15
Manetualain naheluk no Abram
1 Basa ndia, boe ma LAMATUAK natudu Mataon neu Abram. Boe ma, Ana nae, “Abram! O boso bii. Huu Au ndia sili heni o muma o musu mala mai. Ma Au fee o nanala inahuuk.”
2-3 Tehuu Abram nae, “Eeh, Manetualain. Mae Lamatuak fee au noꞌuk boe oo, sosoan taa. Huu au anang taa, fo ana fee au numbu-saꞌduk. De, hambu pusaka noꞌuk, fo tao neu hata? Mae leobee boe oo au atang, Eliasar neme Damsik mai, ana hambu basa sala.”
4 Tehuu, LAMATUAK nataa nae, “Taa leondiak! Huu o ana hehelim ndia, hambu pusaka ndia, tehuu taa ndia ata ndia.”
5 Boe ma, Ana noo Abram deak neu, de Ana nae, “Hatematak ia o suli lalai muu. Hena o mita nduu kala sila. O bisa hingga sala do? Dei o fo numbu-saꞌdu mala noꞌu nala leo nduu kala sila.”
6 Boe ma, Abram simbok LAMATUAK kokolan ndia. Boe ma LAMATUAK cap nala ndia, nae hataholi ia dale ndoos, huu Abram namahelen neu Ndia.
7 Basa ndia, boe ma LAMATUAK tuti seluk, nae, “Au ia, Manetualain. Au ndia, ua o kalua muma nggolo Ur, nai hataholi Kasdim asa daen. Ma Au ndia, fee dae ia, dadik neu o pusakan.”
8 Tehuu Abram natane, nae, “Leo bee LAMATUAK? Neme bee mai au bisa bubuluk ae, neu ko dae ia, dadik neu au pusakang?”
9 Boe ma Ana nataa, nae, “Leoiak! Mai ita tao tataos esa, fo mfo baꞌa hata Au kokolang isinaak ndia. Hatematak ia, o muu haꞌi fee Au: sapi ina esa, biꞌiae ina esa, ma biꞌilombo mane esa. Basa sala musi teuk beketeluk. Basa, na, muu haꞌi kateu esa bali, ma lunda esa.”
10 Boe ma, Abram neu haꞌi nala basa banda la sila. Ana seseli baꞌe duak sapi ndia, biꞌiaek, ma biꞌilombo. Boe ma, ana heti mbaa la sila, baꞌe duak leu dae, esa nasale no esa, de ana dadik ombak dua. Tehuu tana dada mbui kala sila. 11 Boe ma, mbui manaꞌa banda kamate sala mai, de lasuu laꞌa heni mbaa la sila. Tehuu Abram husi heni sala.
12 Ledoeik ledo tesa, boe ma Abram sunggu namanee. Ana nalameꞌi kikiu mumuuk mboti nalan, losa ana bii nalan seli.
13-15 Boe ma, Manetualain nafadan nae,
“Abram! Neu ko o masoda losa mamalasi malan seli, ma, mate mua ndoo-ndoo, bei fo latoi neulalau o.
Tehuu o numbu-sadu mala, neu ko leu tai nai hataholi feꞌek nusan.
Neu ko hataholi nusak leme nusak ndia mai, ala tao sala daꞌdik ata, boe ma ala tuni-ndeni sala, ala doidoso lalan seli, losa teuk natun haa.
Tehuu, neu ko Au huku hataholi nusak ndia.
Boe ma, Au ua o numbu-sadu mala, kalua leme ndia mai, ma ala leni sila basa hata pusaka nala makadotok.
16 Dei fo Au heti, fo neu o numbu-sadu dope kaliman, na, ala fali ia mai seluk bali.
Hatematak ia, hataholi Amori la, leo lai dae ndia. Hataholi la ia manggalauk, tehuu bei taa manggalauk nalan seli.
Tehuu mete ma, o umbu-ana mala fali ia mai, na, Au pake sala, fo huku nakalulutu hataholi Amori la. Huu faik ndia, sila manggalau nala lena susudik so.”
17 Ledoeik leꞌodae so, boe ma, nggengge laꞌo dae esa namasu, ma mbele esa mbila, de dua sala lakababalek lesik mbaa nakadadala kadua kala sila laladan. 18 Faik ndia, boe ma LAMATUAK tao heheluk no Abram. Ana nafadan nae, “Au helu, neu ko Au fee dae babaꞌek ia, neu o numbu-saꞌdu mala, mulai neme lee Masir mai,*Lee Masir ndia, na, fama lee Misraim nai Sinai, do fama lee Nil baꞌen dulu boe. losa lee Efrat, 19 ma dae hataholi Keni, Kenas, Kadmon, 20 Het, Feris, Refaim, 21 Amori, Kanaꞌan, Girgasi, ma Yebus enan.”