8
Yesu Ni Bo Usumunyǝ Ninǝ Kenke.
1 Nnya kenke bɔnlɛ bɔtɛyi ete ni bǝnkǝ, bokpe Usumunyǝ Ninǝ Kenke ǝmfo eto okle, wǝ nsi lǝ Ɔkplɛnyǝ Kenke eto lekankpomɛ eto kodiani lǝ kato. 2 Usumunyǝ Ninǝ Kenke ǝmfo eesumu lǝ kakɛnkɛkɔ ka ni Disumuyo tinti ka Bonamute díyifo, inni betidi díyifo.
3 Bǝtsyǝ Usumunyǝ Ninǝ Kenke saa bǝ lǝ ufi ǝtǝsa saa ku bebuki utǝ Onanto. Nyaso ele bǝ bo usumunyǝ tsya kɛ lesaatsyuǝ nǝ uufi utǝ kedi. 4 Nya lǝ kasɔ mfo ete onkpee, eni wǝ ǝmbuyifo usumunyǝ, itsyise besumunyǝ ba lǝǝtǝ kedi lǝ Yudafɔ eto kɔfi eto kusuu, fe bakpe koko. 5 Keyifo ka beeyifo fe besumunyǝ mfo eyifo nka nte beeyifo lǝ Onanto eto kato eto koyo ete.
Nko esoo, lǝ lefe nǝ Moses nkǝ woato disumunyoo, Onanto lɛtɛyi wǝ nkǝ, “Be fǝnkǝ eyifo ni lekateko ku ditsyǝbi nǝ báte fǝ lǝ kɔtini ǝsuǝ.” 6 Fɛɛ mɔmɔɔ, bǝtǝ Yesu kesumu eto keyifo ka ntǝkǝ mǝ kale kato, fe kase kɛnyɛklekle ka útsyue lǝ wǝ betidi ku Onanto eto ntii, alɛkɛ kaso nka kɔ, itsyise wǝ kɛnyɛtsyǝtsyǝ eto asa alɛkɛ eso asa nnya nkpe lǝ nka kɔ.
7 Lǝ nya ete kulesa dimambia lǝ kɛnyɛklekle tutɛ kamǝ ǝsuǝ, eni yensife itǝ kǝnuǝfǝ kamfo. 8 Fɛɛ Onanto ǝnyǝ kabua lǝ wǝ betidi ǝsuǝ se ɔ́tɛyi nkǝ,
“Lefe lɛ bubǝ se mɔ, fǝ Onamutee,
lookle kɛnyɛ fɔfɔ
ku Israel eto betidi
ku Yuda eto betidi.
9 Kɛnyɛklekle kamfo embutsyǝ fe nka
mínkle ku mǝ bana mǝ,
lǝ lefe nǝ mínkɔbe mǝ minlɛ lǝ kɔni
nya mínkpa mǝ mímbɔnko lǝ Egipte eto kasɔ.
Itsyise béntsyue mɔ kɛnyɛklekle kamǝ koto.
Nyaso míntsyi kama mínkpe mǝ nɛ.
Mmǝ Bonamute nlɛ bɔtɛyi nɛ!
10 Mɔmɔɔ, nyǝ kɛnyɛ ka mookle ku Israel eto betidi
lǝ lefe nǝ lǝǝbǝ mǝ.
Muufi mɔ kɔfi nkpe mǝ lǝ mǝ nsusu kǝmiǝ.
Nya mɔɔwɔni ko nkpe lǝ mǝ ketu kǝmiǝ.
Muuyifo mǝ Onanto,
nya mǝǝ tsya ebuyifo mɔ betidi.
11 Nya mǝ kuutsyuǝ ensi embote wǝ utsyuǝ kulesa
nye wǝ ɔyimitsyuǝ tɛyi nkǝ bete Bonamute ǝmǝ.
Itsyise mǝ utsyuǝ saa ebote mɛ
idu lǝ dikpefi isu ese lǝ uninǝ ǝsuǝ.
12 Nya muufi mǝ abua nnya kenke béyifo ntsyɛ mǝ.
Nya mensiembokloma mǝ abua nya béyifo kulefe.”
13 Se Onanto lídi etiki utsyiko lǝ kɛnyɛklekle fɔfɔ ǝsuǝǝ, ete kasɔ bǝ nka kɔ eyifo kakoko. Nya lesa saa nǝ lefiani lekoko nǝ lesibǝ kutǝkǝǝ, ǝmbɔklɛ fɛ dionya kenke.