1 Kristo ǝlǝkǝ bo nkǝ lǝ busiǝ lǝ bo ǝsuǝ ǝsuǝ. Nyaso bińyǝ kekleke, biǝntǝ lǝ banyinkǝ mi bakpe lǝ kasɔ bǝ lǝ bisi befiani ndomufɔ bio.

2 Bɛnɔ nyamfo! Mɔ, Paulo, nlɛ mi bɔtɛyi minkǝ lǝ bítǝ bála mi leloo, nyaalɛ bíenyǝ kutǝkǝ saa lǝ Kristo ǝsuǝ. 3 Nsi nlɛ mi ato bukǝ bio minkǝ, utsyuǝ saa ke lɔɔtɔnɔ bala wǝ lelo, nyaalɛ usi ufi kɔfi koko komǝ okle ǝsuǝ nya ele bǝ uyifo lǝ ko ǝsuǝ. 4 Mimba nlɛ bokplatsya biǝ bieyifo basɛɛ lǝ Onanto eto ǝnǝmi lǝ buyifo lǝ kɔfi komǝ ǝsuǝǝ, te biǝ bílǝkǝ mi ǝsuǝ bitsyiko lǝ Kristo ǝsuǝ. Nya biensi embunyǝ Onanto eto lefonǝ bio. 5 Bo alɛɛ, bo kusubebe ni bǝnkǝ Onanto ebuyifo bo basɛɛ lǝ wǝ ǝsuǝale ǝsuǝ itsyise bófo Onanto eto Lɛwɔnɔ nǝmǝ ɛyɛ lǝ bo bofokanɔ ǝsuǝ. 6 Lǝ buyifo bani ku Kristo Yesuu, bála utsyuǝ lelo o-o, bánla o-o, yenyifo kulesa. Lesa nǝ nso bofe ete ni bofokanɔ bo nyɛ lǝ bo bǝtsyuǝ eto lelabi ǝsuǝ.

7 Kɔɔ békakplatsya tinti. Owoe díti mi kusu nkǝ bientsyue ɔnukualɛ ǝmǝ koto? 8 Inni Onanto wǝ lékpadi mi oboko lɛtsyi mi nsusu ɔwuninsǝ nko. 9 Ǝyǝnkisǝsa sɛkɛ ete baakpe lǝ nnamfowɔwɔ ǝsuǝ fɛ boataka. 10 Mifo nnɔ miǝ Bonamute ebutǝ nkǝ boensiembofo kuutsyuǝ bamba saa eto nsusu enso mɔ nle hã. Nya nwǝǝ ke nlɛ mi nsusu bɔtsyi kawuninsǝ tsyaa, Onanto ebunǝ wǝ koto kokooko. 11 Mɔ bayimi, lǝ nnya ete minsi minlɛ letsya bobe kate betidi miǝ ele bǝ bala lelo kokooko, beso bensi banlɛ mɛ kama bɔti? Lǝ nko ini, nyalɛ mɔ letsyabebe itsyi lǝ Kristo eto ukpǝ lǝ uyikabie ǝsuǝ emboboko bulǝ saa nkpǝ. 12 Nla miǝ eni betidi ba nlɛ mi nsusu bulǝ bokpe sukosǝ sɛtɔ, lǝ bǝkǝ ǝsuǝ kula tsya ko ete lǝ elo!

13 Mɔ bayimi, bokpadi bákpadi mi báboko bǝ bibǝ bisiǝ lǝ mi ǝsuǝ ǝsuǝ. Fɛɛ mi busiǝ lǝ mi ǝsuǝ ǝsuǝǝ, menyifo kusutǝtǝ itǝ mi abuayifoyifo. Bomuu, ele bǝ bifi nnya lǝ mi bǝtsyuǝ bɔwunsǝko lǝ lelabi ǝsuǝ. 14 Itsyise kɔfi komǝ eto nnya kɔnlɛ bɔtɛyi kenke ete ni bǝnkǝ, “La fǝ ɔyimitsyuǝ fe kase faala fǝ ǝsuǝ.” 15 Fɛɛ bekpe kobe kukɔnɔ bǝ lǝ bɛlɛ asafimfi buyifo bǝtsyuǝ, kǝmuǝ bǝtsyuǝ kayimii, nyalɛ biǝbǝ bǝtsyuǝ bɔtsylɔsǝ kalosǝ.

