3
Yesu Eto Kǝńyǝnkɔ Kpe Kalende Kaso Moses Eto Kale.
1 Mɔ bayimi lala lǝ Kristo ǝsuǝ, mi mba Onanto tsya lékpadi! Bibu Yesu bebe, nwǝ Onanto létsyese nkǝ ubǝ ofiani Usumunyǝ Ninǝ Kenke lǝ bofokanɔ bo bonkpe ǝsuǝ. 2 Úyifo wǝ keyifo lǝ kusu ǝsuǝ útǝ nwǝ dílǝkǝ wǝ nkǝ uyifo wǝ keyifo fe kase Moses díyifo asa lǝ kusu ǝsuǝ lǝ wǝ keyifo ǝsuǝ lǝ Onanto eto diyo. 3 Beefi dibu kǝtǝ nwǝ léto diyo kaso diyo nǝ báto kosate. Nko ke Yesu nkpe dibu kplɛ enso Moses nɛ. 4 Itsyise diyo saa kpe ni otonto. Fɛɛ Onanto ni nwǝ léto lesa saa. 5 Moses éyifo uyifoyifo ɔnukualɛnyǝ lǝ Onanto eto diyo. Nya ɔ́tɛyi asa nnya ǝsuǝ Onanto luubǝ udi etiki utsyiko lǝ lefe nǝ luubǝǝ, ɔ́tɔnsǝ. 6 Fɛɛ Kristo eyifo ɔnukualɛnyǝ fe Onanto eto Ubi wǝ nsi lǝ Onanto eto diyo eto kɛnyɛ. Bo ni wǝ diyo nǝmǝ nɛ, lǝ bokpe utu nya bofo bɔnɔ kekleke lǝ nnya ǝsuǝ bɔnlɛ kusu bobe.
Ɔwɛkǝtsyǝkɔ Kpe Itǝ Onanto Eto Betidi.
7 Nnya Lɛwɔnɔ Kɛnkɛ lɛtɛyi nkǝ,
“Lǝ bɛnɔ Onanto eto ɔkɔɛ mmii,
8 bientidi ato
fe kase ítsyǝ lǝ mi banamǝ eto lefe,
nya bátaka bǝńyǝ mɛ lǝ ǝsuǝ fe kase báto mɛ bábe lǝ mfiminti mfó.
9 Mfó nya báto mɛ bábe, lǝ babe lesa nǝ muuyifo,
ite bǝ bǝnyǝ asa nnya mínyifo lǝ alɛ fosi ana ǝsuǝ.
10 Lǝ nnya eso nnyǝ ɔblɔ nkpe betidi bamǝ.
Nya míntɛyi minkǝ, ‘Baamfo mɛ akanɔ,
nya baani beentsyue mɔ afi koto.’
11 Lǝ nyaso kafo ányi mɛ nya mínka ntamu míntɛyi minkǝ,
‘Bembudufǝ kasɔ ka eni míntǝ tǝ mǝ ɔnwɛkǝtsyǝkɔ kulefe!’ ”
12 Mɔ bayimi bafokanɔtsyuǝ, bebe sinini biǝ mi nti eto kuutsyuǝ ǝmbɔkɛ lɛkɔɛsi bua nya wǝmbɔkɛ bofokanɔ bǝ wǝǝmbɔtsyi kama okpe Onanto wǝ nsi nkpǝ. 13 Bomuu, bɛlɛ mi bǝtsyuǝ kɔlɛ diyi saa fe kase Mmii ǝmǝ báwɔni bákpe lǝ Awɔnisa Kɛnkɛ eto Kukue ǝsuǝ leka mi. Lǝ itǝ bǝ biǝmbɔwɛ mi ǝsuǝ bekpe lǝ lebua lǝ befiani mba ditidi ato.
14 Itsyise buyifo bani ku Kristo lǝ bɔlɛ bo bofokanɔ lǝ kɔni kekleke isu ese lǝ kalosǝkɔ fe kase bútsyiko kasɔ. 15 Awɔnisa Kɛnkɛ eto Kukue átɛyi nkǝ,
“Lǝ bɛnɔ Onanto eto ɔkɔɛ mmii,
bientidi ato
fe kase ítsyǝ lǝ mi bana mǝ eto lefe,
nya bátaka bǝńyǝ lǝ Onanto ǝsuǝ.”
16 Bawe ni betidi ba lɛnɔ Onanto eto ɔkɔɛ nya bátaka bǝńyǝ lǝ wǝ ǝsuǝ? Mba kenke Moses lékpa ɔ́yɛnko utsyiko Egipte eto kasɔ ǝsuǝ.
17 Nya bawoe Onanto dínyǝ ɔblɔ ókpe itǝ alɛ fosi ana sɔ̃ɔ̃? Mǝ ni betidi ba díyifo lebua ba díkpǝ lǝ mfiminti. 18 Bawoe ǝsuǝ Onanto léka ntamu ɔ́tɛyi nkǝ, “Kulefe, bembudufǝ kasɔ ka ǝsuǝ eni míntǝtǝ mǝ ɔnwɛkǝtsyǝkɔ.” Bawoe ɔnlɛ? Mba létaka bǝńyǝ wǝ lǝ ǝsuǝ. 19 Bunyǝ boǝ lǝ nnya eso bámfo kasɔ kamǝ budufǝ, itsyise bámfo banɔ.