1 Leo ndiak boe neu kakana kala ei! Ei musi mamanene ei ina-ama mala, huu ndia nandaa, tungga ita Lamatuan hihii-nanaun.✡Kolose 3:20 2 Nai Manetualain Susula Malalaon nana sulak, nae, “O musi fee hadak neu o amam ma inam.” Ia, Manetualain palenda kaesan fo Ana pake heheluk. 3 Huu faik fo Manetualain fee palenda ndia, Ana helu, nae, “Mete ma o tao leo ndiak, na neu ko o hambu babaꞌe-babatik makadotok, ma o hambu teu naluk.”✡Kalua neme Masir mai 20:12; Tui Seluk laꞌeneu Dala Sodak 5:16

4 Leo ndiak boe, ina-ama la ei! Boso tao ei ana mala ta no hadak, huu ndia tao nala sala luli. Malolenak makaneni neulalau sala, ma manoli sala neme kadiꞌi ana nala mai, fo tungga Lamatuak dalan. Mete ma ala tao salak, na matudu sala ndoon tungga Lamatuak hihii-nanaun.✡Kolose 3:21

5 Leo ndiak boe, hataholi mana tao ues! Ei musi bii ei malanggam fo mana palenda ei nai daebafok ia, ma mamanene neu ndia. Boso tao ues kada fak, tehuu tungga tebe-tebe ei malanggam hihii-nanaun, sama leo ei boe oo, tungga tebe-tebe Karistus hihii-nanaun. 6 Huu ei ia, Karistus hataholi mana tao uen boe. De, nai daebafok ia, boso ei malanggam nita ei dei, bei fo ei manggate. Tehuu tao ues tebe-tebe fee ndia, mae ndia ta nai ndia boe. Huu ndia, na mana tungga Manetualain hihii-nanaun. 7 De, makalalaꞌok ei ue mala no boi-boik, sama leo ei tao ues fee ita Manetualain, fo ta kada tao ues fee malangga hataholik. 8 Huu ita bubuluk, dei fo Manetualain bala fee hataholi mana tao dedeꞌa malole. Mae sila ndia, hataholi mana tao ues do, malanggan do, ata do, ta ata do, na Ana bala basa sala.✡Kolose 3:22-25

9 Leo ndiak boe, malangga nala! Ei boso mambue makabibiik ei hataholi mana tao ues. Huu sila ka Lamatuak nai nusa-sodak, fo sama leo ei enam boe. Ana ta mete matak, tehuu Ana namanene sudi see. Mae malanggan do, hataholi mana tao ues, na Ana namanene basa sala.✡Tui Seluk laꞌeneu Dala Sodak 10:17; Kolose 3:25; 4:1; Yakobis 5:4

10 Mamanene neulalau au kokola mateꞌeng ia. Ei musi toꞌu tea-tea ei namahehelem neu Manetualain, huu Ndia ndia, ei Lamatuam ma koasan ndia, ana seli. Ndia ndia tao natea ei. 11 Soldadu la pake manala fo laban sila musu nala. Leo ndiak boe Manetualain sangga pake ei sama leo soldadu. Huu Ana nau ei laban basa duduꞌa manggalauk fo nitu la malangga inahuun taon. Huu ndia de, ei musi mahehele pake Lamatuak manala nala no matetuk. 12 Huu ita ia, nai natatik dale! Ita ta tatati laban hataholi, tehuu ita tatati laban koasa manggalauk fo ita ta tita sana, laban mana toꞌu palenda manggalauk, koasa-koasa makiuk, ma laban dedeꞌa manggalauk. 13 De, ei musi mahehele fo pake basa Manetualain manala natatin. Dei fo mete ma fai-fai manggalauk mai so, na, ei bisa laban makandoo losa basan. Mete ma ei ta tuda, na, ei mahele losa ei senggin.

14 De, ei musi mbalak eik fo mambadeik matetea! Kada mamahele neu Lamatuak Dedeꞌa-kokolan teteben, huu ndia sama leo ei pake soldadu kalikeen.*Mete ma soldadu Roma la sangga pake manala, na, ala pake lakahuluk badu dalek. Boe ma ala pake kalikee, suek badu dale nala boso deak mai. Basa ndia bei fo ala pake basa soldadu manala nala. Masoda ndoos, huu ita sama leo pake badu besik, babaa kalak.✡Yesaya 11:5; 59:17 15 Mahehele miu tui-bengga Hala Malole fo matudu dalak fo hataholi nasoda no mole no Manetualain, huu ndia sama leo pake sapatu soldadu.✡Yesaya 52:7 16 Mamahele makandondoo henin neu Lamatuak, huu ndia sama leo manala soaneu sili. No manala ndia, na ei bisa tao misa basa nitu manggalauk kokou haꞌin fo ala koun neu ei. 17 Toꞌu matetea ei namahehele mala, fo ei hambu sodak neme Manetualain mai, huu ndia sama leo soldadu pake solangga besik. Toꞌu matetea Manetualain Dedeꞌa-kokolan neme Ndia Dula Dale Malalaon mai, huu ndia sama leo soldadu pake tafa.✡Yesaya 59:17

18 Mete ma ei sangga mambadeik tea-tea, na, ei musi hule-haladoi makandondoo henin pake Manetualain Dula Dale Malalaon koasan. Manea makandoo, ma boso hahae hule-haladoi fee basa Lamatuak hataholi nala sudi lai bee. 19 Ma boso lilii hule-haladoi fee au boe. Moke fo Manetualain fee au Ndia hehelun, fo ela au afada ledo-ledo Ndia hihiin neu hataholi feꞌe kala. 20 Mae au dadik hataholi bui, tehuu Lamatuak Yesus nadenu au, fo dadik neu Ndia nadedenun. De, hule-haladoi fee au, fo au taa bii kokolak tetebes, huu ndia memak au ueng!

21 Au nau ei bubuluk au nanggatutuu-nambadedeing. Huu ndia de, au haitua Tikikus neni ei neu. Ndia ndia, au tolanoo susueng, ma ndia manggate nakalalaꞌok Lamatuak Yesus Karistus uen.✡Hataholi Nadedenu nala Tutuin 20:4; 2 Timotius 4:12 22 Ela ana tui laꞌeneu ai sodan nai ia. Ma au nau fo ana tao natea ei dale mala.✡Kolose 4:7-8

23 Au hule Manetualain fo ita Aman, ma Yesus Karistus fo ita Lamatuan, fo Ala tao basa tolanoo kala mole-dame ma lasueao esa no esa, huu ei mamahele neu Sila. 24 Au boe hule-haladoi, fo ita Lamatuan Yesus Karistus natudu Ndia dale malolen, neu basa hataholi fo mana sue Ndia nakandondoo henin.

Au susulang losa kada ia leo!