18
Yohanes Ánɔ Nkǝ Bába Babilon.
1 Lǝ nyamfo eto kamaa, nńyǝ Onanto eto ɔtɔnkpe bamba utsyuǝ wǝ ditsyi kato ɔnlɛ kasɔ bubǝ. Okpe ǝsuǝale tinti nya wǝ diyǝnde díyǝnde lékpo lǝ kawinsiǝ kenke ǝsuǝ. 2 Ófa bembembe ɔ́tɛyi nkǝ,
“Óba o-o! Babilon wǝ léfo diye sitinti nso aba kenke!
Ófiani awɔnɔ bua kenke eto ɔkplɛ eto kabiɔkɔ.
Mfó nya baklɔbɛ bua saa eto okle ba bendi kenke nsi nɛ.
3 Itsyise kawunsiǝ eto betidi kenke
ǝnǝ wǝ nte bo nkpe ale ini nnya wǝ sɛsɔnɔdidi eto lebua dínǝ éboko.
Kawunsiǝ eto baka álabeko wǝ,
nya kawunsiǝ eto mba laasa asi léfiani batabinyǝ ɛyɛ lǝ wǝ setsyetɔ kekleke siamǝ ǝsuǝ.”
4 Nya minsi mínɔ ɔkɔɛ bamba ditsyi kato nlɛ bɔtɛyi nkǝ,
“Mɔ betidi, bɛbɔ lǝ umǝ ǝmǝ bibǝ!
Bǝ lǝ bɛyɛ wǝ abua nnya ɔnlɛ buyifo buyifo.
Kase biǝmbɔkɛ lekpake lǝ kotonǝnǝ ko luubǝ lǝ wǝ betidi ǝsuǝ.
5 Itsyise wǝ abua etsyue itǝkǝ lǝ ǝsuǝ itǝ bǝ ísu ítidi taa kato,
nya Onanto laakloma wǝ esu bua nyamǝ.
6 Biyifo wǝ fe kase wuntsya díyifo mi eto kɛnyɛ.
Tisǝ wǝ oko sinuǝ lǝ nnya úyifo mi eto kɛnyɛ.
Lɛkɔbe nǝ kafo békuti nte bo nkpe ale bǝtǝ fǝǝ, kuti ni sinuǝ ǝtǝ wǝ.
7 Bitǝ lǝ unyǝ kanyi,
lǝ ɔkɛ lǝ lɛwɛnlo ǝsuǝ fe kase inyǝ itǝ,
lǝ wǝ kɔlɔkɔ kekleke ku nkpǝ minimini bo údi ǝsuǝ.
Itsyise wǝǝsiǝ katɛyi wǝ ǝsuǝ nkǝ,
‘Besio eto Oka mini mfo.
Minni ɔkɔsiǝ nya membusiǝ nkewi keku kulefe!’
8 Mmǝ eso bule bo ni kanyinyǝnyǝ ebutu wǝ diyi lɔni.
Wuudufǝ lǝ kanyi ka ni bufi,
ukpe ku kukpɛnsɛ kplɛ ǝsuǝ.
Itsyise Bonamute Onanto wǝ laakponko wǝ lekpoo eyifo ǝsuǝalenyǝ.
9 “Lǝ kawunsiǝ eto baka ba dídinko wǝ sɛsɔnɔ, nya bédi nkpǝ ku wǝ ǝńyǝ ute wǝ nlɛ wǝ botonsǝ eto kuyuǝ ko nlɛ botakaa, boofa bewi nku bǝtǝ wǝ. 10 Boonyǝ kɔsɛsɛ ke lǝ sikpe sia dímuǝ mǝ lǝ kanyi ka bǝnyǝ ɔnlɛ bunyǝ esoo, batɛyi bǝnkǝ,
‘Mbɔbuɛ! Mbɔbuɛ!
Umǝnkplɛ Babilonia!
Lebombosɔsɔ lɔni ete béfi bǝnǝ fǝ koto mǝ!’
11 “Mba laasa asi kplɛ ba nkpe lǝ kasɔ kamǝ tsya éwi nku bǝtǝ wǝ, ílǝ mǝ itǝ wǝ itsyise kuutsyuǝ saa ensianya fǝ bike. 12 Kuutsyuǝ saa anya mǝ bike bia ni sika sia ku siflubia, atsyabi ku aba nnya lefo koya, mfia sia, nkufia ku mfia bo lǝǝyǝnde, eyi akpa akpa eto kakle ku nnya laanyi fififi, ku asa nnya béfi atonyi ku eyi nnya lefo koya, bitu ku situnaa ku aba nnya lefo koya béyifo tsya. 13 Nya ɔklɔ eto bike bamba nsi ni diyikpe nǝ laanyi fififi baakpo sinamɔn ku asa fififi ate ate nnya beefi keyifo ɔklɛ. Nuǝbi bo laanyi fififi, uyudu ku lifui, nte ku nnuǝ, bloblo eto nnamfo ku edisa, batobuki ku banantsyui, batɔmini ku nkenke kplɛ bo leetsyi bike, ndomufɔ ku betidi ba buufi bǝtǝ kedi kulaa tsya.
