lǝ ǝkǝ mǝ ato kekleke lǝ Onanto eto ǝnǝmi bǝ lǝ bayɛ etiki bunǝ. Itsyise kasɛɛ saa aambɔ le nya ǝsuǝ. Bomu asa nyamfo ǝtǝ bǝ yaabiasǝ mba laanɔ nya. Mǝ bofokanɔ ebɔyuɛ. 15 Lɛ fǝ ǝsuǝ kukɔnɔ lǝ kusu saa ǝsuǝ bǝ lǝ Onanto utǝ fǝ kayofofo sɛɛ. Yifo fǝ keyifo kukɔnɔ bǝ kofani lǝ kɔyɛ fǝ bɔlɛ. Bomu yifo utidi wǝ laate Onanto eto Ditiki Sɛɛ nǝmǝ lǝ ɔnukualɛ kosate ǝsuǝ.

16 Lǝkǝ fǝ ǝsuǝ etsyiko lǝ akuɛntiki ku asa bimba bɔtɛyi ǝsuǝ. Itsyise betidi ba leeyifo asa nyamfo eto oklee, yǝǝlǝkǝ mǝ nsusu ketsyiko lǝ Onanto sikpibote ǝsuǝ famfamfa. 17 Asa nyamfo eto okle bote ale lefabe nǝ leenkpǝ nǝ laanyi kpitikpitikpiti. Nya betidi inuǝ ba léte asa nyamfo eto kakle ni Himeneo ku Fileto. 18 Banya kusu itsyi lǝ Ditiki Sɛɛ nǝmǝ eto ɔnukualɛ ǝsuǝ, nya banlɛ bafokanɔfɔ eto nsusu bobiasǝ katɛyi bǝnkǝ botaka ketsyi ɔkɔmǝ kǝbǝ nkpǝ eto lefe ébubǝ éfe. 19 Fɛɛ Onanto eto diyo eto leba nǝ ǝsuǝ óse ofati úńyǝnsǝǝ, ni nsi ńyǝ. Nya leba nǝmfo ǝsuǝǝ, ɔ́wɔni etiki nya lǝǝbǝ mfo nkǝ, “Bonamute yi betidi ba ni wǝ bale nya,” nya “Utidi wǝ laatɛyi nkǝ ɔlɛ Bonamute busumuu, ele bǝ usinkli lǝ asa bua buyifo kama.”

20 Lǝ diyo kplɛ saa, kedikpɛ akpa akpa lǝǝtsyǝ mfo. Befi sika sia béyifo kǝtsyuǝ kǝtsyuǝ ku sika flubia. Nya kǝtsyuǝ tsya sitǝ beefi baato kǝ fɛ nka baawoe tsya nkpe. Beeyifo kakpɛ kamfo lǝ esu esu ǝsuǝ, kǝtsyuǝ itǝ eyi sɛɛ eto budi eto keyifo. Nya kǝtsyuǝ tsya itǝ diyi saa eto keyifo buyifo. 21 Nyaso lǝ utidi utsyuǝ ǝlǝkǝ wǝ ǝsuǝ utsyiko lǝ asa bua ǝsuǝ nya uyifo wǝ ǝsuǝ kɛnkɛɛ, ofo koya utǝ Bonamute fenkǝ kakpɛ ka baalɔ bǝǝtsyǝ itǝ eyisɛdidi. Itǝ bǝ boofo wǝ bufi itǝ keyifo sɛɛ saa buyifo.

22 Lǝkǝ fǝ ǝsuǝ etsyiko lǝ bakosobi eto alasa bimba butǝkǝko ǝsuǝ. Nya yifo lesa saa lǝ kusu sɛɛ ǝsuǝ, lǝ ǝsiǝ bofokanɔ eto nkpǝ sɛɛ, lǝ akala betidi, nya lǝ ǝsiǝ nkpǝ kpoo ku mǝ lǝ diyuǝ ǝsuǝ. Yifo asa nyamfo ku mba nsi nkoǝ sɛɛ, laato ola ku ketu ka lekpa bǝ ɔwunsǝko mi. 23 Lǝkǝ fǝ ǝsuǝ etsyiko lǝ ebukitiki ku etiki bimba budi ǝsuǝ, itsyise kǝdiǝ ete asa nyamfo eto oklee, lǝǝnǝ kaboko. 24 Nya yanle bǝ Bonamute eto usumunyǝ, lǝ ukǝdiǝ kǝdiǝ. Bomu ele bǝ ukǝyifo kafoɛkpɛ kǝtǝ utsyuǝ saa, udi oteasa sɛɛ, nya uyifo utidi wǝ diyuǝ. 25 Nya betidi ba laataka kǝnyǝ lǝ Ditiki Sɛɛ nǝmfo ǝsuǝǝ, ele bǝ ofo asa kasɔ bulǝkǝ kate mǝ ku utu buɛɛ. Nya ditsyuǝ Onanto ebutǝ nkǝ batsyi lɛkɔɛsi bawuninsǝ lǝ bafo Ditiki Sɛɛ nǝmǝ. 26 Lǝ nyamfo ǝsuǝǝ, mǝ nsusu ebɔsini bǝ lǝ bani Obonsam wǝ dífi mǝ úyifo mba leyifo wǝ lelabi ǝsuǝ.