1-7 Basa ndia, boe ma MANETUALAIN fee babaꞌe-babatik neu Sara, tungga Ndia hehelun. Sara nailu nai Abraham fai lasin dale so. Nandaa no fain, boe ma ana bonggi ana touanak esa. De Abraham foi kakanak ndia, nade Isak (ndandaan nae, ‘ana hika’).

Sara kokolak nae, “Manetualain tao nala au hika, huu hatematak ia, au amahoko. Hataholi la duduꞌa lae, au taa bonggi nai au fai lasing dale leoiak. Naa te, mae au saong namalasi duduu dae, tehuu au bei bisa bonggi feen. De, hatematak ia, see namanene dedeꞌak ia, na, neu ko ana hika tungga no au boe.”

Ledoeik Isak faik falu, boe ma Abraham sunat ndia, tungga Manetualain palendan.

8 Basa boe ma, Isak boe inahuu. Ledoeik sangga finan, boe ma Abraham tao feta inahuuk.

9-10 Laꞌi esa, Sara nita Abraham sao mulin anan Ismael, nambue nakaseseꞌbok Isak. Nita leondia, boe ma Sara kokolak no saon, nae, “Husi heni ata Masir ndia no anan! Huu au taa nau ata ndia anan, simbo pusaka hata esa boe. Kada au anang mesa kana, hambu basa sala.”

11 Abraham namanene Sara kokolak nae leondia, boe ma ana nameda taa malole, huu Ismael, na, ndia anan boe. 12 Tehuu Manetualain kokolak no Abraham nae, “Bam! O boso duduꞌa o sao mulin no ndia anan ndia. Tungga kada Sara hihiin leo, huu o hambu numbu-saduk fo Au heluk ndia so, nesik Isak. 13 Tehuu, Au boe oo, feebabaꞌe-babatik neu o sao mulim anan, huu ndia boe oo, o ana hehelim. Dei fo ndia numbu-sadu nala, dadik hataholi nusak esa.”

14 Neu foꞌa fafain, boe ma Abraham tao lepa-ngge fee Hagar, de ana londa oe boto esa neu alun. Boe ma, ana mboꞌi inak ndia no anan Ismael, de ala laꞌok ndule dae nees, dekak no Beer Syeba.*Faik ndia, Ismael teun sanahulu haa lenak so. Mete Tutuik Laꞌeneu Sososan 16:16; 21:5, 8.

15 Ledoeik sila oe nininun basan, boe ma Hagar ana laꞌo ela anan neu ai anak esa saꞌon. 16 Boe ma, ana duduꞌa nai dalen dale, nae, “Au taa bisa akatataka ala so bali, ita kakanak ia maten.” Basa, de ana heok neu nanggatuuk, meda meter lima hulu neme kakanak ndia mai. Boe ma, namatani nakaleleu.

17 Manetualain boe oo namanene Ismael hala tanin, de Ndia atan esa neme nusa-sodak mai, de noke Hagar, nae, “Hagar! Hatina de o dale hedi leoiak? Boso bii, huu Manetualain namanene kakanak ndia tanin so. 18 Hatematak ia, o foꞌa, fo muu mete kakanak ndia. Matetea ndia dalen, huu dei fo Au sangga tao ndia numbu-sadu nala, dadik hataholi nusak esa fo ana seli.”

19 Basa boe ma, Manetualain tao namaneu ndia matan, losak nita oe matak esa nai ele, de neu diꞌa oe neu boto ndia, fo ana fee kakanak ndia ninu.

20-21 Boe ma, Ismael no inan leo lai mo salaek Paran. Ana inahuu mai, de ana dadik mana kou malelak nalan seli. Basa ndia, boe ma inan nakasasao kana no inana Masir esa. Basa ia la dadi, huu Manetualain no Ismael.

22 Faik ndia, mane Abimelek, no ndia malangga musun, nade Fikol, ala mai latonggo lo Abraham. Manek kokolak nae, “Abraham! Ai bubuluk so, Manetualain no o. Huu ndia, de o tao sudi hata boe oo, basan ana daꞌdi. 23 De hatematak ia, au oke o soo neu Manetualain matan, mae, o taa masapepeko au, ma au umbu-ana nggala. Sama leo au tao malole neu o, na, o boe oo musi tao malole neu au nusang ia.”

24 Abraham nataa, nae, “Hei! Au soo.”

25 Tehuu basa ndia boe ma, Abraham nafada manek, nae, “Ama manek hataholi nala, ala lamoa lala au oe matang esa.”

26 Manek namanene leondia, boe ma ana nataa nae, “Aah! Bei fo au amanene dedeꞌak ia. Tehuu hatina de ama taa au neme makahulun mai? Au taa bubuluk see tataon ndia.”

27-28 Basa ndia, de Abraham no Abimelek lambaꞌa heheluk. Boe ma, Abraham hele nala sapi ma biꞌilombo, de ana feen neu manek. Basa de, ana hele nakadaik nala biꞌilombo tenak hitu bali. 29 Boe ma, manek natanen, nae, “Hatina de o tao leondiak?”

30 Abraham nafadan nae, “Ama manek, simbok mala biꞌilombo tena kahitu kala ia, fo dadik tanda nae, ama manek manaku, au kali ala oe matak ia.”

31 Huu dua sala, ala soo leme ndia, boe ma ala foi mamanak ndia, nade Beer Syeba. Ndia ndandaan nae, ‘Oe mata Soo’.†Nai dedeꞌa Ibrani, Beer Syeba ndandaan bisa mata-matak: ‘oe mata mole’, ‘oe mata ua-nale malole’, ‘oe matak hitu’, do ‘oe mata soo’.

32 Ala soo lateꞌe, boe ma mane Abimelek no ndia malangga musun, ala fali leni sila nusa Filistin leu. 33 Basa ndia, boe ma Abraham sele ai tamariska‡Ai tamareska taa nai Timor. Ai ndia nasoda nai dae madak, tehuu doon nasesengga nakandoo. Okan tola losa dook neni dae dale neu. Biꞌi la laꞌa don. nai Beer Syeba. Mulai neme faik ndia mai, ai ndia dadik nasanenedak neu Abraham, de, ana nakaluku-nakatele neu LAMATUAK fo Kasodak losa dodoon neu. 34 Basa boe ma, Abraham leo tataak losa dook, nai hataholi Filistin nusan.