Paulus susulan
fee hataholi kamahele kala malai kota
Kolose
1
Paulus mulai ndia susulan
1 Soda-molek neme au mai, Paulus. Manetualain mesa kana hele nala au, fo dadik neu Yesus Karistus hataholi nadedenun. Nai ia boe, ita tolanoon Timotius fee ei soda-molek.
2 Au sulak susulak ia fee ei, fo Manetualain hataholi nala malai kota Kolose, fo mana tao nakandoo Yesus Karistus dala sodan.
Ai moke Manetualain, fo ita Aman, natudu Ndia dale malolen neu ei, fo suek ei masoda no mole-dame ma ndondoo.
Paulus hule-haladoi fee hataholi kamahele kala malai Kolose
3 Tungga-tungga ledoeik, ai hule-haladoi nai ia fee ei, de ai moke makasi neu Manetualain, fo ndia ita Lamatuan Yesus Karistus Aman. 4 Huu ai mamanene dedeꞌak noꞌuk laꞌeneu ei namahehelem neu Yesus Karistus, ma laꞌeneu ei susuem ma dale malolem neu basa hataholi kamahele kala. 5 Ei tao leo ndiak, huu ei bubuluk dedeꞌa malole la, fo nana mbedak fee ei nai nusa-sodak. Dedeꞌa kala ia, ei mamanene mitak fo ndia Manetualain Hala Malolen ndia, 6 fo hataholi neu nafada ei neme makahulun mai so. Hala Malole ndia nana tui-benggak sudi nai bee so, nai daebafok ia, ma hambu buna-boa malole, huu ana tao nasafali hataholi sodan dadik malole. Ei sodam dadik malole leo ndiak, mulai neme fai sososan ei mamanene Hala Malole, ma bubuluk tebe-tebe Manetualain dale malolen.
7 Ei manoli dedeꞌak ia neme kaꞌa Epafras so, fo ndia ai nonoon tao ues fo ai suek. Huu ana manggate nakalalaꞌok nakandoo Karistus uen nai ei laladam.✡Kolose 4:12; Filmon 23 8 Ana tui ai nai ia laꞌeneu ei susuem, fo Manetualain Dula Dale Malalaon fee ei so.
9 Huu ndia de, mulai neme makasososan mai, ai mamanene laꞌeneu ei, ai hule-haladoi makandondoo henin fee ei. Ai moke Manetualain fo ei bisa malelak tebe-tebe Ndia hihii-nanaun, ma ei bisa bubuluk dedeꞌak noꞌuk, tungga hata fo Manetualain Dula Dale Malalaon nanoli ei. 10 No leo ndiak, na ei bisa masoda no mandaan, ma mini Manetualain nade malolen. Ei bisa tao mamahoko Manetualain dalen nai basa dedeꞌa kala boe. Mete ma ei matudu dale malole neu hataholi, neu ko Manetualain fee ei buna-boa malole. No leo ndiak, ei bisa boe malelak Manetualain.
11-13 Ai hule-haladoi boe, fo ai moke Manetualain fee koasan fo ana seli ndia, fo ei bisa lemba basa dedeꞌa kala no nggale loak. Ai moke fo ei dale mala henuk no namahokok, fo ei moke makasi makandondoo henin neu Manetualain. Huu Ndia soi dalak so, fo ei bisa simbo babaꞌek neme pusaka nai nusa-sodak. Pusaka ndia, Ana fee neu basa hataholi mana mamahelek neu Yesus Karistus. Huu Ana nakamboꞌik ita teme koasa makiuk mai, boe ma Ana fee ita dadik neu Yesus Karistus hataholin, fo leo nai manggaledok. Ndia boe oo, soꞌu Yesus Karistus fo dadik ita Manen. Yesus ndia, Manetualain Ana susuen. 14 Huu Manetualain fee Ndia Anan ndia so, fo soi nala ita ma koka heni ita sala-singgo nala.✡Efesus 1:7
Karistus ndia deman lena heni basa-basan
15 Karistus ndia, na mata-aok esa no Manetualain,
fo hataholi tana bisa nitan.
Ndia hambu mema kana nakahuluk neme basa-basan mai,
ma Ana dadik Lamatuak neu basa Manetualain nakadadadi nala.
16 Huu Manetualain pake Ndia
fo nakadadadik nala lalai ma daebafok no basa isi nala.
Ana tao dedeꞌa kala fo hataholi bisa nitan,
ma hataholi tana bisa nitan.
Boe ma, sila mana toꞌu palenda, sila mana toꞌu koasa,
mane-mane kala, ma malangga-malangga nala.
Manetualain no Yesus Karistus ala tao basa sila la,
ma Ana fee Yesus Karistus,
fo Yesus Karistus heti sala.
