5
Adam numbu-sadu nala losa Noh
1-2 Lelek Manetualain nakadadaꞌdik hataholi, Ana tao sala mataon leo Ndia matao hehelin. Ana nakadadadik touk ma inak, de Ana foi sala, nade “hataholi”, ma Ana fee sala babaꞌe-babatik.
Hataholi sososak, naden Adam. Ia ia, Adam numbu-sadu nala:
3 Adam teun 130 so, boe ma ana hambu ana touanak esa, fo ndia mata-aon leo ndia aman. Boe ma, ana foi kakanak ndia, naꞌde Set. 4 Basa ndia boe ma, Adam bei nasoda seluk teuk 800, ma ana hambu seluk, ana touanak, ma inanak. 5 Ana mate neu faik fo teun 930 so.
6 Set teun 105, boe ma ana hambu ana tou-anak esa, nade Enos. 7 Boe ma, Set bei nasoda teuk 807, ma ana hambu seluk, ana touanak, ma inanak. 8 Ana mate neu faik fo teun 912 so.
9 Enos teun 90, boe ma ana hambu ana touanak esa, nade Kenan. 10 Basa ndia, de Enos bei nasoda seluk teuk 815, ma ana hambu seluk, ana touanak, ma inanak. 11 Ana mate neu faik fo teun 905 so.
12 Kenan teun 70, boe ma ana hambu ana touanak esa, nade Mahalalel. 13 Basa ndia, de Kenan bei nasoda seluk teuk 840, ma ana hambu seluk ana tou-anak, ma inanak. 14 Ana mate neu faik fo teun 910 so.
15 Mahalalel teun 65, boe ma ana hambu ana touanak esa nade Yared. 16 Basa ndia, de Mahalalel bei nasoda seluk teuk 830, boe ma ana hambu seluk, ana touanak, ma inanak. 17 Ana mate neu faik fo teun 895 so.
18 Yared teun 162, boe ma ana hambu ana touanak esa, nade Henok. 19 Basa ndia, de Yared bei nasoda seluk teuk 800, ma ana hambu seluk, ana touanak, ma inanak. 20 Ana mate neu faik fo ndia teun 962 so.
21 Faik fo Henok teun 65, boe ma ana hambu ana tou-anak esa, nade Metusalak. 22 Basa ndia, de Henok nasoda dalek esa no Manetualain teuk 300 seluk. Ma ana hambu seluk, ana touanak, ma inanak. 23-24 Ana nasoda dalek esa nakandoo no Manetualain. Teun 365, boe ma ana mopo, huu Manetualain soꞌun neni lain neu.
25 Metusalak teun 187, boe ma ana hambu ana touanak esa, nade Lamek. 26 Basa ndia, boe ma Metusalak bei nasoda teuk 782 bali, ma ana hambu seluk, ana touanak, ma inanak. 27 Ana mate neu teun 969 so.
28 Lamek teun natun 182, boe ma ana hambu ana touanak esa. 29 Lamek foi kakanak ndia, nade Noh, huu nae, “Neu ko kakanak ia, ana kokoe-nanasi, ma ana tao namahoko ita dale nala, neme ita taue-taosa mbilu-mbuse nai dae ia, fo Manetualain sumba-soon so.” 30 Basa ndia, Lamek bei nasoda teuk 595 bali, ma ana hambu seluk, ana touanak, ma inanak. 31 Boe ma, ana mate neu teun 777 so.
32 Noh teun 500, boe ma ana hambu ana touanak telu, sila: Sem, Yafet ma Ham.*Ham ndia, ana-muli-anan. Mete Tutui Laꞌeneu Sososan 9:24-25.