9
Manetualain mbaꞌa heheluk no Noh
1 Manetualain fee babaꞌe-babatik, neu Noh ma ana nala, de Ana kokolak nae, “Ei bonggi mala makadotok, fo tao mahenu daebafok ia seluk bali. 2 Neu ko basa banda fui la, mbui kala ma iꞌa kala, ala bii ei. Ei ndia musi heti sala. 3 Ei bole miꞌa basa banda la sila mbaan, sama leo ei miꞌa sesele-ngganggali kala buna-boan boe. Au fee basa ia leu ei.
4 Kada ei taa bole miꞌa mbaa fo bei kadaak, huu banda samanen nai daan. 5-6 Au tao hataholi tungga Au mataong. Huu ndia, de taa bole tao nisa hataholi. Mete ma, hambu hataholi, do banda, fo ana tao nisa hataholi, na musi tao misan boe. Heti-heuk ia neme Au mai. 7 Ei musi bonggi makadotok, fo tao mahenu seluk daebafok ia bali.”
8 Manetualain tuti seluk Ndia kokolan, nae, 9 “Hatematak ia, Au sangga mbaꞌa Au hehelung ua ei, losa ei numbu-sadu mala boe. 10 Heheluk ia, laꞌeneu basa masodak lalaꞌen, fo ndia banda nakaboik, banda fui, ma mbui kala. Kekeꞌun neun, basa mana kaluak lalaꞌen lo ei, leme ofak ndia mai. 11 Au hehelung ndia, leoiak: Au taa sangga haitua faa tuak mai bali so, fo tao nakalulutu basa masodak, ma tao nakalulutu basa daebafok ia.
12-13 Au tao Au elung neu lalai, suek ana dadik tanda nasanenedak neu Au hehelung, fo taa hambu namaketuk neu ei, ma basa masoda kala lai daebafok ia. 14-17 Mete ma hambu koꞌas nai lalai, boe ma elus lane, na, neu ko ndia nasanenedak Au hehelung ae: neu ko faa tuak taa tao nakalulutu basa masoꞌda kala so. No leondiak, Au hehelung fo taa mana basak ndia, nanambaꞌak soaneu ei so, ma basa mana masodak lalaꞌen.”
Noh mafuk
18 Noh ana nala fo mana kalua leme ofak ndia mai, fo sila: Sem, Yafet ma Ham. (Ham ndia, na, Kanaꞌan aman). 19 Basa hataholi malai daebafok numbu-sadu nala, leme Noh ana katelu nala mai.
20 Noh hataholi mana tao ue daek. Ndia ndia hataholi sososak, fo mana tao osi anggol. 21 Laꞌi esa, ana ninu anggol, losa ana mafuk belak nalan seli. Boe ma, ana oꞌdu heni ndia baloꞌa papaken, de ana sunggu lololi nakahola holi-holik, neme ndia uma teman dale. 22 Ledoeik Ham nita aman nakaholan ndia, boe ma nalai deak neu, de neu nafada kaꞌan Sem no Yafet. 23 Boe ma, dua sala haꞌi lala lafa esa, de dua sala lofan lakalolonda kana, neu sila alu nala. Boe ma, ala laꞌo lasadedeak leni uma temak ndia dalek leu, de ala mboti lala sila aman. No leondiak, taa lita sila aman nakaholan ndia. Boe ma, ala deak leu.
24 Ledoeik Noh mamafun mulai lea, boe ma ana bubuluk ana mulianan tataon ndia. 25 De ana kokolak, nae, “Heeh! Kanaꞌan!*Hambu susula laak, nae, ‘Ham’. Au sumba-soo o! Neu ko o dadik kaꞌa mala atan!
26 Koa-kiok neu LAMATUAK! Ela Ana fee babaꞌe-babatik fee Sem!
Tehuu ela Kanaꞌan dadik Sem atan.
27 Ela Manetualain boe tao namaloloa Yafet daen;
Ma ndia numbu-sadu nala, lasoda mole-dame, lo Sem numbu-sadu nala.
Tehuu ela Kanaꞌan, dadik Yafet atan.”†Hambu susula laak, nae, ‘Ham’.
28 Mulai neme basa faa tuak ndia, Noh bei nasoda seluk losa teuk natun telu lima hulu. 29 Ana mate neu faik fo ndia teun natun sio lima hulu.