5
Lesamubi Nǝmǝ Áfo Kukue Ko Bǝkǝnǝ Mfó.
1 Nyamfo eto kamaa, nnyǝ kukue kutsyuǝ ko bǝkǝnǝ ko nwǝ nsi lǝ lekankpomɛ ǝsuǝ nlɛ lǝ wǝ kodiani. Báwɔni asa lǝ ko lekpake nǝ ku nnɛ, nya béfi sitǝ eto etinsa beti ko kɛnyɛ lǝ akpa akuanse. 2 Mfó mínyǝ Onanto eto ɔtɔnkpe kplɛ utsyuǝ wǝ léto ɔkɔɛ bembembe ɔ́tɔ nkǝ, “Owoe ni nwǝ dińyǝ utǝ bǝ ufǝ sitǝ eto etinsa siamǝ lǝ ɔsini kukue komfo?” 3 Fɛɛ bǝnnyǝ kutsyuǝ saa lǝ kato lee kasɔ lee lǝ ɔkɔmǝ wǝ loofo kukue komǝ bɔsini lǝ obe ko kafo. 4 Nwi keku tinti se bámfo kutsyuǝ saa bunyǝ wǝ díńyǝ utǝ bǝ umǝnkli ko lǝ okla.
5 Mfó ǝmǝ nya beninǝ bamǝ eto ɔni lɛtɛyi mɛ nkǝ, “Mensiwi keku. Bee! Yesu wǝ baakpo Tsyata wǝ lɛbɔ utsyi lǝ Yuda eto kusǝ, ɔkplɛnyǝ wǝ ni Oka David eto ufluflu, wǝ dítǝkǝ kato, wǝ dińyǝ utǝ bǝ ɔsini sitǝ eto etinsa akpa akuanse nya béfi béti kukue komǝ eto kɛnyɛ nɛ.”
6 Lǝ nnya kamaa, nnyǝ Lesamubi nǝ nńyǝ lǝ lekankpomɛ nǝmǝ eto ntinti, nya asa ana nnya nsi nkpe mfó ǝmǝ létsyilama wǝ ku beninǝ bamǝ. Nya íyifo fe bolo bálo lesamubi nǝmǝ. Aakpɛ akuanse ńyǝ ni lǝ disi ku ǝnǝmi akuanse, nya ni Onanto eto awɔnɔ akuanse nnya bátsyese kawunsiǝ kamǝ kenke. 7 Lesamubi nǝmǝ ésu ófo kukue ko nwǝ nsi lǝ lekankpomɛ nǝmǝ nlɛ lǝ wǝ kodiani. 8 Kase ófo kukue komǝǝ, asa ana nnya nsi nkpe nyamǝ ku beninǝ fosiǝnuǝ ena bamǝ ákpo kasɔ lǝ lesamubi nǝmǝ eto ǝnǝmi. Mǝ utsyuǝ saa lɛ osanku ku sika eto ɔkpɛ lǝ kɔni. Kakpɛ kamǝ éyi ku lufui nnya ni Onanto eto betidi ba lefo banɔ eto olatoto. 9 Bése kusǝ fɔfɔ ko nlɛ bɔtɛyi nkǝ,
“Aflɔ ǝtǝ bǝ afo kukue komǝ,
nya bǝ lǝ efe sitǝ eto etinsa ekuanse sia nti lǝ kukue komǝ eto kɛnyɛ.
Itsyise bálo fǝ,
nya ɛyɛ lǝ fǝ ǝsuǝ bufi kǝtǝ kedi eto ukpe ǝsuǝǝ,
áfó betidi kpǝ eto disi eto kayo ǝtǝ Onanto.
Betidi bamfo etsyi ese ese, bele bele, nsɔ nsɔ, ku kawunsiǝ eto betidi kenke.
10 Éyifo mǝ báfiani besumunyǝ eto sekakedikɔ ba leesumu bo Onanto,
nya boodi seka lǝ kasɔ kamfo.”
11 Nya se minsi mímbe, nnyǝ kato eto batɔnkpe akpi, akpi ku awo, awo ba lǝmbǝ leklabii, ńyǝ batsyilama lekankpomɛ nǝmǝ ku asa ana nnya nkpe nkpǝ nyamǝ ku beninǝ bamǝ. 12 Nya banlɛ ese busǝ bembembe bǝnkǝ,
“Lesamubi nǝ bálo ǝńyǝ ditǝ bǝ,
lɛkɛ ǝsuǝale, setabikɛ, kobe, bofobuyifo,
dibu, diyǝnde ku atɛsǝ.”
13 Nya mínɔ se asa nnya kenke Onanto díyifo nkpe kato ku kasɔ mfo, kasɔ kǝmiǝ ku lekpo kafo ku asa nnya kenke nsi nkpǝ nlɛ ese busǝ katɛyi nkǝ,
“Nwǝ nsi lǝ lekankpomǝ ǝsuǝ ku Lesamubi nǝmǝ,
mǝ mbǝ atɛsǝ, dibu, diyǝnde ku ǝsuǝale idu manlo isu manlo.”
14 Nya asa ana nnya nsi nkpǝ léfo bátanɔ bǝ, “Ibǝ itǝ.” Nya beninǝ bamǝ lékpo lǝ kasɔ, nya bésumu Onanto ku Lesamubi nǝmǝ.