16
Timotius nakabubua no Paulus ma Silas
1 Basa ndia boe ma, Paulus ala laꞌo lakandoo lakahuluk leni kota Derbe leu. Boe ma ala laꞌok lakandoo seluk leni kota Listra leu. Nai ndia latonggo lo taꞌe-anak esa, naꞌde Timotius. Aman, hataholi Yunani, ma inan ina Yahudi, fo namahele neu Yesus so. Timotius boe oo, ana daꞌdik Yesus hataholin. 2 Basa hataholi kamahele kala manai Listra, ma kota Ikonium, ala bubuluk Timotius ndia, hataholi neulauk. 3 Paulus ana nau fo Timotius ana tungga sala. Tehuu, hambu hataholi Yahudi nai ndia, ana bubuluk Timotius aman hataholi Yunani, de ndia bei tana sunat tungga haꞌda Yahudi. Huu ndia, de Paulus noke hataholi fo ala sunat Timotius.*Paulus ana bubuluk nae, hataholi bei tana sunat, na taa bole neni hataholi Yahudi la uma huhule-haladoin dalek neu. Mete ma Timotius ana nau fali Paulus, fo ana tui-bengga Yesus Tutui Malolen neu hataholi Yahudi la, na, ana musi sunat dei. No leondiak, na lofoanak ana kalua-maso neni hataholi Yahudi la lalaꞌdan neu.
4 Basa ndia, boe ma ala laꞌok leme mamanak esa leni mamanak esa leu, fo lafaꞌda Lamatuak Yesus hataholi nadedenu nala, ma lasi-lasi salani kala nakeketun neme Yerusalem. 5 No leondiak, boe ma ala tao latetea hataholi kamahele kala dale nala. Tungga-tungga faik hataholi kamahele kala boe lamanoꞌu.
Paulus neni Makedonia neu
6 Basa ndia, boe ma ala laꞌo lakandoo. Ala leni nusa Frigia leu ma nusa Galatia, huu Lamatuak Dula Dale Malalaon ana kaꞌi sala, fo boso leu tui-bengga Lamatuak Tutui Malolen, nai nusa Asia. 7 Faik fo ala losa nusak esa, fo natoo no nusa Misia, de ala sangga soꞌba leni nusa Bitinia leu. Te Yesus Dula Dalen ana kaꞌi sala, fo boso ala ele leu.†Hatematak ia, nusa-nusak fo makahulun ele, lae, Frigia, Galatia, Asia, Misia ma Bitinia basa sala lai Turki. 8 Boe ma ala laꞌok lesik nusa Misia, de ala losa kota Troas.
9 Leꞌodaen ndia, Manetualain ana fee Paulus nita sama leo nai meꞌis dale. Nita hataholi esa nambadeik nai tasi selik, nai nusak esa, naꞌde Makedonia. Hataholi ndia nanggou noke tulu-falik nae, “Ama aa! Muni ia mai, fo fali mala ai dei!” 10 Paulus nita leondiak, boe ma ai‡Nai tutuik ia, ala mulai pake ‘ai’ nai ia, huu Lukas ana nakabubua no Paulus asa lai ia. Lukas ndia, ana sulak susulak ia. maketun ai mini Makedonia miu. Ai duduꞌa mae, Manetualain ndia nadenu, fo ai miu tui-bengga Ndia Dala Soꞌdan, neu hataholi manai tasi selik ele. Huu ndia, de Ana kaꞌi ai, fo taa bole mini mamana feꞌek miu.
Ina Lidia namahele Lamatuak Yesus nai kota Filipi
11 Basa boe ma ai saꞌe ofak mima kota Troas mai, de ai mini pulu kadiꞌik esa, naꞌde Samotrake. Foꞌa mai, boe ma ai mia ofak ndia makandoo losa kota esa, naꞌde Neapolis. De ai konda mima ndia. 12 Neme ndia mai, ai laꞌok tungga maꞌdalai mini kota inahuuk esa, naꞌde Filipi. (Filipi ndia, na kota inahuuk nai nusa Makedonia, fo mana palenda Roma boe oo, ana toꞌu koasa nai ndia.) Ai leo faik hiꞌda mima ndia.
13 Nandaa no hataholi fai hahae ue-leꞌdin, de ai sangga hataholi Yahudi la uma huhule-haladoin. Ai makandandaak mamana huhule-haladoik ndia, neu ko nai lee bifin. De ai laꞌo kalua taa dook mima kota ndia mai, losa ai hambu lee esa. Ai matonggo mia inak hiꞌda, lakabubua lai ndia, fo ala hule-haladoi.§Tungga heti-heuk, na musi hambu tou Yahudi sanahulu, bei fo tao uma huhule-haladoik esa. Ala taa hingga ina kala. De, huu hambu inak luma ala hule-haladoi nai lee Ganggites bifin, de ai bubuluk, nai kota Filipi, tou Yahudi kaꞌda lumak. De ai manggatuuk makokola mia sala. 14 Nai basa ina kala sila, hambu esa naꞌde Lidia. Ndia neme kota esa dook nai nusa Asia, naꞌde Tiatira. Inak ia, ana seꞌo tema mbila balanggeok, fo belin ana seli, soaneu hataholi inahuu kala. Ana manggate hule-haladoi neu Manetualain. De leꞌdoeik namanene Paulus kokolan, boe ma ana simbo tuti kana.