17 Ledoeik basa feꞌe kala bei ta,
tehuu Ndia nai ia memak so.
Basa manai ia kala, nanambaꞌak no Ndia,
ma Ndia ndia, heti sala.
18 Ndia ndia dadik Malanggan neu basa hataholi kamahele kala,
ma hataholi kamahele kala dadik sama leo Ndia ao-inan.
Huu Ndia nakalalaꞌok basa-basan.
Neme basa mana mate kala, basa de lasoda fali,
tehuu Ndia inahuun ana seli,
ma Ndia deman lena basan.✡Efesus 1:22-23
19 Basan malai Manetualain Aon dale,
na nai Karistus Aon dale boe
ma ndia tao Manetualain namahoko.
20 Manetualain pake Yesus Karistus,
fo mole no basa Ndia nakadadadin.
Ana fee Ndia Anan,
fo Ndia daan Ana faa dadik tunu-hotuk,
ma Ana mate nai ai ngganggek lain,
fo ela basa malai lalai,
ma malai daebafok,
bisa mole seluk lo Manetualain.✡Efesus 2:16
21 Makahulun, ei mesa nggei masoda nai deak, dook mima Manetualain mai. Ei mamusuk mia Ndia, ma masoda maelak mia Ndia, huu ei dale mala kabook, ma tatao manggalaun ndia, laban Ndia nakandondoo henin. 22 Mae leo ndiak, tehuu hatematak ia Ana soi dalak fo ita mole seluk to Ndia. Huu ndia de, Ana nadenu Ndia Anan fo dadik neu hataholi. Ndia boe oo tao Ndia Anan dadik tunu-hotuk, losa maten nai ai ngganggek lain fo ita bisa mole seluk to Ndia. Yesus Karistus tao leo ndiak, fo bisa noo ita teu tambadeik nai Manetualain matan, fo dadik hataholi malalaok, ma dale ndoos, fo sala-singgo nala ta fa boe. 23 Teteben, ei musi mahele makandoo mia ei namahehele mala. Toꞌu mahele, fo boso manggeꞌo! Boso heok mima Hala Malole ndia mai, fo ei simbon, faik fo makasososan ei mamanenen ndia. Te ei bisa toꞌu mahele Hala Malole Ndia. Hataholi la tui-bengga Hala Malole ndia nai sudi bee, nai daebafok ia. Ma Lamatuak nadenu au, Paulus, fo au uu tui-bengga Hala Malole ndia.
Paulus tao ues, fo ana ono-lau Lamatuak hataholi nala
24 Faik fo Karistus nasoda nai daebafok ia, Ana hambu doidosok noꞌuk. Ma hatematak ia, au boe oo lemba doidosok mata-matak. Mae leo ndiak boe, tehuu au daleng namahoko nakandondoo henin. Mete ma hambu hataholi fo ana musi doidoso, na ela au ndia lemba tungga doidosok ndia fee sala, sama leo Karistus lemba doidosok fee Ndia hataholi nala. Huu Ndia hataholi nala sama leo Ndia ao-inan. 25 Manetualain fee au tao ues ia fo ono-lau Ndia hataholi nala. Huu ndia de, au anoli Ndia Dedeꞌa-kokolan neu ei, losa lutu-lutuk. 26-27 Neme sososan mai, hataholi lamanene Manetualain Dedeꞌa-kokola nala. Ala bei ta bubuluk Dedeꞌa-kokolak ndia hihiin no ledo-ledo, huu hihiik ndia bei nana nafunik. Tehuu hatematak ia, Manetualain naketun so fo Ana buka hihiik ndia neu Ndia hataholi nala. Ma Ndia hihiin ndia, halak fo ana seli fee basa leo-leo hataholi nusak malai daebafok ia. Halak fo ana seli ndia, fo ndia:
Karistus nasoda nai ei dale mala!
Ndia ndia, fo tao ei mamahele makandoo, mae,
neu ko Ana tao dedeꞌa kala malolen ana seli fee ei nai nusa-sodak.
Ia, fo ita hataholi tahani-tahanik neme makahulun ele mai.
28 De, ai mafada basa hataholi la laꞌeneu Karistus. Ai manoli sala, ma fee nasaneneda kasa fo pake basa duduꞌak fo Manetualain fee ai. Ai tao leo ndiak fo boe tao natea basa hataholi mana tungga Karistus. De, dei fo ala bisa lambadeik nai Ndia matan, ta no mamaek, huu ala lasoda ndoos lakandoo. 29 Huu ndia de, au asusua fo tao ues mbilu mbuse fee ei. Au bisa ahele tao ues leo ndiak, huu Karistus koasan ndia tao natea au. Ndia koasan ndia, ana seli!