14 “Mba laasa asi átɛyi bǝnkǝ, ‘Babilonia! Asa sɛɛ nnya fábɛbɛ fǝtǝ ǝsuǝ, nnya lɛbɔ fǝ lǝ ani mmǝ nɛ. Fǝ setabikɛ ku sisuǝlɔ tsya ánya, ensiebunyǝ nnya kulefe.’ 15 Mba laasa asi ba léfiani batabinyǝ ɛyɛ lǝ biketete ǝsuǝǝ, ebuńyǝ kɔsɛsɛ famfamfa itsyise báte sikpi bǝ bofo lekpa lǝ wǝ kanyi ka ǝsuǝ. Boofa nya buwi kamisǝ ku batǝyi bǝnkǝ,
16 ‘Mbɔbɔɛ! Mbɔbuɛ, umǝnkplɛ wǝ lefo diye.
Umǝ wǝ bálɔkɔsɛ ku mfia flubia ku nsia eto aflanka,
nya bálɔkɔsɛ wǝ ku sika sia ku aba ku atsyabi nnya lefo koya ni nwǝmfo nɛ.
17 Fɛɛ lǝ lebombosɔsɔ lɔni kama, setabi siamfo kenke áfiani abiabia!’
“Ntu eto efue eto beninǝ kumba nyɛ kusu lǝ ntu ǝsuǝ, mba laaka ntu eto efue ku mba laasa asi lǝ ntu eto efue ǝsuǝ ǝkǝnǝ bǝńyǝ kɔsɛsɛ. 18 Nya báfá ku keku se bǝnyǝ umǝ ǝmǝ nlɛ ute bunyǝ eto kuyuǝ, nya bátɛyi bǝnkǝ, ‘Umǝnkplɛ saa mensikɛ tɔ wǝ lekateko nwǝ mfo!’ 19 Mfó bákpa utembu bákpo lǝ mǝ esi, béwi kaminsǝku bátɛyi sitinti bǝnkǝ,
‘Mbɔbɔɛ, mbɔbɔɛ boǝtǝ umǝ wǝ lefo diye mfo.
Wǝ ni umǝnkplɛ wǝ efue kplɛ
nnya laayɛ lǝ lekpo ǝsuǝ eto basate lɛyɛ bakɛ atabi ɛyɛ lǝ wǝ setabikɛ ǝsuǝ.
Nya lǝ lebombosɔsɔ lɔni ǝsuǝǝ, áfiani umǝbaba.
20 O mimba nkpe kato kenke, binyǝ disuǝyuǝ.
Binyǝ disuǝyuǝ mi Onanto eto betidi kenke ku wǝ bǝnyɛlǝkǝtidi ku Kristo eto batɔnkpe!
Itsyise Onanto ákponko wǝ lekpo ólo wǝ dikpi lǝ nnya úyifo mi eso!’ ”
21 Lǝ nyamfo eto kamaa, nńyǝ Onanto eto ɔtɔnkpe wǝ nkpe ale utsyuǝ dítsyi kobansǝ kplɛ kutsyuǝ nya óto ko ókpe lǝ lekpo katɛyi nkǝ,
“Mmǝ ke booto Babilonia eto umǝnkplɛ ǝmǝ basɔ lǝ kasɔ bembembe,
nya bensiembunyǝ wǝ bio kulefe nɛ.
22 Nya bensiǝmbɔnɔ kasanku, katlowoe ku nkpatsyaku eto
kɔsɔ lǝ fǝ kulefe!
Bensiembunyǝ ani eto kɔsi eto uyifoyifo saa lǝ fǝ bio.
Nya bensimbɔnɔ ǝkuǝ saa eto kɔsɔ lǝ fǝ bio.
23 Bensiembunyǝ kakandiɛ eto buyǝnde lǝ fǝ bio.
Nya bensiembɔnɔ kusiǝkpakpa eto ese tsya lǝ fǝ.
Fǝ mba laasa asi ni bǝsuǝalenyǝ kenke lǝ kawunsiǝ,
nya ɛyɛ lǝ fǝ kasayifoyifo ǝsuǝ fawɛ kawunsiǝ eto betidi kenke fakpe!
24 Bǝnǝ Babilonia eto umǝ koto itsyise bǝnyǝ Onanto eto bǝnyɛlǝkǝtidi ku Onanto eto betidi
ku mba kenke bálo lǝ kasɔ mfo
eto kɔtɔ ko bákpo lǝ kasɔ mfo eso!”