15 Boe ma ai salani tutik ina Lidia no uma isi nala. Salani basa, boe ma ana noke ai nae, “Ama nggalei! Mete ma ei mae au ia amahele teꞌbe-teꞌbe neu Lamatuak Yesus, na ei mai leo tataak neu au umang dei.” Ana kokoe nakandoo, boe ma ai tunggan.
Ala landee Paulus no Silas leni bui dale leu nai kota Filipi
16 Faik esa, fo leꞌdoeik ai bei laꞌo-laꞌo mini uma huhule-haladoik miu, boe ma ai matonggo mia inanak esa neme dalak. Ndia ia hataholi atan. Inanak ia nitu nalak, losak ana bisa nafaꞌda hataholi la ua-nale nala. Ndia boe oo, ana bisa bubuluk dedeꞌak huu-okan suꞌdi neme bee mai. De, hataholi la noꞌuk kala lateme feen doik, fo loken ana mete sila ua-nale nala. Tehuu doi kala sila, inanak ndia lamatua nala ala hambu basan, de ala daꞌdik lamasuꞌi. 17 Faik ndia, fo leꞌdoeik ai belaꞌo, te inanak ndia tungga-tungga no ai nakandoo. Boe ma nanggou nae, “Hataholi la ia Manetualain, fo Manakoasa Inahuuk ata nala ia. Ala mai fo latuꞌdu dalak lae talobee fo hataholi bisa hambu soꞌdak, ma lakamboꞌik leme sala-singgo nala mai!”
18 Inanak ndia ana tao leondiak losa faik hiꞌda. Doo-doo, boe ma Paulus ana mbela namanene inanak ndia, nanggonggoun ndia. De Paulus ana heok nasafali, de nakabubulak matan neu inanak ndia, boe ma ana palenda nae, “Heeh! O nitu manggalauk! No Lamatuak Yesus koasan, au palenda o, kalua muma inanak ia mai, hatematak ia boe!” Paulus nakokola nateꞌe, boe ma nitu ndia ana kalua tutik.
19 Leꞌdoeik fo inanak ndia malangga nala bubuluk sila atan ndia mopo koasan so, boe ma ala luli, huu ala tala hambu doik so. Boe ma ala toꞌu lala Paulus no Silas de ala hela loo sala leni pasak leu, nai mamanak fo hataholi la lateme paken neu laketu dedeꞌak. 20 Nai ndia langgou tingga-tingga lae, “Hataholi la ia, ala tao lakalulutu ita kotan. Naa te sila hataholi taa manai iak. Hataholi Yahudi la ia leme dook mai fo ala tao seseꞌbok nai ia! 21 Ala lanoli hataholi la boe lae, ita boso mbali mana palenda Roma heti-heun, te tungga kaꞌda sila heti-heun.”
22 Lamanene leondiak, boe ma hataholi noꞌu kala ala manggalau, de leu mbomboko Paulus no Silas. Boe ma hambu malanggan esa nai ndia, nadenu hataholi la sii heni Paulus no Silas baloꞌa papake nala, ma ala filu sala. 23 Ala filu lakamiminak Paulus no Silas. Boe ma ala landee sala leni bui dale leu. Ala fee malangga bui mana maneak nai ndia, nanea teas neu kadua kala sila. Boso losak lalai. 24 Lamanene leondiak, boe ma malangga soldadu mana maneak nai ndia, ana kena sala leu kama esa, nai bui ndia lalaꞌdan. De ana kaꞌbi ei nala nenik ai kakaꞌbi eik.
25 Meꞌda fatilaꞌda, boe ma Paulus no Silas ala hule-haladoi, ma ala soꞌda koa-kio Manetualain. Hataholi bui seluk manai ndia kala, lamanene sila sosoꞌdan ndia boe. 26 Kaꞌda nggengge neuk, dae nanggeꞌo nalan seli, losa basa uma bui ndia boe oo nanggeꞌo. Ma lelesu nala latahukak benggaa. Boe ma basa hataholi bui la tali besi nala, mboꞌi heni kasa.
27 Leꞌdoeik ndia, malangga mana maneak nai uma bui ndia ana nggengge, de ana foꞌa te nita uma bui lelesu nala basa sala benggaa. Nita leondiak, boe ma nae hetuk basa hataholi bui la ala lalai leu fuik so. De ana feꞌa nala felan, fo ana sangga hala aon. 28 Tehuu Paulus nanggou natingga ma ana kaꞌin, nae, “Wei! Ama aa! Boso hala aom! Te ai basa nggai bei nai ia, bou!”