16 Nya minlɛ mi bɔtɛyi ni nkǝ bitǝ lǝ Onanto eto Lɛwɔnɔ lǝ lete mi kase biusiǝ nkpǝ, lǝ itǝ bǝ bɛyɛ bɔyɛ lǝ utidi eto ditsyǝbi eto asa nnya yǝǝnǝ utidi kakpe ǝsuǝ. 17 Itsyise lesa nǝ utidi eto ditsyǝbi laala, ńyǝ lǝ lesa nǝ Lɛwɔnɔ laala ǝsuǝ nya lesa nǝ Lɛwɔnɔ tsya laala, ńyǝ lǝ lesa nǝ utidi eto ditsyǝbi tsya laala ǝsuǝ. Asakpa ǝnuǝ nyamfo eyifo balo lǝ bǝtsyuǝ ǝsuǝ, nnya eto kasɔ ni bǝnkǝ biembofo lesa nǝ ke biala buyifo. 18 Lǝ Lɛwɔnɔ nǝmǝ nyɛnko mii, ete bǝ binsibǝ lǝ kɔfi komǝ kalɔ.

19 Lesa nǝ utidi eto ditsyǝbi leeyifo akpa wuee. Diate ni ditsyǝbi lǝ sɛnɔdi, asinsa yifoyifo ku akuɛnsa yifoyifo, 20 lǝ bǝfiǝ kpakpa ku lǝ sɛsilolo ǝsuǝ. Kolo tsyǝtsyǝ ku ndiǝ diǝdiǝ, kǝnǝnsɛ ku kafo nyinsǝnyinsǝ ku mɔ ale hã lǝ ɛlɛkɛ ǝsuǝ. Nyamfo eesensǝ betidi ku etsyukpa eto nti 21 yǝǝtǝ kǝnǝminsɛ, sitekpe ku disuǝyuǝ bimba nyǝnyǝ ku nyamfo eto kakle. Nlɛ mi kɔlɛ bɔlɛ lǝ nyamfo ǝsuǝ fe kase mínkakabɔtɛyi lǝ lefe nǝ léfe mǝ miǝ betidi ba leeyifo asa nyamfo eto kaklee, embunyǝ kedikɔ lǝ Onanto eto sekakedikɔ!

22 Fɛɛ Lɛwɔnɔ eto asa nnya laabɔ ketsyi ni ǝsuǝ ni lelabi ku disuǝyuǝ ku diyuǝ, disuǝtsyǝ ku kafoɛkpɛ ku lɛlɛkɛsǝ ku asayifoyifo lǝ kusu sɛɛ ǝsuǝ 23 ku ǝsuǝ kasɔ bobokosǝ ku ǝsuǝ bumuǝ kalɛ. Kɔfi saa ǝmbǝ ńyǝ lǝ asa nyamfo ǝsuǝ. 24 Nya mba ni Kristo Yesu eto balee, ébɔsɔ lǝ uyikabie ǝsuǝ mǝ ǝsuǝ eto sinǝ eto ditsyǝbi ku nnya laalɛ mǝ ɔkɔɛ kǝnǝ mǝ kakpe lǝ lebua ǝsuǝǝ, bálo. 25 Nya se ini Lɛwɔnɔ nǝmǝ ǝsuǝ bɔnyɛ bunsi nkpǝǝ, nyalɛ bitǝ lǝ busiǝ nkpǝ lǝ Lɛwɔnɔ nǝmǝ eto lelabi ǝsuǝ. 26 Biǝntǝ lǝ bobesǝ bo ǝsuǝ kato, nye bunyǝ ɔblɔ bokpe bǝtsyuǝ, nye bɔsɛsǝ ǝnǝmi lǝ bǝtsyuǝ ǝsuǝ.