HEBRIFƆ
Kukue Ko Báwɔni Bǝtǝ Hebrifɔ
1
Onanto Eto Ditiki Ɛyɛ Lǝ Wuubi Ǝsuǝ.
1 Koko lefee, Onanto édi bo banamǝ etiki sesia sesia sesia, nya lǝ esu kpǝ ǝsuǝ tsyaa, ɛyɛ lǝ wǝ bǝnyɛlǝkǝtidi ǝsuǝ. 2 Fɛɛ lǝ eyi fɛfɛ nyamfo ǝsuǝǝ, údi bo etiki ɛyɛ lǝ wǝ Ubi ǝsuǝ. Wǝ ǝsuǝ Onanto lɛyɛ úyifo kawunsiǝ, nya wǝ ni nwǝ Onanto dílǝkǝ nkǝ udi wǝ bikǝ kenke nɛ. 3 Ubi ǝmfo dílǝkǝ Onanto eto diyǝnde óte nya Onanto eto ditsyǝbi tututu nkpe wuntsya. Nya úfi Onanto eto Ditiki Sɛɛ kplɛ nǝmǝ úmuǝ kawunsiǝ kenke ɔnlɛ. Se úflǝ bo abua kenke úwii, úsu úsiǝ lǝ Onanto, Ǝsuǝalenyǝ Kenke, eto kodiani kato.
Onanto Eto Ubi Eto Sɛkplɛ.
4 Onanto eyifo wǝ ubi ɔkplɛ enso wǝ batɔnkpe, fe kase wǝ diye nǝ Onanto dítǝ wǝ nso mǝ lele.
5 Itsyise Onanto mántɛyi wǝ batɔnkpe eto kuutsyuǝ saa nkǝ,
“Fɛ ni mɔ Ubi.
Mmii, minle fǝ.”
Nye Onanto mántɛyi itsyi lǝ wǝ ɔtɔnkpe saa ǝsuǝ nkǝ,
“Muudi wǝ Anto,
nya wuuyifo mɔ Ubi.”
6 Fɛɛ lefe nǝ Onanto léla nkǝ woatsyese wǝ Ubi tutɛ kawunsiǝ kamfoo, ɔ́tɛyi nkǝ,
“Onanto eto batɔnkpe kenke ebusumu wǝ.”
7 Fɛɛ Onanto átɛyi lǝ wǝ batɔnkpe ǝsuǝ nkǝ,
“Onanto eeyifo wǝ batɔnkpe fe ufiebi,
nya wǝ kato eto besumunyǝ bamfó fe ute eto kadiakami.”
8 Fɛɛ Onanto átɛyi itsyi lǝ wǝ Ubi ǝsuǝ nkǝ,
“Onanto, fǝ sekakedikɔɔ, kalosǝkɔ embɔkɛ lǝ se kulefe kulefe!
Fǝ sekakedidi lǝ fǝ betidi ǝsuǝ ebuyi ku kasɛyifoyifo.
9 Aala kasɛyifoyifo nya feekisi kabuayifoyifo.
Nyamfo eso Onanto, fǝ Onantoo, dílǝkǝ fǝ,
nya úfi disuǝyuǝ nǝ nso nǝ útǝ fǝ bayɛtsyuǝ kenke útǝ fǝ.”
10 Usi ɔ́tɛyi nkǝ,
“Fǝ, Bonamute, fǝ ni nwǝ taa kasɔ ketsyikokɔ díyifo kasɔ,
nya féyifo kato ku fǝ kosate eto ani.
11 Asa nyamfo kenke ebubǝ efe. Fɛɛ fǝ ebubu akɛ lefe saa.
Asa nyamfo kenke ebobia isensǝ fe kase mfia laala kafiani afianku.
12 Ebukǝnǝ nnya fe kase bǝǝkǝnǝ awu ku mfia itǝ bofloma.
Fɛɛ fǝǝ, nko ete fuutsyǝ nɛ, embofloma,
nya fǝ nkpǝ embolo kulefe.”
13 Nte ɔtɔnkpe wǝ Onanto lɛtɛyi nkǝ,
“Siǝ lǝ mɔ kodiani, isu ese lefe nǝ muufi
fǝ balo nkpe fǝ kalɔ bafiani nnya ǝsuǝ fuutǝkǝ akpa”?
14 Nyalɛɛ, bawoe ni kato eto batɔnkpe fɛ? Mǝ ni awɔnɔ nnya leesumu Onanto nya woakpe mǝ atɔ nkǝ besu bawunsǝko mba ele bǝ bafo lǝ nkpǝ manlo.