29 Namanene halak ndia, boe ma malangga mana maneak ndia, ana bii nalan seli, ma nakandaa. Boe ma nadenu neni feen mbele, de nalai neni bui ndia dalek neu, ma aon ana dele mbuse makasufuk. Boe ma neu sendek neu Paulus no Silas ei nala.
30 Boe ma noo sala kalua leme bui dale mai, de natane sala nae, “Ama nggalei. Au toꞌa alan seli. Au musi tao hata, fo suek au akamboꞌik uma totoꞌak ia mai?”
31 Paulus asa lataa lae, “Dalan leo iak: o mamahele neu Lamatuak Yesus, dei fo Ndia fee o soꞌdak. Leondiak boe neu o uma isi nala.” 32 Boe ma Paulus no Silas lakokola lo malangga bui ndia, ma basa ndia uma isi nala. Lafaꞌda Lamatuak Yesus Dala Soꞌdan neu sala. 33 Seli fatilada fa, boe ma malangga bui ndia no Paulus ma Silas, de ana tao nalalao sila hina nala, fo afik nana filu laꞌek. Basa boe ma ala salani malanggan ndia no basa ndia uma isi nala. 34 Boe ma noo sala leni ndia uman dale leu, de ana fee sala laꞌa. Ndia no kaꞌa-faꞌdi nala basa sala lamahoko lalan seli, huu lamahele neu Manetualain.
35 Foꞌa fafain, boe ma hataholi inahuu nala fo mana maketu dedeꞌa kala, fee halak neu malangga bui ndia, fo ladenu mboꞌi heni Paulus asa leme bui dale mai.
36 Namanene leondiak, boe ma malangga bui ndia nafaꞌda heheluk ndia neu Paulus nae, “Ama nggalei! Hataholi inahuu nala laketun so, fo mboꞌi heni ei. De ama sala miu leo no soꞌdak.”
37 Namanene leondiak, de Paulus tana nau simbok. Boe ma nafaꞌda hataholi nana, nadenu kala sila, nae, “Boso leondiak, te ai ia hataholi Roma. De, ai moke ai hak! Mana palenda musi ala tao ai dedeꞌan tungga heti-heuk. Tungga teteꞌben, na musi nadedeꞌa dei, bei fo huku hataholi. Tehuu ala taa tao leondiak. Tala tao dedeꞌak dei, fo sangga bubuluk ai salan hata, naa te lambue fo filu lakamiminak ai, neu hataholi noꞌuk matan. Taa hambu natoꞌok esa boe, te landee ai mini bui dala miu. Ia ala lena leꞌdo-leꞌdo mana palenda Roma heti-heun so. Boe ma hatematak ia, ala kalua lafufunik ai mima bui dale mai, fo suek hataholi la tala bubuluk, lae, ai sala hata. De taa bole leondiak! Fee malangga nala sila ala mai matan, fo ala mboꞌi heni ai. Leondiak bei fo ai simbok.”
38 Leꞌdoeik fo hataholi nananadenu kala sila leu lafaꞌda, Paulus kokolan ndia, boe ma malangga nala sila, bei fo ala bubuluk kadua kala sila laena hak hataholi Roma. De ala bii lalan seli. 39 Boe ma hataholi inahuu nala sila leni bui dale leu, de loke doꞌo neu Paulus ma Silas. De ala kalua dua sala leme bui dale mai, boe ma loke fo dua sala laꞌo ela kota ndia. 40 Ala kalua leme bui dale, boe ma Paulus asa leni ina Lidia uman leu. Ala lakabubua lo hataholi kamahele kala lai ndia. Ala lanoli sala ma tao latetea dale nala laꞌi esa seluk. Basa ndia, boe ma ala laꞌo ela kota ndia.
*16:3 Paulus ana bubuluk nae, hataholi bei tana sunat, na taa bole neni hataholi Yahudi la uma huhule-haladoin dalek neu. Mete ma Timotius ana nau fali Paulus, fo ana tui-bengga Yesus Tutui Malolen neu hataholi Yahudi la, na, ana musi sunat dei. No leondiak, na lofoanak ana kalua-maso neni hataholi Yahudi la lalaꞌdan neu.
†16:7 Hatematak ia, nusa-nusak fo makahulun ele, lae, Frigia, Galatia, Asia, Misia ma Bitinia basa sala lai Turki.
‡16:10 Nai tutuik ia, ala mulai pake ‘ai’ nai ia, huu Lukas ana nakabubua no Paulus asa lai ia. Lukas ndia, ana sulak susulak ia.
§16:13 Tungga heti-heuk, na musi hambu tou Yahudi sanahulu, bei fo tao uma huhule-haladoik esa. Ala taa hingga ina kala. De, huu hambu inak luma ala hule-haladoi nai lee Ganggites bifin, de ai bubuluk, nai kota Filipi, tou Yahudi kaꞌda lumak.