1 Makasososan, au oke ei hule–haladoi fee basa hataholi la. Ei miu masale Manetualain, na, hule fo Ana tulu–fali basa hataholi malai toꞌa–taa kala dale. Ma moke makasi, huu Ana tao malole soaneu sila basa sala. 2 Hule–haladoi leondiak boe, fee basa mane kala, ma basa malangga nala. No leondiak, ita basa nggata tasoda ndondoo, tungga Manetualain hihiin. Ita boe tasoda nandaa to hataholi mana makaluku–makatelek neu Ndia. 3 Hule–haladoi mata leondiak tao namahoko Manetualain dalen, de Ana simbok no malole. Ndia ndia, fee sodak neu ita. 4 Ana nau, fo basa hataholi la hambu sodak, ma bubuluk dedeꞌak bee ndia tetebes. Fo ndia:

Nandaa no ndia fain, Manetualain buka ledo-ledo Hala Malole ndia, fo nafada basa hataholi la. 7 Boe ma Ana hele nala au so, fo dadik neu Ndia hataholi nadedenun, suek au laꞌok uu afada hataholi ta Yahudi la, sudi lai bee, ma anoli sala fo suek lamahele Lamatuak Yesus boe, ma lasoda tungga dala ndoos. Hata fo au afadak ia, tetebes leondiak. Au ta pepeko.✡2 Timotius 1:11

8 Au hihiing leoiak: nai sudi bee mesan, mete ma ei makabubua fo hule–haladoi, na, ei dale mala musi malole esa no esa. Boso mahinda nasak esa no esa. Boso masisimbo bafak. Mete ma soꞌuk limak fo hule–haladoi, na, ei dale mala musi malalaok.

9-10 Leondiak boe, neu ina kala. Au nau fo ala heti lala ao-ina nala no malole, ma ala pake baloꞌa-papakek nandaa. Boso tao heo-hiluk, fo tao hataholi la pasak mata nala leu sala, huu ala pake langga buluk namata-ao mata-mata kala, do ala pake baloꞌa mabeli fo ta kalela hadak, do heo-hiluk lena-lenak pake lilo mbilas-lilo fulak, ma mutiara la. Te mana tao ina kala ala dadik manaꞌa hiak, na, sila dale nala malalaok, ma tao kada dedeꞌa malole. Ndia nandaa no inak mana makaluku–makatelek neu Manetualain.✡1 Petrus 3:3 11 Mete ma salani kala lakabubua fo lamanene nanonolik, na, ina kala tungga heti–heuk boe fo pasa ndiꞌidook neulalau, fo lamanene tebe–tebe nanonolik ndia. Boso ala lakukutuk, ma boso langgilo. 12 Tungga au, na ta nandaa ina kala ala sosoꞌuk aok fo palenda tou kala, ma lanoli sala. Malolenak ina kala, kada ala bendoo. 13 Huu Manetualain nakadadadik Adam nakahuluk. Basa ndia, bei fo Hawa.✡Tutuik laꞌeneu Sososan 2:7; 2:21-22 14 Ma nitu la malanggan ta kedi nakahuluk Adam, tehuu inak dei. Mulai neme faik ndia mai, hataholi laꞌolena Manetualain heti–heun.✡Tutuik laꞌeneu Sososan 3:1-6 15 Tehuu leo mae leondiak boe oo, ina kala bisa hambu masodak, huu ala bonggi anak. Sadi lamahele tebe-tebe neu Karistus, lasueao, lasoda lo dale malalaok, ma lasoda lo mandaan.*Hataholi mana malelak laꞌeneu Susula Malalaok lae hambu nakandandaak telu laꞌeneu “ina kala bisa hambu sodak, huu sila bonggi anak”. Ndia: 1) hambu Kakanak esa, fo ndia Yesus, fo mana soi dalak suek basa hataholi la bisa hambu sodak; 2) Hawa nana kedi nalak de ana tao salak, tehuu ndia boe oo ana dadik neu basa hataholi la bein; 3) inak fo nasoda nandaa tana mate neu faik ana bonggi anak (tehuu nakandandaak katelun ia ta matea)